شراب الصيف اللمنعش

يقولكم هذا شراب الصيف المنعش

هالعصير شخباري تدرون شنو قديم

من كنت انا بالروضه يمكن واهوه موجود

بس الحين اشوف قاموا يسوون له دعايات وعروض بالجمعيات

والله تدرون بعد الصيف حرقنا فنحتاج نشرب سوائل اكثر

العطش ما يرحم

وهم بعد في عصير كي دي دي بنكهة الكلمنتين

او بالكويتي عصير افندي والله جيد خوش شي

والله كي دي دي عليهم نكهات عجيبه غريبه

وانا يتلي فترة كله اشرب الباشن فروت صج عجيب بس حالي وايد

يخلي السكر يقعد بالعلالي

ولكن مالنا غنى عن العصير الطبيعي ونظروني بالفترة اليايه بسوي عصير هوم ميد

بس لو نركد ونقعد بالبيت شوية

كله طالع على قولت ابوي انت ما تعرف تحط ...... بالبيت لووول

سيارة ولا لوحة اعلانات

بالله انا بعرف بس هل انا اروح اشتري سيارة



واروح اقط ما ادري جم الف



علشان حضرة هالشركات والمحلات والمطاعم يقعدون يحطون اعلانتهم على السيارة



شنو بالله خلصت الأماكن



يعني الديره شكبرها ما يلقون مكان الا على السيارات



لا عاد الله والي يحطونه تلقى حداد ولا يصلح مكيفات والثاني ثلاجات



واذا بالجامعه يحطون مال مكتبات وبحوث وهالسوالف



وانا ارجع بركب سيارتي ما عندي شغل اقعد اشيل بالإعلانات هذي



لا ساعات يحطون ورقه على الجامه الي جدام وانا اركب السيارة اتعايز انزل اشيلها



فأطق الدقمة مالت المساحات الي جدام فتتحرك الورقه وامد ايدي من الجامه واشيلها



والله في ناس يطالعوني يضحكون وانا معاهم اضحك عادي يبه



ديكاتي عليه سوالف خبالوه بس كول:)

خربشات يهال-لا تطوفكم يا جماعة

الأحلام

سالفة الأحلام هذي ما طلعت من عبث :)

طبعا لازم يكون اخوي الصغير مشارك فيها

مره اخوي سألني سؤال احرجني في بصراحة

أخوي:ديكاتي انت تحلم؟

ديكاتي:(وانا مستغرب من السؤال)اي احلم ليش انت ما تحلم؟

أخوي:انزين بقولك شي؟(واهوه يتكلم من صجه

ديكاتي:قول شعندك؟

أخوي:ديكاتي اشلون يحلمون علمني

لوول شنو هالسؤال

ديكاتي:(وانا متوهق)لوول قتله شنو اشلون يحلمون خو لما تنام ما تشوف شي يعني كلش

أخوي:لا ما ادري يعني شنو الحلم

ديكاتي:الحلم مثل فلم او شي تشوفه وانت نايم(يعني بجاوب على سؤاله)

أخوي :انزين يعني انت كل يوم تحلم

ديكاتي:لا مو كل يوم بس يعني الواحد لما ينام غالبا يحلم بأشياء

أخوي:ممم انزين انا بحاول احلم

ديكاتي:اوكي

بعدها بجم يوم

ديكاتي:ها حلمت ولا للحين؟

أخوي:لا للحين قاعد احاول

لووول تكفه حلم شتحاول في

وإلى اليوم و اهوه يسعى إلى انه يحلم ولكن شكله للحين مغرز

انا اعتقد سؤالة هذا طلع لإنه ما يعرف شنو اهي ماهية الحلم ،او ان مو فاهم شنو يعني حلم، المشكله ان صغير يعني اشلون افهمه شنو الحلم

اخاف اقوله كلام علمي بحت ما راح يعرف

بس سؤالة بصراحه مو طبيعي يعني ما توقعت ان راح ايي اليوم الي احد يسأنلي هالسؤال علشان جذي هذي بعض المعلومات الي تفيد في معرفة ماهية الحلم

يقولكم الأحلام تتكون نتيجة دوافع لا شعورية ومكبوتة بالاشعور

او ان الحلم يكون تذكر لإحداث سابقة

أو ان الحلم يكون استمرار بالتفكير في شي ما

المصدر:مقرر علم النفس والحياة

:)

خل نحلل الكورس شويه خل احس اني استفدت معلومه

بطاط بو شنب

اليوم فيني تحلطم على هذا برينجلز

وعلى قولت ناس بطاط بو شنب

والله بالفترة الأخيره قاموا ينزلون نكهات وايد

اليوم رحت مع صاحبي ساد سمايل سيتي سنتر كنت باخذ شغله فقلت خل ناخذ برينجلز بالمره

خذيت بنكهة الصلصة الحارة

والله بصراحه وايد حلوه عجبتني وايد

بس التحلطم وين

اي انا باطه جبدي العلبه مالتهم

يعني اول جم بطاطه تطلعها سهالات بس الباجي الي يصيرون تحت اتوهق فيهم

ايدي ما تدش كلها

ترا مو عملاق انا بس صج الفتحه صغيره

فتضطر انك تميل العلبه علشان ينزل البطاط

يعني بالله هذي حاله كل شوي اميله علشان اكل

خو كبروا الفتحه شوي خلونا نقول لما تفك ما حتسك بضمير

والله العظيم يبطون الجبد لإني بس اوصل لما اخر شي مالي خلق اميل العلبه

فرجاءا إلى شركة برينجلز كبروا الفتحه شوي انني اناشدكم بصفتي ديكاتي لا بصفتي مواطن :)

اي وانا اهناك شفت سفن آب غريب وحتى العلبه ما ادري اشلون صايرة

ومكتوب شراب غير غازي وقليل السعرات

فقلت خل اخذ واحد واجربه

عشنا وشفنا والله

وسامحوني وايد وايد لإني مو قادر اتابع بلوقاتكم لإن جهازي خربان وبالكحه قاعد انزل موضوعات

انشالله تتعدل الأمور ونرجع مثل ما كنا

لحد يشيل بخاطره يا جماعه :)

كلش مو ملاقيف

لوووول العنوان جيد بصراحه

اليوم رحت حق صاحبي ساد سمايل

وعلى قولت الشباب طبجتي ولا بطاريتي

المهم عاد اهوه ساكن بالمنطقة العاشرة هناك صوب المنقف

المهم رحتله وقعدنا ومجابلين النت انا معاه كل واحد لاهي

جان يدش ابوه يطالعنا ويقول يعني مسوين شي انت معاه قاعدين وكل واحد ما يكلم الثاني مجابلين النت

على قولته لو كل واحد قاعد في بيته احسن

لووول المهم شوي جان ديكاتي يحوشه شعور الجوع

قلت حق ساد ها شرايك نروح نشتري شي اطقطق فيه

قال يالله فوقه

طلعنا ورحنا مطعم قريب يمهم طلبنا ولا شوي جان ايي واحد راعي كورولا شكله بدوي او بدوون

عاد لما شفته تذكرت سالفة جان اقول حق بو وليد تدري ان هذيل البدون الي يبيعون رقي بالشارع يقولون (رجي)يعني رقي

لووول ساد ضحك جان يقولي ديكاتي انت شكلك شفت هذا راعي الكورولا جان تتذكر السالفة جان اقوله اي تصدق

المهم وقف راعي الكورولا ونزل حق المطعم جان يدش باص يبي يصفط جدام الكورولا

المهم الحبيب راح جدامها ورجع علشا يعدل صفطته جان ساد يقول حلاته يدعم الكورولا

الله وكيلكم ما مداه قالها جان طرباخ ولا يدعم الكورولا ونموت ضحك انا مع ساد

قلته حسبي الله عليك شسويت انت

المهم طلع راعي الكورولا من المطعم رايح حق سيارته بشوف الدعمه

جان ساد يقولي ها شرايك نروح نتليقف قتله يالله فوقه عاد لقى منو يبي يطوف لقافه

رحنا جان نقوله ها عسى ما تعورت السيارة بس عاد الحمدلله ماكو شي

رجعنا سيارتنا جان اقوله والله احنا ما نستحي هم مفاولين عليه وهم نازلين نتشمت

وتلموني بعد

ترا انا وساد كلش مو ملاقيف صدقوني لا تفهمونا غلط ترا كان قصدنا كل خير

:)

whats wrong with blasha's blog

blasha's blog

شباب محد عند خبر شالسالفة ما ادري موقعها مو مضبوط عندي

واقطعت ما قامت تتواصل معانا

لا يكون هاكر كالعاده ولا باقوا بلوقها

الله يستر

we miss u blasha

فصلت تالي الليل

لوووول والله لما الواحد يفصل تالي الليل يقوم يفكر أفكار غريبه





وتطري على باله أسئلة أشكال والوان





انا شفت وايد ناس يفصلون بس نفس هالفصله ما شفت الا 2





أنا وساد سمايل بس





ذاك اليوم قاعد الوي بالمسنجر ما عندي شغل اتحرش بالأوادم الي عندي





اطفر هذا اينن هذا واتناجر مع هذاك المهم لما وصلت حالت الذروة





عاد اهني ديكاتي قفل مخه جان ايي في بالي سؤال عجيب





فبما اني كنت يوعان وجذي فكان السؤال كالتالي





هل اهي جكن فليه


او


تشكن فليه


او


شكن فليه





طبعا انا ما عندي اي خلاف على فليه سواء كانت فليه او فيليه





ولكن الخلاف صار على الكلمه الأولى





عاد اهني جان اروح أسأل الشباب الي عندي وانقل لكم رأيهم





sad smile


جكن بالتفسير الصحيح





لوووول انا صج صج فصلت عليه لووول والله ضحكني





mr.chocolate


قال جكن





وان تشكن هذي مالت اعلان نايف





3beedo





والله كلهم صح





عبيدو مخلص عمره

وانتوا شرايكم صج سؤالي غبي نوعا ما بس ترا يستحق التفكير

لوووول عادي اتحملوا فصلاتي شسوي بعد

خربشات إمتحان

لووول اليوم عاد ديكاتي يبي يتحلطم على امتحان الله يعينكم

أمس كان عندي امتحان علم اجتماع ماده ما ادري اشلون صايرة

بس المهم اني ما خذيت الوقت الكافي علشان ادرس لها فتقدرون تقولون اني رحت الإمتحان وانا مو اوكي

وصلت الجامعه وطبعا للحين ما ادري الإمتحان وينه فدقيت على الشباب قالولي المكان

طبعا اهوه بالكفتيريا مالت العلوم الإجتماعيه
أول ما دخلنا المبنى جان يقولنا واحد من المراقبين ان احنا بالطابق الأرضي يعني عند البنات

المهم دخلنا ولا في هم صبيان وايد ولكن ربعنا مو موجودين

قعدنا شوية جان يقولنا المراقب لا انتوا مكانكم بالدور الأول ونروح انا مع جم واحد وهم في جم ابنيه مضيعين معانا

صعدنا فوق ولا ماكو مكان لإن الطلبه كلهم مبلشين الإمتحان واحنا متأخرين

الحظ العاثر ان الصفه مالت الصبيان انترست وخلوني أقعد ورا صفة البنات

قلنا مو مشكله جود يغششون او شي

قعدت ولا الي جدامي تبلش حركات البنات

تقعد تلعب بشعرها وتنفشه وما ادري شنو وانا مخلي الإمتحان وقاعد اطالع

اسمع واحد يكلمني بصوت خفيف ولا رفيجي قاعد يضحك يقولي خلها وجابل امتحانك

لووووول ضحكت جان اطالع الإمتحان ولا أسئلة عجيبه غريبه لإني مو دارس عدل

المهم قعدت احل واحل وكل ما اخلص سؤالين اطالع هذي للحين تلعب بشعرها احس عناد لإن انا قاعد وراها وتبي تسوي حركات

المهم طاف نص الوقت جان تقول الدكتورة الي يبي يطلع يسلم ورقته وطبعا البنات لازم اول ناس مخلصين

وانا المشكله قاعد يم الطلعه مالتهم فكل وحده تمر يمي عطرها يضرب بمخي والله من كثر العطور الي شميتها مخي ضرب قمت أضيع بالإجابات

لوووول واحلى شي لما ثنتين رفيجات قامت الأولى جان تقوم الثانيه وياها وثنتينهم لابسين كعب
وتسمعون بالقاعه جخ جخ جخ جخ يعني قاعد يمشون والصوت مال الكعب عالي

لووول انا لما سمعت جذي قاعد اقول بقلبي شنو صار الغزو مره ثانيه

لا وامتحان وانا قاعد ويمي برجر كنج بس طبعا مسكرينه لإن اختبار يعني كان الجو يضحك

--------------------------------------------

خلصنا امتحان ورجعنا البيت

فقررت اركب الكرسي مال ايكيا واقعد واتعافر معاه

وطاخ وطيخ مو راضي يركب
جان يدخل ابوي يقولي اشفيك شنو هالطقطقه

اقوله هذا الكرسي مو راضي يتركب عقدني

جان يقول وخر وخر ما بقى الا عيال همبرجر يركبون كراسي هذي يبيلها رياييل

لوووول ادري كسر فيني وعطاني واحد صفر بس يالله

المهم ركبته وشغل عدل والله

انا خفت لما ابوي ركبه خلص وياي يبي يقعد عليه بغيت اقوله مو حق اوزان ثقيله بس قلت خل اسكت احسن

والله قعد الحمدلله تحمل الموضوع والله مريح وشغل عدل أنصحكم فيه

أبوي صاير كله يقولي خلف الله على امي
شنو يعني؟

3beedo

بليل طلعت مع رفيجي بعدين ييت برجع البيت قلت ها اليوم الإمتحان مو شي ومالي خلق اقعد بالبييت

الساعه 11 جان ادق على

3beedo

لووول هذا الولد احسن ما فيه ان اي حزة ادق عليه اقوله خل نطلع ما عنده مشاكل

وهم احلى شي فيه ان يتكلم ويسولف يعني الطلعه معاه ما تمل منها

(اي شعليك عبيدو قمنا نرفع سوقك)

المهم والله خذاني ورحنا تمشينا على البحر

وعلى قولته ابو مخليه مواصل يجابل عمال في البيت يقول قاعد مع العمال وحاط لابتوبي يمي

والله كشخه العبد

والله تمشينا ونسولف لما يعنا جان يقول عبيد يالله خل نروح ماك

قتله اوكي واحنا ماشين جان اشوف كنتاكي قتله خنروح كنتاكي من زمان مو ماكل منه

تدرون بعد تسمم وما ادري شنو بس اشتهيته فرحنا والله وطلبنا وقعدنا ناكل بس حلقات البصل ماكان اوكي كلش الظاهر شغل تالي الليل ما يضبطونه

لوول خو انا وعبيدو اخر ناس بالمطعم العمال قاموا يطالعونا جنهم يقولون يالله طلعوا نبي نسكر

المهم طلعنا وهم اتمشينا على البحر بعدين رحنا عالم المانجو شربنا عصير

طبعا عبيد العصير العجيب ماله افوجادو مع حليب وعسل

لووول وبالقهوه يشرب شمام بدون ثلج والله طلباته غريبه هالولد

والله ما قصر طلعني من جو الكئابة والملاقة مالت الإمتحان

انا من اول ما شفته وانا قاعد اقول هذا خوش ولد

لوووووول ولا لمن عبيدو فصل الا يقط قوطي العصير بالزبالة شنو هالنظافه الي حلت عليه مره وحده

لووول ويطق فلشر بالشارع وينزل الدريشه وانا احذف القلاصات واحد دخل والثاني زادت قوة الحذفه جان يروح وره الزبالة

بعدين عاد رجعنا قطني على سيارتي ييت بنزل جان اقوله اكرمك الله بوحسين

لوول جان يقولي منو بوحسين والله من كثر ما انا دايخ نسيت اسمه

صج صج نسيته بس تذكرت والله فشله طالع معاه صارلي ساعتين واخر شي انسى اسمه

بس عادي نمون عليه لووول اي واحد ضايق خلقه بليل يدق على عبيدو ترا عادي

يستقبل طلبات 24/7

لووول

انتهى العد التنازلي الثاني:)

تمر دولة الكويت في الآونة الأخيرة بموجه من الإحتفالات

وبهذا تكون الأيام الي طافت ايام تاريخيه كما ذكرت من قبل

وبما أن امس كان عيد ميلادي والي صادف 31/5

فاليوم أفجر لكم المفاجأة الثانيه

والي كنت متردد أنزلها ولكني اتخذت موقف على قولة النواب هاليومين

اليوم بتاريخ 1/6

عيد ميلاد اخوي الحلو

لووووووووووووووووول

كلولولولولوش

شفتوا اشلون انا واخوي ورا بعض على طول

واتقولون ليه أحبه يا ويلي

لووول

اي اليوم عيد ميلاده يحليله وقلت خل اقولكم دام انكم متابعين حق سوالفة العجيبه

خنت حيلي عنده امتحان انجليزي باجر و ضايق خلقه

ما ادري ليش مستصعب الماده

اليوم كلش كان طافي ومجابل كتابه وكل ما اقوله اشلون الدراسه يقولي والله صعب

عموما الله يوفقه واتمنى له العمر الطويل والسوالف العجيبه الي الله لا يحرمنا منها

:) شفتوا اشلون أحب اخوي

مو انتوا كله تقولون لي انت كله مأذيه وما تعطيه فرصه

بس خلاص ماكو عد تنازلي بعد بس باح

بعد العد التنازلي وكلي فخر أقولها

نعم للأمة العربية

نعم للأمة الإسلامية

نعم للعالم أجمع

اليوم الكويت تشهد أكبر حدث تاريخي ل 2008

اليوم هو يوم يجب أن يفتخر به المدونون

اليوم (بس خلاص ما ادري شقول بعد)لووول

اليوم و ادري ودكم تذبحوني وتطقوني

اليوم كل واحد شكله راح يقول ديكاتي ما عنده سالفة

اليوم يا جماعة عيد ميلادي

:)

لوووووووووووووووووووووووووووووووووووووووول

سامحوني ادري اذيتكم ونطرتكم بس شسوي بحتفل معاكم

وهالصورة اول إهداء وصلني بمناسبة عيد ميلادي

واشكر صاحبها وايد بصراحه صورة وايد حلوه علشان جذي قلت لازم اخليكم تشوفونها

يا سلام الحين بروفايلي راح يصير عمري 20

العمر كله حقي والله يخليني

:)

العد التنازلي

بعد 3 ساعات من الآن

ستدخل الكويت مرحلة جديده

وهي اقرب إلى النقلة التاريخيه التي ستشهدها ارض الكويت

وطبعا هذي الشغله لا تأتي الا مره بالسنه فلا تفوتوا الفرصه

وانتظروا التحديث عند الساعه 12

ولا تفوتون الفرصه لإنها عظيمة وما تتطوف

انتظرونا....