مأساة كاكاو بونجوم

اليوم قلت دام ماكو شغل خل اروح الجمعية نشتري خرابيط

بالبدايه كنت بالجابرية فقلت خل ادش فرع قريب يمي دشيت فحطيت لسته في بالي

كل ما ادور شي ما احصله يعني تقريبا حصلت نص الشغلات فقلت خل ارجع كل شي مكانه واروح جمعية منطقتنا علشان اطق صندوقي:)

المهم فقلت دام اني مو لابس عدل يعني شغل على السريع قلت اروح فرع 24 ساعه

تدرون بعد لو تدش الجمعية الرئيسيه وانت لابس شغل البيت الكل يخزك فانا تفاديت هالشغله

وصلت فرع 24 ساعة دخلت وأيضا ما حصلت كل الي ابيه بس طقت جبدي

قلت خل ناخذ الموجود والباجي طاف

وانا بالجمعيه قاعد ادور بين الأرفف ولا اشوف وحده كبيره شوي فيها 35 دشت تدور صوب الحلويات

شوي ولا تنادي هذا الي يشتغل تقوله وين ككاو بو نجوم

انا قلت بييه شخباري ككاو بونجوم

المهم جان تقعد تتحلطم هذي اشلون ماكو وانا ابيه جان يقولها الي يشتغل اخذي هذا مثل بو نجوم واحسن منه

لوول ولا تقوله هذا داخله بسكوت

عاد نا اهني طقتني البوهه يعني شرايج انتي خو حتى بونجوم في بسكوت

ويصير موضوعهم الشاغل والحوار المهم ان اشلون بونجوم في بسكوت وليش هذا احسن من بو نجوم

وانا بطبيعتي الملقوفه قاعد احوس يمهم واسمع شقولون

شوي واهمه بعز النقاش ويتدخل طرف ثالث بالموضوع تدرون منو لووول

انا

خلاص تعبت من نقاشهم السخيف جان اقولها يبه هذا احسن من بو نجوم اصلا بونجوم مو هاي كواليتي اما هذا شوفي قرطاسه اشلون

لووول وهذيج مصدقه معاي لووووول اقولها هذا الكاكاو الي فيه نوعيته زينه مو شغل بو طقه

قتلها اخذيه وماراح تخسرين

وانا مجاملة لها وعلشان اقنعها خذيت واحد واهي خذت كرتون كامل

انا جربته لوووول ما كان حلو استغفر الله طعمه مو شي وشكلها الحجيه ابتلشت فيه ودعت علي

فتقدرون تقولون اني انهيت الموضوع وخذيت اغراضي وطلعت :)

فأخذت الي موجود وطقيت صندوقي وارتحت لوووول

المهم وانا رجاع قلت خل ادش الفرع مال قطعتنا يمكن احصل الي ابيه أيضا دخلت ما حصلت

فقلت من عذر المراكز الي مثل سلطان سنتر و سيتي سنتر وربعهم دايما لما تروح هناك تحصل الي تبيه

لإن اهمه هدفهم الربح فيوفرون لك كل شي وبجميع الأنواع علشان ما تروح مكان ثاني وتاخذ كل شي من عندهم

وجمعياتنا للحين همهم الشاغل انتخابات الجمعيه ومنو يمسك مجلس الإدارة