الميلان مساكم الله بالخير

مباراة الذهاب مع مانشستر

قعدت اشوفها انطقينا ولما صارت الدقيقه 60 طلعت من القهوه

اول ما طلعت ولا يحطون قول

قلت مو مشكله يمكن انا كنت فاقرهم

امس رحت حولي شريت كرت الجزيرة

اول مره بحياتي اشتري كرت تلفزيون

وشغلته وكل شي تمام

ومستعد حق مباراة اليوم

بدت المباراة والحين الدقيق 60 اعتقد

مطقوقين 3-0

انا شفت جذي قلت يا عمي خل اقوم اروح فراشي ابرك

ربعنا ما منهم فايده

خساره فادحه مالها داعي

لو خسرانين بشرف احسن

والله ما يندرا يمكن لما انام يحطون قول شرف

ما يندرا والله

بس ما راح اضايق نفسي

انا ترا ما اعصب ولا شي

بس الربع الي حوالينك

او بالأحرى ما اسميهم ربع

هذول الشماته

يشقوني

الله وكيلكم اهي مكالمات اهي مسجات اهي مسنجر اهي بي بي ام


ما خلوا شي

طبعا انا مطنش العموم ما رديت على احد

يعني نااااايم ومو مهتم حق المباراة

اي هين مو مهتم

كاااااااااااااك لا والي يضحك اني اول ما دخلت البيت فتحت التلفزيون قاعد ادور القناة

بس وقفت عليها والله العظيم يا جماعه يدوب عدلت قعدتي

جان مانشستر يحطون قووول

اي لييييييييييش لييييييييييش

افيييييييييييييييييه

اشوه باجر محاضره وحده والباجي معتذرين

حل مشكلة الإزدحام المروري في الخالدية وكيفان

جريدة امس

طبعا اكثر من جريدة ذكرت الخبر

انا قريته بالوطن

النائب فيصل المسلم ذكر ان مشكلة الإزدحام المروري في مناظق حيويه مثل كبفان والخالديه

وهالمنطقتين فيهم مواقع لجامعة الكويت

واوقات الذروه تكون الزحمه مو طبيعيه

صارلي يومين اتحلطم على هالسالفه

انا اطلع من محاضرة كيفان 12 وربع

بس علشان اطلع من المنطقة يبيلي 20 دقيقه إلى نص ساعه

انا قاعد اتكلم عن المواقف الي ورا من عند التربيه والشريعه

وطبعا السبب الرئيسي هم طلبة كلية الشريعه يوقفون سياييرهم بشكل غير متحضر

جنهم قاطين السياره قط

وطبعا المدخل والمخرج واحد

والحبايب يوقفون على جانبين المدخل والمخرج

معناته يا ان ناس تطلع من المواقف او ناس تدخل

لا يمكن تتم عملية الدخول والخروج مع بعض لإن المكان ضيج

اليوم مشكورين شرطتنا الله يعطيهم العافيه

يايبين ونش وسحب بالسيايير الي تعيق الطريق

الله وكيلكم تدرون شنو برد قلبي الحين

والي طالع يصارخ سيارتي سيارتي

والشرطي يقوله لو تبي سيارتك جان ما قطيتها اهني بالشكل هذا ومشيت

بصراحه زينن سويتوا فيهم

ما راح تخسر شي لو وقفت بعيد شوي ومشيت خطوتين

احد اطباعي البطينيه

فيني طبع ما اقدر اغيره كلش

السالفه يا جماعة الخير

الكل يدري ان ديكاتي مسكين ما يحب الأكل

اي هيين اخ ديكاتي

اليوم كان يوم شاق وطويل جدا

ما تغديت وبعدها رحت الندوه

ورجعت سويت مشاوير كثيره

على اخر مشوار اتصلت على البيت اشوف شنو العشى

قالولي كل خير بس تعال

قلت يالله حلو الكلام

وانا بالطريج افكر شنو الاكل والأفكار اتيي وتروح

وفجأة لقيت نفسي وصلت البيت

دخلت ولا الوالده طالعه وقالولي انهم طالبين بيتزا

قلت يالله حلو بيتزا بيتزا شورانا

وتوصل االبيتزا واتييني المفاجأه

ان طالبين 2 صغار كلش

1 كبيره

و2 بطاط ودجز صغير

اوكي انا كل الي كليته 3 قطع بس انا طول اليوم مو ماكل عدل كله خرابيط الي قاعد تصبرني

معناته ال3 قطع ما تكفي

انزين في قطعتين باقين ولكن الطبع الي فيني ما يخليني اخذهم

اقول يمكن احد يبي وحتى لو محد يبيهم ما اخذهم

ما ادري احس ما اتقبل السالفه

انا متعود اقولهم وقت الي تشترون شي واقولكم اني يوعان ييبوا شي راهي مو حده حده

انا لما يقولون لي اشترلنا عشى فيني طبع اييب زياده

يستانسون والكل ياكل عدل

وبيتنا ماكو شي يقطونه اذا زاد

لووووووووول يدرون ساعات ايوع بليل وابطل الثلاجه

فالحين باقي قطعتين قلت الحمدلله وقمت وانا بهدوئي خذيت مفاتيحي وطلعت

كنت متوجه إلى ماك ولكن الزحمه الي عنده قتلتني فقلت ماكو غير الهندي وامشي حالي

لووووووووووول وهم ارخص بيني وبينكم

والله واروح واطقلي صمونتين و سمبوسه

وعنده شي من هالإختراع العظيم

يكون داخله اما لحم او بطاط او جبن

عاد انت اختار الي تبيه

خذيتلي وحده جبن

والحين المزاج مرتاح عكس قبل لا اكل عدل

ومنبطح بفراشي اقول الحمدلله على النعمه

هههههههههه واليوم ما رحت النادي وهذي بداية الخراب يا ديكاتي

الندوة الخاصة بالمدونات

اليوم رحت الندوه الي مسويتها مجلة العربي

الحضور ميييح طبعا

الكلام وايد حلو

لدرجه اني قعدت الساعتين كاملين لما خلصوا كل شي

الحضور الي كانوا موجودين نصهم من مصر

واشكالهم علماء يا سااااتر

والله نظاره قاعة بطل ومحدبين شوي والصلعه يكسوها شعر ابيض خفيف

كل واحد من المحاضرين تناول موضوع من وجهة نظره

من المواضيع الي عجبتني "حدود الرقابة على المدونات"كان موضوع وايد حلو

طبعا عريف الندوه الدكتور انس الرشيد

الي اثار اعجابي اكثر شي د.رشا عبدالله

كلام منطقي وشرح جميل وامثله حلوه

بصراحه مشاركتها اثرت اللقاء وايد

صج ان وقت اسألة الحضور شقوها بس هذا دليل على المعلومات الكثيرة الي عندها و مدى تجاوب الحضور معاها

وانا قاعد تواجد رئيس قسم الإعلام د.يوسف الفيلكاوي

بغيت ارز ويهي بس ما صارت فرصه مناسبه

بصراحه كلامهم يخليني استانس اني انتمي لمجتمع المدونات

المدونات انتم المستقبل

ندوة للمدونين

ندوة تخص مواضيع المدونين وعالم التدوين

في برنامج ندوة مجلة العربي

اليوم الساعه 4 العصر

ورئيس الجلسه الدكتور أنس الرشيد

وهذا البروشور مالهم


فندق كراون بلازا الفروانية

قاعة الأندلس

مولد الرسول عليه الصلاة والسلام

ما عندي شي غير ان تذكرت شغله

في سنة 2008 كانوا يعارضون هالشي

واليوم انشوف الإحتفالات وذكرى مولد الرسول الكل قايم فيها

هل هذا كان خطأ منهم قبل سنتين

ممممممم

يعني مسوين حمله على الجامعه كلها

واخر شي يطلع شغلهم غلط

شغله فكرت فيها

والحين مليت وانا افكر فيها

وخلاص بطلنا يبه ما نبي نفكر

بس الله يبعدكم عني وما ابي افكر مثلكم
-----------------------------------

الصوره القديمه توهقت اشلون اطلعها

الله يخلي قوقل بس

كتب الي اتذكره من الموضوع جان يطلعه

لوووول اشوه ان مدونتك يا حجي ديكاتي

اول تحلطم على النادي

اففففففففففففففف

قلبي مترووووووسه

اليوم رحت النادي سخنت وكل شي تمام

ورحت صالة الحديد علشان اسوي الجدول اليومي

طبعا في مدرب معاي دايما اروحله ويساعدني ويقولي شنو اسوي

اليوم على كل جهاز اتمرن فيه ايي يقولي زييد الوزن

شيييييل يا ديكاتي

ارفع ظهرك

عاد استغربت منه لإن يدري انا ما اقدر اشيل

على احد الاجهزه جان اييني قالي مسويلي نفسك وحش على هالوزن الي شايله

جان اهد الجهاز

قتله والمطلوب

جان يقول لازم تتعود تشيل وزن علشان تكبر العضله

ومن باجر تاكل موزتين وانت ياي

والغدا صدر دياي بس

كاااااااااااااااااك

يحليله ما يشوف شر والله

والله يعني يا تشيل ولا ماكو قايده يعني

والله ياجر ان حسيت زودها شوي بطنش فيه

واكمل تمريني الشامل وجهاز المشي وكان الله غفورا رحيم

مو لازم اصير كبت او مفتول العضلات

راح اسوي الي براسي طال عمرك

ولا يقول صدر ديايه وموزتين

ترى جد مو متخيل نفسي

انا ترا اكلي صاير عادي مو مثل قبل اضربه بالخمس

معناته قو اهيييد ديكاتي

تصبحون على خير

كويتايران هااا!!؟

الخبر جريدة الراي

جنا صرنا سهالات حق الي يسوى والي ما يسوى

كل من هب ودب قال الكويت محافظة لنا

يبه الكويت دوله لها سياديتها واستقلاليتها

شخابيط

هاااااااااااااااااااااااااااااي

قوه اشلونكم

اسرع سريع بتقديم الموضوع الي ما ادري شنو الي يابه على بالي

انا كاتب هالموضوع بس علشان الصور ما تضل حبيسة ذاكرة التلفون

اليومين الي طافوا الاهل رجعوا من سفرتهم

عاد واهمه يعدلون الأغراض وجذي

جان اشوف فلوس سعوديه ما ادري شنو الي خلاني اتطمش عليهم

جان القى نوط من فئة 100 ريال

متحول إلى دفتر كتابات فراق جروح وعتاب وحب وغلا

الظاهر بنت فلوس هذي

لووووووول احنا ربعنا اذا شدوا حيلهم كتبوا على ربع دينار ويخشونه يعني ذكرى

ولما تمر على راعي برد وحدك عطشان تبي ماي صدقني راح تضحي بالربع هذا

ويا صاحبة النوط جان تبينه تراه بالحفظ والصون
-----------------------------

اهني هالحبيب صدته اليوم الصبح بدليته ظريفة

إلى جامعة الكيفان

لوووووووووووول حلوه منك

جامعة الكيفان يحسسني اسمها انها جامعة بالسودان ولا هالسوالف

--------------------------------------
لوووول الحين سوالف بعض بنات الآداب

وتحديدا بقسم اللغه العربيه والي ما عنده شي خل يمر و يشوف

ما ادري الدكتوره عاجبها الوضع جذي ولا شنو الموضوع

لوووووووول والله صج خبال هالبنات

لوووول هذي اليائسه انا منها اسقط ولا انرفع حق الدي

انا اول مره اشوف احد يترجى دكتور عن طريق ورقه معلقه على الباب

لا المشكله هالورقه مكتوب عليها بيانات خاصه بالدكتوره

بالله هذي شتسوي فيها

والله انا واقف بالممر وقاعد اتطمش واشوف سوالفهم

لووووووووووول من زود لقافتي جان اتأخر على المحاضره

احم احم

تصبحون على خير

هل كنا بحاجة 11 قتيل لنفرح

في خدمة اخبارية على برنامج التويتر

تم نشر خبر سريع يتناول

ولا تدرون خل انسخه لكم احسن

ourkuwait

الداخلية: تسجيل 11 حالة وفاة في حوادث سير متفرقة خلال فترة الاعياد الوطنية


انا تعمدت ما قلت حالة وفاة بل قلت قتيل

لإن سبب الوفاة خارجي

اي من استهتار الناس وعدم الإحساس بالمسئولية العامه


والله مو حرام 11 واحد راحوا من جيس اهلهم والسبه ناس تبي تفرح بطريقه همجيه


غير الي فالعينه و غير طاقينه بساطور


يعني يا بني ادم رايح تحتفل ماخذ ساطور ليش


والصور الله ما كثرها بس ما ابي اشوه اعيادنا فيها


كلهم يومين ليش صار هذا كله


غير ان احد افرادالشرطه توفى بسبب انزلاق دراجته من الرغوه او علبة رغوه مقطوطه بالشارع

طبعا غير الي يحطون مواد اخرى برشاشات الماي من مزيلات شعر ومواد اخرى ما عندي علم فيها

هذا غير في انواع من الرغوه اهي اساس مضره للعين

وربعنا ما يحلا الرش الا على الويه

والله اشوه اني كنت قاعد بالبيت ولا طلعت صوبهم

وجان زين ترتقون بإسلوب النعبير عن الفرحه

ما شفنا منكم غير الهم وضقت الخلق والخساير

المنتخب الكويتي للسيدات لكرة القدم

اليوم مريت على برنامج تو الليل

وكانوا مستضيفين نائب

وموضوعهم منتخب الكويت للسيدات لكرة القدم

انا ما ابي اقول رايي اذا كنت معارض او مؤيد لإن راح تعرفون رايي من الحوار بعد شوي

ولكن في جزأيه شدتني للبرنامج اثناء تمرين المشي الي كنت اسويه

قال النائب ان بدال ما يروحون هالبنات ويمثلون المنتخب خل نستغل طاقاتهم في اشياء ثانيه

ممم لا خوش كلام

وان كرة القدم لا تقدم ولا تؤخر شيئ بالمجتمع الكويتي

يعني على قولته عندك الشباب ويلعبون بالأفرقه والنوادي والمنتخب انزين وبعدين؟

اخييييه هل هذا كلام ينقال

طبعا المذيع قاله ان الدين حث على الرياضه

جان يقول النائب الدين حث على الرياضه للقوه البدنيه والصحيه

يعني مثلا الحين هالبنات الي راحوا يلعبون ويمثلون ديرتهم مالهم داعي

كل فرد بالمجتمع له دور معين

في الدكتوره والمعلمه والمهندسه والمراقبه والموظفه وإلى نهاية القائمه

يعني كل وحده تأدي دورها

اذا بما ان احنا دخلنا على تعدد الادوار راح نوصل بالقائمه إلى الاعبه والرياضيه والمدربه

اوكي نقطة الاختلاف ان ما يجوز تنعرض المبارة على الفضائيات وان المكان لازم يكون مغلق ما فيه رياييل واللبس يكون شرعي

اعتقد الخوات راحوا يمثلون البلد ويمارسون رياضه تنافسيه

لا اهي رياضه اغراء مثلا والي يبي يشوف المباراة علشان يشوف مفاتنهم فالخلل فيه اهوه

كلنا تابعنا المباريات صج انطقينا من فلسطين والإمارات ولكن شاركنا

ولما نشوف المباراة فالهدف المشاهده وليش شي اخر

دخل المذيع على النائب بأن منتخب الجمهوريه الإيرانيه شارك

جان يقول منتخبهم لبسهم محتشم ومقبول من الناحيه الشرعيه

اوكي هل قصدك دام احنا نبي نشارك لازم نحجبهم علشان نقدر نشارك

انا ماني عارف ليش صار الموضوع جدلي وايد مع ان الحقائق واضحه

انا اعتذر اني ما كملت الفقره كاملة ولكن اعتقد وضحة الفكره

قمة القهر!!

مسا الخير

تعرفون شنو قمة القهر الي انا حاس فيها ؟!

لا لا مو اني ماكليت عدل ولا ان احد اخذ البرجر مالتي

القهر ان امس وانا راجع من طلعه ظريفه شفت ولد الجيران

سلمت عليه وجذي واشلونك شخبارك

جان يقولي ها ديكاتي متنان

انا اهني ام العبيد طلعت

قتله هذا وانا داخل نادي صارلي 4 ايام وتقولي متنان

تكفه انا مشلخيني صارلي جم يوم

ولا عارف انام او اتحرك من العوار وايدي شاده وحالتي حاله

والحبيب يقولي متنان

اخ يالقهر اخ ليش ليش يا ربي

قمة الإحباط

لا ولما قتله انا داخل نادي

جان يقعد يرفع بالنادي الي يروحله

اي ب15 الشهر والي يدرب بطل كمال اجسام

وتعال اضبطك بروتين وما ادري شنو الي سماهم

انا لما قررت ادش النادي واستشرت الوالد قالي انا ادفعلك الإشتراك بس على شرط

ان مالك شغل بسوالف بروتينات او مكملات غذائيه

في ناس وايد تتقول ماكو مشكله فيهم

انا بصراحه مو مقتتنع

او مو اني مو مقتنع انا ماني حاس اني احتاجهم

الحمدلله اكل عدل وكل شغلي مضبوط

وقالي شغله خلتني انتبه حق شي

قالي بذمتك ما تغار منهم الي اجسامهم شكبرها والجسم مقسم عدل والعضله طالعه صح

ممممم هل هذا اهوه تفكير الشباب لما يصيرون جذي

يعني ليش فلان جسمه جذي معناته لازم اصير مثله

اعتقد كل واحد يسوي شي له هدف

انا هدفي اضعف ولياقه

في ناس هدفهم يصيرون ضخمين

على لسان معاذ يقول

في واحد ياخذ هرمون وحيد القرن

خو بعد سالفة الهرمونات شي ثاني هذي

والله ساعات الشباب يخبلون بعمرهم وما احس ان التيجه تسوى

اي والله يا زيني انا دبدوب شوي واكل على كيفي

وهات يا برجر وستيكات ومطاعم

والحياة حلوه

والله الحين على هالوضع الي انا فيه

يبيله عصير بارد ينعنش

انا اقول خل اصلي صلاتي واذكر ربي واروح اسوي شي مفيد

باجر دواااام يا ساااتر