الكرسي الهزاز

اليوم بعد مجهود شاق وطويل خلصت اول امتحان فاينل

الإمتحان الساعه 4 والدكتورة ما شرفتنا الا 4 ونص

بس طلعنا التأخير من عينها :)

المهم ما ابي اتكلم عن دراسه وامتحانات بروحي ابي اغير جو

بعد ما خلصت امتحاني قلت دام الأفنيوز قريب يمي خل اروح ايكيا

خنشوف شنو عندهم ما عندهم

والله وصلت وقفت السيارة ونزلت رحت صوب الاصنصير ولا في ام وعيالها 2 داخل وانا بعيد شوي

قاعد اطالع الولد جني اقوله بعيوني لا تسكر الباب انطر خل اوصل والحلو يطق الدقمه حيل حيل علشان يتسكر الباب

وانا اطالعه من بعيد واضحك جان امه تزفه قالتله افتح الباب ما تشوف الريال ياي (لوول اويلاه سوتني شايب الحجيه)المهم

دخلت وخذيت القلم الحلو هذا مالهم مع الكرت الي تكتب فيه الشغلات الي تبيها

ودخلت واتمشيت وانا كان بخاطري كرسي هزاز من زمان مو مال العيايز هذا لا في الحلو الصغير هذا

المهم وانا اتمشى جان اوصل حق القسم مال هالسوالف ولا اشكال والوان الكراسي

وانا احترت اهني اي واحد اخذ عبالي كلهم نفس السعر

ولا يطلع لا بو لون احمر غير بو لون اسود والي ما في شي هم سعره غير

انا قلت اها السالفة جذي يعني

جان ادور واحد مو رخيص ولا غالي بالنص

عاد جان اسجل المعلومات ملوته بس توهقت وين رقم الموديل ماله

ادور يمين يسار اقلب الورقه فوق تحت ماكو

جان ادور من هذيل الي يشتغلون وماكو الا فلبينو

جان ديكاتي يتكلم انجليزي بطلاقته المعهوده الي نصها بدليات :)

بس المهم وصلتله شنو الفكره الي ابيها

اي لا يغركم جامعي وما ادري شنو ترا الإنجليزي عندي احم احم يبيلي كورس عنده ابله خروفه

المهم ناديته وقتله وين الرقم ونقلني وبعدين مشيت

وانا امشي ولا اشوف هذي السله الي فيها خانات وتتعلق وتكون طواليه وقفت عندها اطالعها فعجبتني

بس تبادر إلى ذهني سؤال اشلون تتعلق هذي شفتها ولا يبيلها شغل

جان ادق على امي

الو هلا يمه في سله ودي اشتريها بس اشلون اعلقها

جان تقولي ماكو الا تطق لك مسمار وتعلقها اوا تشتري لها علاقه الي صغيره الي فيها صمغ من ورا وتلزقها على الطوفه

جان اقولها يعني اخذها جان تقولي اسأل ابوك

لووووول وليه كل شي ابوي ابوي

المشكله توه معدل غرفتي ومأثثها وصابغها يعني لو اقوله بطق مسمار بالطوفه يذبحني

:)

قلت خلاص بلاها هالشغله

رحت صوب الإستلام وخذيت الكرسي

قلت الحين راح يعطوني نفسه مركبينه وكل شي جاهز ولا اشوفه يطلعلي كرتون ويقولي هذا اهوه

انا اهني قلت وليه لازم انا اركبه بعد قلت خلاص يمكن قطعتين تركبهم في بعض ويصير

طلعت ورحت البيت دشيت اخوي شاف بإيدي مجلة ايكيا جان يقولي ها اكيد رايح ايكيا شنو شريتلي

يحليلك والله مصدق عمرك بشتريلك قتله روح قول حق ابوك ولا بس شاطر تفتن علي عنده

لوووول جان يروح

شوي دخل عندي الغرفه حكته اللقافه يبي يعرف شنو شاري

جان اقوله اذا تبي تعرف لازم تروح اتييب الكرتون وانا اوريك

والله واخليه يشيل الكرتون من الصالة لما غرفتي (الي يبون يرأفون بحاله ترا المسافه مو بعيده كلها جم خطوه علشان لا تاكلوني بس :)

ياب الكرتون جان اقوله هذا كرسي هزاز جان يقولي خل نركبه الحين

قلت يالله يمكن كلها جم قطعه بطلت الكرتون ولا مليون برغي حاطين وما ادري شنو وجم قطعة خشب

قلت وليه هذي يبيلها قعده وانا بروحي مو خبرة بالسوالف هذي والمشكله ابوي مو موجود

اي ما قتلكم ابوي طفش من البيت جان يسافر قال يومين وبيرجع يبي يغير جو

الظاهر عطيته عين مو ذاك اليوم اقولكم ابوي ما يطلع من البيت صاير الحين سافر مره وحده شكلي نحشته

والمشكله ما سافر الا حزت امتحاناتي يعني ماكو فايده ما نقدر نستانس

واعذروني هاليومين ادري قاطع عنكم بس شسوي نو تايم والله

بس اذا صارتلي فرصه راح اطل عليكم