غبرني أكثر!!

اليومين الي طافوا كان الجو مغبر نوعا ما بس كان عادي ومع هذا كانت الحساسيه شغاله

اليوم قعدت الصبح حسيت في شيي غريب سنسر الحساسيه كان عالي اليوم

خلصنا الدوام ورجعت البيت دشيت غرفتي بدلت طلعت من الغرفة اشوف الدنيا برتقاليه

لا لا لا شسالفة مو وكته

ابوي دق روح اخذ اخوك من المدرسه وانطلقت ولا الدنيا حوسه كل واحد مو عارف شسوي بعمره

والناس تتداعم وسيارات شرطه واسعاف ومطافي

صارة الحالة نفس لعبة

GTA

خذيت اخوي ورجعنا البيت

احلى ما في الموضوع ان بالغبار تصير ليتات السيارة زينون بروحها

ما ادري شنو السبب بس كول

بعد ما عدلنا بالفوتوشوب بس الليتات شكلها عجيب

حتى الشبات صاروا زينون

والحلو بعد ان لما خلصت غدا وشبكت المسنجر وايد ناس شابكين تحسون محد طالع الكل قاعد بالبيت وماجبلين النت.

:)

السماعات من باجر يا شعب

من باجر راح يكون اول يوم راح يطبق فيه القانون الي يخالف التحدث بالهاتف النقال يدويا





يعني لازم تحطون سماعة





وراح تكون المخالفة غير مباشرة يعني الشرطي مو لازم يوقفك علشان يخالفك بس الي عليه ان ياخذ رقم لوحتك ويحرر مخالفة





وأيضا ممكن ما تشوف شرطي فحط في بالك ان راح يكون هناك افراد مدنيين يعني حطوا بالكم و احترموا القانون





خل نصير متطورين ولو مره بعمرنا مع اني ما ادري هل هذا القانون من صالحنا او لأ





مع اني احس شكلي غلط وانا اسولف بالتلفون واضحك والناس عبالهم مينون ما يدرون اني حاط سماعة وقاعد اتكلم

يعني هالمنظر راح يتكرر وايد جدامكم فلا تضحكون على احد

طبعا بالنسبه حق السماعات وصلتني اخبار ان سعر السماعه ارتفع 4 اضعاف

ما ادري اذا صج او لأ بس ما استبعد هالشي

اشوه عنددي سماعه بالكرتون مال تلفوني ما يحتاج اشتري

والي ياخذ سماعة بلوتوث خل يحط باله على صحته ترا البلوتوث يمكن يسبب صداع



ونصيحه حطولكم سماعتين وحده بالتلفون والثانيه حطوها بالسيارة علشان لا سمح الله نسيتوا السماعه الأساسيه الا عندكم وحده



وحق الناس الي يحبون يتكلمون فترات طويل(مو انا) اختاروا نوعية سماعات زينه علشان لا تأثر على الإذن


واذا شفت شرطي يتكلم بالتلفون سو روحك تحررله مخالفة إذا وقفك قوله انا من الداخليه بس مدني واذا قطوك بالحبس انا مالي شغل

مو تقول ديكاتي قال سو جذي انا ما قلت شي انا كل كلامي فرضيات ماكو شي ثابت



الله الحافظ

ترشيد بلشوا نشاطهم المعتاد

اليوم الساعه 2 تقريبا انقطعت الكهربا عن رميثيه وسلوى ومشرف وجم منطقة بعد

طبعا انتوا اعتقد مقدرين شعور لما الواحد يرجع من الدوام وتعبان ويبي المكيف

وطبعا انت طالع من زحمة بعد ترجع بيتكم

ما يمديك تبدل ملابسك وتغسل وتصلي وتقط نفسك على القنفه

الا تسمع ججك ججك ولا الكهربا تنطفي

انا قمت قلت يمكن من بيتنا خل اروح اشوف المحول الرئيسي مال البيت

طليت عليه فحصته بالواير هذا بو سلكين وفي لمبه يعني فاهم

ولا طلع البيت كله ما في كهربا

اتصلت على الربع الي حوالينا يا جماعه عندكم كهربا العموم يقول توها انقطعت

و طبعا بادرت بزمام الأمور واتصل على مال الكهربا

ها يا جماعة قطعتنا كلها طافيه الكهربا شالسالفة

الموظف: والله في خلل بالمحطه اليديده ما ادري شخربط ما ادري اي محطه وان فريق الطوارئ رايح يحل المشكله

وانتو على ما يوصل فريق الطوارئ مالكم ويشوف المهندس الحلو شنو المشكله الا انا سحت بعد ما فيني

حتى غدا ما تغديت مثل الناس

بس الحل كان موجود طلعت من البيت رحت ستار بكس لوووووول منها دراسه ومنها انترنت ومنها القهوه العجيبه وصلحو

والل 10 ملايين وحملة ترشيد وخابين عمركم واحنا واحنا ومن حبنا لها بنوفر لها

وانتوا مو عارفين تتصرفون اذا انقطعت الكهربا عيل باجر اذا دخل الصيف عدل شنسوي

نتسدح فوق السطح مثل قبل ولا نرش جدام الباب ماي علشان يدخل هوا بارد

اي وما نحط برادات نحط برمه والي ما عنده يقولي يدتي عندها 4

ودمتم سالمين

حلو ما بعد الغدا

آآآآآه بعد هالغدا الزين صج اني اكلت وانا مو مفتوحه نفسي بس الحمدلله

اليوم طبعا الجو ما كان اوكي كلش غبار وعفسه

فالحساسيه ما قصرت معاي من الصبح وانا راسي يعورني

رحت الجامعه زاد العوار بس لازم اقعد لإن كان عندي امتحان (مزفت) المهم

خلصت الإمتحان ورحت حق االمحاضرة الثانيه بس حسيت نفسي مالي خلق بروحي مو مقدم عدل بالإمتحان وراسي مصدع وحساسيه اشتغلت

وطبعا على كل هذا الي فيني بدش محاضرة علم نفس فكرهت الموضوع وقلت دام اني امر بالظروف هذي خل اسحب على المحاضرة

بس ما احاتي لإن ما عندي ولا غياب يعني عادي

رجعت البيت نمت وارتحنا شويه وقعدت على الغدا وتغدينا الحمدلله

بعد الغدا حسيت ان يبيله شي نحلي فيييه جان اتوجه إلى الحلو ولا نص منتجات ايران عندنا :)

بس خوش شي

اول شي اكلت شي مثل درابيل بس حلو طعمه والله يعني غير الي عندنا هذا مال الشمالي الأخضر

أدري اللغة على العلبه عجيبه وتحاولون تقرونها والي يقراها خل يفيدنا عاد خنعرف شسمه هذا

بعدين قمت احوس شويه ولا اشوف هذا الي مثل قمردين بس حامض ولونه اسود

قصيتلي شوي وكليت لإن المثل يقولك لا تحط شي بخاطرك

شوي ولا اشوف قوطي كشخه يعني فتحته ولا طلع في قز

وهم كليتلي وحده بعدها شكله السكر ارتفع لوووول بس والله ايران يطلع منهم شي

الله يبيله نروح ايران اخر مره رحت يوم كان عمري 10 :) بس الجو اهناك وايد خوش

يالله انشالله الله يرزقنا ونروح واذا توصونا على شي لا تستحون الي يبي قز و حلو يقول

:)

شراب صيف 2008

صارت عندي عادة ان كل صيف اطلعلي مشروب الصيف

ولازم هالمشروب يكون حلو وبارد ويرضي جميع الأذواق علشان محد يعترض عليه

في صيف 2007 كان العصير الي كنت احبه وكان مشروب هالصيف اهوه عصير رقي

اي لا تستغربون اي رقي هذا الأحمر والي داخله حب اسود الي تاكلونه بعد الغدا بالصيف خصوصا

طبعا كنت اخذه من عصير المنعش والله كان يضبطه صج حلو واحلى شي فيه ان بااااااااااااااااااااااااااااااااااااااااااااااااارد

يعني ما ادري اشلون اوصف البروده الي فيه وحلو

للمزيد من المعلومات عن عصير الرقي و الأشياء الي ندورها بالصيف

http://feehq8i.blogspot.com/2007/06/blog-post.html

اما هالصيف

رحت امس مع صاحبي ساد سمايل على البحر فقررنا نشرب عصير

رحنا عالم المانجا ولازم نطفر الي يشتغل اول شي نخليه يقول اللسته كلها بعدين نطلب شي بره اللسته لووول

فقلت حق ساد سمايل شرايك نشرب عصير وايد خوش

قالي شنو قتلة عصير خوخ بالحليب

اي ادري راح تقولون عيع شنو هذا ومو حلو واشلون يركب حليب مع خوخ

بس يا جماعة انا اقولكم شربوا منه اول قبل لا تحكمون وانشالله راح يعجبكم

وللحين هذا اول عصير اقترحته حق هالصيف ويمكن يطلع شي احسن منه ولكن ما جربت

اي وصح نسيت اقولكم مره كنت طالع مع مستر جوكليت وهم شربنا عصير

جان مستر جولكيت يطلب تين شوكي لوول

والله كان جيد يعني لا بأس فيه حلو حق الي يحب اشياء غريبة

وهذي صور عصير الخوخ حتى لونه حلو :)

خربشات يهال4

اليوم رجعت من لعب كره تعبان حدي بروحه لياقة ماكو بس شنسوي قلنا نتحرك شوي

وصلت البيت وخذيت شور

وتوجهت إلى الصالة قعدت اطالع تلفزيون جان ايي اخوي الحلو

قال ها لعبتوا كره

قتله اي

جان يقولي شنو اسم فريقكم

قتلة الصقور (طبعا بس جذي مالي خلقة)

جان يقول والفريق الثاني شسمه فقتله النسور

جان يقولي ادري تقص علي قتله دامك تدري ليش تسألني مره ثانيه

يقولي بس جذي اختبرك (وليه هذا وكته انا يوعان وتعبان وهذا ياي ما عنده شغل)فقتله ها شنو تعشيت

جان يقولي ماكل صمونة شورما

قتله جم وحده قال بس ثنتين قتله عيل شكلك يوعان الحين قال لا الحمدلله شبعت

(سألته جذب علشان اشوفه يبي بعد ولا من صجه شبعان)

جان اقوله خلاص انا بروح ماك بشتريلي اكل جان يطمر اخوي ويقول ابي ايي معاك قتله ليش

يقول بشتري

قتله مو تقول انت ماكل صمونتين شنو تبي تاكل ما تعضني بعد

جان يقولي يعني الواحد ما يحلي شوي

قتله خلاص ما ابي اروح

جان يروح ديكاتي يدعبس بالمطبخ جان يشوف معكرونيه فحطيت لي شوي وقعدت بريحاتي اكل جان ايي المزعج مره ثانيه(ولييه)

احسه يبي يسولف بس مو عارف اشلون يبلش بالسالفة

يقولي (طبعا بدون مقدمات)لما رحنا الإمارات كنا نبي نسخن خبزه وما عرفنا نشغل الفرن فإتصلنا على يدي (بالشقه الي يمهم) قالوله ما نعرف نبطل الغاز تعال بطله

انا قاعد اسمعه بدون اهتمام لإن ما ادري شنو طاري هالموضوع

الحين خلص سخنو الخبز جان ينتقل إلى المعرض الصيني وقعد يقولي شنو شروا اهناك ومنو شافوا وجذي

مره وحده قلب قام يسولف عن القرية العالميه وأيضا جك بوم قام يسولف لما اتأخروا على الطيارة وشنو صار بالمطار

لما شافني لاهي بالأكل واطالعه جان يسكت شوي

فجأة جان يقولي ديكاتي

فهمت انا بشنو اسولف

الظاهر حس على عمرة وقال شكله ديكاتي ماله خلقي بس مستحي يقولي

لوووووووووووووول اشوه ان صار ذكي وفهمها بروحه وشال قشه وراح

يعني بالله هذي سالفة يسولف فيها

بالبدايه السالفة كانت يسخن خبز و انتهت السالفة بمطار الكويت اشلون ما ادري

يعني ماكو تسلسل مقنع والله طلع ما يعرف يسولف كلش يبيله إعادة هيكلة

هالأخو كل ما اجابلة اشوف اشياء عجيبة عنده

تحديث

بالتلعيقات كل واحد يدش يقولي حرام عليك ليش تسوي جذي وانا قاسي

:)

مع اني ضليت اسمعه ولكن مو مهتم وايد

انا الحين بسألكم

إذا كنت تعبان ومالك خلق وايي ياهل يحن على راسك شنو راح تسوي

قولوا الصج مو تصيرون ملائكة :)

وانيت شايل وانيت :)

لووول توهقت ما ادري شنو العنوان الي المفروض احطة بس مو مشكلة

اليوم المزاج كلش مو اوكي ما ادري ليش

تخيلوا وانا طالع الصبح بالسيارة ما شغلت لا مسجل ولا راديو ولا شي حتى لما رجعت بس قاعد اسمع صوت المكيف

لووول والله ملاقة اليوم بس بالشارع شفت شي غريب

هذا لما كان جدامي

اهني جدمت شوي علشان تصير الصورة قريبة

اهني خليته على يساري

اهني خليته على يميني

شرايكم فيني وانا اصورلكم من الجهات كلها لووول

هذي الي يسمونها صورة 3د يعني ثلاثي الأبعاد بس الإنتخابات الفرعية مأثرة على مخي لإني مو متغدي

ما ادري شكو لوول بس ما كو شي بقولة راسي مصدع

هاليومين العموم ما عنده شي غير الإنتخابات

الله يحفظ هالديرة بس

لا وامس صايدين لهم جم واحد يبيع ما ادري يشتري اصوات قلعتهم

اهمه ياخذون فلوس وانا لأ ما يصير لإن الفلوس هذي حرام

ديكاتي قام يقط خيط وخيط خلاص باي

لحظة لقافة

انا حاليا قاعد بستار بكس ماخذ فترة نقاهه مليت من القعده بالبيت فقلت اغير جو

طبعا الواحد لما يقعد بكافيه عادة يا اما معاه لابتوب ويجابل النت

او معاه كتاب يقعد يقراه ويتثقف شوي

أو يكون معاه ربعه يقعدون يسولفون بأمور عاديه

ولكن الغريب ان من الساعه4 العصر لما الحين وانا قاعد

الطاولة الي يمي في 4 مصاروه وكويتي

من قعدوا هالناس والمكان صار ازعاج

طبعا شوية لقافة مني عرفت عن شنو هالصراخ والأعصاب مشدودة

الشباب يشتغلون بشركة هندسة وفي واحد منهم مسوي شي الي خلا الشركة تخسر مبلغ من المال

الحين الشركة متهمه واحد منهم فهذا بو الشباب ميمع الي مرتبطين بالمشكله ويكلمهم هذا من الساعه 4 مثل ما ذكرت

طبعا الشركة الحين تبيه يدفع فلوس الخساير

لوول مصري وتخليه يدفع فلوس ما يصير اصلا

فالحبيب ما ضلت اوراق ما يابها ما ضلت فواتير ما ضل شي غصب يبي يثبت ان رفيجه المصري الثاني اهوه السبب

هذا بصوب وصاحبنا الكويتي بصوب ثاني مسكين مجابل قهوته وما سمعت حسه

وهالمصري هذا صارلة ساعه يسب ويقسم ويضرب وما ادري شسوي

والله الناس قامت تقعد يمه وتطالعه اشفيه هذا جذي

المشكله صوته مو خفيف يعني لو انا بعيد عنه اقدر اعرف اهوه عن شنو قاعد يتكلم

والله لو اقولكم جم مره حلف لما الحين ما تصدقون يعني وايد وايد

كل هذا ولا إنه يدفع فلوس

وطبعا الحين وانا قاعد اكتب دق على واحد يخليه يشهد جدام الناس وطبعا حاطه سبيكر هذا من صجه والله

شكلي بعد شوي بقوم بعطيه الفلوس بس خلاص خل يفكنا

ما استبعد ان اذا ما قدر يقنع الي معاه ان راح يتهاوش لإن السالفة فيها فلوس ومبين عليه معصب

:) اهم شي انا مشغل النت ويمي كتابين بدال واحد ومخلي هذا كله وقاعد اشوف هذا شقول

على قولت فيه كويتي صج ملقوف

مراسلكم من قلب الحدث ديكاتي

منتهى النكهه يا جماعة الحق يا FORZAQ8

لووول والله العالم استخفوا

ما ادري حاشهم عقر بقر

شالقصه ابي واحد يقولي شالسالفة يا ناس

ذاك اليوم قلنا جبن بنكهة البيتزا قلنا يالله مو مشكله

طلعلنا فورزا بسالفة مشروب بنكهة البيتزا طوفناها

بعدين قالي بطاط بنكهة الكاري قلت حصل الخير

بس لما اشوف شي مثل هذا راح تضرب فيوزاتي

تكفون يا جماعة شنو هالنكهه ليش جذي

عاد اذا باجر مشى سوقها راح ينزلون نوعين

نوع بالزيت الي يكون حامض

ونوع الي يكون لونه احمر شوي وحالي

والله ما نستبعد هالشي كل شي يصير

:) عشنا وشفنا

تحديث

نظرا للإقبال الشديد على موضوع ورق العنب فنزلت التحديث التالي

بعد

أن وردت لنا أخبار من المطبخ أن

باجر بيتنا راح يسوون ورق عنب الي يبي اييب صحنه

مو تستحون:)

ساد سمايل والعايلة الكريمة

اليوم كان يوم شاق جدا عدلت غرفتي و قعدت اجهز حق الدوام باجر

فكان يوم مليئ بالتعب الذهني والبدني

بعد ما خلصت على العصر دقيت على رفيجي الملقب ب(ساد سمايل،الإبتسامة الحزينه يا ويل حالي) قتله امش خل نطلع قالي انا عندي مشوار اخلصه واييلك

قتله خلاص ماشي

المهم خلص شغله وطلعنا رحنا قعدنا بالقهوه سوالف وعصير و نجرة مع الي يشتغلون (لازم نأذيهم ما نقدر نخليهم بحالهم)بس خوش ناس

ما صار على قعدتنا 10 دقايق ولا يرن تلفون صاحبي المهم طلع بره عن الإزعاج تكلم ورجع بسرعه

قتله ها خير قالي يالله امش ابوي واقفه سيارته على طريج المطار

طلعنا من القهوه ولا يسألني السؤال العجيب

صاحبي:ديكاتي تدل من وين نروح المطار

ديكاتي:(احنا كنا بحولي)ممم اعتقد ان لازم نطلع على الملك فهد ونرجع صوب غرب مشرف وربعها اهناك في لفه حق المطار

مو تضحكون ترا ما ندل وايد احنا :)

المهم مشينا على الطريج نفسه ونزلنا على الدائري السادس وكملنا سيده لما وصلنا صوب لفت المطار ودشينا الشارع

واحنا نمشي ولا نشوف سيارتهم واقفه السايد الثاني معناته لازم نطق فوق تحت

ونكمل ندش المطار ونرجع مره ثانيه على الشارع وصلنا ولا طلع ابوه واخوانه اثنين مع والدتهم

اقوله وليه فشله انا معاك والحين اهلك راح ايون معانا راح يصير زحمه قالي لا عادي عادي مالك شغل

المهم ولا طلع ابو صاحبي متصل على الكرين علشان ايي يشيل السيارة

سفط الكرين جدام السيارة الخربانه ويبي يرجع ورا حقها ولا الحبيب تايره الي جدام يطيح في بالوعه :)

انا قلت وليه هذا وكته ولا اشوه قدر يطلعها وشال السيارة واحنا رحنا بسيارة رفيجي وكان ابوه قاعد يسوق

وانا ورفيجي واخوه ورا وامهم مع اخوهم الصغير جدام

قبل كان رفيجي يقولي ابوي ما يدوس يعني حده 100 هذا دايس يعني

احنا ما مدانا طلعنا على الشارع الرئيسي ولا الحجي يعطيها دوسه انا قلت يمكن علشان يسرع والسيايير الي ورا و يلزقون فيه

المهم قلنا يالله مو مشكله اشوف هذا قام يدوس الحبيب داش كوع ودايس وانا ايدي على قلبي

طلعنا على خط صبحان قام يقط بتوينات وانا اطالع هذا بايعها شكله ترا راكبين بلازر يعني سيفتي وثبات ماكو واحنا 6 بالسيارة

انا قاعد اطالع الطريج واحاتي والي يمي باردين رفيجي قاعد يلعب بتلفونه واخوه يمي قاعد يوريني تلفونات بمجله(يمعود انا خايف من هالسرعه وانت قاعد توريني تلفونات انا ناقصك انت بعد) واخوه الصغير قاعد يلعب براسه ما ادري شسوي

يمكن الوحيدين الي خايفين انا وامهم

وابوهم يدوس مرته تقوله سيارة جدامك يقولها خو بعيده عادي ولما يلزق بالسيارة الي جدامة يطق بريك حيل وانا قلبي يطيح بمخباتي

حتى رفيجي كله يعيب يقولي ابوك شكثر يقط قطات مليقه وما ادري شنو لإن طلع معانا جم مره

بس ابوه بدع اليوم

شفنا طيارة قاعده تنزل فقال ابو رفيجي حق ولده الصغير شوف الطيارة قاعده تنزل

جان يسأله ولده يبه ليش الطيارة مبطله الليتات

لوول جان يقوله ابوه يمكن في ياهل يبي يمر او شي علشان يشوفه الي يسوق الطيارة(عرفتو منو المليق الحين)

طبعا انا ما ضل فيني ضغط ما ضل سكر كل شي حاشني قمت بس ابلع ريجي خلاص وصلت حدي

والشباب الباردين يمي ولا هامهم

انا صج ادوس بس لما اكون بروحي او على الأأقل واحد معاي مو عايلة كامله

وصلنا المنقف صوب بيتهم الأبو نزل وقال حق رفيجي يودي اهله البيت ويستلم رفيجي القياده ويكمل الفلم الي بدأه الوالد مو الحب يطلع على بذرة

على ما وصلنا بيتهم الا انا منتهي بعد ما فيني

طلعنا من المنقف ورحنا القهوه ما ضل شي ما شربته من القهر ورفيجي يضحك يقولي ها اشوفك خفت

اقوله عبالي انا طالع مع اوادم بس اكتشفت انكم بعيدين عن الآدمية

الله لا يقطكم بموقف جذي

بس كانت رحلة مليئة بالأكشن :)

قام سوق الخطابات يا جماعة

لما تروح المستوصف بعيد الشر عنكم وتدش على الدكتور حسنين ولا محمدين (يعني مصري) و تقوله فيني حساسيه ولا بطني يعورني ويعطيك دوا كحه

وانت على نياتك تروح حق الصيدلية تبي تاخذ الدوا أو مجموعة الأدوية الي ولا واحد منها حق المرض الي فيك

فلازم تاخذ جيس علشان تحط الأدوية

تنصدم إن الجياس قامو يحطون عليهم اعلانات تجارية

انا اول شي شفت جيس عليه دعاية نظارات حسن قلت يالله مو مشكله الظاهر يبون يتطورون

ولكن وين الصدمه

الصدمه لما تشوف اعلان خطابة على جيس الادوية

بالله انا وين اصير زين اذا هذي دعاياتكم لوول ولا حاطين سرية تامة بالمعاملة

وحاطين المعلومات كاملة يعني ماكو اي مشاكل

انا اول ما خذيت الجياس هذيل قلت يمكن الجيس مسويته الجهة الي تبي تسوي دعاية

بس لما قلبت الجيس لقيت التعليمات المعهودة (إن هذا الدواء) لبلبلبلبلبلب وإلى نهاية

الناس لما تبي تسوي شي تسوي شي عدل ولا لا تسوي احسن

اترك التعليق لكم

:)

LCD wayed 5oosh:)

اليوم رجعت من الدوام ولا اشوف المفاجأة بالصالة الوالد خربها يا جماعة

رايح ماخذ تلفزيون ال سي دي 40 بوصه مع ان التلفزيون الي قبله كان 43

والله شغل عدل صج لما يقولك الصورة النقيه مع ال سي دي أنا معاهم وأبصم بالعشره

سمعت معلومة تقول ان قناة الوطن تبث برامجها بصيغةHD

وطبعا التلفزيون اليديد يدعم هالخاصية

فأول قناة حطيتها الوطن والله خوش الوان علييها

يعني لما تطالع شي بالنقاوة هذي تحس بفرق كبير

هذا التلفزيون الي خذاه شكلة مرتب والله ولابق على قولت ابوي

وهذا التلفزيون الي شلناه والله كان جيد بس اليديد احسن طبعا

:)

شرايكم تسوون لي قطيه وتشترون لي واحد حق غرفتي واذا عندكم خردة ما تبونها اخذولي بلاي ستيشن 3

مره وحده والله راح اكون شاكر لكم

:) ديكاتي واتشرط

حلاوة النوم

النوم هذا الشعور العظيم الي وصلت فينا الحالة قمنا نتفنن بالنومه كل واحد عنده ستايل خاص بالنومه

انا اليوم ابي اتكلم عن حالة من الشعور عجيبة واحس ان حلاوة النوم تكون في هذي الحالة

الحالة اهي الفترة الإنتقالية ما بين الوعي والنومه

شرايكم فيني بس

والله لما تدش الغرفة و تكون باردة جدا الي تخليك تخدر وما تقاوم النوم تحط راسك على المخدة الحريرية(اهم شي)وتاخذ نفس عميق

وتغمض عينك إلى ان توصل إلى مرحله انك ما راح تحس بنفسك وتكون هذي المرحله اهي ما بين الوعي والنوم

تدرون شنو شعور حلو خصوصا اذا كنت تعبان

واملق شي لما يحوشكم داء الأرق اففف راح تكروهون عمركم لإني جربت هالشي وخلاني اتنرفز ومالي خلق شي

فعلشان جذي حاولوا تستمتعون بكل دقيقه وانتوا نايمين

كتبت هذا الموضوع لإني بفترة امتحانات وصار عندي نقص نوم فإشتقت إلى هذا الشعور الي الله لا يحرمكم منه

تصبحون على خير

مشاعري اتجاه ورق العنب

اليوم لما رجعت من الدوام ولا اشوف جدر بالمطبخ شكله يغري :)

فتحت الجدر واشوف ذاك المنظر اللماعي الي يخلي العين تبرق من هول المنظر

واللعاب يسيل بشكل مو طبيعي سعيا إلى تذوق ما في هذا الجدر وتتحرك المشاعر والأحاسيس الي خلت ديكاتي ينسطل جدام الجدر مدة مو قصير

ما ادري شكو المشاعر والأحاسيس بس يالله

هذا اهو ورق العنب بالزيت يا سلام

ورق العنب مو اي واحد يضبطه ويا حلاته و اهوه حامض واحلى ما في السالفة ان تاكلة بارد او حار كله نفس المفعول يخليك تفصل عن الخدمه

فأصريت اني اقلب الجدر بعد معاناة ونقاش طويل مع الوالدة

وبعد معاناة اقنعتها اني اقلب الجدر

وهذي الصور

ملاحظة الي يوعان لا يطالع

خوش لمعة والله

يا معيريس:)

يا معيريس عين الله تراك والقمر والنجوم تمشي وراك

دم دم كح دم دم كح (يعني طبل)لووول

أمس كان يوم مليئ بالسوالف

ابتدي معاكم من اول ما قمت الصبح

اليمعه نمت الساعه5 وقعدت 9 فتقدرون تقولون اني ما شبعت نوم وكنت تعبان بس قعدت

ورحت بيت يدتي تغدينا وقعدنا نسولف و جذي ولا ابوي يتصل يقولي اليوم عرس ولد عمك لازم اتيي

اقوله انزين دام ان اليوم في عرس ليش ما قتلي من اول علشان اجهز نفسي وملابسي

يقولي ما ادري نسيت اقولك(اهوه ينسى عادي بس انا اذا نسيت تقوم القيامة) لوول

المهم طلعت الساعه3 رحت قصيت شعري الفلفولي وعدلنا الشغل

رجعت البيت طلعت غتره كنت موديها من شهرين المصبغه ولكن كانت جيده

وبعد صلاة المغرب توجهت إلى صالة الأفراح بالشعب

طبعا العايلة الكريمه أغلبهم كانوا موجودين ما يمديك تسولف او تشرب شي الا يايلك واحد مسلم عليك

احلى شي بالعرس لما وصلت فرقة الهبان لووول يا سلام شنو رقصوا رقص الربع

لووول الي حتى المعرس يابوه من مكانه وخلوه يرقص وصار ضحك والله

طبعا انا بالبدايه كنت خوش ولد لإن ابوي قاعد يشوف بس من ابوي اختفى جان يدش ديكاتي

بين الحضور ويفره فر الي ورجي قام يعورني من كثر الرقص تكسرت

لا ولما كنا بناخذ صورة جماعية مع المعرس لوول الشباب الي ورا المعرس ما خلوه بحاله

يسوون اشياء مو زينه لوول حتى المعرس عصب عليهم قالوهم بس ترا شقيتوني لوووووول

شطانة شباب والله

وبعدها طلعنا رحنا زفينا المعرس لما صالة الحريم والله وناسه

كانت المسيرة فيها نوع من الذرابه مو مثل ناس يطقون رشاشات وصواريخ ومدافع

خو ترا هذا عرس مو حرب وما ادري شنو الوناسه لما تطق بالرشاش ترا مليقه السالفة

وصلنا صالة الحريم ويينا نبي ندخل المعرس

طبعا لازم يرقصون مره ثانيه بصالة الحريم لووول عمي واقف يمي يقولي يبيله رقصه

جان اقوله عمي ترا الثقل زين احنا شباب مومشكله انت شايب خلاص راحت عليك

والله خلصنا وسلمنا على المعرس وتوكلنا على الله و رحنا الدوانيه انا مع جم واحد

انشالله عؤبال ما نشوفكم معاريس حق الي مو متزوجين والي متزوج اقوله عؤبال الثانية

تحديث:لازم البوست اقراه الف مره ويطلع فيه بدليه سوري يا جماعة

nightwish-nemo

funny door :)

Door Handle - Watch the top videos of the week here

خربشات يهال3

أمس بعد الغدا رحت قعدت مع اخوي اشوف شنو عنده ما عنده

ديكاتي: ها اشلونك شخبارك اشلون المدرسه؟

أخوي :(لازم يتحلطم)كله دراسه كله واجبات كله امحانات

ديكاتي:انزين شنو السيارة الي ودك تشتريها اذا كبرت؟

(جذي السؤال طرا على بالي)

أخوي: يصير اختار اكثر من وحده؟

ديكاتي :اي

أخوي: اول شي ابي اخذ سيارة تفرض هيبتها

(قصدة يوكن)

ديكاتي:قتله انت تعرف شنو يعني تفرض هيبتها

أخوي:اي يعني قويه

(ماشالله العقلية متطورة عندة)

ديكاتي:انزين شنو السيارة الثانيه؟

أخوي:ابي السيارة الي تشتغل بضغطة زر

(قصدة التيما)

ديكاتي:شمعنى يعني تبي ام ضغطة زر؟

أخوي:منو يستخدم مفتاح غيرك انت وابوك ،يبه الناس تطورت وانتوا للحين مفاتيح

ديكاتي:تدري اشلون انت مو كفو واحد يقعد معاك روح روح طالع سبيس تون احسن

لوووول

والله نرفزني لوول احسه ضغطني شوي مو ناقص الا يطقني شنو هالجيل

شكله وايد يتابع دعايات

يبيله مرسيدس

Mercedes Benz Power - Click here for the funniest movie of the week

تحضرني النكته الي تقول

بدوية غارت من ماريا مرسيدس جان تسمي نفسها وضحة نيسان

تدخين =الراس يقفل

في عادة سخيفه وبايخه وتبط الجبد قمت الاحظها مؤخرا وبكثرة بعد

عادة التدخين مو التدخين بحد ذاته لأ قصدي التدخين قبل دخول المحاضرة

والله يا جماعة ان هذا الي يدخن ويدش المحاضرة ما يفكر ان ريحته ممكن تزعج الي يمه وخصوصا اذا كان نوع الزقاير ريحته قويه افف

والله احس انزعج لا وهذا كوم ولما يطلب مني شي كوم ثاني الله وكيلكم احس الدخان يطلع من حلجه واهوه يكلمني ودي امسك خشمي لوول

يعني الزقارة ما تحلى الا قبل الماحضرة انزين روح غسل اشرب شي فوقها علشان ريحة الدخنه تخف او تروح

لا والكورس الي طاف بمادة فلسفه كانت صعبه نوعا ما

المهم كان في واحد كل مره يكون شارب شيشه ويدوام والله يا جماعة من كثر ما ريحت الشيشه قويه قمت افقد والله احس اني نشعت خلاص ومخي يقفل

ريحته قويه حتى مره سألني الي قاعد يمي انت شارب شيشه قتله لا هذا الي وراك جان يسأل الي ورا قاله ياخوي خوش معسل شنو نوعه هذا لووول
وانا اطالعهم واقول شهالخبول الي ابتلشت فيهم

خو حسوا على دمكم يعني الجو عندنا بالكويت حار ورطوبه وخيسه بدون شي وانت اتيي مدخن زقاير ولا شيشه بالله شنسوي بعمرنا احنا
لا وخصوصا اذا القاعه صغيرة بس تنطر المحاضرة تخلص علشان تنحاش

السبب الرئيسي لتقلبات الجو

على مدى اليومين الي طافوا الجو ما ينعرفله امس كان الجو عجيب بارد بعدها طق مطر شويتين بعدين رجع بارد، اليوم الصبح كان معتدل شوي صار رطوبة بعدها صار فجأة غبار بعدين صار خليط من الغبار والرطوبة،يعني بإختصار عشنا 4 فصول

بيومين

ولكن محد يعرف السبب ليش صار جذي حتى العجيري عجز ما يدري شقول

الخبر عندي وانا ديكاتي

الجو انقلب كل هالتقلبات لإني غلطت غلطة عمري وخرقت قوانين الطبيعه والفطرة الي فيني والغريزة الإنسانيه وطبيعة المخ البشري وما ادري شنو بعد

ودخلت سيارتي الحوش وغسلتها امس العصر،ومعروف اني منحوس

الله وكيلكم لما غسلتها خلصت جان اشوف السما تنقط لوووووووول قمت اتحلطم قاعد اقول

الحين طول اليوم ماكو شي لما غسلت سيارتي صار مطر

يا جماعة اتحملوا هالجو بس وعد مني اني ما راح اغسل سيارتي مره ثانيه توبه توبه

انا قاعد اتحلطم لإني يوعان والجو كئيب وراسي مصدع من الغبار

:)وسلامتكم

fedex ad. :)

Fedex[1].marooned - The funniest videos are a click away

صباح البيتزا

اليوم قعدت الصبح حسيت بيوع كافر فقلت حق الشغاله تسويلي توسته مع جبن على ما البس واتجهز انا

خلصت لبست ورحت المطبخ اخذت التوست واتجهت إلى السيارة فقلت على ما تحتر السيارة خل اكل

كليت اول لقمة حسيت بطعم غريب،قلت مو مشكله يمكن ريجي ناشف علشان جذي

اكلت مره ثانيه لا في طعم غريب قلت خل امر الفرع يم بيتنا اشتري شي اشربه

شريت عصير شربت شوية ورديت كليت يا جماعة للحين في طعم

بس شدعوه ديكاتي يوقف والله ما يهمك اهم شي تاكل وتسد اليوع

المهم لما خلصت التوسته وانا بالطريج قعدت افكر والطعم للحين بحلجي قاعد اقول معقولة الجبن محزر

لووول جان احس معدتي تقلب قلت والله شكله محزر وانا كليتها

اي خو يا الحلو دام انك حسيت بطعم غريب قطها لا تكملها بس لا والف لا لازم اكملها ادري بعمري

شوي بعد ما استقر الطعم حسيت بطعم دسم طعم خضار صلصله ما ادري طعم ما ينوصف

الله وكيلكم رجعت البيت جان اسأل الخدامه شنو الجبن الي حاطته ويطلع هذ

جبن بطعم البيتزا ومن الصبح على ريج ناشف كان مو شي حده