و اخيرا شفت iron man

اليوم اتصل علي مستر جوكليت وقالي شرايك ندزه ستار بكس نقعد ونسوي جم شغله

قتله خلاص ماشي بعد الصلاة نروح

وفعلا بعد الصلاة رحنا ستاربكس قعدنا نسولف وجابلنا النت وضحك وجذي

وقعدوا ورانا رياييل كبار كانوا يسولفون عن موضوعات مختلفه من سياسه إلى سيارات و برنامج الأوتوكاد مال التصميم

طبعا هذا البرنامج جوكليت يعرفله فعلى قولته شده حديث الرياييل عن هالبرنامج

لووول طبعا جان اقوله حلو دام ان شدك الحديث يعني انت مشيت اول خطوه في طريق اللقافه

شفتوا اشلون مو بس انا ملقوف

واحنا نسولف جان يقولي والله يبيله نشوف ايرون مان

قتله اي وايد ناس امدحوه جان اقوله شوف السينما اذا في عروض خنروح

والله دخل النت وحصلنا بالمرينا الساعه 12 ونص بعد منتصف الليل

والله وحجزنا ورحنا المرينا وطبعا الساعه 12 والبحر زحمه ماشالله عليهم هالشباب

اي و الإشارات الي بشارع البلاجات فتحوهم واحلى شي انهم صوب شارع المطاعم

شفتوا اشلون الحكومه تراعي الشباب وتخاف على بطونهم

شفتوا يا شباب الحكومه فتحولكم اشاره تدخلكم شارع المطاعم على طول علشان ما تيوعون كلش

وصلنا المرينا

و المرينا انا صارلي فترة حيل طويله مو رايحله

فاليوم لما دشيت شفت الأشكال الي اهناك صكت فيني الدنيا والله شباب هيلق ومصخره يعني الوضع كان مقرف

المهم دشينا السينما واخذنا المأكولات الخفيفه وطبعا الكراميل شي اساسي بالموضوع

دخلنا صالة العرض وقعدنا نسولف وناكل على ما يبتدي الفلم

ويعني حاطين مثل الوان تطلع على الشاشه قبل لا يبتدي العرض وبصراحه شكلهم مليق

والله تحسسني الألوان جني قاعد بسينما الكويت ايام السبعينات

انا كليت شوي من النفيش وسكرته علشان لا يخلص قبل لا يبتدي الفلم واقول حق جوكليت بس لا تاكل يقولي اوكي

اسرح انا شوي ولا اشوفه قاعد ياكل اقول بس يا جوكليت الحين يخلص والفلم ما بلش يقولي اي خلاص خلاص اخر وحده

وهم يرجع ياكل لووول عاد اخر شي انا خربته معاه وظليت اكل قبل لا يبتدي الفلم

بدى الفلم وطبعا لازم يطلعون ناس ظريفين من هالشباب الي يقعدون ورا ويعلقون على الفلم وتسمعون اصواتهم بوضوح لإن ماشالله عليهم يتكلمون بهدوء

انا و جوكليت قعدنا على طرف وقعدوا يمنا 3 شباب صغار

و بنص الفلم واحد منهم يقول حق الثاني من اقوى ايرون مان الاول الي صابغينه ومضبطينه ولا الثاني الي لون واحد

جان يرد عليه هذاك قالة لا اكيد الي لونه احمر اقوى لإنه يديد وشكله حلو (اهم شي شكله حلو)المهم انا قعدت اتحلطم

و جوكليت يقولي هذا ذبحني الي يمي قاعد وينافخ ويتحرك والله كانوا مزعجين

خلصنا الفلم وطلعنا من المجمع وطبعا كان صخه تقريبا هالكلام الساعه 3 الا ربع

قلت حق جوكليت يبيله مشروع ناكل بس بعدين كنسلنا لظرف طارئ

واحنا بالطريج راجعين جوكليت قالي عن حلم عجبني مقطع منه

يقول حلمت فيل لاحق اسد

لووووووووووووووووووووووووووووول عاد فيل ويلحق اسد هذا غير حلم بعد

خلصنا من سالفة الحلم وسكتنا شوي ولا جوكليت يغني اغنيه عدنان ولينا لوووووول

قتله تكفه جوكليت يعني طالعين من فلم ايرون مان والساعه 3 الفير وهدوء يعم المكان وانت تغني عدنان ولينا

شنو هالمزاج يعني

وطبعا كالعاده ابوي اذا سألني الصبح ليش تأخرت اقوله هذا جوكليت قص علي قالي خنروح السينما بليل

:)