وفاة جاكي شان

تحديث تحت

أمس انا وساد سمايل الساعه 12 وشوي

كنا رايحين شارع المطاعم نتعشى

على قولته متنسي بشيش طاووق لووول

المهم واحنا بالسياره شغل على المرينا ولا حاطين اعادة برنامج الدوانيه

ولا ما ادري الياقوت أو الأنصاري قال حق طارق العلي ان جاكي شان مات

جان اسأل ساد متى مات هذا قال ما ادري

عاد جان يقول الأنصاري الكويت كلها تدري ان جاكي شان مات ولا ساد يقول الا الي يمي للحين ما عنده خبر :)

عاد قلت خنشوف موقعه الرسمي

http://www.jackiechan.com/

دشيت ولا مو كاتبين شي عن وفاته ولا حاطين اي خبر يفيد هالشغله

يعني تعتقدون اشاعه او شي ولا شنو الموضوع

وثاني شغله ليش محد قالي ان توفى ؟

:)

لا تخافون ما راح اروح اعزي اهله بس علشان يكون عندي خبر

التحديث

ممم طلعت اشاعه مثلا ما قال

صاحب مدونة كافيه لوبيز

و

fo0o2a

عطتني موقع مارك فيه الخبر الأكيد

مم ثنكس على التوضيح

وجان زين الي ما عندهم شغل يقعدون يطلعون اشاعات يبطلون هالسوالف البايخه

Devil eyes

الظاهر ديكاتي مخطور هاليومين

حطوا بالكم يا جماعه الي عنده واقي ولا درع ولا شي خل يحتاط

ديكاتي قام يشور بالأوادم

اعذر من انذر

لووول

قبل اسبوعين في وحده تصيرلي شاريه تلفون يديد

وشغل عدل ومستانسه فيه

عاد جان اقولها مبروك خوش تلفون وبالعافيه عليج

جان اقولها اي يبه كل يوم تلفون مو احنا الي كل 3 سنين تلفون

وقتلها شرايج تعطيني التلفون وتشترين غيره جان تقول لا توني شاريته

قتلها ترا خاطري فيه كيفج

الله وكيلكم بعدها بشوي ولا يعلق تلفونها

تطفي وتشغل صار زين

بعدها بإسبوع شفتها مره ثانيه جان تقولي الجهاز صاير بطيئ ما ادري اشفيه

قتلها ترا قتلج خاطري فيه وانتي ما صدقتي

جان تقول مو مشكله اوديه الشركه يسوونه لي

وطاف اسبوع وشفتها جان اقولها ها اشلون جهازج

قالت وديته سووله ابديت وبدلو السوفت وير

بس للحين بطيئ

قتلها ترا انا للحين خاطري فيه وانتي كيفج

قالت انا ما راح اتراجع عن قراري

قلت مو مشكله

اخر شي تلفونها ما قام يستقبل مسجات

وبعد ما احد يطرش المسج بنص ساعه او اكثر يوصلون كل المسجات مره وحده

لوووووووول والظاهر للحين مصره على اقوالها


شكلي اخر شي راح احرق الشاشه واخليها ترضى بالأمر الوقع وتعطيني الجهاز

هل تعتقدون ديكاتي شرير لوووول ؟

لا منو يقول كلش مسكين خنت حيلي ما يسوي شي

دربالكم مو تتحرشون ترا انا صاير وحده بوحده

..........

هاليومين صرت وايد اسمع ناس يقولون لي لا تنام وانت زعلان او متضايق

امممم سألتهم ليش يا جماعه شنو المشكله

قالوا ان الواحد اذا نام واهوه نفسيته تعبانه يمكن يقوم واهوه حايشه شي او حلمان بشي مزعج

أو ان يقوم وصحته تكون مو زينه

فمثلا قالولي عن وحده تصير لنا من بعيد انها نامت واهي ضايق خلقها على ولدها لإن كان مسوي حادث وتحاتيه

لما قامت ولا سكر وضغط طافح عندها الي طاحت عليهم وضلت بالمستشفى 3 ايام

بعدين قالولي هم عن وحده كانت توسوس ان حايشها ثعلبه ونامت واهي ضايق خلقها على هالسالفه

فلما قامت ولا شعرها طايح

ادري مو شي هالكلام بس لما الواحد ما عنده شي يسويه علشان يحل مشكلته او يحاول ان ما يتضايق شسوي

انا عندي احسن وسيله اهي النوم وبس

في ناس يطلعون حرتهم بالأكل وناس يدخنون وناس تسوي وايد اشياء

ويسوون هالأشياء علشان يحاولون يهربون من المشكله او يتناسونها

--------------------------------------------------

اليوم رحت فسرت حلم صارلي يومين احلم فيه

ما ادري شنو القصه

ولكن هالحلم قمت احاتيه

الله يكافيكم الشر كله احلم ان فيني سرطان

قالولي روح طلع صدقه

والله طلعت وللحين كل شي الحمدلله انا مو خايف ولكن شوي قعدت مع نفسي افكر

الله لا يقول وصار شي جذي اشلون راح تكون خطوتي اليايه ممم ما ادري ليش قاعد افكر جذي بس طاااف

مو تخرعوني بس اوش ما ابي تعليقات على هالنقطه بليييز

-------------------------------------
سمعت خبر من وكالة الأنباء التشيكيه

الخبر يقول: خروفه خاطبتلي واسبوع الياي عرسي

وعلى قولتها خوش بنت

ومشارك في عملية التفجير مستر جوكليت

و من مصدر سري يقول ان في شركاء بعملية الإختطاف

و من وكالة الأنباء رويترز تؤكد المعلومات ان السفينه الغرقانه فيها ذهب

ولكن أكد مصدر مسؤول من الحكومه أن الطلاب للحين بخير

شكو شكو شكو

للحين ما عندنا اي تفاصيل عن الخبر و الحادث

ويوافيكم بالتفاصيل من موقع الحدث ديكاتي

الرميثيه , الكويت

---------------------------------
ودي اطور من البلوق احس يبيله شغلات يديده

يبيله مواضيع مختلفه

اول شي راح اغير الشكل و الخطوط والألوان

ثاني شغله راح تكون في طريقة يديده للموضوعات

ثالث شغله راح استخدم شغلات تخلي المواضيع احلى


ما اوعدكم اني راح اسوي كل هالشغلات ولكن بحاول

علشان ما ابي احد يمل من البلوق وانا ابي اسوي شي يديد

اليوم ما ادري اشفيني ادري الإسلوب متغير يمكن او مالي خلق

بس حسيت اني ابي اكتب شي عن نفسي فهذا الي طلع معاي

سوري على الملاقه بس يالله مره بالشهر مو مشكله

:)

تفليص شبابي

أمس قعدت انا ومستر جوكليت و صاحبنا برذر هود بستاربكس

نسولف ونتناقش بامور الحياة والبلاد وما إلى ذلك :)

عاد في لحظة هدوء وكان جوكليت يتكلم بالتلفون طليت تحت الطاوله بطريقه لاإراديه

فلمحت ان انا ومستر جوكليت وبرذر هود كلنا اليوم لابسين نفس الجواتي وانتوا بكرامه

لوول طبعا يمكن مو صدفه لإن احنا رحنا شرينا مع بعض وكلنا خذينا نفس الشي

وايد ناس لما نقعد معاهم انا ومستر جوكليت يقولون انتوا حتى بالجواتي نفس الشي

خصوصا بإجتماع بالبلوقر لوول كل ما نروح لازم واحد منهم يعلق أخرهم كان مطقوق :)




لوول في اثنين صوروا هالشكل

تقدرون تعرفون منو احنا اعتمادا على لون البنطرون

لوووول هذا الي يسمونه سؤال تعجيزي

لوول عادي التشير ممكن يساعدكم

مره ثانيه المتواجدين اهمه ديكاتي ومستر جوكليت و برذر هود

مثال:يعني صاحب بنطرون الي لونه جذي هذا فلان عرفتوا كيف

:)

MY FIRST TAG

لووول اخيرا عرفت شنو يعني

tag

لوول وانا اقول اشفيهم الأوادم طايحين له تاجات

اثر السالفة ظريفة والله

لووول لا وانا اقول حق خروفه شنو يعني

tag

ولكن طلع مستر جوكليت هم مسوي واحد فقالي ادخل موقعي علشان تفهم شنو هذا

والله زين حاط شرح جيد

والحين راح ابلش لإن خروفه قالتلي

لوووووووووول وانا اكتب احس فيني ضحكه ما ادري ليش احس الموضوع غريب بس يالله

التاغ الأول (تاج-تاق)كل يدل على المعني

المهم التاغ الأول مال علاقة المفاتيح

انا دايما اشيل مفتاح سيارتي ومفاتيح البيت

على اليمين مفتاح السياره ترا مو كايين هذا مفتاح هوندايتي واللي على اليسار مثل محفظة مفاتيح بس من جلد اصلي امي عطتني هذي

وايد مريحه ما تسمعون خرخشة مفاتيح وشغلك منظم لوول طبعا اهمه 4 مفاتيح

مال الباب الي بره ومال الي داخل ومال غرفتي والرابع ما ادري مال شنو

التاغ الثاني والي المفروض لازم اذكر 6 شغلات عن اطباعي

عاد انا خوش ولد يعني علي حركات غبيه شوي بس ترا عادي سمبل على قولتهم

(1)

لما اقعد اكل غالبا احب يكون معاي احد ما احب اكل بروحي و اذا احد يبي يحطلي شي مو مشكله بس ان ياخذ من صحني اكفخه بالصحن لإن عيب ما يصير هذي حقوق ملكيه لإني وانا اكل كل قطعه بالصحن اتأمل اشلون راح اكلها فلما واحد ياخذها يخرب الخطه

(2)

ممم اتييلي فترات احب اقعد بروحي تدرون شنو اموت واحب على شي اسمه هدوء اخييه والله الهدوء شي عجيب صج احس ارتاح وحتى ساعات اطلع بروحي بس هذي ما تصير وايد الواحد يحتاج يقعد مع نفسه ساعات

(3)

لما اقعد بمطعم او بمكان عام اخذ راحتي غالبا سواء مكان كشخه ولا عادي المثل يقولك خلك على طبيعتك احسن من ما اصير ستايل وكول وما ادري شنو يبه فري كويت

(4)

ممم لما اطلع بروحي بالسياره احط آيبودي واسمع ميتال بس لما يركب معاي احد غالبا اغير او اطفيه لإن الناس ما تحب تسمع ازعاج اما انا ما عندي مشاكل بالعكس استانس واحد يقعد يصارخ لووول ولا اطول عليه بعد حتى الي يمي بالخط السريع يسمع صوت المسجل :)بس اذا وقفت عند زحمه او اشاره اقصر عليه

(5)

لما اروح اشتري ملابس تكون عندي خطه مسبقه يعني اقول ودي هالمره اشتري شي اسود او شي فاتح واروح اختار الأشياء الي في بالي مو من النوع الي اروح اشوف شنو في حلو واشتري

(6)

لوووول لما اتسبح احب الف فوطه على راسي واقعد لووول اي مو عبالكم شعري طويل ومكتكت لا يبه فلفولي شغل عدل بس احب احط فوطه جني علاء الدين .

ادري نص الشغلات الي قلتها مثل وخيتي خروفه بس لإن هذي اول مره اسوي تاغ انشالله مره ثانيه تكون احسن

ممم حاليا ما عندي احد اطلب منه يسوي تاغ لإن الي كنت بطلبهم خروفه ومستر جوكليت حاطينهم

انشالله التاغ الياي يكون احسن :)

مدونة زوبعة شوماخر

تحديث تحت
لووول امس وانا ادور وادعبس يمين ويسار

ولا اصيد مدونة توه مسوينها ما صارلها يومين

قلت يالله خل ندخل نشوف شنو اكو

لووول بيوم واحد 6 مواضيع

ياساتر شدعوه توه فاتح المدونه مداك تحط 6 مواضيع

بدايه قويه وسريعه وكلها تفاؤل انشالله ما يقطع عاد

دورت عن هالمواضيع ولا طلع صاحبنا يكتب بمنتديات وناقل جم موضوع

بس اهم شي انهم ملوته يعني مو بايقهم

والإسم والله ملفت للنظر ولا شرايكم

زوبعة شوماخر

الإسم حلو عجبني

بس انا قاعد اقول هذا اول يوم 6 مواضيع الله يستر باجر


وفي موضوعين لوول ضحكوني

يالله الله يزيد هالمدونات ملينا من هالسياسه والكلام الفاضي

بدايه قويه وسريعه وكلها تفاؤل انشالله ما يقطع عاد

نبي نضحك ونغير جو ولا شرايكم

عموما المدونه تستحق الزيارة

zawba3at-shoma5er

يا جماعه ترا بلوق زوبعة شوماخر مال بنيه مو ولد لووول خوش مفاجئه

الظاهر انها كانت مشتركه بالرابطه :)

عموما حياها الله بالبلوقز

مايكروويفيات:)

Amazing Microwave fun! - The best free videos are right here

انا من الناس الي ما احب الميكروويف يعني نادرا جدا استخدمه وحتى لو في شي ما يستوي الا بالمايكروويف ما اكله

احسه موشي والله وفي ناس ثلاث ارباع اكلهم كله يسوونه بالمايكروويف

اهوه بمجرد ما توقف يمه هذا يضر بالصحه فما بالكم تاكلون شي منه

أنا أعتقد ان اهوه مضر على المدى البعيد فنصيحه لا تكثرون في استخدامه

إضافة الخانة الثامنة لأرقام الهواتف

وزارة المواصلات ستبدأ بإضافة الخانة الثامنة إلى الأرقام في 8 / 8 / 2008م ، وذلك على النحو التالي

إضافة رقم ( 9 ) في بداية جميع أرقام شركة ( زين ) للإتصالات

.* إضافة رقم ( 6 ) في بداية جميع أرقام شركة ( الوطنية ) للإتصالات

.* إضافة رقم ( 2 ) في بداية جميع أرقام الهواتف الأرضية

.* إضافة رقم ( 1 ) في بداية جميع أرقام الهواتف التجارية

المصدر

فلسفات أب

اليوم وانا قاعد اطالع فلم بالغرفه دخل الوالد جان يقولي عندي جم مشوار تبي اتيي

انا فكرت اخاف اقوله لأ يقولي تقعد شتسوي فإمش معاي واذا قتله اي بيي يفر مخي بمشاويره

المهم في الحالتين سواء قلت بروح ولا لأ انا لازم اروح لإن راح يغصبني

اهوه بالبدايه يأمرني بلطف واذا قتله لأ يقولي قوم البس و لا تكثر كلام فانا اختصرت الموضوع

طلعنا وكالعاده ديكاتي يصير دراولهم عاش عاش

(ملاحظة :الوالد لما يقولي تعال وده يزف احد علشان جذي يقولي تعال معاي علشان يشخط فيني طول الطريج :)لوول )

طلعنا اول شي سقت بإيدين لإن اهوه ما يحب احد يسوق بإيد وحده وهذي طافت الحمدلله

اشوفه شغل المكيف حده ومخليه بارد اول مره يسوي جذي ولا العاده لما نطلع بعز الظهر والحر يقصر عليه يقول الي يطول عليه يصير مريض علشان جذي مو زين

واحنا نخيس حر بالسياره

الحين خلاص انا طقني البرد قتله مو جنه برد جان يقصر عليه ويقولي اي زين والله حسيت بالبرد خو انت ما تحس كله مشغل المكيف

معناته اهوه عناد مطول عليه وناطرني اقول برد علشان يفتح موضوع

خلصنا جم شغله بشرق واحنا طالعين من المواقف جان يذكر سالفة صارلها اسبوعين ويقعد يتحلطم عليها وانا ماشي مو مشكله

رحنا جمعية الفيحاء شرينا جم شغله والحين بنرجع البيت جان يطلعلي بسالفة

يقولي انت ليش ما رحت درست بمصر وليش ما ادري شنو واشحقه داخل هالجامعه

خلصنا منها وانا كله انشالله وانشالله وحاضر

عاد وصلنا حق السالفة الي ضحكتني صج صج

يقولي ليش يايب مفتاح سيارتك ومفتاح البيت خو انت طالع معاي

قتله بس جذي يعني هذي اغراضي اذا بطلع مع اي احد اخذهم معاي

ويقعد يتحلطم ويحن ويحن جان اقوله خو شنو مضايقينك يعني ترا انا حاطهم بالدرج مو ماخذين مكان

ويقولي اي ليش اتييبهم يعني شحقه

بالله هالوالد شنو ارد عليه

ولا يقولي اخاف انت ما تبي تسوي زحمه على علاقة المفاتيح بالبيت علشان جذي ماخذهم

قتله خو ترا بحطهم بمخباتي خلاص خو مفاتيح ويبتهم شنو صار

لوووول جان يقعد ويزف وانت كله طالع وليش ماخذ مفاتيحك بالله صار شي بالبيت ويبون يطلعون سيارتك او يحركونها واشلون

يقولي يالله يالله رد علي مو انت اعلامي وتدرس اعلام يالله شفيك ساكت

وانا ميت ضحك والله مو قادر امسك نفسي واهوه معصب

قاعد اقوله شكو شكو هذا بهذا يعني شكو المفتاح بالإعلام

يقولي جب جب اقلب ويهك

لووووووووووووووووووووووووووووووووول والله ضحكني

عليه سوالف ما ادري من وين يطلعها احس رجل فلسفي يربط كل المواضيع في بعضها وبالنهايه ما تطلع معاه بنتيجه

ازالات حتى بالمسجد

ذاك اليوم طلعت مع مستر جوكليت

رحنا المكان العجيب ستار بكس قعدنا وشربنا

وصارلهم اسبوعين ما عندهم وايت موكا والله مو شي ترا

المهم قلنا خل نروح نصلي بالمسجد (اويلاه علينا بس )المهم

رحنا درعمنا نبي نتوضأ ولكن لكشت المفاجئة العظيمة

خو بالله عليكم مسجد حاطله مكان علشان المصلين يتوضون

ازالة ليش علما بأن مكان المغاسل صاير صوب مثل براحه محد يستخدمها لإن دار مدارها بيوت

وحتى لو يبون يستخدمونها ترا المساحه الي ماخذينها صغيره تكاد لا تذكر

يعني القانون صح يمشي على الجميع بس هذا مسجد يعني مو مخالف ذيج المخالفة الي تستحق هالإزالة

shawarmaT

لووول ما ادري اشفيني على الأكل

بس يالله بالكويت شنو عندنا غير اكل وتمشي وتلفزيون وانترنت

هذا مطعم اسمه شاورماتي بالجابرية

ذاك اليوم كنا انا وساد سمايل رايحين فرح ولا نمر على هذا بالغلط فغيرنا المشروع وقلنا ناكل منه

نادينا الحبيب قلناله بغينا المنيو قال ماكو لسه بالمطبعه

قلناله من متى انتوا فاتحين هالمطعم يقول من زمان بس اشلون للحين المنيو بالمطبعه

المهم قالنا شنو عنده

والله خلطاته يديده اول مره اسمع عنها

فجربنا شورما دياي (دجاج لوول )مع مشروم بالجبنة

وخذينا شورما لحم مع روب ونعناع ويقول انها حارة

ورحنا القهوه قعدنا نشوف مباراة وناكل

والله بشكل عام الشاورما عاديه بس الشي اليديد ومخليها سبشل الخلطات الي عليها

والله ادري تقولون ديكاتي صاير بطيني هاليومين بس ما عليه محافظ على رشاقتي للحين

لووول والي خاطره يجرب خلطات يديده يروح حق هالمطعم ترا لا بأس فيه

كلية العلوم عالم مختلف

اليوم مثل ما انتوا عارفين

بداية الكورس الصيفي بالجامعه

وانا ويا بختي ويا ويل حالي يعني بصير فلته

جان اقوم واخذ مواد في كلية العلوم بالخالديه

طبعا الكليه لا توصف بالمره خو انا على ما دليتها ولقيت المواقف دار مخي

فقلت اخذلكم بعض الصور ونعلق عليها

لإني اليوم قمت امشي واكلم نفسي من هول المناظر الي شفتها

لووول هذي وحده من الأشياء الي لفتت انتباهي وانا قاعد ادور القاعه مالتي

انا لما قريتها شدني الفضول ولوعت الجبد ودي اشوف شنو داخل هالغرفه ودي استكشف

عبالكم ما حاولت لا طال عمركم انا ديكاتي وما يهزك ريح فتحت الباب ولكن طلع مقفول حسافه

ولا جان خذيت لكم صور عن قرب داخل هالغرفه الغامضه

طبعا ممرات الكلية كلها متروسه بأجهزه بأشكال والوان مختلفه

والله وين ما تمشون تشوفون اجهزه مقططه وثلاجات وما ادري شنو بلاوي

والمشكله كل الأجهزه مغبره وشكلها ما يوحي انها تشتغل

خو مو محتاجينها بيعوها أو عطوها حق الناس الي تستفيد منها مو مكودينهم بالممرات

الي يشوف هالمنظر يقول قاعد ايام الغزو مو بكليه العلوم

هذا الي ما يتسمى كان جدام القاعه او بالأحرا المختبر الي ناخذ محاضرتنا فيه

انا واقف ناطر الدكتور وقاعد اطالع هذا قاعد اقول

لو ينفجر الحين شنو راح يصير يعني خل اتخيل الموقف

هل يمديني ادش القاعه انخش عنه ولا ينفجر ويصير ديكاتي شهيد كلية العلوم

تبادرت الى ذهني الكثير من الأفكار الشيطانيه

إلى أن وصل الدكتور

دخلنا المختبر وطبعا انا اول شي كنت مسجل عند دكتورة ولكن صار ان الدكتورة قالت حق دكتورنا ان ياخذ جزء من الشعبه

والشغله الحلوه ان دكتورنا اهوه ابو الدكتورة الي كنت ماخذ عندها يحليلهم الأب وبنته في نفس القسم

الله يخليهم

المهم انا دشيت المختبر وشفت عجب العجاب(اليوم ديكاتي داوم بكلية العلوم بس مصطلحاته الأدبيه ابداع)اي والله

يعني شفت شغلات اول مره اشوفها

لوول هذا اجزاء تمثيليه للعظام لا انا اول ما شفتهم قاعد اجيسهم اطالع الملمس اشلونه

المشكله يمهم شي محطوط بغرشه ما ادري شنو هذا بس اكيد شي محنط

الدكتور قاعد وانا افتر على المختبر لإن ما كان في كراسي وناطرينهم اييبون الكراسي

لوول يا ولد هذا الجرجور الصغير

هذا يريور صغير هم حاطينه بسائل ما ادري شنو علشان لا يخيس

بس عيونه مو موجوده هقوتكم استئصلوها للتشريح ولاا اختفت بروحها

هذا زبيدي على ما اظن فيعني لا تحاتون يوم الي يغلون الأسعار

والمثلج ما اييبون منه راح نلجأ الي الزبيدي المحنط

يعني ماكو اي مشاكل انشالله بس اذا كليتوا وحاشكم انفلونزا السمك انا مالي شغل

مو خبركم هاليومين كل كائن حي صار عنده انفلونزا

زين ما يقولون باجر انفلونزا السيارات عادي يعني لا تستغربون

اهني مكاني يوم ييت اقعد ولا اشوف هالجهاز بعد

والله شنو هذا مختبر علم احياء ولا وكالة الفضاء ناسا

كل شي فيها وكل شي متوفر

والله هالكليه فيها بلاوي محد يدري عنها

انا بسأل عن شغله هل اهو لزوم ان كل مختبر علوم لازم يكون في مثل هالكرسي

يعني الكرسي هذا يساعدك على انك تفكر تفكير علمي ولا شنو

كل مختبرات العلوم الي مريت فيها من صغري لما تخرجت كلهم عندهم نفس هالكراسي شنو الموضوع يا جماعه

اهني لمحة صغيره على مختبر المعيدين

لوول شكله غرفة الممرضين بالمستشفى

على طاري الممرضين ترا اغلب الي يشتغلون بكلية العلوم يلبسون بالطو ابيض سواء دكتور معيد ولا عامل كلهم

هذا الجهاز الي عقدني صاير مثل لمبه ما ادري اشلون

هالجهاز وين ما تمشون بكلية العلوم تلقونه

كل ممر تلقون فيه اكثر من 2 ما ادري شنو استخدامه بس لاعت جبدي من كثر ما شفته

بعد ما خلصت محاضرتي قلت امر على الكافتيريا نشوف شنو فيها

والله شغلها عادي مو احسن من الآداب ولا التربية

اهني ماكو شي ملفت بس مالت البنات فيها كاريبو كافيه

وانا بسأل هل فيها وايرلس او لأ حق الي عنده خبر ؟

بس شغلهم منظم والجو حلو بس الي صدمني هالصورة الي تحت

لوول شورما من الصبح شنو اسود

انا اقول اشفيهم طلبة العلوم كله مفيخين ومالهم خلق شكله من هالشورما الي تقعد على الجبد

انا عندي اقتراح ليش ما يفتحون قهاوي بالكليات على الأقل الواحد يقعد يشرب جاي قهوه وشيشه حق الي يدخنون

مو احسن من ما يتعنى الطالب ويطلع من الكليه ويروح قهوه

مو خبركم اليوم كنت بروح قهوه دام الفراغ طويل بس زحمة الخالديه خلتني اتراجع عن قراري

الحين قلنا نبي نطلع من المواقف

بس حاشتنا مشكله صغيره

الحين الموقف صايره على شكل صفوف تدخل وتطلع من الجهة الثانيه

ولكن الطلبه العلميين الله يعيطهم العافيه يروحون صوب الطرف الثاني مال اطلعه ويوقفون سياييرهم ويخلونك غصب تجيور(يعني تلف فوق تحت)داخل مسافة ضيقه تجدم السياره وترجعها مليوم مره علشان تطلع

خو حاطين لكم مواقف ارضيه وكشخه وماكو شمس ليش ما توقفون سياييركم هناك

ادري اليوم او مو بس اليوم هاليومين صاير اقرق وايد بس اتمنى انكم مستمتعين

وتيتي مثل ما رحتي جيتي

والي يبي يملق اقوله لا اتعب نفسك جيتي ولا هوندا هههه

بس خلاص خلاص ما ادري اشفيني فصلت