الفارسي للطائرات الورقيه+الفرصه الذهبية+تحلطم

اول شي مسااا الخير

شحالكم اشلونكم

بشرونا عنكم

انا اليوم فيني تحلطم نظرا للكبت الي كنت اعانيه الفتره الي طافت

ولكن طفح الكيل

حرية التعبير مكفوله لدى المجتمع البلوقري وانا فرد من هذا المجتمع

معناته راح اعبر عن رأيي بكل صدق وشفافيه

ويالله يا ديكاتي انت بدأت خطوه اولى نحو التغيير

وبالله نستعين

لووووول

بذمتكم ما انفع اكون مرشح على هالمقدمه الزينه

-----------------------------------------------

ذاك اليوم وانا على شاطئ شويخ

رحت حق البحر اشكي همومي

لووول ترا انا عايش جوي اليوم ما ادري شالموضوع

المهم وانا على البحر ولا فريق الفارسي للطائرات الورقيه كانو موجودين

ولا تشوفين الجو اشلون كان حلو

بس ماا شالله الطيارات كبيره

يعني لما وقفت يم وحده منهم انا صرت نتفه جدامها

وخذيت صور ما ادري ليش حسيت اني بدعت فيها بصراحه




هذي الصوره كنت تحته كلش ورافع راسي على الآخر

والله لما تشوف شي فوقك وعالي تدوخ

:)


-----------------------------------------

حطوا بالكم يا جماعه لا تطوفون الفرصه الذهبيه

ترااااه عرض ما يتطوف كلش



3 دشاديش وتحصل على دشداشة نوم

والله يبه عرض يا بلاش يا بلاش

بصراحه انا بعد هالإعلان تشجعت اني اروح اشتري

اخيييه انا بس بعرف منو شركة االإعلان الي مسويه هالفكره الخطيره

والله الداعية الإعلان تطور عندنا بالديره

-----------------------------------------------------
البحوث الطلابية

العموم فينا سوو بحوث واستبيانات ودراسات

سواء بالجامعه او بالثنويه

خلونا من الثنويه

ابي عيال الجامعه

اول هل عادي تشترون بحث وتقدمونه للدكتور؟

الي عادي عنده خل يقولي ليش

والي يعارض انا معاه قلبا وقالبا بس هم خل يقوول وجهة نظره

بصراحه

اناا اول ما بلشت هالكورس من اول محاضره في دكتور قسمنا قروبات

وقالنا في بحث وكل قروب يشتغل

تخيلوا من اول يوم القروب الحلو الي طبيت معاه خذوا قرارهم

وكالعاده قطيه وانييب البحث من مكتبة

انا عمري ما اتبعت هالإسلوب

لإن عادة البحث ما يطول معاي كلش

بالعكس اصلا انا بعد كل بحث حصيلتي المعرفيه تكبر

واستفيد وايد

واستانس اكثر لما احصل معلومات مهمه واقدمها جدام الطلبه والدكتور اخليهم ينبهرون

اما الشباب الباجي ما ادري ليش ما يحبون هالشغله

انتوا شرايكم

والله ما ادري اشلون راح نبني جيل واعي يمكن يقوم بالكويت ويرفعها اذا هذي سوالف الجامعيين المتعلمين

واترك لكم باقي الكلام

:)

سكر زياده

مساااا الخير

هههاي يتراوالي موضوع الزواج الي نزلته اخذ نصيبه

و الغالبية يقولون انت تزوج وانشوف شنو راح تسوي

:)

عمومنز

امس التجمع الطلابي بدوانية ساد

:)

قعده وسوالف وضحك والسكر كل ماله يرتفع

كيف اشلون جذي يا ديكاتي

اول شي انا وساد رحنا القهوه قبل لا ايون الشباب قعدنا شربنا بيبسي هذا اول شي
1

رجعنا البيت مستر جوكليت وصل جان يقول يا جماعه ترا بخاطري كنافة الملوكيه مالت الكنفاني اليديده

ممممممم

خوش كلام

دقينا عليهم قالوا يبيلها ساعه ونص على ما توصل لكم

فقلنا نطلبها ونروح ناخذها من كنفاني المنقف يمنا

رحنا خذينها واسرع سريع للبيت علشان نشوف هالملوكيه اشلون قايله

لووول طبعا فرق بين الصوره الي بالدعايه والي شفناه ولكنها طيبه

والشيره الي معاها ظريفه جدا

:)

هذا رقم2

شوي ولا عبيدو بالطريج يالله انا ياي

واييكم عبيد بطبق حلو شكبره

ولكن انما ايييه

شي رهيب

حلو بريوش ما ادري شسموه ولكن المهم ان حلو

والسكر الي فيه بالعالي

واكل يا ديكاتي ما تخافي

:)

رقم 3 خلصنا منه

شوي ديكاتي قاعد يسرح ويفر بالتلفزيون

ها يا جماعه مشتهي بربيكان

انا رايح البقاله تبون شي

العموم يالله معاك

واشرب بربيكان هذا مشروبي وهذا حياتي وهذا السكر فوق

لا وتعالوا شوفوا الكرت مال البقاله الي يمنا

انا صدت 3 بدليات

اللغه تعبانه كلش

وهذا رقم 4

بعدين الشباب بعد مطاحن ومناجر

لوووووول ترا انا ما اتحرش بأحد كلش مسكين

المهم يعنا

يالله شنو العشى اليوم

اول شي بغينا نجرب بيتزا توسكاني اليديده

لما دقينا عليهم قالوا انها راح تنزل اليوم او باجر معناته ما نقدر نطلبها

اوكي غير المشروع إلى بابا جونز

ونطلب 2 كبار وبطاط ودجز العملاق

انا اول مره اشوف بطاط ودجز مال بابا جونز كل قطعه شكبرها شدعوه هالكثر مالهم خلق يقصونه

المهم اكلنا وبيبسي طبعا

والحين شنو بعد يا ديكاتي تكفه

هذا رقم 5 وخلصناه

هذا الي قلته لكم كله

كان من الساعه 7 ونص لما 11 ونص

احم احم علينا بالعافيه

تتوقعون السكر ارتفع ولا لأ

لووول

عاد انا متبع نظام رجيم فالدكتور قالي لازم اكل جذي يعني لا تلوموني

الدكتور اعلم بشغله انا علي بس اطبق

:)

واحتمال اني نزلت جم كيلوا والله اعلم

:)

ملاحظة:كل شي صورته لما اكلت منه بعدين تذكرت اني بصوره يعني ماكو شي صورته قبل لا ااكل

والله اني راعي رجيم

---------------------------------------------

اليوم ابوي شاريله
mp3 player

من نوع سامسونج

والله خذيته قلت خنشوف شنو فيه ما فيه

حلو وسهل وظريف جدا لا بأس فيه

ولكن استغربت ان مستعمل

لما دخلت على الصور ولا في احد مصور وحاط صوره

والبنت حاطه صورها وصور رفيجاتها

مع ان الجهاز شارينه من الوكيل نفسه ومغلف وكل شي

المهم ما ادري شسوي فيه الحين ارجعه

ولا امسح الي فيه واستعمله

بس يا بنات الي تحط صور بأجهزه جذي خل تمسح شغلها

لا سمح الله طاح بإيد واحد ما يخاف ربه اشلون يعني

الله كريم

بس شرايكم اشتكي عند حماية المستهلك مو خوش فكره

انا شريت جهاز المفروض يديد ومغلف ولكن لما بطلته طلع في صور ومستعمل اشلون يعني

متزوجون ولكن!!

اليوم بطب بالمتزوجين

عاد مو يزعلون ربعنا

لووول بس صج يعني شي لاحظته على المتزوجين

اتييكم السوالف

من فترة صرت اقعد مع شباب اكبر مني بالعمر يعني اكبر واحد فيهم 24 واغلبهم توهم متخرجين

ربع عيال خالي

بس خوش ناس وضحك وشي حلو

الحين القروب تقريبا لو بحسبهم نوصل 12 واحد

دايما نتيمع وجذي

من ال12 هذول تزوجوا 4

امس قلت امر عليهم نسلم ونشوف شخبارهم لإني من زمان مو شايفهم

المهم وصلنا الدوانيه

وقعدنا وسوالف ضحك والوضع مستقر جدا

صارت الساعه 10

المتزوجين كل واحد قاعد يقول والله شكلي بمشي

يعني الحبيب قاعد يمهد لنا اني ترا بمشي بعد شوي

اوكي

من ال10 وثلث لما ونص واحد ورا الثاني قاموا يمشون

الله يالدنيا

وين الي قبل كنا نقعد لما ال12 و ال1

اخيييه

لا والثاني يقولون له ها وين على الله تو الناس

لووول هذاك خو صريح جان يقول مو خبرك مو مستأذن

لوووووووووووووووووووووووووووووووووووول

هالكثر الحريم يخرعون رياييلهم

خو ترا احنا نقعد مره وحده بالإسبوع شدعوه عاد


:)

لا بس صج صج ضحكت

لا ولا الثاني

بعز السوالف وازعاج الشباب وصله مسج

اشوف طخ مره وحده قام يعرق وحالته مو شي

جان اقوله يا فلان اشفيك

جان يقول مرتي تقول تبي جنطه من قيللا مودا

قتله لا عيل من حقك تطخ واذا ارتفع ضغطك قولي علشان نروح مبارك على طول

يا ربيييييي على هالمتزجين

والله ماكو على العزوبيه

:)

ادري ماردنا يوم وراح نتزوج ولكن خل نستانس بشبابنا اول

يتراوالي الي صارله فتره طويله متزوج ما يرد على احد

بس هذول توهم فريش

والي يضحك ان صاحب الدوانيه ما خلا شي ما قاله عن الي مشوا

المشكله ان ملجته بعد شهر

شكله الدوانيه راح تسكر بيبانها الساعه 9 ونص بعد ما يتزوج

:)

نشوفكم على خير

بعد ال12 ساعه هلوسه

صياح ومساء الخير

:)

سكتوا عني توني ماكل بيتزا قاعده على جبدي

لوووول بس كانت شي والله

المهم

اكتشفت نظرية ديكاتيه

تقول النظرية

بعد 12 ساعة من النوم العميق تبدأ بالهلوسه في الأحلام

اها اشلون يا استاذ ديكاتي

انا اقولكم

:)

اليوم تخطيت حاجز ال12 ساعه بالنوم

حسب تقديراتي ان من طفت ال12 ساعه الأحلام قامت تصير شي مو طبيعي

بعد ال12 ساعه حلمت 3 احلام

الأول

الله يعافيكم لا تضحكون ترا حلم شي مو بإيدي بس هذا الي صار

اول حلم كان مسلسل بريزن بريك

لووول بس مو بريزن بريك عادي هالمره الشخصيات الي تمثل كانوا كويتيين

طبعا انا كنت معاهم

وكان المقطع لما هذاك يبدل الفلوس بالجنطه ويحط فيها مجلات

هذا اول واحد طوفناه

الحلم الي بعده

حلمت اني برميثيه قاعد اسوق

بس لما ورا

يعني الناس الي بالشارع كلهم يسوقون بس قري يعني حاطينه
R

ونسوق

ما ادري ليش بس حلم عقدني وانا احلم فيه

الحلم الثالث والأخير

سيارتي واقفه على جسر الغزالي عند الجامعه

وفي واحد مصري واقف يمها وباق الباقات وخاشهم تحت ملابسه

جان اييله واطلعهم من تحت قميصه

واردهم السياره واحرك

انا سألت نفسي لما قعدت ليش السياره كانت واقفه مع اني بعد ما اخذت الباقات ركبتها ومشيت عادي

نصيحه لكم يا اخوان

لا تتعدون ال12 ساعه من النوم

انا قعدت احس مخي متحرك ماخذ يمين شويه مو عارف افكر

لوووووووول بس بصراحه صج صج خوش نومه

حللت الساعات الي فقدتها من النوم طول الإسبوع

:)

هالأيام ادري ما عندي سوالف بس بخاطري اكتب

ما يهزك ريح يا ديكاتي
-------------------------

مقوله اعجبتني

النساء:

أكثر المخلوقات ثرثرة، ومع ذلك فهن يكتمن نصف ما يعرفن


صج عاد؟


:)

مستر كسول

مرحباااا

تقرير يومي الكسول

اليوم قعدت الساعه 10 ومحاضرتي 11

وعيزان مالي خلق

اتعرفون الي اقوم من فراشي وارجع اقط نفسي عالمخده

كلش دايخ

بس تعوذت وقلت خل اخذ شور اصحصح

تسبحت على راحتي ومزاااج عمره ما صار

طبعا عيارة لإني مالي خلق اداوم

خلصت واوقف جدام الكبت اشوف شنو البس يعني طالع فيها

وبعدين قعدت امشط فلفولاااتي بمزاج

عيااارة يا ديكاتي

وقعدت ارتب اوراقي

ما صار حلو الترتيب الا اليوم اخ منك بس

خلصت ورحت وخليت السياره تحتر على راحتها وطبعا مو عوايدي

طلعت من البيت توني بنزل عالخط السريع جان اتذكر ناسي ورقه

لوووووول طبعا بدون تفكير رجعت البيت

يعني كل هذا علشان ما ابي اداوم

رجعت خذيتها جان افكر ها جنه يبيله امر الفرع اشتري جوكليت

واروح الفرع واشتري كيندر سبرياس

اشوف الوقت ولا افففففففف باقي 10 دقايق على المحاضره

لوووووول لا والله احلف يعني الحين كل هالتأخير الي سويته وتحاتي بعد

واطلع عالخامس واعطيه الي في بطنها كله

وصلت كيفان والمحاضره المفروض صارلها 5 دقايق مبلشه

قطيت السياره اخر الدنييا ايضا مو عاويدي

بس قلت انا مـتاخر بكل الأحوال خل امشي شوي

نزلت من السياره مشيت جم خطوه وتذكرت اني نسيت الهويه

مو خبركم كيفان لازم تطلع هويتك حق السكيورتي

لوول انا كل مره اخليها بالسياره وعادي يدخلوني بس هالمره غصب بصير منظم

وصلت ولا الشباب واقفين بره

سلمت ودخلت

ولا واحد يقولي ديكاتي ترا الدكتور معتذر

اياااااااااااااااااااااااااااااااااااااا ........ طوووط

لووول بط جبدي انا بروحي مالي خلق لو مكمل نومتي احسنلي

بس اليوم حسيت اني عيار وقاعد اتدلع كل هذا لإني ما ابي اداوم

خخخخخخخخخ

والله ما تحوشكم مثل هالحالات ولا بس انا

:)

------------------------

موضة الوردي كل مكان

ولكن مثل هالوردي انا ما شفت

عذبني بس

موضوع بوتيت

يالله حيااا كيف الحال

ديكاتي صاير مو مضبوط ادري

ماكو بوستات مثل الناس والسوق نايم وماكو شي

حاليا انا بالقهوه ومعاذ مجابل ويهي

الله يستر على هالصبح شكله راح يكون مشئووم

ويييه و مستر جوكليت وصل بعد

ياااا الله

المهم

خخخخخخخخ

انا قاعد يمهم واحش فيهم

بس اشوه انهم ما راح يقرون الا لما يرجعون بيوتهم

عاد اقولكم

هاليومين طالعين طلعه بتلفونات النوكيا الصيني

واسعارهم طايحه بالأرض

يعني جهاز وشي زين يطلع عليك ب 45

ولكن

باالنهاية صيني يعني ماكو فايده

شوفوو هالجهاز العجيب صيني طبعا

المنيو نوكيا كامل

ولكن المسميات غبيه

لا وابشركم في تلفزيون بعد

لوووول ومن تحت تطلع الأريل

حشى مو تلفون

والله ما خلو شي عيال الصين

بس بالنهاية اذا الشي مو اصلي ما منه فايده

وما اانصح فيه كلش

:)

اي والله قال اريل قال

----------------------------------------

الا شرايكم بالجو امس

اخييييه كان بديع والله

غيوم وهوا وشمس وبرد

وانا لابس خفيف يعني طقطقت الا شوي

:)

وخذيت صور الي يازتلي

طبعا اهداء صغيررون حق ملاك

لوووول ملاك ما راح نخلص ترا انا اسوي اهداء وانتي تردين علي بإهداء ثاني

انزين لما متى عاد
:)

----------------------------------

امس وصلي ايميل من صوت الكويت

اهي حركه شبابيه معروفه

المهم كان عندهم عرض حق فلم اسمه"عندما تكلم الشعب"وايد حلو

امس حضرت الجزء الأول

والأثنين الياي الجزء الثاني

والأثنين الي بعده الجزء الثالث

بصراحه فلم وايد حلو اهوه سياسي نوعا ما

قاعد يتكلم عن مجلس الأمة والنواب والي قاعد يسوونه

بإسلوب مضحك ويشد المشاهد

طبعا الحضور كان لا بأس فيه

بس الكراسي مو مريحه لووول

ولكن كانت تجربه حلوه وايد

واعتقد اني راح اروح الجزئين اليايين اذا صار في مجال

:)

---------------------------

ترا عنوان الموضوع على ذوق معاذوو

قتله مليت من الأسامي ملوت المواضيع المنوعه

حطيت تناتيف و خربشات نبي شي يديد

كنت بكتب مقتطفات ولكن معاذ قال اكتب موضوع بوتيت

تنانيف- كاميرات السرعه!!

هذا الخبر امس قريته

واليوم واحد من الشباب اكد الموضوع

يعني خلاص ماكو كامرات مقلوبه صارت الكامره تصور من الجهتين

والله شكله اخر شي وزراة الداخليه بحطون صواريخ

علشان محد يفكر يدوس

بس للحين ما طبقوها على الكامرات بس شوي شوي راح يسوونها

يالله نطروا شويتين والشباب يطلعون لهم حل حق الموضوع

ما تخاااااااافي

:)

------------------------------------------

اليوم اول ما دخلت الكليه

كان في شي غريب

الي كان بالإداريه الصبح يمكن شاف الي انا شفته

اليوم شفت 5 إلى 7 بويات

طبعا كل ثنتين بروحهم

ما ادري شعندهم اول مره اشوفهم

تهقون عندهم هووشه

:)

لا في وحده لابسه نجديه لونها خطير

الله يكافينا الشر ويحفظ عيالنا

-------------------------------------------

امس بينما كنت اقرا خطاب الأمير بالنسبه لحل المجلس

والمشاكل الي قاعد تصير مؤخرا

حق الي يهتم بالموضوع

خل يقرا الخطاب وراح تلاحظون ان في رسالة الأمير الله يحفظه قاعد يوجهها

ما ادري انا لاحظت الكلمات المستخدمه والإسلوب حسيت بشي اعتقد اني فهمته

مممممم

وهم ال
BBC

خذوا الخطاب وحللوه

فيعني شي جيد شدني هالفتره

شرايكم نوقف موضوعات الأكل والضحك ونقلب سياسه

دام العموم يتكلم بالسياسه

:)

ترا انا قاعد اسولف لإن الغدا ما استوى للحين وابي اضيع التايم

المشكله بطلت الجدر طلع عيش ابيض فأكيد اليدام تحت العيش

طبعا العمه الشغاله واقف فوق راسي ما خلتني اتعبث واستكشف

هههههه

نشوفكم على خير

برجرز

مساااا الخير

اشلونكم شحالكم

:)

هي هي هي اليوم ديكاتي ناوي على شر

ويمكن البعض راح يطقني ما يندرا

بس لازم اعبر عن ما في جعبتي

اول شي

مطعم بلاك اند وايت سالم المبارك

هذا الفرع الجديد لهم

وطبعا انا ماعطي رأيي المطعم هذا من زمان

وبصراحه برجرهم صج صج عجيب

اول شي المطعم وايد وايد اكبر من مال المنطقه الحره

ودورين طبعا ولكن حاليا الدور الي فوق ما خلص

رحناله بالويك اند وكنت متوقع ان زحمه ولكن طلع صخه

بس شي مرتب وحلو وايد واهم شي ان قريب يمي

قبل كنا نشد الرحال لما المنطقه الحره علشان ناكل منه

وطبعا كالعاده صور من هنا وهناك

لوول اهني صوره ولكن على طريقة بلاك اند وايت


وهذي وجبتي الي استمتعت جدا فيها

والله لحمهم في نكهه حلوه ما تحصلها بأي مطعم

بصراحه مطعم من افضل المطاعم للبرجر

يتراوالي احسن من برجر هب

:)

------------------------------------------

لوووول الكل شاف صمونة برجر كنج اليديده

هالله هالله

اليوم رحت جربتها

بصراحه اهي كقطعة لحم ما فيها شي زود

ولكن نكهتها حلوه لإن حاطين معاها بيف او ما ادري شسمونه هذا

بس جيده لا بأس فيها

يعني اتوقع اني راح استغني عن الدبل ووبر بوجود هالوجبه

لووول وطبعا لما اكلت نص الصمونه قلت حق الشباب الي معاي

والله حجمها بالصج مو نفسها بالصوره

لوووووول هالإستنتاج طلع لإني حسيت اني ما شبعت

:)

سوالف ديكاتي ما تخلص

دام ان هالمطاعم تنزل اشياء يديده

الحمدلله من قررت اسوي رجيم وانا ماشي على خطى ثابتهه

اللهم لا حسد

لووووووووووووووووووووووووووول

نشوفكم على خير

خربشات ديكاتي

في احد ايام هذا الإسبوع المتروس من الشغل

والأعمال الشاقه مع النفاذ بحكم انك بجامعة الكويت الموقره

ذاك اليوم قعدت الصبح وخذيت شور وكل شي ماشي بامان الله خلصت اول محاضره ورحت شريتلي كتاب

فقلت ما ابي ارجع الجامعه

خل اروح المنطجه الحره اقعد بالقهوه واشرب شي واقرا كتابي

حلو الكلام

حزتها المووود كان اوكي وقاعد امشي واتحلطم على الي اشوفه لإن ماكو احد اقرق معاه

المهم وانا عند الجسر الأخير مال الغزالي صار زحمه

وجدامي راعية بورش كايين علييييها باااااااف

مو صج

يعني بين بفها وسقف السياره اقل من شبر

شدعوه عليج راسج تافخته هالكثر

عاد انا قاعد اتحطلم واعترف اني شقيتها بالتحلطم

ولكن الله ما يطق بعصا يا ديكاتي
هي هي هي

لووووووول المهم الحين صار يميني رصيف واهي على يساري

انا طفت بس بحركه لا اراديه كنت بشوف الباااف من الجنب لفيت ويهي بطالع

جان طق احوش الرصيف

قلت عادي يالله مو اول مره احوش رصيفف

ولكن جدام شويه صار شي مو زين
لوووووووووووووووووووول الله ما يطق بعصا ليش تحش بالبنيه شوف زين لك الحين

والساعه 11 وحر

ادق على الربع الي يمي ماكو االي محاضره والي ما يرد

وحش بروحي

واطلع العده واقعد اسويه

انا ما اقص عليكم صج طفرت

يعني من قعده هاديه واقرا كتاب واشرب شي

إلى تصليح تاير وحش بروووحي

لا وانا قاعد ارفع السياره وايي هندي وقف وراي قاعد يطالع

انا هم ما ايوز قاعد اتحلطم اقول بقلبي خو يا تساعدني يا تطس لا تطالعني جذي

لوول لما فكيت التاير وييت بركب السبير جان ايي

لاااااااا والله تو الناس

الحين قاعد اركب براغي التاير وهذا قاعد ينزل السياره ولا طربااااااااااااااااااااااخ

ما ادري شنو هالصوت المهم جان اخزه وانا واصل حدي واهوه يضحك

جان ازفه ومشيته

اي والله قهرني قاعد يضحك

بس هم رحت القهوه وبس قاعد ومجابل الماي حتى مالي نفس اقرا ولا اسوي شي

----------------------------------------------------
في اشاعه اطلقها بعض الشباب بالجامعه والي اشك بمصداقيتهم

ولكن اخر محاضره امس كان الموضوع المتداول بناءا على الإشاعه

ان الجامعه ما راح تسوي كورس صيفي لعجز بالميزانيه

عاد صج جذب العهده على الراوي

بس ترا مو شي احنا بروحنا متأخرين ترا

بس هم ما اعتقد شنو خو مو فوضه السالفه

------------------------------------------

لووول واستقاااااااااااااااااااااااالة الحكومه

يالله دخييييلك

ما مداهم

قبل شهرين مسوين حكومه يديده والحين استقالت

واحنا ما عندنا غير استقالوا وحلوا وانتخبوا ورشحوا

اقوووووول عمي اترس بطنك وجابل دراستك واطلع مع ربعك وخل هالسوالف عنك

اليوم احد النواب الموقرين حاط خبر بالجريده نرفزني بصراحه

انا بعلق مو قادر امسك نفسي والي فيها فيها

يا حبيييييييييييييييييييييييييييييييييييييييبي انت

الحين بناتنا مو قاعد يدرسون بجامعات ومعاهد ودكاتره يدرسونهم

انزين بالمدرسه الي يدرسون فيها ما في اداره ما في عمات عين

ثاني شغله حتى لو مسائي الصف مو اقل من 10 طالبات فيه يعني شنو بسوي

على طول مساءله حق الوزيره واستجواب يمكن بعد

وترا انت قاعد تتكلم عن مدرس مو صايع ولا هتلي يايبينه من الشارع

ناس تحر الواحد بصراحه

شنو الي يخليك ما تاخذ خط فيفا؟

مساااء الخير

اشلونكم شحالكم اخواني وخواتي

هيييه يابويا الزين خلانا

هههههههه والله انا الي شكلي بالخلي هالزين

اليوم قاعد مع خالي قاعد يقنعني اني اخذ خط فيفا

فقلت حق نفسي ليش ما اخذ

مع اني حجزت رقم واستلمته بس عطيته الوالد

المهم

انا بقول مميزات الفيفا الي يازتلي

اول شي الإنترنت مالهم سريع و24 ساعه شغال زي الفل

تعبي بعشرين تاخذ زياده 8 دنانير

يعني 28

اوكي

خدماتهم المتجدده دايما شي مو مسبوق لا من قبل زين ولا الوطنيه

خدمة التلفزيون اشتراك 3 دنانير بالشهر



ويشتغل بسرعه وما يعلق وما يحسب عليك اي قيمه اضافيه

طبعا ادري اني ما راح اجابل التلفزيون على تلفوني ولكن هذي شغلهه تنحسب لهم

مو ربعنا تشغل خدمة التلفزيون يحسب 60 فلس للدقيقه

الإرسال نوعا ما متعدل عن بدايتهم

اوكي الحين عندي كل هالأشياء الزينه

وطبعا في المزيد زالمزيد من الخدمات وغير الخصم مال المكالمات

شنو ابي اكثر من جذي فليش ما اخذ

مو احسن من زين الي طلعت فلوس من ديرتنا وتوسعوا وللحينهم ما سووا شي حق هالديره يذكر

الي عنده خط يقولي شنو عيوبه اذا كان في عيوب

والي ما عنده شنو الي يخليه ما ياخذله واحد

طبعا انا ما اختلف مع الي يقول الناس كلها تعرف رقمي هذا فليش اغيره

:)

PIZZA INN!!

من فترة طويلة

يعني فيها شهرين اذا مو اكثر

وصلني كذا ايميل من مطعم بيتزا انن

طبعا من فترة رحت لهم بسوق السالميه

ولكن ما كان مفتوح للحين

ما ادري شحقه شاقيني يإيميلاتهم عيل

المهم من يومين

في طلعه سريعه

قال مستر جوكليت يالله اقترح شنو نتعشى

فكنا قريبين من سوق السالميه

فطاح اختياري على بيتزا انن

المهم وصلنا المطعم كان فاضي ومساحته مو ذاك الكبر

قعدنا وطلبنا

يومها كان عرض واعتقد للحين مستمر

ان تاخذ بيتزا وتاخذ نفس حجمها مجانا

وهذا المنيو


وطبعا غير المقبلات الي خذيناها من خبز بالثوم و بيبروني ريبز او شي جذي

المهم واييكم التقرير

لوووووووول طبعا كل تقرير يطلع بعد ما اترس بطني كلش

اول شي خبز الثوم اطرافه يابسه نوعا ما حتى انا ما كملتها كلها بس اكل جزء واليابس اخليه

والبيبروني جبنتها ما كانت اوكي
مع ان جوكليت شكله يازتله :)

ادري طيحت حظ المطعم بس الحين اييكم الشي الزين

اخيييييييييييييييييييييييه

البيتزا كانت شي حلو جدا

اول شي العجينه خفيفه مع انا طلبناها سميكه ولكن خفتها حلوه

وثاني شي ما تغث كلش

يعني احنا اثنين اكلنا الثنتين وسط مع المقبلات

لووول علينا بالعافيه تفتفتفتف

يعني بيتزتهم وايد حلوه

والصوص مال البيبروني كان جدا حلو احسن من بيتزا هت الي لازم تقولهم يحطون اكسترا صوص علشان يبين الطعم

والبنهايه

يالنا المنيجر مالهم وقعد يسألنا عن جم شغله

وعطيناه ملاحظاتنا

ومثل ما تلاحظون الصحون والقفاش وغيرها بلاستيك

سألناه عن هالشغله قال لإن يمكن ناس تاخذ طلبهم بره يقعدون صوب تجمع المطاعم فجذي يمكن تضيع صحونهم

ولكن الحين خلاص سكروا التجمع الي يم المطعم فمن بعد اسبوع راح يكون كل شي زجاج وما إلى ذلك

وخذينا ورقة فيها اسئله حق تقييم

كانت الإجابات ايجابيه بصراحه لإن البيتزا حلوه

وبالأخير الحساب طلع 4.650

مممم على الي اكلناه لا بأس


والي يحب يجربه ترا بيتزتهم تستاهل

---------------------------------------

اخيييييه من زمان مو كاتب موضوع خاص بالأكل

والله الواحد يحس بمتعه واهوه يكتب

الأفكار تطلع من كل مكان اذا كان الشي يتعلق بالبطن

:)

نشوفكم على خير