شركات الإتصالات

الحمدلله اللهم ادمها من نعمه>>توه ماكل وشبعان حده

لوول

مسا الخير

توني وانا قاعد التهم صمونتي اللذيذه بطريقة فعتوهه جان يصير شكلها يضحك

لوووول مو جنها سمجه

المهم عاد اقولكم وانا منبطح على فراشي الحين وقاعد افكر

قلت خل ادق اشوف مكالماتي شنو الي لي والي علي

يهب طلع 48 يا سااااتر

اخر مره كانت مكالماتي هالكثر يمكن قبل 8 اشهر

انا مو راعي مكالمات كلش

يعني عندي اشتراك البلاك بيري ومكالمات بسيطه ورسايل وبس

عااااد انا منبطه جبدي من زين

بصراحه شغلهم مو منطقي كلش

يعني تدفع فواتيرك وتصفر حسابك اول الشهر لما ينزل اشتراكك

بعدها بإسبوعين تنصدم ان عليك مكالمات مع انك ما تكلمت

تتصل عليهم شصاير ما صاير يا جماعه غير هالكلام

اول ترقيعه يقول فواتير متأخره

ثاني ترقيعه يقولك عندك استخدام
gprs

مع اني مشترك بخدمة النت معناته انا مو بحاجته

ثالث شي لما خلاص يزهق منك وبشوف ان ما منك فايده يقولك احولك على الدعم الفني

انزين متى يدق الدعم الفني يا طويل العمر

يقولك بالكثير يومين

عباله يومين شويه ماخذها سهالات

لا والي يبط الجبد ان حضرة الدعم الفني يدق بأوقات مو صج

تلقى يا انا نايم ولا بالمحاضره او مشغول

يعني ما يدق بالوقت الصح انا ما اقول ان هذا ذنبه بس لما النية ما تكون صافيه جذي يصير

المهم وعاد انطر الدعم الفني ويقولك احنا نحاول نحل المشكله وبالأخير يخلونك تزهق من المشكله وتمل وتطق جبدك

وبالنهايه تقول يا عمي ما تسوى علينا هال20 دينار الي راح اتييبلي الضغط والسكر

عاد المهم انا قاعد افكر لو وزارة المواصلات فتحت سالفة انك تحول رقمك على اي شركه

يعني انا رقمي زين وابي احوله على فيفا ولا الوطنية تقدر تحوله ورقمك ما يتغير

طبعا ليش صعبه انهم يسوون هالسالفه لوول المعنى في كرش الشاعر

اهوه اتوقع فيفا من صالحها ويمكن الوطنيه تتأثر شوي ولكن مستواها زين

بس الي راح تاكلها زين لإن الشكاوي زايده عليهم والعملاء في نسبه كبيره منهم تشتكي

يعني لو يصير احول رقمي على شركه ثانيه بدون ما يتغير رقمي والله ما راح اتردد ولا لحظه وحده

بس شنقول عاد

لوووووول اي اي 48 دينار مو هاينه علي كلش علشان جذي قاعد اطلع حرتي اهني

تحلطمات

بووووووووووو

ههههههههههههه

من زمان ما طليت عليكم مو

مساكم ما ادري صبحكم الله بالخير

ديكاتي متكي بفراشه ناطر الإخت النومه اتيي

قلت على ما توصل النومه ادش على بلوقي الحلو وانشوف شكو ماكو

هالأيام لاهي مع الجامعه وسوالفها

عاد امس كنت قاعد ادرس مقرر فلسفه

تدرون شنو يعني لما 4 ساعات تقرا سوالف تخليك تفكر وايد

يا سااااااتر

والله قمت اشك بكل شي

وعاد انا نوعي ما اعرف اقرا وبس

لازم افكر بالكلام الي قريته واشوف هل صح او لا

والمشكله السوالف بالفلسفه ساعات تخليك تشك بكل شي

وصلت لمرحله ان قمت افكر بأشياء المفروض ما اوصل عندها ولا افكر فيها اصلا

لا وعاد الفلم كله لما ييت انام

بالغصب نمت لا ولما نمت قمت احلم بالي قريته

امحق نومه

والله الفلسفه يبيبلها ايمان قوي وعقل كبير

ما الوم بعض الناس لما يتعمقون بالفلسفه تضرب فيوزاتهم

المشكله مو بس جذي

المشكله ان يحطون ادله تخليك تفكر حتى لو انت مقتنع حدك

بس يالله انشالله خير

مممممممم اخر امتحان عندي تاريخ 23

الله يسهل علينا وعليكم

باك

سوري رحت اشوف شنو بالثلاجه بس ماكو شي فرجعت لكم خالي اليدين

طبعا ليلة راس السنه هذي كانت اخر وجبة عشا كليتها ب2009


حدها يم يم

انا الحين يوعان وقاعد اشوف صور الأكل واتحسف على عمري الي راح

لووووووول

وليه باجر دوام ما ادري متى راح يخلصونا انشالله

ههههههههه فيني تحلطم ولا يتراوالي

الألياف الضوئية من كيمز fiber optics from kems

مسا الخير جميع جماعة

عساكم بخير

ديكاتي قاطع ولايعه جبده

بس والله الي يعيش بجامعة الكويت يشيب راسه

المهم

اليوم وصلني مسج من شركة كيمز للإنترنت

وفحوى المسج(كلمة فحوى بايقها من مقرر اساسيات كتابة البحث لإن الدكتور يستخدمها وايد)اي المسج يقول

المهم والله وقلت والله زين

ما ادري اذا في شركات اخرى قدمت نفس الخدمه ام لا

ولكن من زمان كنت اشوف كيمز عروضها حلوه والحمدلله مرتاح معاهم

والي عنده شركه ثانيه نزلوا الخدمه خل يفيدنا والله

عاد المهم اتصلت عليهم وانلطعت على التلفون 8 دقايق ولكن الحمدلله ردوا علي

الأخ الي استقبلني متعاون جدا وشرحلي كل شي

اشتراك الألياف الضوئية ما يبيله شي غير انك تدفع 20 د.ك ويتحول اشتراكك من العادي إلى الألياف الضوئيه

وطبعا تدفع مره وحده حق التحويل بس وبعدين اشتراكك العادي تشتغل عليه

سألته شنو الفرق يعني

حسب ما فهمت منه ان ماكو فرق الا ان يعطيك اداء افضل

يعني انا سرعتي 256 ما راح يتغير فيها شي غير انا اداء السرعه يصيير احسن والشبك اقوى

بالنسبه حق الدونلود قالي راح يعطيك الداونلود الي يناسب سرعتك بدون نقص

والله ما اعتقد ان راح احول عليه لإني ما اجابل الدوانلود ولا انا فاضي هالأيام كلش

اليوم شغلت الابتوب من بعد اسبوع ما كنت ادري عنه

والي عنده تعليق يفيدنا لا يتردد رجاءا

صباح المؤتمر واليوم الي هل راح يعدي على خير ؟

صباح الخير والنفس الحلوه

صباح الورد والبرد اللطيف

صباح النور والشوارع بتسكر

صباح الياسمين والقمه الظريفه

صباحج خير يا كويتنا

اخيييييييه احييي فيني شعور الوطنيه والولاء

صبحكم الله بالخير جميعا فردا فردا

اليوم ومثل ما العموم يدري وعارف ان وصول رؤساء وملوك الدول الخليجيه

والله علشان اكون صريح جدا ترا انا مو مع ان يعطونا اجازه اليوم

ولكن دام ما تبون تعطونا اجازه المفروض تكون هناك خطه مروريه محكمه

بصراحه حد ام الوهقه

الحين يبون يكودونا نحن الشعب الموقر على جم شارع او دائري والباجي يسرونهم

احنا يوم البروفا ما وصلنا بيوتنا الا جريب العصر

يعني هل كيف يصير هذا

لووول احنا مع كل الشوارع والدوائر الي موجوده وهم مسوين زحمه

هل مره بتسوون سين وجيم

يالله شنقول بعد كلها جم يوم ما عليه

عموما ترا في خريطه حق الشوارع المفتوحه والسالكه

طبعا هين اذا كان في شي سالك بس هم يالله

انا كان بالود احطلكم لنك حق الخريطه بس النت الي اهني بالمره مو مساعدني

المهم

عاد انا شنو الي صار معاي اول شي نمت مبجر شحلالاتي والله

بس الموشي اني قعدت السااعه 4 وشي

صدووووووووووووووق

نام يا يمه شمقعدك

لا ماكو نوم

انزين شنسوي مني مناك

جك بوووم ولا معاذ بالقهوه

اها خوش خوش

والله وقلت دام اليوم مؤتمر وحاله

خل نطلع مبجر

بس ديكاتي شدعوه عليك مبجر طالع الساعه 5

المهم

والله واخذ وشور والبس

انزين ما بقى شي على الصلاة اشلون ما لون

والله وجان اقعد شويتين ويطق براسي ابي جاي

عاد امس متعشي يريش وونخي

يعنني البطن حد امه منتفخ

بس يعني ياي ابي اكشخ فيها من بعد اليريش والنخي وجان اسويلي جاي الإفطار الإنجليزي لووووووول

احسه مو راكب مع الي كليته امس بس يالله

على على هالأكل المفروض جاي كشري اخيييييه

المهم والله واصلي والحمدلله واطلع

الشوارع هاديه والأمور مستتبه

وطبعا لازم العده معانا من مسباح الي توني شاريه والجناط الي يشوفني يقول طالع كشته

علشان مو عبالكم كاشخ المسباح ب5 بس يعني بو طقه ههههههه

عاد اقولكم

والله وصلت صوب الجامعه

لووووووول يعني طالع فيها الطالب المجتهد

بس للأسف البوابه مسكره ولا كان بالود اجابل الحارس شويه على ما يصير حزة الدوام

لووووووووووول ماكو شغل صح

وجان اروح القهوه حق الأخ الظريف معاذ والحين قاعدين وسط الجو الحلو والهادي وماكو احد

والأن السؤال هل يصمد ديكاتي لما الدوام الساعه 9 ونص

ادعو الله العلي القدير ان يصبرني حتى موعد الدوام

والله يستر من طلعة بعد الدوام

والسلام عليكم ورحمة الله وبركاته

محدثكم من المنطجه الحره ديكاتي ولد ام ديكاتي دوت كوم

شبلاي فاصل عالصبح

وصباحكم خير مره ثانيه واسعد الله ايامنا وايامكم وعساه يوم مليئ بالعمل والإجتهاد والتفحيط والتقحيص اللاإرادي

اللهم اني كنت من الظالمين

من جم يوم صارلي موقف ما حسيت بحجمه الا بعد ما خلص كل شي

كنت مستلقي بفراشي مو يايني نوم

طلعت التلفون وشبكته على الوايرلس وقاعد اطالع فيديوات يوتيوب

ييعني اغاني وطقطقه

المهم وانا اطالع قلت خل اجيك على الساعه علشان الأذان

المهم قلت لا في وقت خل اقعد اشوف

المهم وياخذني الوقت وانا اطالع واطالع ونسيت الاذان

ولبرهه صغييره ايي على بالي الأذان ولكن ما ادري ليش ما ادركت اني لازم اطفي الأغاني

المهم والله واستمريت اسمع

لما شوي جذي ولا يطفي التلفون بروحه

انا اهني تصروعت لإن مو من عوايد تلفوني يطفي بروحه اصلا ولا مره صارت معاي

المهم طفا التلفون حاولت اشغله ما اشتغل

جك بوووووم (تعبير عن الفجأة)احم

واسمع الأذان

الأذان من غرفتي ما ينسمع ولكن يومها سمعته اشللون ما ادري

استغفر الله يارب

يعني بعد الي صار قاعد افكر شنو سويت انا اشلون صار جذي

يعني تحذير اكبر من هذا وصريح جذي عمري ما واجهت

قمت خذيت شور ورحت المسجد صليت الفجر جماعه

ورديت وللحين مو على بعضي

قاعد اللوووم نفسي اشلون سويت جذي

يعني الله سبحانه عطاني انذار مباشر بحيث طفا التلفون مع دخول الله اكبر الله اكبر

والله ونمت وانا كل شوي اقوم اشوف الوضع

حسيت ان هذا اخر يوم يمكن انام و ما اقعد على الي سويته

يعني افكار افكار وايد

بس توبه والله توبه تصير مره ثانيه

الحمدلله الذي انعم علينا وعافانا

سوالف

صباح الخييييييير

لووول تعرفون شعور الي واحد طالع من الإمتحان و حد حده مبدع

ودك تسوي كل شي كل شي لوووووول

المهم شخباركم شمسوين

والله انا مقصر بحق هالبلوق العظيم وايد

ولكن انشالله لنا رجوع قوي بس متى ما ادري

اي على طاري لنا رجوع

هالفتره مستر جوكليت قاعد يكتب قصه من تأليفه عن قروبنا اللطيف الحيين واصلين الجزء الثالث

لوووول صج انها خياليه ولكن حدها ظريفه

والله صج ان طاب فيني لما قال بس

ولكن ما عليه حلوه منك حلو منك حللللللللللللللللللوه منك يعني زعلان انت مني يعني انك

لووول انشالله ما اغني

مممممم شعندي بعد

اي الا الجو شفيه حار جذي اليوم

اشوه اني ما كنت مخرع الشتا

بس حروره والله طقيت المكيف بالسياره

ههههههههههههه طبعا انا للحين على عوايد اصور غيوم

ما ادري ليش الصوره الأخير ممكن احط عليها عنوان(وانيت دتسن مستعرض )لوول

الا شرايكم بالموضوع هذا

المباراة تاريخ 21

التذاكر بالمرينا او نادي كاطمه

الأسعار راح تكون 10 و 15 للدرجه الثالثه

و 25 و35 للدرجة الثانيه والأولى

و 90 و150 للدرجة الممتازه

والله انا مو مهتم حق هالسالفه كلش وما اعتقد اني راح اشوفها

بس يالله شي احسن من ولا شي

--------------

بوست اكل وبلعه وطلعه

فعتوووه.كوم

انا صاحي لكم

مساكم الله بالخير

وعيدكم مبارك وعساكم من العايدين الفايزين انشالله

انا صاحي لكم وعيني عنكم مش غافله

اي والله صح لسانك يا من قالها

صارلي فتره طويله غاااط عن المدونه

صار مزاج الكتابه صعب وسط الظروف الي عايشها

ما ادري احس هالكورس غير بكل المقاييس

ما علينا

انشالله مستانسين بالعيد وانشالله المطر ونسكم

الحمدلله على هالنعمه والله صج صج غسلت ارضنا وقلبونا بعد

احلى شي بالمطر انك تقعد جددام شي مثل هذا اخيييه

طبعا احتفالا بالعيد وتمشايا مع رغبتي الداخلية

قررت اتفعته واشرب كاديه

والله بالبدايه اللون عجبني

بعدين قلت يبيله ثلج علشان اعيش الجو يعني

جان اطقلي جم صوره

عموما العرض القادم خالي من اي كحول او مشروبات روحيه وعقلية

ولكنه متروووس وبنسبه عاليه من المواد الديكاتيه والنسبة 5%من المواد الفعتوهيه
لوووووول

عاد تصدقون انا اول مره اجربه والله ظريف بس مزاج احسن ش

لونه مساعد على التصوير والله

نشوفكم على خير

2012 movie-sowalef

صباح الخير

اي اليوم مواصل شعلي

هي هي هي مبسوط ياخويا

ايام الدوام يطلع هالسهر من عيني

ما عليه سهالات انشالله

اشلونكم شخباركم اعزائي المدونين والربع والمتابعين

ممم اليوم شعندك يا ديكاتي

اها اي صح

اليوم رحت فلم 2012

انا من شفت التريلر ماله وانا شادني هالفلم

والله و على بركت الله اليوم رحتله مع صديقي العجيب

ما راح احرقه عليكم

يعني بس شويه راح احرق مو وايد

لوووووووووول

الفلم يتكلم عن نهاية العالم وشنو الدمار الي راح يصير

وان اشلون الديانات تتقبل هذا الامر

بصراحه الفلم قوي والإخراج احلى بعد

الي شد انتباهي حق الفلم ان ولد البطل اسمه نوح

وبالقصه ان ياخذون الناس الي قدروا ينجون وجذي ويحطونهم بسفينه حق مكان امن

بالسفينه كانوا ماخذين معاهم حيوانات يعزكم الله والعلماء واصحاب النفوذ والي عندهم فلوس

اهني تذكرت قصة سيدنا نوح عليه السلام لما صار الطوفان واخذ من الحيوانات الذكر والأنثى وجذي

احس انهم مقتبسين هذا المقطع من هالقصه

ولكن بالنهايه ينجون من الي صار بفضل التكنو والحكمه

استغفر الله انا قاعد افكر يعني ممكن لما يصير يوم القيامه راح يصير شي جذي

استغفر الله يا ربي بس اتأثرت بالفلم وايد

وبصراحه الي يحب سوالف جذي خل يروح لإن الفلم وايد حلو وما حسيت بالملل او تشتت انتباهي كلش

واهوه بعد طويل مو قصير والله

دخلنا 12 وربع وطلعنا 2 ونص اعتقد

عاد الجو كان بارد شغل عدل

الله يتمم علينا هالجو الجميل

------------------------------------

من جم يوم رحت مكتبة خرير

اقصد جرير

والله لقيت اختراع بسيط بس شي حلو

مثل ليت صغير يشتغل على البطاريات

مدة التشغيل 8 ساعات

واللمبه زينون زقرت

والله شي حلو عجبتني على كثر ما اهي بسيطه

وسعرها 1.800

لا بأس عليها ولكنها يازتلي وهذي بعض الصور لها
-------------------------

انا من شفت هالفلم عرفت ليش مايكل كانوا الناس يحبونه وايد

دخلت الفلم مرتين

طبعا ماكو قصه خير شر

بس قاعد يوريكم الإستعدادات ملوت الحفله الي كان راح يسويها

والله يا جمااعه هالحفله لو صايره جان كسرت السوق كله

صج صج قويه

وحتى الفلم ما تكلم عن وفاته ولا عن اي شي غير الحفله

يعني تدش الفلم تسمع الأغاني ملوته وتشوف السوالف الي كان يزهبونها

بس والله يستاهل

حتى تعامله مع الناس الي يشتغل معاهم وايد يبين ان محترم واسلوبه حلو

ما ادري هل كان يتصنع هالشي او لا

بس عجبني وايد

استغفر الله من مات وانا كله اسمع اغانيه

بدال ما ننسى موضوعه علشان ما نزيد ذنوبه قاعد اسمعه وايد

بس خوش اغاني عليه انا ما ادري ويني عنه من زمان

critical thinking

مساكم الله بالخير

ترا الموضوع الي طاف توني اليوم استوعب انا شنو كاتب

الظاهر ما كنت بوعيي وانا اكتبه امس

المهم حصل خير

لووووووول

بس ترا جيد الموضوع ولكن في نوع من الفعتهه

المهم

اليوم في احدى المحاضرات الجميله والي لما الحين ما استمتعت فيها عدل

كان موضوعنا اليوم عن التفكير النقدي

لا لا مو يعني التفكير بالفلوس

النقدي من ينتقد انتقادا فهو ناقد

عاد احب هالسوالف واشلون تنتقد الشي حتى لو كان كامل

اشلون تحول الشي الزين إلى شي سلبي بالكلام طبعا

يعني الموضوع يدفع الواحد علشان يفكر

بطبيعة الحال الدكتور لازم يستفزنا علشان يعطينا دفعه ونبتدي نفكر

مهما يكون هالموضوع احنا ناخذ الشي بعيد عن التعصب وعن الطائفيه وحتى عن الدين

يعني لما يذكر الدكتور مسأله في وجود الله هذا شي يخلينا نفكر

ولكن بطبيعة حالنا ما راح ننكر وجود الله

ولكن هو دافع قوي يخليك تفكر شوي بطريقة نقديه

ولكن وين مربط الفرس يا ديكاتي

لما يكون معاك طالب مخه داخله قراطيس لا اكثر

مخه غير قابل للتحريك والتفكير

انسان يعتقد بشي واحد ولا يمكن ان يغير هالشي حتى لأجل الوصول لهدف وهمي

يعني هالطالب اليوم خرب جو المحاضره كله

صار الموضوع من تفكير نقدي إلى محاضره شريعه

الدكتور يتكلم عن نظرية دارون والتطور الإنساني والحبيب هذاك مزنجر ومو راضي يسمع

والا يبي يقول ان دارون مخرف ونظريته غلط

انزين غلط ولا صح انا مو هذا موضوعي

الهدف من المحاضره نشغل تفكيرنا

ليش عندنا ناس اشبه بالطاولات ما يتقبلون الفكر الأخر ولا حتى يسمعونه ويضلون على فكر واحد عمره ما يتغير

وطبعا اداتهم النقاش بالصراخ ورفع الأصوات

والله كثرة هالأشكال اهي الي قاعد تخلي مجتمعنا يرجع ورا

والمشكله ان الدكتور يقوله اخر الدلائل والأبحاث الأخيره في مجلة ساينتيفيك اميركا تثبت شي من صحة النظريه

وهذا الحبيب مصمم ان لا النظريه كلها غلط ولا يمكن ومايصير

الله يفكنا منك ومن الي يفكرون مثلك والكويت راح تمشي لجدام
---------------------------------

موضوع حش وحسد و مرضت ودرب وحاله
فعتوووه.كوم

اسطورة ديكاتيه

ما عندي سالفة بس توني متعشي وقلت اكتب بوست

الكل راح معرض الكتاب وشاف الي اكو والي ماكو

ولكن ما اعتقد احد انتبه إلى ان كان في كتاب موجود عند اغلب المكتبات ولكن محد كان مقدر قيمته المعرفية الكبيره

هالكتاب هذا يا جماعه هز الكثير من الجبال والمشاعر والإرادات القويه

المؤلفة من اكثر الناس حكمة وشطاره للوصول إلى عقول الناس والسيطره عليهم عبر الفكره الإقناعيه والدليل القاطع


هي شاعرة الكلمة

هي صاحبة الرأي

هي كما يسمونها صابحة القلم المفتلت

هي بروفيسورة العلم

هي من حول الكيمياء إلى فيزياء والعكس

هي من سخرت عقلها في سبيل العلم والتعلم

جاهدت وكافحت وتعبت وياما احترقت اييدها ولكنها ثابرة

حتى اصبحت هي الرقم 1

منذ زمن ونحن نعرفها ولكن لم نعرف قيمتها

اصدرت كتبها ومؤلفاتها التي كانت تزخر بالكثير والكثير من العلوم والمعارف

هي من ينطبق عليها "كاد المعلم أن يكون رسولا"اي نعم

معلمة ونعم المعلمات

معلمة اجيال وافيال

هي من جعلت الجدور والصحون والصواني ترقص على انغامها

هي من جعلت ديكاتي متبحلقا امام شاشة التلفاز ايام رمضان ناطرا برنامجها

هي وهي وهي من جعلت الكرش لا يصغر ابدا

بل جعلت الإكسات ملوت الفنايل تزيد

انها الأستاذه الكبيره

لوووووووول جنه المقدمه قويه ها

هي هي هي والله من الفراغه قعدت اكتب ماكو شي السوق ميت

grandma bk from france

صباح الخييييييير

هههههههاي من زمان ما كتبت بوست

يا ربي هالبلوق هذا ماللي غنى عنه

قط كل الي بقلبك وامش

لوووول خصوصا البوست الي توني كتبته حق بلوق فعتوووه

والله احس بردت جبدي

المهم عاد اشلونكم شخبارك اصدقائي الصدوقين

مشتاق لك موت ياللي طول غيابك

اي عاد اقولكم امي حبيبتي الي اهي يدتي سافرت فرنسا من فتره

ومن جم يوم رجعت اخييييراااااا

واي ما بغت ترجع

هالإنسانه انا ما اقدر اعيش بدونها

رحتلها المطار والله ما همني العموم لميتها طلعت كل الحنان الي كان نقصني

الله يطولي بعمرها

عاد الحجي ان يدتي بعد راسي رايحه ومبدعه بالسوالف الي يايبتها من اهناك

صج سوالف حريم كبار والله مت ضحك عليها

وما خليت صورت كل شي

اول شي طبعا واحنا بالمطار ولا اشوف بالعربانه مالت يدتي جيس في زرعه

والله قاعد اطالع شنو هذا جنه طماط

قلت والله تسويها يدتي ما استبعد يايبه شجرة طماط معاها على بو ان فرنسي وحلو

بس طلعت ورده عاديه ما ادري شنو موضوعها



لوووووووول لا الي ضحكني اكثر انها رايحه مزرعه يم المكان الي ساكنين فيه ومطيحه مع العيايز الفرنسيات

عاد ماشالله اهل فرنسا اهل كرم جان يعطونها كستنه كل وحده شكبرها
طبعا اشكره راح نخشه حق الشتا علشان نحطه عالفحم ونجابله انا معاها بس

ما نبي احد يضايقنا لوووووول


حياتي يدتي حايشها نقص من البيئه الي عندنا فالحجيه يايبه بذووور حق بعض الفواكه علشان تزرعهم بالحديقه

لووووول المشكله بالجو يا يمه مو بالزراعه بس يالله خل نشوف شنو يطلع معانا


تبون الفلم الي صج حبيبتي شاريه مقله

تقول شكلها يغري خنشوف فرنسا واهل فرنسا اشلون عدت المطبخ مالتهم كواليتي ولا لأ


والله حسستني انها رايحه ايران ويايبه معاها جدور هذي سوالفها بعد

واهني يايبتلنا صمون فرنسي بس تدرون شنو عظيم يالربع

لوووول خو ما نطرت على طول بطلتها وكليت

حتى ريحتها عجيبه


لوووول على قولت يدتي هاك يمه هذا عنب يايبته مغسلته بماي فرنسا جرب جرب

بعد عمري حاطته معاها بالطياره تقول اخاف السكر يوهقني او شي الا معاي عنب

واحنا مالت على الباميه لما نخاف السكر ينزل ناكل ككاو

واهني اخر شي طلعته من الجنطه بطوووووول

لوووول اقول حق يدتي شنو هذا واين

كااااااااااااك

لا هذا زيت الجوز وزيت زيتون

طبعا هم جربتهم ما خليتهم

حطيتلي بطاسه وقعدت اغمس فيه الصمون

منو يقول ما تعشيت عندها ذاك اليوم

لووووول وطبعا حق البنات مو مخليه كريمات وسوالف مو يايبه

انا اهم شي طلعت بالبلوفر مالي ويايبتلي عطر

طبعا اول ما وصلت قتلها عطيني جوازج ماكو سفر بعد

تعبت نفسيا ما اقدر افارقج

:)

بوست ظريف سريع والياي اعظم

اي اي تعالوا ترا طبيت بالبنات الي عندنا بالكليه بالفعتوووه.كوم

الإسبوع الجامعي البارد

بسم الله الرحمن الرحيم

اخواني الطلبه والطالبات

ارحب بكم في بداية الفصل الدراسي الأول 2009/2010

واتمنى لكم دوام التوفيق والنجاح

يا ربييييييييييييييي

يا وييييييييييييييلي

ليش احس اني قاعد اقول مقدمة طابور الصباح بأول يوم دراسي

هي هي هي

اول شي صباح الخير اشلونكم شخبارك اعزائي الحضور الكريم

ماكو فايده فيني

اشلون الدوامات معاكم

ادري ادري والله حاس فيكم زحمه وأذية بس ما عليه هذي الكويت صلوا على النبي

وادري ادري بعد حاس بمعانات البعض منكم مع ربعنا المستجدين خصوصا بالمواقف

ولكن للأمام يا شباب

طبعا لازم تغطيه من ديكاتي على الأمور الي صايره

اهني اول يوم دوام وكانت محاضرتي الاولى والوحيده بكيفان واشوه الباجي كلهم بالإدرايه

اييييييييييه كفان يا كيفان

الله يسلمكم اليكم سالفتي مع كيفان

بأحد ايام اول اسبوع دراسي وصلت كيفان وانا متدلع اتمشى عالبحر لإني طالع مبجر

وصلت كيفان ولا الدنيا معفوسه

الله اكبر شصاير

ولا الدوريات مهزئين الطلبه عدل

الله وكيلكم مخالفات على افا من يشيل

يا سااااااتر

والله صج كان حوسه وحالة يومها

المهم انا كعادتي اطق فوق تحت نهاية مواقف الآداب اهوه ما يصير ادخل منه ولكن متعودين احنا عليه

المهم دخلت اللفه ولا اشووووف شرطي يأشرلي تعال تعال

وانا ومعاي يمكن 7 ولا 8 سيايير وقفنا

واخذ اجازاتنا وجذي

وانا لما الحين ماسك اعصابي

جان ايي مره ثانيه

عمي الشرطي: خالي خالي طلع دفترك وانزلي يالله خالي الله يطولي بعمرك

لووول وانا خذيت دفتري ونزلت وكلي تفائل

جان اقوله ترا احنا بجامعه اهني

واهوه يقولي انت داخل لفه ممنوع تدش فيها

عاد اهني ديكاتي استنفر

جان يطلع صوتي والله

وانت يا عمي الشرطي احنا اهني نعتبر بحرم جامعي

وان هذي مواقف جامعه وانت شايف الحال اشلون صاير والطلبه مو لاقين مكان

جاان يقولي يعني حتى لو بالجامعه هل تخالف القانون

قتله روح اقرا الائحه الجامعيه وشوفها شنو تقول

مو من حقك تخالفني وانا داخل الحرم الجامعي وثاني شغله احنا مو معطلين السير او مسوين ازعاج لما ناخذ الفوق تحت هذي

كليته كليته وبصراحه انا ترا ما ادري اذا في لائحه تقول هل احنا نتخالف بالجامعه او لا

عاد المهم شاف اسمي جان يقول شصيرلك فلان وفلان وفلان وفلان

لوووووووول كلهم عيال عمي

جان يقول توكل على الله

والله حتى في وحده واقفه يمنا

تقول حق الشرطي ما يصير جذي انا عندي اجتماع مع الوزير

جان الف ويهي عليها واقول وزيره الله يسلمج

لووووووووووول ترا كلش ما احرجتها ولا قامت تقط الوان

والله يهديهم بس على سالفتهم اخوانا الشرطه

لازم كل كورس يسوون لنا نفس هالموضوع

وطبعا دخلت المحاضره متأخر

اما بالنسبه حق استعدادات الجامعه حق الإنفلونزا الخنازير وانتوا بكرامه والله يحفظكم من كل شي

والله العيادات الطبيه متواجده بشكل ملفت ومنظم

والمعقمات وكل شي ماشي على حسب الأصوول

وحتى التوعيه الإعلاميه داخل الجامعه موجوده من بروشرات وارشاداات وحتى على التلفزيونات بالممرات

والله يعطيهم العافيه


اما اخوكم ديكاتي صاير يتذكر ايام الطفوله من اول ما يركب هالباص

والله احس بوناسه وشعور غريب

احلى شي موقف سيارتي بالظل والأمان والباص اييبني ويردني شنو احلى من جذي

لوووووول طبعا ما ننسى ربعنا الي كلامهم يبدأ ب(سلام علييييييكم)و ينتهي ب(موفقين موفقين)ههههه

الإنتخابات والقوائم

لوووووول حضور جبار ماشالله عليهم

والمشكله ما يداومون المحاضرات علشان خاطر هالإنتخابات

الله يهديكم بس
------------------------------------------------

بوست على سالفة اغلاق القهاوي الساعه 12

تحليل فعتوهي جدا على فعتووه.كوم