21 بالتمام والكمال

تم وبعون الله

والحمدلله الف الف الحمدلله

احم احم

اليوم كملت 21

او قبل ساعه اقدر اقولها

هههههههههاي


كل عام وانا بخير

ادري بوست عيد ميلادي مال السنه الي طافت كان اقوى

ولكن هاليومين صادف عندي امتحانات وتقارير

اليوم بعد قاعد اجهز تقرير مع رفيجي من بعد المغرب لما الساعه 11

والله حبيبي بعد ما قصر خلصنا التقرير وطلعنا جان يقول قول تم نتعشى

والله ودشينا بلاك اند وايت بحكم ان كنا قاعدين بستاربكس الحره

ويمنا بلاك على طول

هي هي هي كانت وجبة لذلذه بالنسبة لعمر ال20

واحنا عيال اليوم

واييكم بوست ثاني هدايا الي وصلت

:)

والي يبي يعطيني هديه ترا المجال مفتوح
:)

ديكاتي عالم جميل

السلام عليكم

كيف حالكم اخواني واخواتي

ديكاتي صاير ثقيل احم احم رسمي يعني

لووووووووووووول

والله يا جماعه لاعت جبدي من الإمتحانات والدراسه

هذي فترة نهاية الكورس تخلي الواحد ما يقعد راحه

كل شي فوق بعض والأفكار متكافخه والتفكير مضرب عن العمل

بس الله يعين

:)

الواحد لما يرجع يقول الي عنده بمدونته الغالية ترجع روحه وخصوصا بوجود ناس حلوين مثلكم

:)

اليوم عندي تحلطم وتناتيف من هنا وهناك وذاك الصوب ولا تشوف وراك ما ادري شكو بس هذا الي طلع بعد

اول شي

لازم اتكلم عن البلعه

هي هي هي

في محل مال برد بمجمع الكوت صاير على النافورة مكانة

تره شي عجيب يا جماعه

والله يعني ما عندي مشاكل اطق درب من رميثية لما اهناك علشان اخذ منه

ما ادري اذا عنده فرع ثاني او لا ولكن انا اعرف الي بالكوت


هذا اسم المحل

طبعا احنا رايحين متأخر فأغلب الأنواع خالصة ولكن قدرت اسويلي تشكيلة حلوه


بعدين عاد لما تختار الأنواع الي تبيها تروح الصوب الثاني وتحط اضافات

طبعا في وايد اصناف من مكسرات وفواكة وكاكاويات وحلويات

ولكن انا تزامنا مع الهبه هاليومين حطيت بلاك بيري و روز بيري

الطعم صار تحفه



واهني يخلطهم كلهم مع بعض


وهذا الشككل النهائي اهوه صج عفسه بس لذيذ


وتروح تقعد خصوصا اذا الجو حلو

تشوف الناس والنافور مع الموسيقى الزينه وتاكل وبالعافية عليك


----------------------------------

ذاك اليوم كنت رايح شركة النقل العام الكويتية صوب ادارتهم

ولا اشوف ان الموظفين مسوين اضراب او اعتصام على قولتهم

والله من صجهم يعني

والي يصارخ والي رافعين لافتات

بس ما قدرت اصور وايد احم احم اخاف يحوشني طشار


----------------------------------

اعلان الجزيرة للطيران شيقووووول يا ديكاتي


يقولكم كلما زادت درجة الحرارة كلما زاد الخصم

وانا اقول كلما زاد الخصم كلما زادت النحشة من الديره والحر

:)

-------------------------------------------

ورديات

الوالد الله يسلمه لما قرر يصبغ كرسي

قام وما حصل لون غير الوردي

لووول وايد ناس يقولون حلو بس انا مو عاجبني



طبعا حتى جمعية الرميثية ما قصرت منزلين كلنكس وردي

هذا لون يديد الظاهر يبون يفتحون النفس بالحر

--------------------------------------------

عالمي المفضل

عالمي الجميل

عالمي الرائع

لا تخافون ترا مو دعاية زين

لا هذا عالم ديكاتي

الي اهو

لوووووووول يبيلة اخليها واجهة المدونه ولا شرايكم

:)


هذي اليوم وانا قاعد على زولية صوف جان اجك هالصوره

بروحه حر ويدتي للحين حاطه هالزولية

ليلة نتائج الإنتخابات ولكن على طريقة ديكاتي

بسم الله الرحمن الرحيم

اول شي ابارك حق الأربع ورود والزهرات مرشحاتنا الأربعه

الاتي فازوا بالأنتخابات

وانشالله نشوف شي يديد منهم

:)

لووووووووول

هي هي هي هي

هاهاهاهاهاي

احم خلاص الحين تبلش الفصله

ايييييييييه يالربع كيفكم اشلونك شحالكم

امس الساعه 9 ليل قاعد بالبيت ماكو شي

بعدها قررت اروح عند صاحبي ساد سمايل نقعد نقضي وقت الفراغ الي عندنا

رحتله وقعدنا نشوف نتايج الإنتخابات التي كانت رائعه بصراحه

انا ما ادري اشلون حكمت انها رائعه لإني اول مره اتابع هالموضوع ولكن المهم اني استمتعت

عاد اقولكم صارت الساعه 12 ونص جان ساد يقولي

ديكاتي انت مو يوعان؟

لوووووول ديكاتي الي اهوه ديكاتي ويقول مو يوعان قويه اصلا

الإجايه طبعا كانت بلا يوعان

ونظرا للحالة المادية المزريه التي كنا نعاني منها فما كان اكو جدامنا غير اكل بيت

المهم جزاه الله خير ساد راح المطبخ عشر دقايق قلت الحين قاعد يطبخ لنا مجبوس

ولكن طلع لنا بفطاير معجنات الصغار هذول

طبعا من كثر اليوع ما مداني اصور شي لإن ب 5 دقايق اختفى الي كان بالصحن

ولا تسألووون وين راح لإني ما ادري وين راح

المهم قعدنا نشوي نتداحر انا معاه لازم شطانه شويه

ودام انه شطانه معناته استهلكنا جهد والجهد يعني طاقه والطاقه تعني لازم تعبيها

شنو معناته شتقصد يا ديكاتي ؟

يعني معناته نظرا للعرس الديمقراطي الي صاير عندنا لازم اعوض الطاقة الي فقدتها

:)

المهم قلنا يالله لازم نشوف لنا مشروع وطني يتناسب مع حالتنا الماديه

فقررنا نروح مطعم هندي وخردة السياره ما ترد احد

طلعنا ندور صوب المطاعم والمحلات نبي مطعم هندي مو محصلين

المهم قلنا نسأل واحد من الهنود الي واقفين تطبيقا لمبدأ المشاركة في ايجاد الحلول

عاد من كثر ما حظنا قوي بالدائرة الإنتخابية الي كنا ندور فيها مطعم هندي

الهندي الي سالناه طلع صاحب مطعم توه مبطل من جم يوم

قلنا يالله دام هذا الي متوفر

المهم رحنا المطعم وشفناه وقلناله الي نبيه

المهم عاد ديكاتي كلش مو ملقوف منو يقول

جان ادش صوب المطبخ واشوفه اشلون يسوي الجباتي

ايييه يالجباتي الي طول عمري اكلها بس ما عمري شفت اشلون يسوونها

كيف تسوي جباتي خطوة بخطوة؟

المهم احطلكم طريقة الترشيح بالخطوات الإجرائية بالنسبة لعمل الجباتي

اول شي تاخذ عجينة

وطبعا تفردها وتمغطها

وبعد ما تقردها وتمغطها وتشقلبها


بعد ما تفرشها تقسم او نفصل السلطتين التشريعية والتنفيذية عن بعضهمها البعض

وكل نص تسوي على شكلي دائري مكور مثل ما تشوفون الجباتيات الي مصففين على شكل دائري

بعدها مثل ما نشوف بالصوره الي فوق هذي

تاخذ كل نص خليته مدور تاخذه وتفرده وتمغطه تمهيدا للشكل النهائي


وبعدها تكون جاهزه ما عليك الا انك تقطها على الفرن

مثل ما انشوف اهني



وهذا الشكل النهائي كلش


بعدها رجعنا البيت

قلنا على هالشي الزين يبيله جاي وجبن وبطل فلفل نظرا لحقوقان السياسيه في هذا المجتمع

وطبعا علشان نسوي ههذا كله خذينا 20 دقيقة يمكن

الأخ ساد مو راعي مطبخ كلش فعلى ما دورنا الأغراض الي محتاجينها اخذنا وقت

واهني المائدة المستديره التي تشهد اليوم الديمقراطي الذي يمثل يوم كبير لكل مواطن كويتي

مسكاين المقدمين صج صج تعبوا

والله الله يعينهم

يعني احنا قاعدين من الساعه نقول 11 لما 4 الفير واهمه على حطتهم بس يقولون النتايج

احنا تعبنا

بس الله يعطيهم العافية

وطبعا الله يسامح ابو ساد مطفي علينا السنترال وماخذ المفتاح مال فقل النترال

اييييييييه خسنا الا شويا خصوصا بعد العشى


لوووووووووول كله تصوير بتصوير ما يوقف ديكاتي

---------------------------------------------------

لحظة ضج


ضج يايه من اضجك يعني بشقك

المهم

إلى الأخ عبادي والمباركية

انا اقول ثقلوا ترا الثقل زين

انا مسحت الكومنتات والموضوع الي نزلته بالغلط

ولكن جربوا سووها مره ثانيه

لوووول خو عبادي اكلت نصيبك اعتقد والدور يايك يا المباركية

:)

الحبايب شافوني نزلت الموضوع يعني كتبت عنوان بس ماكو كلام بالغلط

قاموا ويحطون كومنت الأول يقول وين البوست الثاني يقوله ما استوى بعده

ويرد يقوله لا الناس خلصوا الإنتخابات بس ديكاتي للحين قاعد يفرز الأصوات

لووووول

انا اقول الباب الي اييك منه ريح سده واستريح علشان لا انقلب ضدكم

:)

ديكاتي ذا هيرو

احم مرحبا

اكسكيوز ماي انقلش يا الربع

لوووول

ادري صاير ما امر على مدوناتكم ولكن لكل حجه ظروفها

ما ادري شكو بس يالله مشوها

:)

تذكرون في موضوع سابق قتلكم عن البحث هل تاخذونه من مكتبة او تسوونه

طبعا اكثر الردود قالوا انهم يسوونه احسن

والأسباب معروفه

انا هالكورس عندي ماده عليها بحث

والقروب الي طحت معاه 5 وانا سادسهم

من اول شي اتفقوا الحبايب انهم ياخذونه من مكتبة

ولما قتلهم خل نسويه احنا ما عجبهم الوضع

اييييييييه يالله صوتك ما وصل يا ديكاتي

المهم

وصار اليوم الموعوود

قمت الصبح مبجر لإني مو محضر ولا شي حق البحث وبصراحه ما قريته لإنه ما ينفهم

قمت قريت كلمتين الي المفروض اقولهم وطلعت

وانا بالطريج ماشي بحالي يا زيني

الحبيب الي جدامي كييييييييييييع طق بريك انا انتبهت بس حسيت اني ما راح الحق فشوي دنيت على حارة الأمان

جدام الشرطي واقف ويأشرلي اوقف اوقف

انا ها اوقف ولا اطنش فيه

المهم وقفت

كالعاده الكلمه المعهوده الإجازه والدفتر

عطيته راح وطول وانا بروحي متأخر وراي برزنتيشن والحبيب يتمخطر

يالي وعطاني المخالفه شرحتله الوضع جان يقولي مو مشكله وقع

قتله اي يالله بوقع اخاف تتصيد علي وتقولي ليش مو رابط الحزام

خذيت مخالفتي وحركت
المخالفه والبحث

شسويله بعد

صج فال بايخ عالصبح

وصلت الكلية واسرع سريع انزل ورحت القاعه

الشباب واقفين ها يالله دخلنا يا جماعه

الإتفاق كان ان كل 3 يوقفون مع بعض علشان محد يضل بروحه

طبعا الموضوع نظري حيل

فالشباب كان بس يقرون الي جدامهم بدون اي تفاعل

ولا تشوفون الكلاس الي حاط ايده على خده والي كلش النومه قضت عليه

طبعا الدكتور زهق على الآخر

قمنا انا والثلاثه الي معاي طبعا انا اخر واحد

وصل دوري والمفروض ان الي يمي واقفين انا ما مداني قريت سطرين ما لقيت احد يمي

وييييييييييه صاار حر توهقت جان اقط بدليه انا شسويييييييييييييت

واحد منهم حس فيني جان ايي يوقف يمي

خلصت الي عندي جان امسك الموضوع من اول واعطيه كلام بالعاميه وقتلهم الموضوع نظري جدا ما راح تقدرون تفهمونه بسهوله يعني ترقيع للموضوع

خلصت جان اقول في اسأله طبعا البنات خاموش

جان واحد يطمر من وره اي عندي سؤال

سأل خلص انا ييت بجاوب جان الي يمي يقول خله انا اجاوبه

رفيجي قاله احنا ما تناولنا هالنقطه بالبحث وجذي

جان ادش عرض واجاوب على سؤاله

جان يقولي عندي بعد سؤال

ويسأل وجاويته وسؤال ثالث وهم جاويته الدكتور قاعد يطالعني اشلون ارد بإسلوب علمي بحت الي حسيت اني انا الي مسوي البحث صج

يوم خلص اسألته جان اقوله ادري صدمتك

ولا عموم الكلاس يضحكون هيهيهيههي

قلت يالله زين لطفنا الجو شويه

على قولة القروب الي معاي والله ختامها مسك يا ديكاتي انقذتنا

احم احم وانا اخذت موقف البطل اهني

بوريكم صور سريعه عن البحث

علشان تشوفون انه صج شغل اي شي

طبعا بين كل سطر وسطر حاطين سطر فاضي

والخط 16

غصب يبي يترس الأوراق

لا والرسمه الي حاطينها ما ادري اشلون تنفهم وما ادري مالت شنو

بس المهم كل شي طاف على خير

عسى بس الدكتور ما يكسر فينا

:)

صبااح الخير - الجامعه وسوالفها

صباحكم خير وفل وعسل وياسمين

اييييه

انا اليوم متنشط قاعد من فير الله

يا ديكاتي نام نام اخمد ماكو نوم

يمين يسار لا ما بيها نوم

المشكله بالحاله هذي اني اقعد مصحصح على الآخر

ولكن نص اليوم أو بمعنى أصح حزة المحاضرة النوم كله يتسلط على مخك

فالله يستر على باجي اليوم

طبعا تو الناس على الدوام فقاعد اطالع قناة فنون

ترا هالقناة ابداع الصبح يحطون سوالف تضحك

المهم ما اطول عليكم

وصلني ايميل من احدى العزيزات المتابعات للمدونه بتاعتي

على قولتها مالها شغل بالتدوين وما تعلق ولكن متابعه جيده للمدونات

المهم دزتلي هالصوره

وعلى قولتها هذي الصورة بإحدى دورات المياه بأحدى كليات الجامعه

ما ابي اقول اسم الكلية عن الشبهات بعد هالأيام جامعتنا يمشون ويرفعون قضايا



هذا الإعلان ينطبق عليه

بجامعتي تجارتي

وبجامعتي يمشي سوقي

:)

ايييه يالله عشنى وشفنا

------------------------------------------

خل اتحلطم شوي

عندي ماده خلصنا المنهج ودايرينه برزنتيشنات

استغفر الله المحاضره بايخه وتقعد تطالع الطلبه واهمه يقدمون

لا ولا اييكم الي يقرا بسرعه بسرعه ويقول اخر شي و سلامتكم

لوول مو ناقص الا يكملها ويقول سلامتكم وتعيشون

مسوي اصبوحه شعرية مو برزنتيشن

ولما يطفون الليتات علشان عرض البروجكتور

اهني ديكاتي يغمض عويناته وياخذله غفوه

ايييه يالله شنسوي بعد

:)

شوهتوا مفهوم "السلام عليكم"

اليوم موضوع باط جبدي من فترة

فقلت دام ان مزاجي اكتب هالأيام خل اطرحه وتشاركوني فيه

كلنا نشوف راعي الزي الأصفر كل يوم الصبح واحنا طالعين من البيت نبي نركب سياييرنا

تشوفونه مسكين قاعد يخم وينظف

ولكن

الحبيب اكيد عارفين لعبته

انا خل اقولكم الي قاعد اشوف هاليومين

اول شي هالصوره

هذا الحبيب الي مداوم بفريجنا

الأخ بو الأصفر شسوي

يكون ماشي بحال سبيله بين البيوت على مود ان قاعد ينظف

انا اطلع اسوي ثلاث جكات

جكات يايه من جكجكه يعني الصوت الي يطلع لما تبطل او تسكر شي

اول شي جكت باب البيت جك انا فتحت الباب وطلعت وسكرت الباب

اهني اهوه الأصفراني سمع النداء الأول فيبلش بالإستداره فوق تحت

الجكه الثانيه اهي فتحت باب السياره وسكرته

اهني الحبيب كمل الإستدارة وبالطريق إلى موقف سيارتي لإن انا اعتقد وبحسن نية مني ان في وصخ يم سيارتي ونسا ينظفه فالحين راجع لي

الجكة الثالثه لما اشغل السياره

اهني صاحبنا يبلش بالجري السريع

انا انزل راسي اكون قاعد احط اغراضي واشغل التكيف وما إلى ذلك

في هذه اللحظه ارفع راسي ولا الحبيب واقف يم جامت سيارتي

انا اهني حالتين يا ان اخترع لإن الحبيب فاجئني وما ادري من وين طلع

او اذا كنت للحين بتأثير النومه

فأطالعه بنظره هادئه جدا

وطبعا اول ما يشوفك يرفع ايده ويقول السلاااااااااااام عليكككككككككككككم

ايييه انا ارد السلام واشوفه للحين واقف

انزين انت سلمت خلاص واقف ناطرني حق شنو يعني شنو المطلوب اكثر من السلام

طبعا كلكم عارفين شنو يبي

الحين انتقل إلى الصورة الثانية

وللحين ما زلنا بصاحب اللباس الأصفر

هذا الطيب يوقف عند اشاره كل يوم امر عليها انا بطريجي للدوام

هذا سالفته سالفة

هذا ولدنا تقنيته حديثه جدا ما شفت منها

اشلووووووون يا ديكاتي

هذا مبرمج طال عمركم

اذا صارت الإشاره خضرة يوقف مكانه

ما يسوي شي كلش بس يطالع السيايير

واذا صارت الإشارة حمرة ينظف ويخم على طول الشارع والسيايير واقفه

وعند كل سيارة عنده برمجة السلاااااااااااام عليككككككم

يعني على اقل تقدير 10 سيارات واقفين يم الرصيف اهوه يسلم عشر مرات

وطبعا أيضا الهدف معروف

خلص الموضوع

النقظه الي ابيها انا

هل صارت كلمة السلام عليكم هدفها استغلالي هالكثر

يعني انت اتيي تسلم علشان يمكن اعطيك شي

انزين

هل اذا ما سلمت علي ما راح اعطيك مثلا؟

في شي اسمه نية مثلا انا اقول اليوم بطلع صدقه عن عمري او دفعة بلا او شي من هذا القبيل

على طول من اشوف واحد سواء سلم او لا راح اعطيه

فليش صاروا يستخدمون السلام عليكم و حاطين في بالهم انهم لو سووا جذي الشخص راح يعطيه شي

الموقف الي صار

في احد الإخوان يسولفلي

يقول ذاك اليوم بالدوام مريت صوب غرفة العمال

يقول واسمع واحد من الجنسيات المزعومه يسولف حق واحد مصري

يقوله الكويتيين ميانين او فيهم شي انا امر عليهم اسلم اهمه يعطوني فلوس

بصراحه هذا مو ويه نعمه ويمكن احنا علمناهم على هالشغله ما ادري بس انا مو مرتاح لها

انتوا اكيد مريتوا بالسالفه هذي

هل اذا سلم عليكم تعطونه شي ولا تكون على نيتكم ؟

احذروا نافورة الإجتماعية

تحذير تحذير تحذير

انا قتلكم و ابلغكم

لوووووووول

طبعا لا تاخذون السالفه جد جد

بس قلت لازم ابلغكم علشان ابري ذمتي

هذا موقف صار جدامي في أحد الأيام

اهوه باليومين الي طافوا صار

في أحد الليالي الظلماء كنت توني خالص شغلي وطالع من مكتبة جابر الأحمد

دخلت صوب العلوم الإجتماعية متوجه إلى سيارتي

المهم مريت صوب النافورة

وما كان اكو سكيورتي ما ادري وينهم المهم

انا ماشي بحالي قاعد ادندن

ما اشوف الا اثنين واحد واقف بعيد شوي والثاني عند النافورة

الحبيب الثاني تهقون شقاعد يسوي

:)

لوووووول

الأخ اللطيف واقف قاعد يشخها

يعملها

يلبي نداء الطبيعه

اكثر من جذي ما اقدر اوضح

لووووووول

انا قاعد اطالع اففففف لا هذا مو منصجه ترا

يالحبيب انت هوب

لا ولدنا لاهي ما يدري عني

المهم مشيت انا وكأن شي لم يحدث

ثاني يوم الصبح وانا ياي الجامعه مريت يم النافورة

لوووول ولا البنات قاعدين والي حاطه ايدها بالماي

والثانية ترش على رفيجتها ماي

لووووووول بلاهم ما يدرون عن الي شفته قبلها بليله

لوووووول لا لا يعني موقف ما توقعت يصير

انا دشيت محاضرتي وييت بطلع ورفيجي معاي

يقولي امش خل نتمشى لما الإدارية قتله يالله

المهم واحنا نمشي صارت النافورة يمنا

اففففففففف جان اقوله امش امش وخر عن النافورة

يقولي ليش

اقوله انت وخر وبس احسنلك واحسن لي

اييييييييييييه ساعات الشباب يفصلون

مره وحده

اي ليش عاد الحين هديت حمامات الجامعه كلها وما حلت لك الا بالنافوره

والله والناس رايحه راده على هالنافورة والماي يحوشهم بالحر ومستانسين بلاهم لا يعلمون

بس ضحكني يعني

يمعودين باجر يحيلون نافورة الإجتماعية حق لجنة الظواهر السلبية

نشوفكم على خير

واسف اذا خليتكم تشمئزون او تلوع جبودكم

بس هذا الي حصل

مطعم عبدالوهاب ورجيمي

مسااااااا الخير

كيفكم اشلون شخباركم

اي والله اي والله ادري مو خوش ولد

اعلم اعلم صدقوني بس شنسوي الدنيا تلاهي

مو خبركم عندي ماده مالت اعلام اسمها تحرير الخبر ومصادره

الأخ الدكتور مشخلنا كل يوم واجب وتكتب خبر شطوله شعرضه وتدزه ايميل

فلاعت جبدي من شي اسمه اكتب

خلاص مليت

بس اليوم دام سويت شي يديد قلت لازم ارجع حق مدونتي العزيزه

واكتب شي

اييييه

طبعا لازم يكون البوست بطيني ولا ما اطلع انا ديكاتي ولد ام ديكاتي

امس رحنا انا مع الشباب والرياضة مطعم عبدالوهاب

اي اي الي على البحر

ادري قديم والناس راحوا خلصوا بس هم انا توني رايح وبكتب

انا اول شي قريت عند وايد بلوقرز تجربتهم مع هالمطعم

ولكن انا الحين يحط تجربتي

اول شي المطعم حلو من داخل منظم نوعا ما

انا كنت حاجز بالتلفون 1821000 اول ما دخلنا على طول قعدنا على طاولتنا مع ان صار لخبطه على اي طاوله راح نقعد

بس حلوها بسرعه

المنيو مو كبير وايد بس يفي بالغرض يعني

انا توقعت في اختيارات اكثر من جذي

لوووول واهني التفتيحه مالتهم

ترمس وجزر عليه ملح

لوووووووول خو الشباب طاحوله بالترمس لو ادري جان شريت لهم بربع وانا ياي

واهني شورربة العدس مالتهم

انا ادري ان بالبيت يسوونها وكل مكان يسوونها بس لما ادخل مطعم احب اجربها

وكانت جيده ايضا

ومقبلاتهم كانت وايد جيده

خصوصا الكبة النيه لوووول

مستر جوكليت ما كان حابها اول شي بس بالمطعم هذا كلاها وزي الورد

والمشاوي حلوه يعني ما اقدر اقولها عنها عوووع

يعني جيده لا بأس

وانا قاعد اكل اول ما وصل الأكل اكلت اول جم لقمه بعدين وقفت

قاعد افكر في شي ناقص

بعدين استوعبت ان ماكو مخلل

وانا غرامي المخلل ما اقدر اقاومه لازم كل وجبه فيها شي مالح سواء مخلل اجار معبوج فلفل الي يصير

االمهم شي يكسر الطعم

عاد طلبت مخلل ويابوه لي

ولا الحبيب حاطلي خياره شطووولها

شدعوه عليك عاد

لووول قاعد اطالع هاي شنو هاي منو

لووول طبعا لازم ديكاتي يسوي حركاته الظريفة


وهذا عصيري الي شي عجيب وطبعا لازم اييبونه واخليه لما يصير حار

بعدين اقولهم ابي ثلج

هههههاي كل ما اروح مطعم اسوي فيهم جذي

من الأشياء الظريفة بالمطعم

ان لوحة الحمام يعزكم الله عليهم صور للرجال والنساء

المطعم جيد جدا وحسابنا طلع 70 حق 7 اشخاص

والخدمه روعه

واحنا كنا رايحين يوم اليمعه الساعه 10 بليل

ولكن على الرغم من ان ويك اند ولكن الوضع كان حلو

---------------------------------------------

طبعا الحين انا وصلت المرحلة الثانية من رجيمي المتبع

والمرحلة الثانية تحتم علي اني اكل تفاحيتن يوميا



وبعد التفاحتين تشرب ربع قلاص ماي دافي

وبعدها تنزل صينية مجبوس دياي

ويمه القليل من المعبوج وشوية دقوس وما يأثر لو حطيت اجار

وبجذي تكون اكلت وجبة متكامله وانت تحافظ على وزنك

اي هين

بخير الله يسلمك

لوووول

نشوفكم على خير