5roofa racer

خروووفه

انا جم مره قايلج لا تهيتين عيالج بالشوارع

بالله كلام هذا انا ادخل موقع ولا هذا الخروف راكب قاري ويناقز جدامي

اقوله وين ابله خروفه يقول رايحه تقرا بلوقات وتشوف الناس

لا لا عذرج مو مقبول

على قولت ولد الجيران
not acceptable

بس خوش لعبه جربيها

خروفه

حطي اللنك بموقعج علشان الناس تعرف خروفه اشلون واصله

ولها انتشار مو بس على المدونات على الألعاب والأعمال الخيريه والشباب والرياضه

:) انا قلت ما يصير العبها وما اقول حق خرووفه

اثر طلع عندج سوابق خرووفه

جربوا اللعبه

THE DARK NIGHT(BATMAN)

أمس مثل ما قتلكم بالبوست الي قبل هذا

اني بروح فلم باتمان

طبعا كنا مخططين انا ومعاذ نروح وحجزنا التذاكر

والله الساعه 4 ونص حجي معاذ كان توه قاعد من النوم

على قولته كان نايم بعمق 15 قدم :)

رحنا الأفنيوز وطبعا كنا محظوظين ان حصلنا موقف قريب لإن كان زحمه و نص الكويت بالأفنيوز

المهم دخلنا رحنا طلعنا التذاكر وقلنا نطقلنا دوره على السريع وبعدين نرجع ناخذ نفيش والخرابيط وندخل الفلم

والله وقفنا والدور كان طويل بس تقدرون تقولون كان يمشي بسرعه

قبلها كنا نتحلطم انا ومعاذ على السالفة الي لما توصل متاخر وتبي تطوف علشان توصل كرسيك واذا دست على ريل واحد وجذي

طبعا وصلنا كان في شباب قبلنا فإضطرينا نمر جدامهم ولكن الحمدلله مرينا بسلام

قعدنا الكرسي الي يمي كان فاضي جان اقول حق معاذ انشالله محد ايي يقعد يمي علشان ما يأذينا على ما يدخل

شوي جان ايون اثنين ويدخلون جان يضحك معاذ ويقول وصلوا الي ما بغيتهم

لا وكل شوي رايحين ورادين خو بعد قعدوا لازم تروحون الف مره وترجعون

-------------------------------------

الفلم

بصراحه الفلم وايد حلو احسه غير عن اجواء الجزء الي قبله

في نوع من التغيير الإيجابي طبعا

والي عجبني وايد دور الجوكر كان مبدع حيل حيل

يعني يايب الدور صح

بصراحه الي ما يشوف هالفلم يكون ضيع على عمره شي عظيم

وطبعا بالفلم راح تحشوكم نقزات وتخرع

لووووول انا جم مره نقزت ومعاذ ينقز معاي ما ادري انا خرعته ولا اهوه اخترع من الفلم

بالنهايه طلعنا وكان النقاش هل ركبك ودها تطق بعد هالقعده

طبعا الإجابه اكيد اي

الفلم طويل نوعا ما بس راح تلهون فيه وما تحسون بالتايم

:)

اليوم!!

لوول بوست قرقه بس ماكو شي مهم

اليوم وكالعاده طبعا بيت الجده الله يحفظها

ولد خالتي رجع من السفر اسبوع الي طاف فقالي تعال مبجر علشان نقعد وجذي

المهم صارت الساعه 8 ونص جان يدق وانا طبعا نايم غارق بالمخده وما رديت عليه

الحلو نرفزني صج

لأن دق 8 ونص

و8 و31 دقيقه

و 8 و32 دقيقه

بس خلاص تكفه يعني شفتني ما رديت خو لا تدق خلاص انطر لما اقعد افف شكثر يحن

المهم اخر مره دق رديت عليه قتله اوكي شوي واقوم

المهم قمت رحت تشورت(يعني خذيت شور)ورجعت غرفتي علشان البس ولا اشوفه قاعد يدق جان ارد عليه قتله يالله البس واطلع

سكرت التلفون منه ولا الحبيب قبلها بدقيقه هم كان متصل لووووووول


رحت لهم قعدنا نسولف وحطينا اخوه الصغير ونمنا فيه طق وتكفخ لوول لإن شيطان وقاعد يتحرش

مو صغير وايد عمره 16 او 15 ذبحنا قاعد يحذف علينا ويتحرش جان نمسكه ونعطيه المقسوم لوول مخنا فاضي

عاد اهوه كان راجع من النمسا ويابلي شغلات تذكاريه صغيره وحلوه

عاد تصدقون توني ادري ان

austria

اهي النمسا لوووووول

بس ليش حاطين بقره هل اهمه مشهورين بالبقر مثلا ولا بس جذي

وهذي مدالية فيها جرس

انشالله اذا شريت مياومياو(يعني قطوه)اعلقها عليها

------------

وخلصنا من بيت يدتي ورجعت البيت

الحين قاعد انشوف شنو اكوو اخبار بلوقريه

والله اليوم الموااضيع حلوه الظاهر البلوقريه يتفرغون يوم اليمعه ويكتبون

------------

اليوم بروح فلم باتمان انشالله اشوفه واعطيكم التقرير

لإن اعتقد الفلم وايد حلو والكل يمدحه

نشوفكم على خير :)

إلى أين يا كلية العلوم

متى نوصل إلى نهاية الطريق




مع نهاية الكورس قامت الأمور تصعب نوعا ما

المواضيع قامت تصير معقده تحتاج تفتح مخك

أنا بالنسبه لي مو مقصر ولكن قاعد اشوف الي معاي واحد ورا الثاني يطيحون

بالنسبه حق طلبة الأدبي بصراحه حمل كبير ان ندرس شغلات مثل هذي خصوصا مادة الأحياء

فيها تعمق كبير بالخلية والسوالف هذي

ولكن الله كريم

--------------------------------------------------

المقدمه الي طافت كانت تمهيد حق هالنقطه الصغيره الي بتكلم عنها

لما ايي دكتور ويقول

انا صارلي 20 سنه بالجامعه ماكو احد اخذ بمادتي
A

انا بس بعرف هل هذا الشي مفخره لك

او ان راح يرفع من هيبتك

يعني في ناس تستحق الدرجه العاليه ولكن انت ما تعطيه مجال ان الطالب يوصل لها حتى لو كان يستحقها

يعني شنو الهدف وين النقطه الي تبي توصلها

هل هذا راح يزيد معاشك ولا مكانتك الوظيفيه راح تكبر

يا جماعه عطوني رايكم

حط نفسك مكان دكتور بنفس العقليه هذي وابيكم تقولون لي بشنو تفكرون

شنو الشي الحلو اذا سويتوا جذي

لإن بصراحه مو قادر افهم اشلون هالناس تفكر

يبيله نجرب !!

High Pitch - These bloopers are hilarious

قرقر واجد مخ ماكو!!

لوول اليوم قمة الإبداع

لما تكوون راجع من دوامك وانت بالطريج وماخذلك اسبوع أوف من الدكتوره

وحاطين على المرينا حبيبي شمعة الجلاس

وانت تغني معاهم

تدخل لفت بيتكم

ولكن تشوف منظر غبي وغريب بنفس الوقت

تطق لفة بالفريج وترجع باك(بايقها من المرينا)المهم

ولا تشوف على راس اللفه هالمنظر الغبي

لوووول اي لا تستغربون

3 سيارات طالعين من اللفه ومتداعمين

والله يا جماعه ان المنظر غبي صج صج غبي

شنو الي 3 يطقون في بعض جذي خو مو قاعدين بخط سريع احنا

ترا والله داخل فريج

نزلت اشوف شقصتهم ولا الحبايب 3 هنادوه

كل واحد يسب ويقول هذا عمي ما يشوف دعمني وثلاثتهم عندي كل واحد يقطها على الثاني

ما ادري الظاهر عبالهم شرطي انا او شي جذي

ترا والله انا ديكاتي لا رحت ولا ييت انا شكو منو الي دعم

انا نازل لقافه بس بشوف شنو صار

طبعا السيارات مو متعوره كلها طقات حفيفه

يعني لو انا مكانهم جان مشيت ولا اقعد بالجو هذا الساعه 1

وينطرون الدوريه اتيي

وطبعا انا مشيت ورجعت تغديت وقعدت وطلعت لهم واهمه للحين واقفين ناطرين الدوريه

والله شكله راعي الدوريه مسكب فيهم :)

بس صج صج هنادوه يعني وين مخكم يا الأغبيه

وشر البلية ما يضحك مو جذي يقولونها؟

:)

خذلك كاس

آه ويلومني لو قلت احبه ترا مو بس احبه انا اتنفس هواه

لوووول ترا هذي مو وحده هذا ابوي

عليه سوالف بطاليه خنت حيلي وصلت من الدوام ولا اشوفه متشرقد بالصاله مريض

ماله خلق شي

قاعد يشوفني داخل وطالع وياي

يقولي انت ما اذيتني شعندك رايح ياي

جان اقوله شدراني ما ادري وين قطيت تلفوني

واخر شي طلعت ناسي التلفون بالسياره كالعاده

المهم السالفة الي بدردش فيها غير

ذاك اليوم راجع من الدوام وحر ومالي خلق الشمس كافخه فيني عدل

ولا ابوي قاعد يتغدا خو اهوه 12 ونص مطيح غداه ما ينطر احد


وانا لو اتغدى قبلهم يقولي اشفيك ما فيك صبر خو انطر الأكل مع الجماعه زين لا تاكل بروحك

المهم

عاد دخلت سلمت رحت بدلت ورجعت بشرب ماي ولا يقولي اشفيك

قتله تعبان والجو حار يعني شنو متوقع مني

جان يقولي تعال اخذلك كاس من هذا وشوف

طبعا الي يشوف البطل على طول راح يصير جذي

اقول حق ابوي هذا شنو

قالي لا تسأل جرب وشوف النتايج

طبعا انا قاعد اطالعه قتله صبلي خنشوف

صب شويه قتله بس ربع قلاص شنو بحلف عليه

جان يقولي هذا غالي شعبالك انت

بغيت اقوله لا يكون وايت واين ما ادري رد واين بس

لووول

انا قلت الوالد خربها على كبر قام يلكه بالبيت

المهم شربت زقمه ولا تدرون شنو مررررررررررررررررررررررررريييييييييييييييييييييير

يذبح قطع مصاريني اففففف

لما شربته قمت اكح ويهي قلب والحلو ابوي ميت ضحك

يقولي ها شرايك بذمتك ما نسيت التعب والحر


لووول قتله وانت قاعد تجرب فيني وتضحك ها

يقولي شسوي فيك بعد الي يشوفك يقول ياي من الجامعه مشي
:)

Ducati like 2 move it move it:)

مساكم وصبحكم الله بالخير جميعا

اليوم خلصت عشى وقاعد احوس ما ادري شسوي ماكو شي يتسوى

قاعد ادورو ادور وابطل تلفوني ابي اسمع اغنيه جذي نقازية ماكو

مريت على الأخ الصغير ولا حاط ام بي سي 3

قعدت معاه جان يحطون اغنيه لووول قمت انا معاه نحرك روسنا فوق وتحت مع الغنيه

اطالعه جان يطالعني ونفطس ضحك

عاد قلت الا اطلعها لوول حدها عجيبه

لووول وانا قاعد ادورها واقول موف ات موف ات

لوول لا صج صج حسيت نفسي فاصل




لوووول صج صج عجيبه

طبعا الإغنيه حق فرقة
Real 2 Real

اصدروها سنة 1994

يعني الإغنيه مو يديده صارلها دهر بس هبينا فيها الحين

والي يبي يضحك صج صج

يدخل على اهني ويشوف جيم كيري واهوه يسوي حركاته العبيطه لوول صج خبل

لوووول وآي لايك ات موف ات موف ات :)

بطيني دوت كوم

الظاهر بالآونه الأخيره انضميت إلى قروب البطينيين

صاير كل ما جابلت النت وحسيت نفسي يوعان

اقص على عمري وادخل موقع طلبات دوت كوم

هذا المفروض يسمونه بطينيين دوت كوم

والله منسدح وقاعد اشوف هالمطاعم مصففه جدامي وتدخل على المطعم ويحطلك المنيو كله

وكل اكله تتكون من شنو وانت تختار الي تبيه

ولو حبيت تحط اضافت ولا سوالف هم تقدر

اليوم ثاني مره اطلب منهم شكلي استانست على السالفة

أول مره طلبت من برجر كومبني

انا كنت مجربه من قبل وجربته مره ثانيه وللحين رأيي فيه ما تغير المطعم عادي ما في شي زود واكله عادي أيضا

بس اليوم قلت خل نغير

دشيت على مطعم باستامانيا وقعدت احوس

انا صج اني شفت ان وايد عندهم باستات (جمع باستا)ولكن شدتني البيتزا

اها فقعدت اشوفلي شي لقيت وايد اشياء غريبه

ولكن المثل البطيني يقولك جرب الشي على اصوله علشان تعرف طيبه

يعني اذا شي تبي تجربه اول مره جرب شي معروف بعدين اذا عجبك خربط

جان اطلب بيتزا وسط ببروني مع اكتسرا جبن هذي شغله اساسيه بالبيتزا

المهم قالي اوكي وكل شي

توقعت انهم يدقون علي لإني اول مره اطلب ولكن لا حس ولا خبر

قعدت اساحل عمري واطالع تلفزيون بس لا يوعان شسوي ادق على منو

جان ادخل على موقع طلبات ودخلت على اكاونتي

ولا في ان اقدر اكلمهم اونلاين

يهب هذي التكنولوجيا ولا بلاش

المهم طقيت جان واحد يقولي هاي

وانا يحليلي اقوله هاي

المشكله قاعد يكلمني انجليزي يبيله شغل يعني

المهم بالنهايه قتله شنو مشكلتي

جان يدق على المطعم ويشوف طلبي جان يقولي طلبك تأخر شوي بس الحين اهوه بالطريج

والله وناسه انا اكلمه من النت واهوه يشوفلي الطلب خلص ولا لأ

شنو هالتطور الي وصلنا حقه

المهم قتله مشكور ويعطيك العافيه

بعدين كتبلي جمله بالإنجليزي ما ادري شنو يعني بس حسيت انها تقول لا تكثر سوالف ترا هذا مو جات

مع ان شكله الصفحه مثل الجات بالضبط

المهم 5 دقايق ولا حبيبنا يوصل

يهب وطيران عند الباب عطاني البيتزا ولا احس انها بارده شوي

جان اقول اي نسيت هذيل مو بيتزا هت ما عندهم الفرن المتحرك

المهم عطيته فلوسه ودخلت البيت

بطلت البيتزا ولا اطالع يهب شنو هذا طالبها حق زرزور انا

الله يعز بيتزا هت اتييلك شكبرها وشغل عدل

المهم قلنا يالله يمكن العبره بالطعم

والله اكلت اول قطعه قلت ها لا للحين ما بين الطعم

اكلت ثاني قطعه قلت لا يبيله الثالثه لإن يقولك الثالثه ثابته

اكلت الثالثه جان يطلع التقرير

مممم البيتزا جيده لا بأس فيها ولكن مشكلتها ما اتييك حاره وايد مثل هت

ممم وتوصيلهم طول شوي

ولكن بشكل عام البيتزا عاديه ولا الببروني حاطينلي جم وحده عبالهم بحلف عليها انا خو حطوا

شنو هالنحاسه

المهم انا شفت عمري جذي وسالفة وناسه كل ما تطلب يعطونك نقاط والله شي زين هالموقع

والله صاير بتمبه هاليومين الله يهداني

منهد على الأكل ما ادري شالقصه

بس يالله ناكل الحين وبعدين رجيم مو مشكله :)

تأجيل الدراسه إلى بعد شهر رمضان

اليوم الخبر المتصدر بالجرايد الكويتيه

والي يهم الطلبه على وجه الخصوص

طبعا اخص طلبة المدارس

الخبر يقول ان الحكومة رفضت اقتراح مجلس الأمة بتأجيل العام الدراسي الاول إلى بعد شهر رمضان

وهذا ما يشمل طلبة الجامعات والمعاهد :) هذا اهم ما في الموضوع بالنسبه لي

بس خل نآزر طلبة المدارس

طبعا و كالعاده استنكر نواب مجلس الأمة هذا القرار

وبدأو بالتحلطم واصدار التصريحات الصحفيه

ولكن يقولون اذا ما قدروا على تأجيل الدوام راح يحاولون انهم ياخذون اجازه بالعشر الأواخر

والحكومة أرجعت سبب عدم الموافقه على تأجيل الدراسه

بأن العطلة الصيفيه القادمه راح يتأخر موعدها أو تتقلص مدتها

وراح تأثر على التحصيل الدراسي للطلبه

وأيضا إمتحانات الطلبة راح يتجدم موعدها

وفوق هذا راح تأثر على الجدول او التقويم الدراسي للعام كله

------------------------------------------------

خلصنا من كلام الجرايد الحين وصل دور التحلطم

اول شي ناخذ السالفه من الناحيه الإيجابية

يعني اذا تأجلت الدراسه إلى بعد رمضان راح يكون تخفيف على الطلبه بشكل كبير لإن لا ننسى أن احنا راح ندش رمضان بشهر 9

وطبعا درجة الحراره راح تضل بغليانها وحرارتها

والدوام متعب

وخصوصا النظام الموحد الله يعينهم صج كاسرين خاطري يعني اهمه بالدوام العادي كل اسبوع امتحان

هالمره مع رمضان شنو راح يسوون

وطبعا في حال انت أجلت الدراسه إلى بعد رمضان بشكل اوتوماتيكي وطبيعي راح تتأخر العطله الصيفيه

الناحيه السالبية

طبعا راح يخترب نظام العطل والدوامات طول الكورس وراح تصير تعديلات وايد حسب كلام وزارة التربيه متمثلة بوزيرة التربيه

انزين يعني لازم احد يضحي بالنهايه

انتوا شنو رايكم بالموضوع شنو تفضلون

هل انتوا مع تأجيل الدراسه ولا مو فارقه معاكم ؟

-----------------------------

اليوم يايبلكم تحلطم اخوي بعد علشان اعطيه مجال يعبر

من قعد من النوم الساعه 2 الظهر

كله نوم وسهر بعد شسوي مو انا مالت علي مجابل هالدوام

المهم قعد من النوم وراح خذا الجرايد وجابلني

اول ما قرا الجريده قاعد ويتحسب على الوزاره

حسبي الله عليهم وحسبي الله عليهم صاير جنه شايب

لا بس بعدين لما مل جان يغيرها حسبي الله عليهم سبع التحاسيب لوووووول

يقول شنو هذا ما يصير نداوم برمضان

قتله ليش يبه ما يصير خو دوام عادي انت كنت تداوم قبل برمضان وين المشكله الحين

جان يقول انت قبل كنت تداوم معانا يعني عادي كلنا ندوام

بس برمضان هذا انت تنام وتسهر وتطالع تلفزيون واحنا نداوم ما يصير

يعني اهوه كل القهر ان ما يصير انا انام واهوه يداوم

لووول

خو انا طول الصيف مدوام يعني ما ارتاح بالله

الحليب!!

اليوم في محاضرة في كلية العلوم

يعني شي طبيعي دام احنا بكلية العلوم راح ندرس شي علمي

هالفتره قاعدين ناخذ عن جسم الإنسان

عاد وصلنا حق الجهاز الهضمي و توابعه وشنو فيه ما فيه

المهم واحنا بنص الشرح ذكرت الدكتورة الحليب واشلون نستفيد منه وشنو الأنزيمات الي تنفرز حقه

اكتشفت لأول مره ان احنا ما نستفيد من الحليب نهائيا على حسب كلامها

تقول الدكتوره على روايتها انا مالي شغل اي

تقول ان اليهال الصغار لما 5 سنين يقدرون يستفيدون من الحليب بشكل كامل

يعني لما اي واحد من الكبار لما يشرب الحليب يكون لمجرد الإستمتاع بالطعم وبس ماكو شي اكثر من جذي

وقالت ان الصغار يستفيدون من الحليب لإن عندهم انزيم اسمه الرنين

والله انا بحثت عنه و اهوه موجود بس اسمه غريب

ولكن صج انصدمت

بس ما ادري يعني لازم في فايده حقه ما يصير جذي لا فايده ولا عايده

ولا انا ماكو شغل اشرب حليب علشان استمتع بالطعم

عاد في وايد ناس ما يحبون الحليب لووول

مع ان الحليب ما في شي حلو بس انا احبه مع سكر

لإن في ناس يشربون خلط زلط بدون شي

والحين اذا فرضنا كلامها صح

ليش هالدعايات الي تارسه الديره والحليب والحليب

ولكن معلومه اضافيه تقول الدكتوره ان اللبن والجبن

نقدر نستفيد منه لإن تخمر وناخذ منه العناصر الي نستفيد منها

والله اول مره احس اني فاهم شي بالعلوم

يعني زين طلعت بفايده

الله يثبتنا على هالشي قولوا آمين خل نخلص الكورس على خير

كلية العلوم-تقرير نص الفصل

اليوم بعد ما امضيت نص المده المقرره في سجن كلية العلوم

وانا اعني كلمة سجن لإن الكلية مريضه

قبل كنت اعيب على الآداب واقول قاصين علينا حاطينا بمدرسه بس كشخوها وسووها كليه

بس الحين اقول الحمدلله على كلية الآداب

المهم

اول شي راح اوريكم من بعض المناظر الغريبه الي بالكليه

أول شي انا عمري بحياتي ما شفت شي جذي

حتى بكلية الشريعه ما وصلوا حق هالتقنيه الي وصلت لها العلوم شوفوا

بالله أكو احد يحط بمكينه مثل هذي اشرطه او سيديات فيها قرآن وادعية

خو شدعوه ترا انتوا بالعلوم يعني المفروض تحطون لهم شغلات علميه

انا ما اقول ان المفروض ان ما يحطون هالشي بس كل شي بمكانه حلو

يعني ما يصير اييب ميكانيكي واقعده بورشة كمبيوتر

ثاني شغله عاد هذي صج صج شغل عدل

لوول المختبر المتنقل

اي على قولت صاحبي الي معاي يقول حلاته ناخذها ونقز فيها على البحر

وانت ماسك ضب وانا مطلعلهم جرابيع نخرع الأوادم

بعد مختبر متنقل مال دراسات صحراويه شنو تتوقعون داخله

لوووول


لا وبممرات الكليه حاطين على الجوانب صور العلماء ومواليدهم وشغلات عنهم

والله تلوع جبودكم وانتوا تشوفون هالشغلات

على قولت محمد أنا انحدر من سلالة انشتاين لووووول

و مره كانت صورة نيوتن يمنا جان اقوله محمد جدك شوف جدك نيوتن

جان يقولي ديكاتي لو سمحت عن الغلط لا تقعد تخلط بنسل العايله

نيوتن هذا خالي من صوب اهل الوالده

لوووول والله خوش واحد

-----------------------------------

الحين نطب شوية بطلبة العلوم

هذا الكلام ما ينطبق على الجميع ولكن في نسبه من هالحالات

شكل رقم1: تشوفونه لابس نظارة والقميص داخل او يكون لابس بدلة رسميه ويكون نشيط ومتحدث ويعني انسان مثقف
geeeeeeeeeeeek
لوول توني متعلم هالكلمه

شكل رقم2:طبعا لابس نظاره والفنيله تكون وسيعه وماله خلق واللحيه الحجريه لازم ولما يمشي تحسون ان هالولد في شي مو طبيعي

شكل رقم3: تلقونه يمشي بسرعه يعني بخطوات هروله وتلقونه يكلم عمره ما ادري شقول ويحرك ايده ما ادري قاعد يحسب معادله ما ادري شسوي وبصراحه هذيل يخرعون

شكل رقم4:هذا القيزي مال العلوم تلقونه كاب ولازم لبسه كل لون غير عن الثاني يعني ماكو شي راكب على شي وماله خلق الكليه بس يقول حق عمره على الأقل انا بكلية العلوم

شكل رقم5:هذا الزقرتي تلقونه مضبط حاله ويلبس احسن لبس ونظارته الشمسيه وسكبه شغل عدل ،بس المصيبه بعدها بجم يوم تشوفون ماخذ واحد من الشكل 1 او 2 وقاعدين بكافيه و رقم 1 او 2 قاعدين يشرحون له شي

أما البنات ما ابي اطب فيهم لإن عليهم سوالف بعد بس مو كثر الشباب

واذا الله احياني وإياكم اوافيكم بتقرير نهاية الكورس وراح اطب بالدكاتره

اخاف اطب فيهم الحين حوبتهم تطلع فخلوني خوش ولد

رسالة إلى ملحد مجهول

انا بنزل هالموضوع لإن في واحد حلو قاعد يحط عندي تعليقات مبدعه

طبعا وكالعاده شغل الجبناء يكتب التلعق تحت اسم
anonymous

اوكي مو مشكله مطوفينها لك

وطبعا اهوه نزل تعليقه على موضوعين

الي اهمه موضوع وفاة جاكي شان

وموضوع أم بي سي - ايران

وطبعا كل تعليق اطول من الثاني

انا بالبداية علشان اكون صريح عطيته طاف لإن مو مستعد اقرا تعليق يتكلم عن شغلات انا مالي شغل فيها

ولكن بعدين قلت حق شخص شوفلي هذا شنو موضوعه والله ما قصر

راح هالشخص وقرا التلعيق

قالي هذا واحد ملحد ما عنده اي اعتبار للإسلام والدين

ممم انا شفت جذي فالحين انقل لكم بعض الكلام الي كاتبه والي يعتقد فيه

وجد الكون لايعطينا مبرر بتأليف قصص خرافية وتصديقها مثل خرافة الله والخلق والسموات السبع وغيرها من قصص الأطفال

وطبعا كل شي يرجعه ان وكالة الفضاء ناسا قاعد تبحث بهالموضوع وكيف نشأت الحياة

الله: فكرة خرافية

القرآن: هو مجموعة من الأشعار وقصص خرافية منقولة من الديانه اليهودية.

محمد: إنسان مريض نفسيا وأيضا عقليا بمرض الصرع

وطبعا كلام وايد الي يحب يشوفه خل يدخل التعليقات بالمواضيع الي ذكرتها لكم


خلصت كلامك قلت الي بخاطرك الحين

اوكي الحين انا برد عليك

أول شي لما تبي تنشر أفكارك الغبيه والي انت تعتقد فيها روح انشرها بمكان يعطونك ويه فيه

ثاني شغله انت منو علشان تقول هالكلام لا يكون بس وصلت مواصيل الناس الي مو عاجبينك الي تكلمت عنهم

ثالث شغله انا اقول وغيري يقول الحمدلله على نعمة العقل

بالنهاية ترا ما يشرفني ترد عندي

واذا ما كنت شخص حتى الجهه الي قاعده تحط هالتعليق شوفولكم مكان ثاني

MBC Persia أم بي سي -إيران

اليوم وانا ادور بالتلفزيون

ولا اطالع على قناة أم بي سي اعلان عن افتتاح قناة جديده تابعة لمجموعة قنوات الأم بي سي

واهي أم بي سي الفارسية

وهي قناة متخصصة بالأفلام أيضا ولكن بترجمة فارسيه حسب ما فهمت

والقناة اذا اكيد موجهة للشعب الإيراني والمتحدثين باللغة الإيرانيه علشان يطالعون جميع الأفلام بترجمة فارسيه

طبعا القناة حسب ماهو مكتوب بالموقع راح تنقل أفلام مثل الي تنقلهم على قناة تو والفور والأكشن

تردد القناة:

Satellite: Nilesat 101	Satellite: Arabsat B4
Frequency: 12341	Frequency: 11919
Polarity: Vertical	Polarity: Horizontal
Symbol Rate: 27500	Symbol Rate: 27500
Code Rate: 3/4	Code Rate: 3/4

هذا التردد حسب ما هو مكتوب بموقعهم

ولكن انا صادفتني مشكله مع هالتردد ولكن حصلت تردد ثاني

يعني الي تواجهه المشكله يحط هالتردد

12347 V Sr 27500

وهذا موقعهم الرسمي

http://mbc-persia.com/

قمة القهر عالصبح

ايييه تدرون شنو القهر عالصبح مليييييق

قبل يومين كنا في محاوله ان نقنع الدكتورة علشان تعطينا بريك اليوم على اساس عندنا امتحان

والحمدلله تفهمت الموضوع وقالت لنا اوكي اليوم انتوا اوف

فقلت دام الدكتورة عطتنا اوف خل نكلم الدكتور مال محاضرة الصبح جود يعطينا

علشان يصير طول اليوم ماكو دوام

والله وأيضا بعد جهد بسيط ومن جم واحد معاي قالنا الدكتور خلاص لا اتيون

قلنا حلو خوش كلام انا اهني كيفت قلت عيل بسحبها خوش نومه

أمس بليل بحاول انام ماكو نومه يمين ويسار مو قادر انام

فقلت خل اقعد دام ما وراي شي الصبح

قعدت احوس وجذي لما يتني النومه وفعلا بعد جهد جهيد نمت

قلت الحين على هالجو البارد النومه تصير حلوه

ما مداها غطت عيوني ولا يصير شي ما كان متوقع

ولا كنت حاسبله حساب ولا ايي على البال

الساعه 5 ونص الفير تنقطع الكهربا ياااا سلاااااااااااااااااااااام

تكفون ليش جذي انا ما صدقت انام وبالغصب ماخذ اوف من الدكاتره

يعني ليش ليش يصير جذي والله بذمتكم مو قهر

بالله اكو ضغط كهربا من الفير بالله الناس نايمه شنو هالضغط الي يخليك تقطع الكهربا عمه بعينك

يعني هذا الي قطع الكهربا احسه قاعد يراقبني يقول اشلون ديكاتي ينام قرير العين

لا ما يصير لازم اقطع عنه الكهربا واخليه يقوم غصب

والله والجو حار والمشكله لو قعدت ماكو شي اسويه كهربا ماكو ودوام ماكو شسوي بالله وفوق هذا دايخ

لا والحلو بالسالفة ان ابوي الي ولا مره بحياته طلع من البيت 6 ونص اليوم سواها

اشوفه طلع مبجر شنو هالحب حق الدوام يا الوالد

انا شفت ابوي طلع قلت يالله خل اطلع انا بعد اروح اشوفلي مكان بارد نقعد فيه

فقررت اروح القهوه لإن ساد سمايل قاعد اهناك من الفير

وطلعت على الخط السريع وتحشوني زحمة الصبح افففف شنو هاليوم المليق

والله ما همني خذيت حارة الأمان ورحت المكان الي ابيه

الله يستر من باقي اليوم

بس صج صج سالفة تقهر

انشالله لما ارجع الكهربا اشتغلت علشان ارجع اكلم نومتي

وصباح الخير على الكل

مراسلكم ديكاتي من وسط القهوه

معلم ستالايت

اليوم انا بشكي همي تعبت خلاص

صج صج زهقت

ابوي صارله 4 ايام يشيل الرسيفر ويحط غيره

وكل يوم تعال يا ديكاتي ضبط الرسيفر وعدل القنوات

والي يبط الجبد يبيني ارتب القنوات على حسب تصنيفه

يعني يبي القنوات الكويتيه اول بعدي السعوديه والخليجيات وراها

بعدين اللبنانيات وربعهم

وانا اقعد اشيل وحده وحده وانقلها

وتطلعلك وحده ما تشتغل

عاد تعال دور غيرها واذا مو موجوده تعال طلع التردد ويعني حوسه

والحين اخر شي بعد 3 ايام من العباله وكل شوي مناديني تعال وتعال

والمنيو هذا غير وهذي القناة ليش ما تشتغل

اخر شي جان يضرب الرسيفر بكبره ما قام يشتغل

عاد بيني وبين نفسي قاعد اضحك الضحكه الخبيثه نيهاهاها قلت احسن هذي حوبتي اكيد

شوي ولا يطلع من غرفته رسيفر ثاني

ويقولي لا تخاف ماكو رحمه بعد اليوم هذا رسيفر ثاني اقعد ضبطه

عاد انا اهني ام العبيد كلها طلعت والله دوخنا خلاص

من كثر هالرسيفرات الي سويتها هالجم يوم عرفت وايد اشياء قمت اضبط كل شي

يعني الظاهر راح يكون مشروع زين لو افتحلي محل رسيفرات

بس هم ملل ما يصير جذي اهوه بس يشيل ويحط وانا اعدل

واذا قتله ليش ما تدق على واحد ايي يضبطه لك

يقولي ليش اعطيه 5 د.ك علشان يسوي شغله الكل يعرف يسويها

اقوله دام الكل يعرف يسويها انت ليش ما تسويها

يعصب ويقعد يزف لوووول

عاد اهوه ينطر علي الزله علشان يطبق العقابات

يا ماكو فلوس ولا ما تتأخر ولا ما تروح وكل ساع يدق اذا طلعت

فأنا اسوي الي يبي علشان ما اتعرض للبطش

:)

بس هم ظلم ترا

ديوانية الربع

:)

لوول العنوان اعتقد اني بقته من اسم قهوه بشرق

لووووول مو مهم

اليوم بسولف وافرغ ما في جعبتي عن الدوانيه

طبعا الدوانيه من العادات الكويتيه الي وايد من الرياييل مواضبين عليها

ويقابلها عند النساء قعدة جاي الضحى

:)

شاد حيله ديكاتي ادري

الله يسلمكم ربعنا الي الي اهمه قروبنا العجيب دايما نتيمع بمكان كل جمعه

طبعا الربع في الكبار والي متزوجين وعندهم عيال بس يحبون يقعدون معانا يعني فري عادي ونستفيد منهم ومن خبراتهم يعني

وفي الصغار الي بالثنوي ما اعتقد عندنا اصغر منهم

والغالبيه من الشباب الي اهمه احنا الي ندرس بكليات يعني اعمارنا من 19 وفوق

كل واحد خلاص زاير الأهل وما عنده شي بليل نتيمع ونقعد نسولف وندردش

الجو يصير حلو وتصير نقاشات منها الغبيه والي ما يتكلم فيها غيري انا وساد سمايل صاحبي

أو تكون هناك نقاشات جاده الجميع يشترك فيها

وطبعا لازم يكون هناك نوع من الضغاط علي سبيل الضحك والنكت واخر سوالف الشباب

ومن السوالف اليديده الي دخلت الدوانيه على أيدي الجيل الجديد (لا ديكاتي اليوم متأزم ما ادري اشفيني اكتب جذي بس يالله)اي

اي من السوالف اليديده ان قمنا نحط اضافة إلى التلفزيون والرسيفر بلايستشن3

وايرلس حق الإنترنت والي عنده لابتوب تلقاه شابك ولا قاعد يسوي شي

في ناس تعارض هالشغلات فيقولون ان الدوانيه المفروض تكون خاليه من الأشياء هذي علشان يكون هناك حديث متبادل بين الجالسين

ممم نسبيا كلامهم صح بس احنا شباب يعني اذا اهتماماتنا ما كانت في موضوع محدد ولا شغلات تستحق يدور عليها نقاش

فإذا دخلنا النت وهالسوالف والبلاي ستيشن راح يكون نوع من التسليه والكل يشترك فيها وما راح نمل

يعني اذا كلا نسولف الساعه 11 الكل طالع

احنا اول ما ندش نسلم نقعد شوي نتحرش ولا شي طبعا هذا النظام مالي انا وساد سمايل

انزين بعدين نبطل النت نشوف شنو اكو ما اكو كل واحد يوري الثاني العاب او شغلات يديده وخو اليوتيوب لازم كل واحد يشوف فيديو تشوفون العموم متيمع فوق راسه قاعدين يطالعون معاه

وعندنا مصادر ينزلون افلام يديده وجذي وكل واحد يعطي الثاني

بعدين نشغل البلايستيشن ونقعد نلعب نلعب شريط واحد الي اهوه كرة قدم على قولتهم الدوري الياباني :) خو من اول ما نشغلها ما نطفيها الا قبل ما نطلع يعني الشريط يتحلل عدل


عاد اليمعه الي طافت كانت القعده عند ساد سمايل وكانت والدته طابخه لنا العشى

فأول ما فرشوا السماط ديكاتي خو ما يستحي عادي قبل لا يحطون شي انا قاعد مجابل السفره

والشباب قاعدين على القنفات فوق يطالعوني

لوووول اول ما وصلت طاسة الي فيها سلطه جان ساد يقولي دامك قاعد اخلطها لووول خلطتها وحطيتلي وقعدت اكل والشباب يطالعوني

لووول وساد يرفعلي يقولهم لا تطالعونه خلوه ياكل بالعافيه عليه البيت بيته ما يحتاج اعزمه (احرجني )بس و كملت سلطتي

ونزل ذاك العيش الي ما قدرت امسك اعصابي يوعان

ودياي محشي ومعكرونيه وكوربطاط ومرق باميه

ترا هذا عشى يعني لوووووووول

ونوعين سلطه

وتبون اقولكم شي

ترا والدة ساد من افضل الناس الي يطبخون ماشالله عليها يعني شي عجيب

بكل شي مبدعة طبخ كويتي أمريكي حلويات كل شي كل شي

وطبعا نسيت اقولكم عن الحلو الي كانوا مسوينه

كان الطبق الي صج خلا فيوزاتي تضرب ومعدل السكر يرتفع وعيوني طلعت من كثر ما اهوه حلو

يعني صج كيكه حلوه اسمها كيكة رهش بحطلكم الصورة بس مو تسعبلون :)

وكان في بعد بسبوسه بالقشطه بس انا مو من ربع القشطه

على قولت ساد بعد العشى

والله اليوم اكلنا وايد لما تبطبطنا لوووووووول


سوري ما قدرت اخذلكم صوره قبل لا يصير الهجوم الكاسح لإني انا كنت قائد هذا الهجوم
اهني صورة لآثار الدمار بعد الحرب

خو بعد العشى تشوفون الشباب كل واحد مستلقي على قنفه يفكر بما اقترفته يداااه

وبعد العشى تكون السوالف توصل ذروتها لإن مالنا خلق نسوي شي غير ان نتكلم فتطرح المواضيع

واذا ماكوا مواضيع كل واحد يتحرش بالثاني وتطلع الفضايح

وعاد اخر شي نرجع نلعب ونشبك لما كل واحد يحس عمره دايخ عاد يشيل قشه ويطلع

لهذا الدوانيه شي عجيب ومكان تلهي في الوقت مع ربعك بدون خرابيط وعربده

واحسن من الفراره بالشوارع والمدابج يمين ويسار الثقل زين

وعلى قولة ساد حقوق الحفظ محفوطة مو تاخذون الصور وكل وحده تقول شوفوا انا اليوم سويت هالكيكه

وطبعا العشى هذا كان ساد مسويه بمناسبة تخرج
3bady

لوول على البركه وانشالله نشوفك معرس


:)

عاوز فحص حضرتك!!

خخخخخ الله ياخذه خرب مزاجي

اليوم وانا راجع المغرب وصلت البيت قاعد اوقف السياره واشيل اغراضي

ولا اشوف اثنين مصاروه لابسين بدلات وكل واحد شايل بإيده جنطه

الي يشوفهم يقول رجال أعمال

المهم وانا نازل من السياره ولا واحد منهم يلتفت صوبي جان يسلم

ورديت عليه وكملت اطلع اغراضي من الدبه

جان ايي كيف حالك واشلونك وشخبارك وعساك بخير واشلون الدوام (شايفني شايل كتبي و الابتوب)المهم

رديت عليه وانا مالي خلقه

جان يقولي احنا شركه بتسوي فحص ونتايجنا مضمونه

ويقولي عن الشهادات الي عندهم وان اهمه من الشركات المعروفه عالميا

وانا واقف اطالعه اي نعم معاك نعم نعم كمل

اخر شي جان يقولي مش عاوز نسويلكم فحص

جان ابقق عيوني هاااااااااااااااااااااا شنو شنو

شتفحص خير يبه شنو تبي تفحص

جان يقولي لأ حضرتك الظاهر ما فهمتني

احنا نفحص الماي مال البيت

وانا عمه بعينك الله ياخذك خو قول من اول خليتنا نفكر بشي ثاني

ويقولي انتوا تشربون ماي وهل انتوا متأكدين ان الماي هذا نظيف ونسبة الكلور فيه زينه

والسوالف هذي

جان اقوله صارلنا عشرين سنه نشرب من الماي هذا وكا الحمدلله صحة وعافيه ما فينا شي

جان اقوله يبه عندك شي كلم اخوي الكبير انا مالي شغل بالسوالف هذي

(ترا انا اكبر واحد بس كنت برقع الموضوع)جان يقولي مو مشكله ناده خلني اكلمه

دشيت البيت وطلعتله قتله اخوي نايم اذا تبي شي باجر تعال واتفاهم معاه انا لا تدخلني بالسوالف هذي

يعني اكبر من هالتصريف ماكو

عاد ويقولي وانتوا عايله واكيد والدتكم مره كبيره واهم ما علينا الوالده وصحتها وقام يربط شي بشي

عاد انا وصلت حدي بروحي مالي خلقه ما ادري من وين طالعلي

جان يقول اذا تبون حياكم الله واذا ما تبون هم حياكم الله

جان اقوله اي ما نبي والله يحييك واذا عند شي باجر تعال واتفاهم مع اخوي

ومشيت عنه جنه العيد

اي والله شنو انت يعني ما تشوفني مو ماعطيك ويه

وكل ما تقولي شي اقولك مو محتاجينه

يعني افهم اني ما ابي

شنو السالفه غصب ولا غصب

وعاد احنا لو نبي شي نعرف نطلعه من تحت الأرض مو ناطرينك انت اتيي اتطق باب البيت تقولنا تبون ولا لأ

لا والمشكله اقوله احنا الماي يوصلنا من شركه ويكون الماي مفحوص وكل شي

هم ملزم ان هالشركه يمكن شغلها مو مضمون

الظاهر عباله مثل مصر نشرب من الحنفيه الماي الي تغسل فيه اهوه الي تشربه

الله يديم النعمه بس

fuel station!!

أمس وانا داخل محطة بانزين بصب

ولا أشوف مضخات يديده وشكلها حلو ومرتب

لا وتلقون في ممتاز وخصوصي وسوبر

حتى أشكالهم ظريفه

والله أحسن من القديمين هذيلاك الي من قبل الغزو واهمه حاطينهم

حتى لما تصب منهم تسمع صوت رجفه

حسبالك الهوز راح يفتلت عليك

لا وفي بعضهم لما انزل اصب ما يوقف على الي ابيه بالضبط يا يزيد او ينقص

واذا نقص ايي بزيده يعطيني ضخه عدله يصب فوق الي ابيه

لوول والله تشوفوني اقعد اتعافر انا مع هالهوز

وساعات مالي خلق تشوفوني اطلع خرده 5 فلوس او 10

علشان اعطي فلوسه كامله واهوه يقعد يطالعني احس وده يتحلطم بس يسكت

يعني شي مثل محطات البانزين بالكويت هذي من الأماكن الحيويه

الي تحتاج تطوير و نظام أمان جيد

وهم عندنا بعض الناس الله يعطيهم العافيه الخزان ماله يمين بس يروح حق مضخه مالت اليسار ويسحب الهوز كله

اي ليش تسوي جذي مالك خلق تنطر هالجم دقيقه على ما يخلص الدور

ببساطه هذا الي يسمونه تخلف

تحديث

هذي المحطه بسلوى

لووول بالكومنت مو متأكدين من المعلومه الي عندهم

لا ياشباب كلامكم عدل هذي بسلوى :)

أول امتحان بالعلوم

اليوم كان عندي اول امتحان في كلية العلوم

هالكلية العجيبة الي كثر ما تمشي فيها تلقى اشياء غريبه وكائنات ما ادري اشلون صايره

خصوصا هذا المبنى الي يحسسني اني قاعد بممر مستشفى

اليوم وصلت الصبح ونزلت متوجه صوب القاعه

شفت الشباب واقفين فسلمت عليهم وقفنا نسولف وجذي

شوي ولا المح الدكتور من بعيد وراهم

جان اقولهم رحتوا فيها الإمتحان صعب

قالولي شدراك؟

قتلهم شوفوا الدكتور وراكم اول مره يلبس غتره وعقال من اول ما بلشنا الكورس

اهوه دايما يلبس بنطرون وقميص

لووووول تعرفون الي احس خرعتهم زياده والدكتور عليه نظرات عجيبه خلتنا نهرهر قبل الإمتحان

ييت بدش القاعه ولا طالعوا شمسوين بشييييه بشييييه

لووول ولك شنو هالطرقاعه احنا بالآداب كل واحد لازق بالثاني ونمتحن والي يقدر خل يغش

اهني حاطين فواصل ومتر بين كل طالب وطالب

زين ما يحطون اسلاك شائكه وشبك حديدي علشان تكمل السالفة

لا وبعد دام احنا بالعلوم

يحطون لنا الكرسي الي في احزمه

يربطون ريولك وصوب خصرك ورقبتك علشان لا تلفها

خو شدعوه عليكم

لا عاد هذا بصوب و الي يراقب بصوب ثاني

لووول يايبلنا 2 يراقبونا احنا كلنا 19 طالب

وانتوا مجابلينا 3 حق شنو زيادة عدد حق التخرع يعني

والله وكيلكم انا قاعد بأول طاوله وجدامي طاولة الدكتور

واحد من المراقبين قاعد ويتثاوب بويهي

الله ياخذ بليسك انا بروحي دايخ وانت كل شوي مبطلي حلجك

والله اتقولون مجابل ابو الهول ما ادري ليش حسيت شكله وطريقة تركيبته انها فرعونيه

وكل شوي قايم وقاعد يحك خشمه ما ادري شسوي

لووول انا الظاهر كنت مخلي الإمتحان ومجابله اشوفه شسوي

:)

Ducaties

ذاك اليوم انا مع ساد سمايل كنا قاعدين ندور باللأفنيوز

ودخلنا فوت لوكر نشوف شعندهم ما عندهم

وانا من فترة شفت بالنت جوتي عليه ديكاتي

والله اول ما دخلت حصلته شغل عدل شحلاته والله


وكلهم حلوين بس الي بالكويت ماكو كل الألوان

بعدها بيومين رحت ستاربكس مع ولد خالتي قاعدين ندردش جان اخذ مجلة ستيودنت توك واتصفح

ولا هم حاطين دعاية حق الجوتي لا عاد انا اهني قلت شكلي باخذه

عاد اهني خلاص قفل مخي ابي اخذه

ولكن لما قلت حق أمي جان تقولي لا تشتري انا يايبتلك بوما

انا استانست قلت اكيد يابتلي الي على ديكاتي

ولا الإخت يايبه واحد عادي

جان اقولها ليش ما يبتي الي عليه ديكاتي تقولي ما ادري شكله مال يهال

لووووول جان اقولها اي مشكوره الحين ديكاتي صار مال يهال

والله ظلم يا جماعه

والمشكله ادري لو شريته راح اكل زفة سنه بساعه علشان جذي ما راح اخذه

FOOTLOCKER.COM

-------------------------------
وطبعا الكل عنده خبر

عن الفلاش ميموري مال ساندسك ديكاتي ايدشن
حسب ما اهوه مذكور

ان سرعة نقل الملفات من إلى المصدر سريعه

وك دزاين بصراحه حلو

---------------------------------

وهذا قلم هم ديكاتي ايدشن

شكله ظريف يبيله واحد حق الجامعه :)

لا وسعره مو رخيص بعد

-----------------------------


لوووول شكلها عبيط

والله ديكاتي عندهم وايد شغلات من جذي انا حبيت هالسيكل

وادري الحين لازم يطمرون ناس يقولون لي انت عندك ديكاتي

يبه والله لأ ما عندي ما عندي

مو كل واحد يشوفني ميت على هالسيكل يسألني انت عندك ولا لأ

خل اتخرج واشتريلي واحد بعدي صغير على سياكل

ردينا حق السوالف البايخه!!

عاد الحين رجعنا حق سوالف عمتي وخالتي

والله شنو هذا انا اليوم بتحلطم

يعني لما الإنسان السعيد الي مثلي يرجع من الدوام وينام خوش نومه

يقعد ويقول اشرقت شمس الصباح مع اني قعدت بليل

ويتمغط ويقول على هالجو يبيله شور

ويروح واهوه يسبح ويحط الشامبو على الشعر الحريري الفلفولي

ويغمض عيونه مو خبركم مو شامبو لا دموع بعد اليوم

واهوه يغسل شعره ويغني دليييه دون دلييه (يعني دعاية صانسلك)المهم


وتطفي الكهربا وطبعا اهوه مو حاس لإن مغمض عيونه

ويشطف شعره بالماي ويفتح عيونه بس الدنيا ظلمه

ويطالع يمين يسار لأ صج صج ظلمة

لبرهه حسباله حاشه داء العمى

ولكن يطل على الفتحه الي تطل على الخارج ويرا ضوء شبة الشارع

فيستوعب ان الكهربا طفت

ولكن عندما يأتي الشمات العظيم والي الله يبعدكم عن لسانه

وهو أبو ديكاتي لوول لا يعني صاير مؤدب يطق الباب

اقول منو يقولي ها طفت عليك الكهربا(لا والله شرايك انت يعني)

يقولي اي يبه تسبح كمل اقوله ظلمة اشلون

لووووول عاد اهوه اهني احرجني جان يقولي

تبي ادش اسبحك لووووووووول

قتله ها لا ماله داعي خلاص

يقولي لا اخاف ما تشوف

بالله يا حكومتنا الرشيده يعني زين لكم جذي

تقطعون الكهربا وايي الوالد يقعد يضغطنا

يعني ترضون تحطوني يموقف مثل هذا

اشتروا مولدات فكونا

لا ولما بليل ابوي يطلع انا ما صدقت ولا الدوانيه الي يروح لها طافية كهربتهم بعد

ويرجع البيت نتقابل بالعيون انا معاه

لوووووول
:)