سماء الكويت

تصغي الأشجار وتتحدث الغيوم وتغني الطيور و تسمع السماء صوتا مناديا من الأرض يقول انا ديكاتي فإبتسمي لأني قاعد اصور

الصور هذي كلها انا مصورها ما عدا صورتين اتمنى تعجبكم

لوووول اول مره اكتب كلام جذي اتمنى ما يكون ثقيل عليكم

ال30 نقطه للدكاتره الأكثر ملاقة

اليوم بتكلم عن موضوع الملاقه التي تصدر عن الدكاتره سواء كانت هذي الملاقة عفوية او مقصوده طبعا دكاترة الجامعه على وجه الخصوص ولإني حاقد على البعض منهم وهذي 30 نقطة اتمنى تعجبكم :

1-الدكتور يكون مليق اذا دش اول محاضره ويكون نفسيه وانت تحسب ان هالدكتور شديد وبعدين تكتشف ان خوش دكتور.

2-الدكتور الي كل يزن على راسك الحضور ثم الحضور ثم الحضور وما يسجل غياب

3-الدكتور الي يخليك تطق طريج من الصبح وبتوينات وداخل حارة الأمان وطالع منها وماكل لك جم مخالفة واهوه يطلع بالأخير مو مداوم

4-الدكتور الي يقولك ادرس الكتاب كله وبالإمتحان يعطيك اسئلة من اخر الكتاب

5-الدكتور الي ينزل مواد حق بنات والصبيان مطنشهم

6- الدكتور الي يضغط الشباب حسباله ضغيط وما يدري ان احنا ما نرد عليه علشان ما ينقصنا

7-الدكتور الي حسباله دمه خفيف ويقط نكته سخيفه واحنا نضحك مجامله حقه

8-الدكتور الي تذبح عمرك علشانه طول الكورس واخر شي ما يعطيك حقك ولما تكلمه يقولك اسف كل واحد ياخذ حقه

9-الدكتور الي يقولك اشتر الكتاب الفلاني والكتاب الفلاني وكل كتاب سعره وقدره و طول الكورس يقولك ييب الكتاب واخر شي يقولك ادرس من الدفتر

10-الدكتور العنصري الي يمشي طلبة الشريعه وربعه ويخلي عيال الناس

11-الدكتور الي توه متخرج وتشوفه طول المحاضرة انا بأمريكا ولا انا بلندن جنه محد راح امريكا او لندن الا اهو

12-الدكتورة الي عمرها الف سنه وتشوفها لابسه لبس مراهقات لا واذا شافت بنات تقول شنو هالجيل التعبان

13-الدكتوره الغير كويتيه وغصب تبي تتكلم كويتي ونص كلامها بدليات

14-الدكتورة الي توها متخرجه وتدرس صبيان تلقونها اول يومين هالله هالله بعدين تقص عليها بكلمتين

15-الدكتور الي تعطيه سؤال صاروخي وتلقاه يتوهق فيقول الجملة الآتيه:ياشباب زميلكم سأل خوش سؤال منو المجتهد او الشاطر الي يرد عليه
طبعا من يقول هالجمله لازم تعرف انه متوهق

16-الدكتور الي هم تسأله سؤال قوي بأخر المحاضرة ويتوهق فيقولك خله المحاضرة اليايه وتشوفه يلم بعضه ويطلع بسرعه

17-الدكتور الي شاري شهاده خصوصا الي متخرجين من جامعات معروفة في بيع الشهادات تشوفه اسلوب والحاله حاله وانا وانا وانا واهوه طل بعينه

18-الدكتور الي طاقلة موتر بسعر وقدره وتشوفه لما يدش المصافط يطقله فره صوب شارع الكلية علشان يشوفونه الطلبه

19-الدكتور الي يقول حق الشباب خلونا نستعمل التكنولوجيا في المقرر هذا ونتراسل بالإيميل حق الواجبات وبعد فترة احد الطلبة الله يعطيهم العافيه يدزلة فايروس او شي ،فيقولك الدكتور ها خلاص خلونا نسلم الواجبات بالمكتب احسن تقوله ليش يقول في بعض الطلبه ما يعرفون يستخدمون الإيميل

20-الدكتور الي يدرس مادة مدخل حاسوب وتلقاه يتكلم عن الدين الإسلامي واشلون نستخدم الكمبيوتر في حساب المعاملات الإسلاميه واعتقد وايد ناس تعرفه

21-الدكتور الي تشوفه شاري من ستاربكس من الصبح ويقعد يشرب بالقهوه من اول الدوام لما يخلص

عفيه قهوه

22-اما هالنقطه غير احب لما اشوف الدكاتره الأجانب خصوصا في واحد باللآداب تلقاه كله مبتسم يعني الإبتسامه ما تفارقه لما اشوفه اتفائل جان زين دكاترتنا يصيرون مثله ترا ما تخسر شي لو ابتسمت

23-الدكتور الي يقعد يشرح وكل شوي يسأل الطلبه ها وين وصلنا

24-الدكتور الي يقول نص الكلمه وبنطر الطلبه يكملون النص الثاني

25-الدكتور الي يقول حق الطلبه سوولي بحوث ودورولي معلومات وترجمولي الكتاب الفلاني واخر شي تشوف البحث والمعلومات الي طلعتها او ترجمتها حضرة الدكتور حاطهم بكتاب وكاتب بالخط العريض تأليف الدكتور فلان الفلاني

26-الدكتور الي طول ما اهوه عايش يطلب من الطلبه بحوث وطول الكورس يناقشهم بالبحث ولما تقوله احنا شنو نستفيد من المقرر اذا كله نتناقش بالبحث يقولك البحث احسن علشان تتعودون لما تدشون سوق العمل وانا مو باط جبدي غير سوق العمل الي مأذينا فيه

27-الدكتور الي ما يلقى احد يشارك معاه فيقول اشفيكم الناس الصبح تكون نشيطه،واذا محاضرته الظهر يقول خو بعد الحين مو الصبح الي انتوا كله دايخين،واذا محاضرته العصر يقول شنو ما شبعتوا نوم من الصبح وهم يايين دايخين

28-الدكتور الي قبل كل امتحان يقول ترا انا حاط عشر نماذج وانا حاط عشرين نموذج ولما تشوف ورقة الي يمك تلقاها نفس ورقتك وحتى الي وراك والي جدامك بس الدكتور يبي يوهقك

29-الدكتور الي بالكورس الصيفي قاطينه بورشه وما فيها مكيف اول ما يدش يشوفنا كل واحد ماله خلق والويه احمر وعرق وحالة ويسألنا ها حر؟

يعني شرايك انت، لا ويقعد ربع ساعه يعطينا الشغل ويطلع

30-الطالب الي يتحلطم مثلي مو كفو يدش جامعه لووووول لا اتغشمر بس قرقت وايد وما عندي شي حق النقطه هذي

الجو مغبر وأيضا المخ مغبر

الجو اليوم ما نحسد عليه بصراحة اول مره اشوف جو يصير لونه احمر يقط برتقالي والحساسية تشتغل والراس يصدع وانا دايخ واليوم خميس ومحاضرتي الساعه3 المهم وانا بالمحاضرة قاعد يعني متابع مع الدكتور وهالدكتور دايما يعطينا امثله من الواقع جان يسأل سؤال

الدكتور:يا شباب الرقابة وين قلناها او وين شفناها

ديكاتي:مع الويه شاد حيلي جان اقوله الرقابة بالمسرحيات

الدكتور:يفصل ويقولي شكلك حاجز حق مسرحيه اليوم ، يبه قصدي الرقابة وين خذيناها بالمنهج

ديكاتي :اها و بالمرة تذكرت طارق العلي كله حاط دوبه دوب الرقابة،الظاهر كنت دايخ بس تبون الصج تفكيري كله كان بالصورة هذي

لإني كنت يوعان ولما اتذكر هالصورة افكر وانا افتح الجدر اشوف ذيج الطبخه الي ما تقاومها بس وين خلف الله علي خلنا على حلاو و جوكلت بالكلية وايد زين

خربشات يهال2

هذي ورقة لقيتها عند اخوي العبيط يعني كاتب اسامي مطاعم مع الويه لووول صج اليهال داهيه لا وهذا كل يوم يروح المدرسه وطالعوا اشلون يكتب

اهم شي

كنتاتي

ماقدونلز وبهذي ما الومه كل ما ندش ماك يسمع الفلبن ولقم سير تقوله ماك جكن، يقولهم ون ماق جقن وذ قولا يعني كولا

باباجوزه هذا يعني باباجونز

الهي صبرني على هالأخو:)

انا قلت باخذ اجازة من التدوين بس خلاص برجع هونت ملاقة يوم كامل ما تكتب شي تتعب الواحد يبي يعبر يبي يضحك يبي يشوف ناس حلوين مثلكم

مشكورين على الدعم يا جماعة وتشريفكم مدونتي ولا تقاطعون

استراحة محارب

نظرا لظروف الإمتحانات ولإني مهمل ما حضرت شي واسبوع الياي كله امتحانات باخذ اجازة عن التدوين لما يوم الخميس بس ما راح ارجع فاضي مزهب لكم خوش موضوع

وفوق ان امتحانات، أحد الدكاتره معصب علينا لووول جان يرقعنا في بحث ولازم اسلمه اسبوع الياي ايضا فالجدول مزدحم

والله المستعان

what the fear show:)

Fear Show - Funny bloopers are a click away

pizza hut 50th birthday

بيتزا هوت يحتفلون بالذكرى ال50 لتأسيس المطعم وبالمناسبه هذي منزلين جم بيتزا يديده، لما رحنا انا و عيال عمتي طلبنا وحده منهم كان اسمها بيتزا ديلا روما وهي 3 انواع من الجبن بس كانت وايد وايد حلوه وعليها نعناعه بعد واحلى شي ان كلينا بالمطعم فكان كل شي حار ومضبوط

انا طلبت بيتش كراش خوش عصير واهم شي الكرزة الي طعمها حلاو

ولد عمتي سأل خوش سؤال فقلت اطرحه علشان محد يسأل بعد

قال يحتفلون بالذكرى ال50 علشان افتتاحه بالكويت ولا بالعالم ؟

طبعا رد عليه ولد عمتي الثاني قاله يعني بالله قبل 50 سنه تتوقع كان في بيتزا هوت بالكويت ولو كان في تلقا بيتزا هوت من بيت طين ويسويلك بيتزا على خبر ايراني :)

بيت تقراه من اليمن لما اليسار نفسه من اليسار لما اليمين حرفيا

مودته تدوم لكل هول##وهل كل مودته تدوم؟

اقروا البيت من اليمين إلى اليسار اهوه نفسه نفسه من اليسار لما اليمين

والله اللغه عندنا على قولتهم زاخره خنشوف توني ومايكل يقدورون يكتبون بيت مثل هذا :)

فوتوشوب أيام المراهقة

AUDI

******************************************

INFINITI G37

***************************************************

BMW M6

******************************************************

ALTIMA COUPE

هذي الصور كنت مسويها اول ما تعلمت على الفوتوشب والله كنت اقعد على كل صورة فترة مو قصيرة بس علشان اقعد اضبط فيها بس الحين كبرنا على هالسوالف أو بالأحرا مالي خلق :)

خربشات يهال

اخوي الصغير ساعات عليه افكار يهال بس تضحك ف من اليوم بحاول اكتب لكم المواقف الي تمر علي والظريفه طبعا



ذاك اليوم كنت قاعد ولا يرن تلفون البيت المهم اخوي قام بسرعه ورد على التلفون فدار الحديث بينه وبين المتصل كالتالي

أخوي:الو السلام(طبعا اهو مؤدب وايد لازم اول ما يشيل التلفون يقول السلام)تفضل

المتصل:وعليكم السلام اشلونك مالونك وين ابوك؟

اخوي:تمام الحمدلله ابوي ما ادري وينه لحظه شوي لو سمحت

اخوي يسألني

أخوي:ديكاتي وين ابوي

ديكاتي:والله ما ادري بس اعتقد انه طلع

اخوي: يعني اقول حق هذا ان ابوي طلع

ديكاتي:اي قوله طلع

اخوي يرجع حق التلفون

أخوي :الووو الووو(المتصل ما يرد بس على الخط)يطالعني اقوله كلمه اشفيك حسيت انه متوهق، جان يقوله الووو ريال وينك(لوووول اخوي كان متوهق ما يدري شنو ينادي الريال)اهوه قال الوو ريال انا فصلت اقوله شنو الوو ريال قوله عمي قوله اي شي مو الوو ريال يقول شدراني انا بعد

ودي اعرف اهوه

طالع على منو ما ادري ترا مو طالع علي :)صج.





.

اللبس الخليجي بإختصار

ليش المتدينين ما يلبسون عقال:)

في بوست سابق تكلمت عن ان الي يقولون ان ما يصير نحتقل بمولد النبي

بالردود سألني يوسف خوش سؤال قال:ليش الدينين ما يلبسون عقال؟

طبعا احنا نلاحظ وايد ان الملتحين والدينين ما يلبسون عقال بس يحط الغترة او الشماغ على راسه ويمشي

وطبعا الدشداشه ستايل برمودا ف اليوم راح اجاوب على التساؤلات بعد ما سألت و بحثت

اول شي الغترة :يقولك في رأيين سمعتهم الأول يقول ان هذا العرف و التقليد من زمان

والقول الثاني يقول ان اهمه حطوا اللحية فقالو لازم نسوي شغله نتميز فيها اكثر فقالوا نلبس غترة بدون عقال

والبعض يقول ان اقتداء بالصحابة <<الي باط جبدي ان اشلون تثبت الغترة مع الهوا وجذي انا البس عقال واحسها بتطيح

ثاني شغلة دشداشة ستايل برمودا: اما الدشداشه القصيرة انا اضحك عليهم بالشتا لإنهم يطقطقون من البرد تشوف الواحد منهم واقف ويحك بريوله من كثر ما البرد قارص، يقولكم ان الدشداشه يقصرونها جذي لسببين

الأول ان هذا اقتداء بالرسول<

السبب الثاني يقولكم ان هذا نظافة علشان لا يسحب الثوب بالأرض ويتوصخخو احنا لما نلبس نلبس شي معتدل لا يسحب بالأرض ولا مقصمل وقصير خلك بالنص .

اشكر يوسف مره ثانيه:)

معرض العودة للطبيعة

اليوم رحت مع ولد خالي معرض العودة للطبيعة بفندق ريجنسي ،طبعا ادري بعمري انا مو مال هالسوالف بس قلت يالله خنشوف شعندهم والله كان في شركات متنوعة

رحنا حق محل على قولت ولد خالي عندهم احجار تساعد على التركيز والتفاؤل ويعني السوالف هذي انا ما أؤمن فيهم بس

شفت سوالف غريبه يعني مثلا لما تبي تاخذ حجر تقولك الي تبيع مرر ايدك على الأحجار والي تحس في جاذبية او ترتاح له ايدك اخذه

ولد خالي خذا جم واحد يقولي يبي يجرب اما انا خذيت حجرين صغار مو علشان شي بس لإن شكلهم عجبني

طبعا العلب او العقاقير الي ورا هذيل تقول الي تبيع وعلى ذمتها ان هذيل خلاصة قوة الأحجار حاطينها في شكل سائل اقولها اشلون حجر تاخذون قوته وتحطونه تقول في طريقة معينه طبعا انا من وراها شنو هال

pull shit

المهم كان في حجر اسمه تايجر آي يعني عيون النمر كان شكله حلو فخذيت واحد

بعدين رحنا حق محل يبيع قهوه على قولته قهوه تسد نفسك عن الأكل والله تبون الصراحه كلامه صج انا شربت شوية ولما الحين ما اكلت شي لإن مو مشتهي شي وشكلي بنام وانا مو ماكل شي اسم القهوه كافي هيربا لايت وموجوده بالجمعيات

خلصنا منهم واحنا خلاص بنطلع ولا قناة سمارت واي كانوا موجودين وانشبوا لنا نشبه الا نسوي معاكم مقابله انا دزيتها بولد خالي قتلهم اهوه متحدث ويعرف بالسوالف هذي لوول دبسته فيها وراح قابلوه وانا قاعد اضحك عليه لوول

بالنهاية كانت خوش طلعه اول مره اروح حق معرض من هالنوع .

ما مداه المجلس انحل شوفوا شنو صار

اي ما مداهم بسم الله اليوم انحل المجلس اشتغلوا المرشحين خو هذا صاحبنا على اوله قام حاوط المكان وكتب محجوز مو خو انطر الإنتخابات بعد شهرين ليش مستعيل عاد منطقتنا الله ما كثر فيها البراحات لا بس شكله هذا داخل بقوه ومطبق المثل الي يقول من سبق لبق،عاد تدرون شنو احلى شي بالإنتخابات خصوصا منطقتنا يقولكم بالإنتخابات ما يحتاج تطلع من المنطقة العشى كل يوم روح عند نائب والشيشه خو على افا من يشيل كل نائب حاطله زاويه مسويها قهوه وطبعا السنه الي طافت خو كان كاس العالم كان كل نائب حاطله اشتراك وبروجكتر ويعرض المباريات والعصير رايح راد عليك يعني كان خوش شغل وهالسنه شكلنا راح نشوف العجايب

تحديث

لووول الي يبي حل حق ازلة الدواين

دام ان امس شفنا اللوية الي صارت على سالفة استقالة الحكومة والجرايد

من امس بليل حطت الأخبار ونبأ الإستقالة والمحللين السياسيين قام سوقهم والقنوات الفضائية الكويتية والغير كويتية انشرت الخبر وخو قناة العربية ما يبيله بعد اول وحده انشرت الخبر بعد قناة الوطن وطبعا القناة الأولى نايمه على عمرها بس الزين الي فيهم انهم الوحيدين الي نقلوا كلام بوخضور مباشر، وقناة الراي يقولون انهم اول قناة اذاعت الخبر في خبر عاجل، المهم انا ما علي من الكلام هذا كله انا قعدت افكر بالقضايا الي معلقة طبعا الكل شاف الجرايد يومها قالوا ال120 تأجل إلى وقت اخر، بليل استقالة الحكومه خوش شي ،انا مو هذا موضوعي انا ابي اتكلم عن ازالة الدواوين قبل كانوا يمشون ويهدمون بالتعديات واستغربت ان اول منطقة كانت جنوب السره انزين الحين حكومه ماميش وزراء ماميش يعني ازالة تعديات بشوفهم شنو راح يسوون هل راح يكملون او لأ لووول ،اليوم واحد من الربع يسولفلي يقولي باجر راح اييون عندنا يبون يشيلون الدوانية فقتله وانت شنو راح اتسوي يا بطل جان يقول بشخط فيهم واقولهم حكومه ماكو وزير ماكو وكل شي معلقينه يعني اخذوا شغلكم واتيسروا لووول طبعا انا بشوف ولدنا سبع ولا بس كلام والي جربها عفيه خل يقولي .

مولد الرسول صلى الله عليه وسلم

اليوم بالكلية موزعين البوستر هذا كل مكان والي يقول ان ما يجوز نحتفل بمولد الرسول عليه الصلاة والسلام طبعا هذا مو شيي غريب دام الي ماسك الإتحاد الإتلافيه وطبعا حاطين اسامي شيوخ من المعارضين لهذه الظاهر

انا ما اعترض ولكن رأيي بالموضوع مع احترامي لكل الشيوخ والمذاهب ان هذا مو احتفال

وإنما تجديد ذكرى مولد الرسول ومحد ينكر ان هذا اليوم الي انولد فيه الرسول كان بداية عهد جديد

لإن لولا الرسول لما انتشر الدين الإسلامي وكلنا نفتخر بهذا الشي.

استخدام الهاتف النقال أثناء القيادة

في موضوع سابق الي يخص اسبوع المرور الخليجي الموحد اليوم تم تأكيد القرار الخاص بمخالفة من يستخدم الهاتف النقال يدويا أثناء القياده اعتبارا من شهر مايو القادم، المصدر كونا.

طبعا راح يقوم سوق سماعات البلوتوث وأم وايرات حق التلفونات القديمه ف الي عنده محل تلفونات يشتري دفعة سماعات ويخشها بعدين يبيعها بالسعر الي يبيه لووول

لووول 1970 مره وحده

قبل شوي كت قاعد ادور على برنامج استخدمه حق الفيديو وجذي ف وانا ادور بالمواقع حصلت واحد ولكن المفاجأة ان اخر تعديل كان في تاريخ شوفوا

لوووووول طبعا اكيد عندهم خلل او شي ولكن لو افترضنا ان صج لووول اتخيل يدي كان قاعد على كمبيوتر صخر القديم ومشغل هالبرنامج او الموقع لا ومركب وايرلس و اكيد كان سهران لإن الساعه 2 الفير تلقونه خلا يدتي تنام واهوه راح شبك مو انا طالع شيطان على منو بعد، اخيييه الحياة سعيده.

لم افكر بأن اشك بأخلاقك يوما

عامر جعفر

ظهر الحق وزهق الباطل

اليوم تم تأكيد موقف الدكتور عامر جعفر وبرائته من التهم التي وجهت له من تحرش جنسي وإلى ما نحو هذا

طبعا التهمه طلعت في أيام الإستجواب الي كان موجه إلى وزيرة التربية اذا ما خانتني الذاكره وأيضا متزامنا مع

انتخابات رابطة هيئة التدريس في التطبيقي وهذا دليل على إن التهمه ملفقه حقه يا ان علشان يوسعون محاور استجواب الوزيرة

او علشان يحجبونه عن الإنتخابات لإن يمكن له تأثير على أعدائه ولكن الله ما ينسى أحد

واليوم بدأت الإجراءات علشان يردونه في منصبه بقسم الموسيقى

وبنقل لكم بعض العبارات اليوم ذكرت بالمقالة والي تثبت كلامي

وأن كل ما أثير ضده من بعض أعضاء هيئة التدريس لا أساس له من الصحة

الشكاوى الأخرى المتعلقة ببعض الأعمال الإدارية في القسم فقد خلصت لجنة التحقيق إلى التأكد من عدم جديتها وعدم صدقها

وطبعا الجريده الي ناقلة الخبر حاطته داخل بس يوم قرروا يتهمونه ويوقفونه عن شغله كان العنوان بالصفحه الأولى يا سبحان الله

الإعانه الجامعية وزيادة الرواتب

اليوم قعدت افكر واذا ديكاتي فكر لازم ينتج

فقلت الحين الكويت كلها تتكلم عن زيادة المعاشات الي ما يابت لنا غير الفقر بسبب زيادة الأسعار

المهم مو هذا موضوعنا

انا بتكلم اليوم عن الإعانة الجامعيه وعلاقتها بزيادة الرواتب

بحثت بشكل سريع فعرفت وانشالله المعلومات تكون صحيحه

عرفت ان الإعانة الجامعية مسئول عنها صندوق التكافل الإجتماعي وهذا الصندوق يقدم إعانات حق المواطن الكويتي

الي يستحق هذه الإعانة

ولما رجعت حق نص زيادة المعاشات والي يقول

قال وزير المالية الكويتي في بيان بثته وكالة الانباء الكويتية (كونا) ان علاوة غلاء المعيشة التي ستشمل كذلك من يحصلون على مساعدات اجتماعية سيبدأ العمل بها في مارس اذار

انزين يعني اضافة إلى زيادة الرواتب راح يكون عندنا المساعدات الإجتماعية وهذي المساعدات يقدمها صندوق التكافل الإجتماعي والي اهوه مسئول عن الإعانة الجامعية اذا الإعانة بالحاله هذي ضمن الزيادة

ليش محد تكلم عنها او ياب لها طاري و الكلام كله صار على الموظفين والرواتب.

هذا الإستنتاج كان بشكل سريع فيعني الموضوع كله ممكن يكون ماله اي أساس من الصحه ،والي عنده معلومات عن الشغله هذي خل يفيدنا.

توم كينز ولكن !!!

اسبوع الي طاف في محاضرة مدخل علم نفس الي الواحد يتمتع فيها لإن الماده وايد حلوه وظريفة

كانت الدكتورة ماعطتنا مثل تقرير كل واحد يسويه عن موضوع معين فالجميع كان مستعد والي متوتر والي مو محضر المهم

على طاري مو محضر انا ما تذكرت ان عندي تقرير المفروض اسويه الا قبل المحاضره بساعتين

فأخذ ديكاتي زمام الأمور واشتغل على التقرير صج كان اي شي بس الإسلوب يلعب دور مهم والدكتورة استانست

المهم بلشت المحاضرة وقامت تنادي الأسامي وكل واحد يطلع ويقول الي عنده حق الكلاس

لما وصلت حق رابع اسم اشوفها قاعده تقرا جان تقول توم كينز تفضل

طبعا انا انبهرت واتشققت الله وناسه عندنا واحد اسمه توم لا وكينز بعد يعني مو اي شي

وبحكم اني قاعد بالصفة الأولى قاعد انطر الأخ توم يوصل لإنه كان قاعد ورا

وطبعا باللحظات هذي انا قاعد اتخيل الشكل قاعد اقول اكيد ان ابيض وشعره اصفر والعيون ملونه والجسم ما يتحاج بعد

والكثير والكثير من هذي التخيلات ولكن اتيي الصدمه اهني

طلع صاحبنا توم كينز حنطاوي الشعر فلفولي والعيون عاديه والخشم عريض انا انصدمت صار عندي هبوط قاعد اطالع اشلون توم

وهذا شكلك ياخوي مو راكب ولما وقف على الخشبه نطر الدكتورة تخلص كلامها جان تقوله تفضل محمد يالله

عاد انا اهني طلعت قروني بعد كل هالتفكير والـتأملات يطلع اسمه محمد واشلون قبل شوي تقول توم كينز

والله ما خليتهم جان ارفع ايدي واسأل الدكتور قالتلي اتفضل قتلها انتي مو قبل شوي قلتي

تفضل توم كينز قالت اي، قتلها الحين اشلون صار اسمه محمد

جان تضحك وتقولي توم كينز اسمه العالم الي يبي يتكلم عنه محمد يا حظي

لوووووول طبعا الكلاس ما قدروا يمسكون عمرهم انا انحرجت وقعدت اقول حق نفسي يعني شنو هاللقافة

بجامعة الكويت وبالآداب لا ومادة علم نفس من وين بيطلعلك واحد اسمه توم

لووول الله كريم بس ترا الظاهر يومها كنت مقفل لإن هالسوالف ما تطوف علي بس يالله شنسوي .

:)

محطة جديدة تنضم لباقة الإذاعات الكويتية

محطة أناشيد اسلامية تبث من الكويت وهي محطة السلام وهي حاليا تبث بثا تجريبيا بصراحة فكرة حلوة يعني حق الي ما يبي يسمع اغاني يحول على شي اسلامي وايد زين وهي اضافة إلى محطة القرآن الكريم واتوقع ان لها نشاطات متعدده ومختلفة وجديده ايضا كونها اول محطة من هذا النوع بالكويت
.
http://www.salamfm.com/

شياب بحالة مزرية :)

مساكين هالشياب كل واحد قاعد يطالع البحر ما ادري يشكون حق البحر ولا البحر يشكي لهم بس قعدتهم اثارت الفضول جان اعطيهم صورة ،بذمتكم ما ودكم تعرفون بشنو قاعد يفكرون يعني قعدتهم غريبه بس يالله الدنيا للحين بخير.

RED BULL

والله خوش كلام طلعت نص المنتجات الغذائية الي توصل الخليج فيها نسبة كحول والله وناسه ذاك اليوم بطاط دوريتوس واليوم رد بول وبربيكان يقولك لازم يدخل فيه نسبه من الكحول الله يستر باجر زين ما يطلع حليب نيدو حاطين فيه نسبة كحول لوووووول عاد ياهل وتعطيه شي في كحول اهوه حليب ويدوخ وهالمره مع كحول الله يستر .

الصورة وصلت بالإيميل واشكر الصديق الي دزها.

i'm lovin' it

اليوم

جربت ماك كرسبي والله نوعا ما جيده بس مو الطعم الي كنت اتوقعه كنت اتوقع شي افضل من جذي بس يالله كل شي يمشي اهم شي تترس بطنك

منتخبنا الله يجزاهم خير

لووووول بصراحه خبر دلدغ احاسيسي لا صج صج يضحك سمعوا الخبر

يقولكم تاريخ 21 يلتقي منتخبنا الوطني مع المنتخب العراقي الموقر وصاحب كاس اسيا

والي يلعب فيه مجموعه من نخبة لاعبين العالم

يا جامعة من صجكم انتوا احنا مع منتخب سيرلاناكا خسرنا هالمره تبون تلعبون

مع العراق يعني غصب تفشلونا يعني باجر اييني عراقي خو الله ما كثرهم بالديره هاليومين المهم اييلي عراقي

ويقولي احنا فزنا عليكم بالله انا لي ويه اطالعه والله منتخبنا يفشل انتوا عدلوا المنتخب ولعبوا مباريات وديه على كيكفم

بس الحين خلوكم على مباريات البطولة وايد زين على الأقل إذا خسرنا نرقع الموضوع ونقول ان التنافس على البطولة كان قوي وما قدرنا نفوز

قناة الراي

الكل مستغرب قناة الراي من وين لها كل هالفلوس والمذيعين وبرمضان حطوا برامج يبيلها مصاريف وخصوصا برنامج حليمة بولند الي ملابسها بس كانت تكلفتها تكسر الظهر وبعدين وصلنا حق مهرجان هلا فبراير وصارت قناة الراي اهي الناقل الرسمي للمهرجان ما تعتقدون ان كل هذا يبيله مصدر دخل قوي.

بعد التفكير وطرح الأدلة والمباحثات وشوية تحريات توصل ديكاتي إلى المصدر الأساسي لتمويل قناة الراي

اي نعم مصدر تمويل قناة الراي مصبغة ملابس لا تستغربون الكويت للحين بخير:)

F-650 SUPER CREWZER

اليوم يا جماعة شفت سيارة فورد شقولكم عملاقة شوية عليها والله دبابه، يعني تصفها يم الهمر تقوله استريح طال عمرك لووول وايد كبيرة واخليكم مع الصور

اسبوع المرور الخليجي الموحد!!

بداية اسبوع المرور الخليجي الموحد وطبعا هذا الإسبوع الي ما اندري عنه خير شر بس لفت نظري بعض القوانين الي يبون يدرسونها وبيقدمونها لمجلس ألأمة علشان يقرونها وهي كالتالي:

1-تجاوز الإشارة الحمراء تدفع غرامة 250دينار

2-التحدث بالتلفون أثناء القيادة تدفع غرامة 50 دينار

لووول قالولي غرامه بالله الواحد ضايق خلقه يعني ما يسولف وخو البنات الله يعينهم بعد ، بس شنو هالقانون السخيف يعني شرطي يبي يوقفني علشان يخالفني لإني قاعد اتكلم بالتلفون احسها مو راكبه بعد مو ناقص الا يقولي منو قاعد تكلم .

3- الأكل او التدخين أثناء القياده تدفع غرامة 50 ديناراي خير انشالله الأكل ممكن نصدق بس تدخين قويه تبي تمنع منو ولا تتخلي منو من صجهم هذيل حبيبي وكت الواحد الي يبي يدخن ما يهمه لا شرطي ولا مخالفة

التكسي الجوال

اليوم انا واصل حدي والسبه هذيل الي اسمهم التكسي الجوال

يا جماعة والله محد راح يضيع عيالنا ويخرب شوارعنا غيرهم

انا اول مره اشوف في بلد نفس الكويت التكاسي الجوالة أكثر من سيارات

الموطنين بالشوارع ولا وفوق هذا كله تلقاه ماسك اليسار ولا يترك لك عادي ما عنده اي مشاكل

والمشكله الي خلتني اتكلم بالموضوع هذا السوالف الي صرت اسمعها عنهم

وامس

صارلي حادث على دوار والسبب ان تكسي ماسك يسار ويبي يدخل اللفه الي على اليمين مالت الدوار

وطبعا انا بالنص وعلى يميني سيارة بعد المهم اول ما صارت له الفرصه طلع من الدورا ونام علي انا وقفت

خليته يطوف ولكن الي على يميني ما خلاه يطوف وسلامتكم وما تشوفون الي التكسي يطق بريك مره وحده وانا ادخل فيه من ورا

وطبعا عينكم ما تشوف الا الخير بوديكاتي متكود على السكان وانطر الجزء الياي قلت يمكن احد يدعمني بعد من ورا بس اشوه

الناس تداركو الوضع ، نزلت من السيارة ما خليت كلمه ما قطيتها على راعي التكسي بس بالنهايه انا الغلطان لإني انا الي دعمته

من وره، قالي تبي نتصل على الدوريه قتله لا انا اصلحلك احسن من ما ادفع غرامة حادث 30 دينار وتصليح سيارته ما كلفني

الا 15 دينار والغريب ان سيارتي ما صار فيها شي والحبيب دعاميته طاحت تحسون شغل اي شي سيارته

وبعد من الأشياء الي اسمعها عن هالتكاسي ان لما تنحاش خدامه من بيت أحد المواطنين وتركب مع تكسي من الهنود او البنغالية

ويكون على علم انها منحاشه فتقوله يوديها السفارة فالحبيب يستغل الوضع ويقولها ان يعرف واسطه وجذي

وياخذها حق أحد هالسماسره الي يمارسون التجارة بالنساء ولهذا فإن مشاكل التكسي الجوال اكثر من مجرد مشاكل بالشارع وانما

مشاكلهم وصلت إلى المجتمع الكويتي وبدأت تظهر نتائج هذه المشاكل بشكل واضح.

الميلان إلى المجهول!!

اليوم مو يومهم ميلان خسروا من أرسنال 2 صفر وطبعا بحكم اني ميلاني فحسافة عليهم لإنهم راح يطلعون من هالموسم ولا كاس ماخذين ،والسنه اليايه ماراح يشاركون بدوري الأبطال فيعني اللقاء راح يكون السنه الي بعد اليايه ، وبالمناسبة أداء كاكا ما كان بالمستوى المطلوب فأعتقد ان من الحين لما السنه اليايه راح تصير تغييرات كبيره بالفريق، وطبعا خسارة اليوم لها عدة اسباب اهمها غياب سيدورف وديدا وبصراحه انشلوتي ما عرف اشلون يتحكم بالمباراة ويخليها بصالحه

قبل جم يوم قالي ولد عمتي ان اليوم في معرض حق سيارات فقررت اروح معاه وفعلا رحنا مشرف بأرض المعارض صوب بنكو كارت طبعا المكان صغير بس السيارات الأمريكيه اهي الي كانت ماخذه الجو فخذيت لكم جم صوره من اهناك وطبعا كان فريق
STS
الكويتي موجود مع الطاقم والسيارات وبصراحه خوش شغل عندهم والحين اخليكم مع الصور