إلا صلاتي

أمس صار موقف ما ادري حسيت ان عجيب ما ادري اشلون صاير

أو بطريقة ثانيه يعني الموقف أثر فيني خلاني افكر لفترة

الله يسلمكم أمس وكعادتي قررت اني اقرا كتاب فرحت ستاربكس أحد المجمعات الهاديه

وطبعا عادة هالمجمع ما في زحمه والناس الي يروحون له تكانه وكل من لاهي بشغله والقهوه يضبطونها احسن من اي مكان

قعدت وحطيت عدتي قبل لا ابلش أقرا شي سولفت بالتلفون واشرب القهوه لمدة ربع ساعه وبعدين فتحت كتابي

ولا ايون بنتين قعدوا على الطاولة الي يمي وطبعا المسافه كانت صغيره حيل لدرجه اني كنت اقدر اشوف عنوان الكتاب الي مع وحده من البنات

المهم بعد شوي وصلوا رفيجاتهم 3 صاروا 5 وقعدوا يسولفون ويتكلمون بمواضيع بناتيه بعضها مضحك وبعضها مليق

طبعا البنات كانوا 3 متحجبين و2 مو متحجبات واللبس هالله هالله

المهم انا ما كنت حاط في بالي اصير ملقوف كعادتي واسمع فكنت ماعطيهم طاف

بعد شوي جذي ولا يأذن أذان العشاء

ولا اسمع وحده منهم قالت شويه بنات بروح اصلي وارجع

عاد انا اهني قلت لحظه ستوب منو هذي لازم اشوفها ولا تطلع وحده من الي مو متحجبات

طبعا انا قاعد اقول سبحان الله شوف المتحجبات قاعدين وهذي الي معدله شعرها ولبسها فري قامت تبي تصلي

طبعا انا بكلامي مو معناته انا العموم جذي بالعكس في بنات سواء متحجبات او لأ ما يطوفون الصلاة لو كانوا وين انشالله

بس انا حبيت انقل هالموقف واقول والله للحين بناتنا فيهم خير

لووول حتى حزامها كان انيرجي شغل عدل :)

بس والله لو كان بإيدي جان قمت صفقت لها على الي سوته

يعني خلت السوالف والقعده مع رفيجاتها وراح صلت ورجعت كملت

والله يهدي الجميع انشالله

والله يا جماعة ساعات الواحد اذا طافته صلاة ما يكون مرتاح يقعد يحاتي يحس في شي غلط صاير

والله السالفة ما تاخذ 10 دقايق تذكر فيها ربك وتروح تكمل شغلك الي شنو ما كان

كل شي نقدر نأجله شوي علشان الصلاة

:)

شرايكم فيني وانا صاير ولد مسلم ومؤدب