الفحص الفني بالويك اند

ايييييه عاد اقولكم

امس خلصت دوامي العصر ورحت حق الفحص الفني الي بالجابرية لإن دفتر سيارتي باح خلاص

وطبعا الله يخلي الوالد راح جدد البيمه ما ادري التأمين وانا رحت قمت بالإجراءات الباجي

طبعا ابوي قالي روح انت علشان تتعلم

طبعا انا شديت الحيل وقلت انشالله

قبل لا اروح قتله بالله علي مخالفات اشلون شسوي

جان يقولي دبر حالك (اهم شي) عاد اهني قعدت احاتي وليه لا يكون علينا مخافات ولا شي بروحه فلوس ماكو

المهم وصلت الفحص الفني والناس صافة بالدور

وقفت وراهم لما وصل دوري عطيت الموظف الي معصب ماله خلق اوراق التأمين مع دفتر السيارة وقالي روح الفحص

وتوجهت حق الفحص طبعا مثل ما انتوا شايفين مظلة كبيرة والشرطي الي يفحص واقف

وصلت عنده عطيته الأوراق طبعا ما قالي اسوي شي لا طق اشاره ولا شي ختم الأوراق وقالي جمله تعقدت منها

قال: طلعها بره و وقعها داخل

انا اهني تنحت قتلي شنو

قال:طلعها بره و وقعها داخل

قتله ما اسمع :)

قال:وقفها بره و وقعها داخل شنو الصعب فيها

لووووول والله كلامة ماكان مفهوم يعني بالغصب فهمت عليه

المهم وقفت سيارتي بره ودشيت داخل مره ثانيه ختمولي الأوراق وقالولي روح ميدان حولي

وينطلق ديكاتي إلى اهناك

وصلت عندهم على الساعه 4 ونص وطبعا زحمة و هالمقيمين تارسين المكان بالغصب وقفت سيارتي

دشيت داخل المركز طبعا الله لا يوريكم المكان اشلون زحمه ولا اكو تنظيم ولا شي

قاعد ادور واحد كويتي اقوله وين اروح ما لقيت الا واحد من الإخوان كان معاي بالفحص

جان يضحك عاد سلمت عليه وقتله عمي وين نودي هالأوراق

جان يقولي والله يا ولدي ما ادري انا ضايع مثلك جان اقوله اوكي مشكور ما قصرت خل اروح اشوف احد من هالموظفين

جان يقولي حياك الله جزاك الله خير

المهم سألت يمين يسار قالولي خل يدققون على اوراقك اول

وقفت عند المكان مال التدقيق طبعا عشرين واحد جدامي جان اسأل واحد قتله انا على طول ييت حق التدقيق في شي اسوي قبل

قالي اي روح شوف اذا عليك مخالفات او لأ

وليه واخلي الدور واروح مكان المخالفات ولا يوقف وراي واحد كويتي قالي اعطيك 20 وتخليني اوقف مكانك

لووول انا ضحكت قتله عطني العشرين واخليك توقف اول واحد بعد

لوول عاد انا بروحي ادور واحد يسولف وهذا وقف يمي وما خلينا احد بحاله من هالإيرانيين على زلمات على مصاروه شلخناهم

واحلى موقف لما دشت وحده هالله هالله اشوف هذا الريال قام يقول الله يزيدهم الله يزيدهم وانا قاعد اطالع شقول هذا بس لما شفت الي شافه

جان اقوله الله يزيدهم اي بس بالمكان هذا الي كله رياييل والريحه تصدع الراس مو شي

جان يقولي يمعود على الأقل هذي لما تشوفها تخفف عنك تعبك النفسي بالمكان هذا

جان اضحك

قالي ها عليك مخالفات قتله والله ما ادري الحين بشوف قتله عاد مو يطلع علي شي لإن معاي بس 10 جان يقولي انت من صجك ياي حق مخالفات مو شايل فلوس معاك

قتله انزين شنو ما عندهم كي نت قال لا هذيل وينهم وين الكي نت

وطبعا الموظف مال المخالفات كل شوي ينرفزونه الناس و يقعد يصارخ وما ادري شنو

وانا واقف بالدور اتصل علي ساد سمايل صاحبي يقولي ها وينك قتله والله بشوف مخالفاتي

قاعد يقول اي شوف شكثر عليك علشان انا بروحلهم يوم الأحد علشان اييب معاي فلوس وجذي قتله فال الله ولا فالك انشالله ما علي شي

المهم رحت حق الموظف ولا الحمدلله ما علينا شي

بعدين رجعت حق تدقيق المعامله عطيتها الموظفه وحسييتها لايعه جبدها جان اقولها الله يعينج والله

جان تضحك وتقولي شنسوي بعد هذا شغلنا

المهم خلصت المعامله وقالتلي روح كاونتر 1 وطبعا وقفت بكاونتر واحد يمكن أكثر من نص ساعه والناس تتخطرف والي مو عاجبه الوضع

وجدامي واحد مصري على ريحة حلج اففففففففففف يابلي الصداع الله ياخذه ورفيجه يمه وقاعدين يسولفون عن مصر وبنت خالته تزوجت وابوها مات واختها انتحرت واخوها راح المانيا يشتغل وانا ما اعندي شغل قاعد اسمعهم

طبعا اللوحات ملوت الأرقام حاطينهم زينه ولا اكو نظام ولا شي يعني ما تحس انك قاعد بالكويت على هالمنظر

واخير وصل دوري عطيت الموظف اوراقي وقالي انطر لما ينادون اسمك

والله الحمدلله ما طولوا 5 دقايق الا نادو اسمي وعطوني الدفتر اليديد وقالولي روح استلم الأرقام اليديده

ونسيت اقولكم عن مستر بو درنفيس هذا وين ما اروح بالمكان اشوفه جدامي وكل ما اشوفه اقول هذا مال اسحب الدرنفيس منه واخليه يقعد يدور لوووول بس قلت لا حرام

ورحنا استلمنا الأرقام وطلعت بره ولا هذيل بنغاليه وهنود يقولون تبي تركبهم قتلهم لا اركبها بالبيت شنو عيزان اييب درنفيس واركبهم يعني

المهم حطيت اللوحه على الطبلون وحركت من المكان

قلت يالله ما ابي اركبهم الحين خله بالبيت احسن

وانا طالع ولا الحظ العاثر يحوشني تفتيش قلت وليييه هذا وكته بالله

وصلت عطيته الإجازة والدفتر اليديد جان يقول متى تبي تركبهم (قصده الأرقام)قتله توني طالع

جان يقولي ادري بس متى تبي تركبهم بغيت اقوله باجر بس قتله لما اوصل البيت:)

وصلت البيت وركبتهم

وبعدها حسيت ان راسي يعورني من كثر الإزعاج الي تعرضت له

ابوي يقولي اشفيك تعبان قتله شسوي زحمه اهناك وجذي

قالي شنو انت من صجك واقف بالدور

قتله اي بعد شسوي جان يقولي يبه انت اذا تبي تتعامل بالدور وجذي عمرك ما تخلص شغلك

واهني في سؤال حقكم

هل احنا ممكن نتطور اذا للحين في ناس مثل ابوي وغيره يفكرون بإن المفروض ما توقف بالدور وانت كويتي يعني المفروض يمشونك ؟

يعني انا استحي على ويهي اذا ما التزمت بالقانون او الدور سواء بديرتي او بره وانتو شرايكم وحتى لو كانوا الي واقفن معاي كويتيين او مو كويتيين .

وعبيدو هذا البوست عن الفحص الفني مو باجر اذا انتهى دفترك تتصل علي تقولي ديكاتي شسوي بالفحص الفني وارجع اعيدلك الموضوع

اي وقبل لا انسى يا جماعة التعليقات الأول والثاني حق خروفه والثالث حق مستر جوكليت حاجزه حق خروفه

اي مو تقولون بعد :)