مساكم الله بالخير
آه يا راسي آه
اشلونكم شخباركم
مبدئيا ديكاتي متعشي سلطه
معناته الله يستر بعد ساعتين شنو راح يصير
ههههههه
لا تسألوني ليش بس صارلي يومين مشتهي صمونة ربيان مع كتشب ومايونيز
شالخبار يالربع
ايييه يا ديكاتي اشلون يومك؟
والله يوم طويل
كان مستهل اليوم بالجامعة وبعدين كشتنا بالمحاضرة الثانية ورحت الوفره
عدد من الزميلات و أحد الشباب رايحين اهناك يبون يصورون
انا طلعت وراهم
طريج من الديره لما الوفره يبووووي شطوله
مليت وانا امشي
اشوه اني كنت مثبت على الكاميرات
وصلت اهناك ولا حد أم الوهقة الشباب
مو عارفين يفتحون الكامره مالت القسم
والكامره الي معاهم كان عليها عدسة زوم وحده
وطلعنا العده وضبطنا كل شي وسوينا مقابلاتنا
والشغل كان وايد حلو
وصلنا الحين نصور البعارين وجذي
والي يربونهم و يرعونهم
عاد رحنا مكان بعيد شوي ودخلنا
الله يخلي الهنادي والله وحش الصحراء
المهم رحنا حق واحد عنده خير
واستأذنا ورحب فينا
صورنا وجذي
بعدين شفنا ناقه قاعد ترضع الحوار
عاد خوش لقطه وقعدت اصور
بعدين انتقلت إلى تصوير الفيديو
المشكله ان الشمس كانت مو صج خصوصا مع الكسوف الي صاير
وانا قاعد احاول اصيد الحوار واهوه يشرب
المهم انا مو قاعد اشوف جدامي كل نظري على شاشة الكامره
شوي ولا شي يكفخ راسي كفخه سنعه
اححححححح
احححححح
شنو صار
جان يقولونلي ان الناقه طقتني براسها مادري عضتني
المهم مادري شسوت
استمريت اصور وجذي
شوي ولا احس في شي براسي
حطيتي ايدي ولا
اخخخخخخخخخخخخخخخ
لووووول للأمانه اول ما صارت الطقه كان الوضع عادي
بس لما شفت الدم جان اتصروع
لووووول
اهني عاد قمت احس بدوخه
وراسي صار ثقيل
اشوه أم شين من الناس عطتني ماي وعطتني صمونه
كنت بحاجة إلى إعادة تزويد بالطاقه
عاد ونطلع من الوفرة وخلصنا الحمدلله
رجعت لما رميثية ورحت المستوصف
الضحك إن كل ما اقول حق احد نطحتني ناقه يضحك
دخلت على الدكتور قالي شفيك
قتله نطحتني ناقة
قالي شنو؟
قتله بعير بعير
جان يقول اشلون وجذي
رحت حق مال على قولتهم الحقن
ويسوقني بذيج الإبرة يا سلااااااااااام
بعدين رحت حق الضماد
جيك على الجرح جان يقولي اشلون صار؟
قتله نطحني بعير
جان يقول يعني بعير تقصد واحد من ربعك بعير
ولا بعير بعير
قتله لا بعير بعير
وهم ضحك
لووووووول حسبي الله على ابليسكم
وها انا الحين بعد ما رجعت
نمت
وحلمت بالناقة الي نطحتني الله يسلمها
مو خوش نومه كلها بعارين
لما الحين انا ما فيني شي
الدكتور قال اذا حسيت بأي مضاعفات على طول ارجعلي
انشاء الله خير
وفعلا نطحة ناقة
