تحت الظل vs وراء الأبواب

اليوم يا جماعة الخير كانوا حاطين برنامج تحت الظل على قناة الوطن وبرنامج وراء الأبواب على قناة الراي بنفس الوكت و ما ادري هل اهي صدفة أو حركة مقصوده إن البرنامجين كان موضوع حلقتهم الجنس الثالث وطبعا لإنهم في نفس الوكت ما قدرت اني الم كل التفاصيل ولكن راح احطلكم وجهة نظر كل من البرنامجين:

بالنسبه حق برنامج تحت الظل كان ضيوف الحلقة الدكتور بدر الشيباني دكتور في جامعة الكويت قسم علم النفس التربوي، والمحامي سعد العنزي ، طبعا لاحظت ان المحامي سعد العنزي كان منطلق بالكلام أكثر من الدكتور بدر وكان يستعمل الفاظ نوعا ما ما تليق انها تطلع بالتلفزيون وكان رأيه ان الجنس الثالث مجموعة من الناس لا تستحق الإحترام و حثالة في المجتمع الكويتي ومالهم حقوق يطالبون فيها ورأى ان الذي يحق له المطالب بحقوقه ويحق له اجراء عملية تحويل الجنس هو الخنثى أي الذي له جهازين تناسليين .

أم الدكتور بدر الشيباني كان يتكلم من منطلق علمي بحت ويحث على دور الأسرة وقال أن الفرد الذي يقرر أن يتحول إلى الجنس الثالث وعمره اقل من 18 سنه فهو تحت مسئولية ولي امره ولولي الأمر الحق بأن يعاقبه ويردعه وما كان كلامه مؤثر جدا يمكن لإن الدكتور العنزي كان ماخذ الجو بإسلوبه المهاجم ولو ان الحقائق الي طرحها ما تستند على منطق أو دراسه مقنعه .

برنامج وراء الأبواب كانت دائرة الحوار أكبر من واوسع من تحت الظل لإن عدد ضيوف الحلقة كان 3 ومن النوع المتحدث بشكل جيد الضيوف هم:المحامي عادل اليحيى والمحامي عادل العبدالهادي والدكتور النفسي عادل الزايد، لووووول تلاحظون كل الضيوف اساميهم عادل صار ضحك بالبرنامج لإن اذا اتصل واحد يقول ابي الإستاذ عادل فكلهم يتوهقون ، المهم عادل اليحيى تقدرون تقولون مناصر للجنس الثالث الي اتجه إلى هذا الطريق نتيجة حالة نفسية بحجة أن ممكن هذا الشخص يكون اخوك ابوك ابنك ،وطبعا كان الناس الي يتصلون يهاجمونه بشكل مو طبيعي لإنهم مو قاعد يسمعون كلامه عدل المهم ان ذكر حالة بالكويت تحولت من أنثى إلى ذكر سنة 98 و خذت حقوقها كامله ومحد كلمها،بالنسبة لقانون تجريم المتشبهين بالنساء والي ذكرته في بوست سابق،قال ان هذا القانون غير مدروس وطبقوه على العموم بدون استثناء ومعلومه من عندي ان المحامي عادل اليحيى اهوه رئيس تحرير مجلة شبكة الحوادث، ننتقل حق المحامي عادل العبدالهادي كان ضد الجنس الثالث بشكل قوي جدا وذكر نقطة عجبتني قال ان هذا الشخص يسافر خارج الكويت يسوي عمليات ويغير بشكله وجسمه بحيث يتشبه بالنساء ويرجع الكويت ويفرض نفسه على المجتمع الي ما يتقبل هالنوعيه من الناس،أما استشاري الأمراض النفسية الدكتور عادل الزايد قال ان الذين تحولوا إلى نساء اهمه ما تحولوا بشكل فعلي وانما تحول جسمي فقط وليس حقيقي لإن من الداخل تضل الهرمونات الذكرية غالبه وحتى لو فحصته بأبسط الأشكال مثل انك تاخذ عينه من على لسانه وتفحصها راح يتبين لك ان هذا الشخص ذكر من غير ما تشوفه وبالنسبه للعلاج فالدكتور يقول ان لو مهما عاقبنا بالسجن والنفي ماكو فايده لإن هالشغله تعتمد على قرار شخصي وكان الدكتور مؤيد جدا للضرب والعقاب الجسدي ومن ثم العلاج النفسي.

في مجموعه من المتلصين أيضا كان لهم ردود غريبه والبعض منها مفيد،في واحد من المتصلين قال هالأشكال لازم يكون عقابها اما اعدام او نفي وقال لو اي واحد من اهله او اخوانه صار من هالناس ما اعنده مانع يرميه او يذبحه، اما الدكتورة النفسية الي اتصلت ما ابي اذكر اسمها قالت ان الضرب بالعصي ثم يعالجونهم، وكان احد المتصلين مع الراي الي يقول ان القانون قاصر، وأيضا ما ننسى وجهة النظر الشرعية والي قالتها مقدمة البرنامج ان الإسلام هو الي يحكم سلوكنا.

وطبعا في متصل من الإمارات قال قصة اول مره اسمعها يقول في عصر الخليفه عمر بن خطاب كان في واحد ما اذكر اسمه بس كان شديد الجمال وشكله مائل إلى جمال النساء طبعا طبيعيا مو تصنع ولما وصل خبره إلى الخليفة طلب من الناس اييبونه فلما وصل حق الخليفه قاله البس عمامه علشان تكون اكثر رجوله، ولما لبسها قالوله الناس ان هالشخص مع العمامه صار احلى من قبل، فقالهم قرعوه وقرعوه أيضا قالوله الناس ان هالشخص صار احلى من قبل فقرر أن ينفيه من البلد إلى الصحراء ،لما يي هالشخص إلى الخليفة قاله انا شنو ذنبي ان الله خلقني جميل فقال الخليفه وانا شنو ذنبي اني اخليك تخرب على امة محمد.

على ذمة الراوي.

مقتطفات

في زيارة سريعة إلى الجبرة مع الوالد الله يحفظه بعد الوالد ما عنده غير شويخ والجبره فخياش البصل لفتت انتباهي

صورتها ودزيتها حق واحد من الشباب يموت على شي اسمه بصل:)

*** *****************************************

شرايكم فيني وانا ارسم أيام الثنوية ترا شغل ايدي والله

********************************************

هذا اعلان ليتل سيزرز احس ان المطعم قام يخسر بالكويت كل يوم يسوون عرض غير شكل والمشكله اكلهم مو حلو لا وقبل العرض هذا كانوا مسوين عرض يقولك اشتر بيتزا حجم كبير واخذ الثانية بنص دينار

***********************************************

انا بس بعرف منو هالبعير الي بشتري هالدهن شدعوه كل هذا لا اخر شي يصب مكان الدهن غاز حرام يقط القوطي ما ادري العلبه الدرام القلن الي اهوه.

*************************************************

انا خابر مايكل جوردان خال يلعب كرة سلة طويل صنقيح ،ولكن هذا أبيض لا وبروفيسور بعد ولكن تشابه أسماء.

***********************************************

هذي الصورة خذيتها لما كنت رايح مسابقة رد بول مالت الطيارات الي أذونا فيها المهم قلت خل ناخذ لقطه كذكرى ولما رجعت البيت قاعد اشوف الصورة فطاحت عيني على القرعه الي تلمع على اليسار قاعد اقول بيني وبين نفسي هذا من وين طلع انا ما شفته وكت الي صورت.

***********************************************

هذا مذيع في قناة الكويت الأولى أول ما فتحت التلفزيون لفت نظري الخشم بصراحه مو طبيعي (اللهم لا شماته).لوول

*******************************************

خخخخخ فوزية الدريع الله يخليها حق بناتنا الي مبتلشين بعمرهم قالت دام اني اقدم في قناة الراي خل إحطون اعلان وبلاش بعد

********************************************

هذا خوش جاي بصراحه أحسن من لبتون الي دعاياته مأذيتنا وأهم شي اسمه عجيب لإن هالإسم قريب مني وايد

*******************************************

لاتعليق

المتظاهرين في استجواب الصبيح

طبعا هاليومين الكل ما عنده سالفة غير استجواب نورية الصبيح ، المهم وانا اقرا جريدة النهار طبعا ما عجبني نقل الموضوع فما كملت فقررت اني اطالع الصور بشكل سريع لفتت نظري الصورة الي فيها رولا دشتي ، بالأحرى مو رولا دشتي الي لفتت نظري بس الي معاها ما ادري هذا واحد ولا وحده مو مبين وعلى اليمين في اثنين واحد شعره طويل شوي والثاني حاط ايده على حلجه بطريقة ما ادري اشلون صايرة لوووول الظاهر في معرفة سابقة أو في نية لا تحمد عقباها

رجيم :)

اي يا جماعة الرجيم واشكثر ناس تكلموا عن الرجيم وقالوا كلام مأخوذ غيره بس اليوم حجي ديكاتي يايبلكم معلومات جربها بنفسه ومن وراها نتائج ديكاتية عظيمة، أنا سألت نفس مره ليش أنا أمتن ويزيد وزني فتوصلت إلى معلومات:

أولا: إني لما ابي آكل أصير مثل ما تقولون طماع ودي آكل كل شي فيعني لما اروح مطعم و خصوصا اذا كنت يوعان اطلب وايد أشياء مع اني ادري اني ما اقدر اكل كل الي طلبته بس راح آكل لما اشبع حدي

ثانيا: تدرون ليش لما تروحون تراجعون دكتور تغذية يقولكم لا تعطون عمركم مجال انكم تيوعون لإن الواحد لما يكون يوعان راح يندفع بشكل مو طبيعي على الأكل مما يؤدي إلى زيادة بالطعام وبعدها يزيد الوزن.

ثالثا: المشروبات الغازية أنا وسلوم فيه كويتي صارلنا الحين 3 أشهر ما شربنا من هالسوالف دايما عصاير أو ماي وأحلى شي عصير التفاح الي عند ماك وايد حلو ،،وصدقوني جربوا تاكلون وبعدها شربوا عصير أ, ماي راح تلاحظون فرق في عملية التهظيم .

رابعا: يا جماعة بالحركة بركة يعني تحركوا ولو بشكل بسيط يعني بدال ما تقول حق الخدامه ييبي شي اروح أن اييبه منها تحركت ومنها خدمت نفسي .

خامسا: كل ما سبق مو بالضرورة ينطبق على كل الأشخاص بس أنا جربتها ولاحظت الفرق

.

وأنشالله الله يديم عليكم الصحة والعافية

يقولك كبّرها واربح

ولللك يقولك هذي كبّرها واربح ياساتر احنا بالكويت شنكبر شنخلي خصوصا الجيل اليديد طالعين لك بالمتن موضة الكرش طايح بالأرض ولابسين ضيج ترا مو حبا باللبس أو عاجبهم بس علشان يلوعوون جبودنا

لا هذا بصوب واييلك جنس متين بصوب ثاني لا لا يا جماعة أن ما اقدر جذي لإن قمة اللوعة والنرفزة لما تشوف جنس جذي لا و مصدق عمره عباله حلو

cake'nbake

لووووول هذيل ما خلوا فيها راس سنه والله على هالإعلان شكلها سنه سودة منيلة بستين نيلة ، شكله الي كاتب هالكلمة قراها بالإنجليزي وبعدها كتب الإعلان على حسب ما قراها اول مرة fahaheel
الله كريم .
:)

parking in art college

لووول هذي سيارة رفيجي أنا وصلت الكلية الساعه7 ونص يعني الأماكن فاضية بس ما ادري ليش واقف جذي المهم شوفو نتيجة الوقفة الغبية:) بالصورة الثانية......
هذي نتيجة الوقفة شفتوا اشلون مسوي خبصة يمه مو مخلي الناس توقف عدل



عاد لما سألته عن سبب الوقفة الظريفة قالي ما ادري أنا شفت المواقف فاضية فقلت خل أوقفها جذي وآخذ راحتي.



طبعا لو تلاحظون شي بالموضوع اني ما كتبت صفطة او صافط لإني توهقت فيها هل أكتب صفطة أو سفطة فقلت لا هذي ولا هذي مع اني شاورت الإخصائي والمحنك و الفطحل الكبير سلوم فيه كويتي؟ فقالي والله ما ادري الموضوع يبيله تفكير ومخمخه.