Robin Hood movie - fuddruckers

صباح الخير

حلو ان الواحد يعيش شي ممممم شنو اقدر اسميه؟

ممممممممممممممممم

يعني يعيش يومه مليئا بالإنجازات

هذا ما اطلق عليه اليوم الكامل

اويلاه عليك يا امرئ القيس انت

لووول حسب ما تدرون اني من امس معطل فاليوم قعدت يدوب على الظهر

تغديت وجابلت بحثي لما خلصته كله

بعدين سويت شغل ابوي كله

بعدها صليت ورحت النادي ولعبت من قلب

صج صج تعبت بس حسيت اني عوضت اليومين الي طافوا نظرا لإني خربتها على الأكل

وانت متى ما خربتها يا حظي لووووووووول

رجعت البيت وكنت محتاج طاقة لإن بعد وراي يوم ما خلص

رجعت على الساعه 9 خذيت شور

واحلى باور هورس والله بذمتكم الصورة ما تحسسكم انه من قلب بارد

وجابلت النت شوية

بعدين طلعت مع معاذ رحنا المهلب لإني حاجز حق فلم روبن هوود

عرفتوا البباي القديم روبن هوود يمشي سعيدا بالغابة وحوله الأصدقاء

ايواااا هذا اهوه

لوووول بس الشخصية الي بالفلم كلش مالها شغل بالبباي الي شفناه

واهني بعض الصور


البطل حده عجيب

انا بصراحه ما جذبني شي قبل لا ادش الفلم

يعني كنت بروح بس ابي اشوف اسطورة روبن هوود عن شنو تتكلم وشنو قصته

بس الفلم روعه

طبعا هالفلم كله علشان يوصل لكم إن روبن هوود بالنهاية صار هو الشخص الخارج عن القانون

بس بصراحه الفلم حلو جدا

لابد من التقطيع كالعادة ولكن لا بأس

الفلم يستاهل تروحونله حق الي يحب السوالف التاريخية

------------------------------------------

قبل الفلم

قلنا دام ان احنا بالمهلب خل نتعشى بمطعم فدركرز

ما نبي نحوس وايد لإن عاصفة ترابية تغزو الكويت والله يعين

المهم دخلنا المطعم وقعدنا

اول شي المنيو فقير جدا

يعني المنيو ما يفتح النفس وماكو تنوع بالأصناف بالمره

حولت على البرجر وطبعا الكلام الي قبل الوجبة يخليك تسعبل

1 باوند من اللحم و عليه البيكون وذيج الجبنة

انا قلت الحين يا سلااام هذي الوجبة ولا بلاش

ولما وصلت وجبتي
اذا في احد شايف البرجرة خل يقولي الله يعافيكم

انصدمت بالحقيقة المره

الوجبة فاشلة الف % ما حبيتها ولا طعم ولا صوص ولا شي فيها حلو

يعني والله كليت بس علشان اسد يوعي

منو يتخيل ديكاتي يخلي بصحنة جذي
انا اسف ما قدرت اكمل بسبب الإحباط والفشل الي يعيشة المطعم

و حتى المقبلات اصابع الجبن

والله لو اييب مال امريكانا يمكن وايد احلى من الي عندهم

الطعم كلش مو شي

بالبداية الصوص الي معاه رقع الوضع شوي

بس الصوص الي حاطينه عبالهم نبي نحلف عليه

والتزيين جزرة وخيارة

من صجكم والله

مطعم عالمي و هذا آدائكم

الخدمة باردة ولا احد مباشرنا

تجربة سيئة جدا جدا

والله الي يقعد بالمطعم راح يحس ان المطعم يكسر الخاطر

وحتى انت راح ينكسر خااطرك على نفسك

طلع حسابنا 10 دك

مستعد ادفع اكثر بس احصل شي احسن من جذي

لووول حتى قوطي الكتشب ما كان موجود على الطاولة

وعلى ما تنطر الاخت اتييبة لك الا انت طفشت لإن الي تاخذ الطلب قاعد تنظف الأرضية و تودي طلبات الناس

الله كريم والله لا يكثر مثل هالإيام لإنها تذبحني

أهم شي الطعم والجودة والخدمة

اذا ما توفرت هذه العناصر فالمطعم مصيرة الفشل

وديكاتي يطب فيه واهوه مرتاح

مع ديكاتي إلى نحو جيل بطيني واعي