يهب هالتكنو وين وصلوا

من فترة شريتلي فلاش حجمه4

احلى ما فيه ان صغير وايد

لدرجه ان معلقه بالتلفون اهوه علاقه واهوه فلاش

لا وسريع بعد

على قولت جوكليت ايام قبل كنا نشتري هاردسك 4 جيجا بسعر وقدره

لا ونقسم هال4 بعد

والحين وصلنا 1000 وهم مو مكفينا

بس صج الي يحب هالسوالف الظريفه ترا خوش فلاش

وسعره 6 وكسور

الا شرايكم بعضلات صبعي

كنت توني شايل حديد مسوي تمارين حق صبعي علشان جذي الباي شاد ما عليه

واهم ما في الموضوع ان لونه وردي

اي وردي مو تقعدون تتحلطمون ما لقيت الا وردي خصوصا عبادي

ادري فيك انت شنو يفكني من لسانك

:)

laptops- tech*

مو خبركم هاليومين قاعد احوس عن لابتوبات وجذي

عندي جم شغله قلت خنسولف فيها

اول خبر

شركة سوني تسحب 440 الف جهاز لابتوب
vaio

والسبب مشاكل داخل الجهاز

موقع بي بي سي

وطبعا بتفاصيل الخبر يقولون ان الأجهزه الي من 2007 لما هالسنه كلها فيها نفس المشكله

ادري الي شروا منه ضاق خلقهم بس اقولكم شغله

اول شي هالمشكله ب48 دوله بس

يعني يمكن الكويت مو من ضمنهم

واذا صار ما صار الشركه غصبا عليهم يصلحون لكم الابتوب

يعني مو يضيق خلقكم لإني اعرف جم واحد شاري من هالنوعيه

---------------------------------------------------

شركة
dell

ولو اني ما احبها لإن لابتوبي منهم ومأذيني بس يالله

المهم منزلين لابتوب بطاريته تدوم 16 إلى 19 ساعه

ترا حده شي زين

انا بطاريتي 3 ساعات ومستانس

تخيلوا 19 ساعه تدرون شنو يعني ابداع

وهذا الموقع

وانا كنت قاعد مع الي يشتغل بمحل خالي مال الكمبيوتر قالي ان في جهاز راح يطلع بطاريته تشحنها بالشهر مره

ما ادري هل يقص علي ولا يبي يمشيها عالبراد ما ادري

بس انا ادري ان اهوه واحد يقرا ويطلع على الأخبار

انا دورت عن هالشغله ما حصلت

:)

------------------------------------------------------

وانا ادور بمحلات حولي

حصلت لابتوب سوني

اصدار ما اعتقد ان رسمي لإن مو موجود بالنت ولا على موقعهم

والشركه نفسها ما عندها من هالجهاز

بقولكم مواصفات الجهاز

ram 3 gb ddr3

6 mb cash

320 gb hard desk

13.1 screen,TTD screen ,128 up to 1gb

2,53 gh

1,5 kilo weight


الجهاز تحفه وصغير وايد وخفيف

والشاشه مالته مثل ما قلت تي تي دي

لو تحط كشاف وراك ما يبين اي انعكاس

سعره 699

بس ينخاف من الإصدارات الي مو رسميه

انشالله مو مضيع بمواصفات الجهاز بس هذا الي اذكره

احلام رمضانيه

مرحبا الساااااااااااااااااااااااااااع عالجميع

شخباركم شحالكم عساكم طيبين

يا محفوظين السلامه(شعنده ديكاتي صاير لسانه حلو اليوم)اي من صار رمضان وانا احلامي البريئة ما ادري اشلون صايره

قبل كنت احلم بأكشن بسالفه بقصه الحين لا سلامتكم ماكو شي من جذي

الحين صاير احلامي رمضانيه بحته

اهوه شي من الأثنين يا اني احلم اني قاعد اكل بمطعم او اني قاعد اكل بمكان عام

يعني بالحالتين قاعد اكل

و المشكله مو اهني الحين اوكي امنا بالله انا قاعد احلم اني اكل

المشكله اني اقوم من النوم احسن اني شبعان

لا ومره قمت من النوم جان اقول الحمدلله

لا ديكاتي تكفه ركز معاي شنو صاير

الظاهر رمضان تلف اخر عصبين بمخي

لا واليوم يعني طالع فيها حلمت اني انا وصاحبي ساد سمايل رايحين فش ماركت

لوول الحين طلبنا جان اييبون لنا بطاط مع ان لما رحنا صج ما حطولنا بطاط

بس الظاهر بالحلم كان طبق رمضاني

وانا قاعد اكل وللحين ما صار اذان ساد يقولي انطر خل يأذن اقوله عادي بطاط خفيف ما يأثر

بالله كلام هذا يعني

والمشكله اني مو من النوع الي اتسحر انا بس من فطور لفطور

بس احلى ما في الموضوع ان كل يوم اكل شي ما يهم

يا رب تستمر معاي هالأحلام لما نهاية رمضان

ورمضان كريم

----------------------------------------------


ذاك اليوم انا وساد رايحين حولي

دخلنا احد العماير او المجمعات وركبنا المصعد

ولا طاع شكاتبين


لوووول الظاهر الي كاتبها لاعت جبده

يمعود هذيل يدخنون اذكر لما كنا ساكنين بالصوابر

كنا نشوف اشياء بالمصعد يمه يمه لا تنشاف ولا تنقال

:)

وعكه تدوينيه

هاليومين حدي قاطع

بس الابتوب مسويلي افلام هنديه

انشالله هاليومين اخذلي واحد ثاني ونكمل سوالفنا

ادري ما تقدرون تقاطعوني بس تحملوا

:) ثقه ماشالله علي

انشالله مو مطول

نشوفكم على خير

انثوال+فطور+رطوبة مغبرة

اليوم انا وشقيقي ساد سمايل طلعنا الساعه 5 ونص

لإن كان مشروعنا نتفطر بمطعم فريج صويلح

المهم واحنا بالشارع الناس تمشي وما تدري الله وين قاطها

الي ينام على الثاني

والي طاق اشارة يمين وداش يسار

يعني الحاله مزرية تكون

فتناقشنا انا وساد عن هالإنثوال يعني صج الناس تضحك

ما ادري اشفيهم

فتوصلنا إلى الآتي

الصبح سبب الإنثوال إن يقولك قاعد من الصبح ودايخ

الضحى والله ما تريقنا والناس صايمه

الظهر الشمس حارة والجو ما ينبغى

العصر قمة اليوع والمخ مقفل

للحين وصلنا خير والناس تفطروا

بعدين

بعد المغرب سبب الإنثوال مكثر على الفطور

بليل شويه يقولك والله كثرنا حلو

بالله انا بعرف متى تصحون متى يكون مخكم واعي

والله الواحد صار لما يسوق برمضان يخاف على عمره من هالأوادم

خو ما ابي اتكلم عن الحاله قبل الفطور بربع ساعه

شي لا يوصف

---------------------------------------------

اليوم رحنا تفطرنا بمطعم فريج صويلح

اول ما وصلنا طبعا زحمه ونطرنا الدور

بس ما طولنا وايد بسرعه وصل دورنا

ما مداني اخذ صور لإن اليوع كافر

بس الحلو فيهم

ان ما عندهم الإختراع الي اسمه طاسه

شغلهم كله جذي

هذي الشوربه وسلطة روب وخيار

:)

-------------------------------------------------

اليوم الجو رطوبه قلنا مو مشكله

بعدين صار هوا

بعدها صار غبار

انزين يعني يا رطوبه او غبار

بس أثنينهم مع بعض بالله وين اصرفها هذي

يعني هل اقدر اسميه رطوبة مغبره ولا غبار مرطب

بصراحه ما ادري شنو التعبير للوضع هذا

بس الله يعين

وهااااااااات يا حساسية

وسلامتكم

الشايب ديكاتي وسوق الديره

هاليومين صاير شايب مقعد

ما عندي غير سوق الديره والمباركيه والقهوه الشعبيه

يا سلام شعور جميل ترا

يعقووبوو الكلام مو حقك ولا تقرا الموضوع لإن ما راح تنياز معاه لوووول اضحك معاك

:)

اليوم رحت انا مع العم بوحسين سوق الديره جود بغيت اشوفلي غتره ولا شماغ



لا ولما دقيت على ابوي قتله ترا انا رايح سوق الديره

جان يقول بصوت واطي هذا بصير شايب غصب

اي خو خلني اصير شايب والله الشيب وقار يقولك

وصلنا ونزلنا سوق المسقف او ناس يسمونه الغربللي

دخلنا محل الغتر وشفنا شنو اكو ما اكو

اهوه صج صيف وجذي بس كان في باالي لون احمر لإن راح يصير حلو مع لون الخام مال الدشداشه

المهم والله ما همني شي خذيت شماغ احمر بس خفيف من بروجيه

يا جماعه بروجيه عرفتوا هذا شركه عجلان واخوانه

:)

وبوحسين خذا مثل الشماغ مالي وغتره

خلصنا وتمشينا بالسوق شويه وخذيت صور من يمين ويسار

لا ولا يطوفكم الي ما شرا خام

شوفوا هذا ترا شكله مغري لوووول

حتى بالخامات طلعت فناتك



بعدين دخلنا سوق الديره بوحسين فصل يبي بوك

فرينا وشفنا سوالف والله كل الماركات موجوده وتقليد درجه اولى


وهذي ذكرتني بمسلسل الحياله

مسابيح وخواتم خواتم ومسابيح

الا منو قال وزار واختار اللون الي تبيه نحن نرضي كل الأذواق

لووول محد مرينا ولا سوق شرق خلك مع المنتج الكويتي

ديكاتي مو اول امس رايح الأفنيوز انت؟

احم لا لا هذا مو انا هذا واحد مقلدني

:)

نشوفكم على خير

مسلسلات رمضان 2008

اليوم الموضوع طالع من اعماق المخ

يعني لو اني مو صايم جان حطيت يمي قهوه فرنسيه وماي

وجنه مو لك سنكرز على جنب جذي

لووول

انا ما ابي افصل بالموضوع لإن وايد ناس كتبوا وشرحوا فيه

انا باخذ هالشغله من نظرتي الي ما تخورش الميه

مسلسلات رمضان هالسنه فيها نوع من الإبداع

اول شي او اكثر شي عجبني فيهم

ان وايد مسلسلات اتجهت إلى السيناريو والدراما التقليديه

او بشكل اوضح طرح المواضيع على النظام القديم ايام قبل

يعني عندنا مسسلسل الفنانة حياة الفهد في الدايه

فكرة حلوه وفيها نوع من التغيير ولو اني سمعت ناس انتقدوها على انها مقلده مسلسل مصري ولكن مو هامني المهم ان العمل يطلع بصورة زينه وتشد المشاهد

وعندكم مسلسل ظل الياسمين

ما شفته عدل ولكن لا بأس فيه

بعدين ايي البرنامج الي ساعات احسه مليق وثقيل دم

الي اهوه مال البلام وعبدالناصر دندرمه

لوول هالبرنامج اول ما شفته كان البلام اهوه الشايب وعبدالناصر اهوه الولد او الشباب

الحلقه الي بعدها عبدالناصر اهوه الشايب والبلام اهوه الشباب

يعني منوعين لكم علشان لا تملون

بصراحه هالنوعيه من المسلسلات او البرامج احس خلاص ما صار لها متابعين مثل قبل

يعني داوود حسين لما طلع بالسوالف هذي كانت مقبوله ولكن بعد فتره خلاص الناس ملت ما تبي شي مكرر

بعدين ايينا المسلسل الي اقدر اقول عنه صج اقوى مسلسل

الي اهووه حق الفنان الكبير عبدالحسين عبدالرضا مسلسل التنديل

السنه الي طافت كان منزل حبل الموده كان قمة الفشل وما احس ان يجذب متابعين

بس هالسنه طلع بمسلسل التنديل بشكل حلو جدا

والوحيد من بين المسلسلات الي خذت الطابع القديم مسلسل التنديل يتميز بالتصوير والأخراج الحلو والأكثر من رائع

ومن المميز ايضا مجموعة الفنانين الكبار الي طلعوا بالمسلسل هذا يعني علاوة على الفنان عبدالحسين عبدالرضا عندنا جاسم النبهان وابراهيم الحربي الي ما بغى يطلع بكركتر يديد و يعقوب عبدالله والقطري عبدالعزيز الجاسم ومجموعه كبيره بوزنها وادائها الفني

يعني هالسنه مستوى المسلسلات ارتفع عن ماكان عليه السنتين الي طافوا

ديكاتي يشهد عليها يا جماعه

:)


-----------------------------------------

من الأشياء الي تخلييني اضحك من قلب

برنامج عيني عينك

الي يقلدون فيه البرامج

والله صج صج برنامج ناجح

يعني يايبين الأشكال الي بقلدونها وحركاتهم يشكل ممتاز جدا

هذا بصوب ولا حلقة العجيرب لما يقلد خالد عبدالجليل كانت ابداع

بصراحه هالسنه تمام ماكو دوام والمسلسلات على كيف كيفك

خراابووه

ممم شكله العنوان غريب اليوم صح ؟

اليوم قررنا انا مع الوالد الله يحفظه نروح نفصل دشاديش

اي بعد خبركم قبل العيد بإسبوع مالكم محط ريل بالسوق

لا والخياطين اغلبهم مشغولين والي مو مشغول يرفع سعره لإن يدري انك مبعوص

المهم رحنا ونقينا هالخامات الزينه وقطيناهم عالخياط

وقال الأحد الياي يخلصون المهم خلصنا

ولازم دام احنا بسوق الديره نمر حلويات الوطن ولا الشمالي

نشتري من هالكيك والبسكوت والسوالف الطيبه

وكان معانا بالرحله عمي الله يسلمه

الحين اتييكم سالفة خرابوه

:)

طلعنا عالبحر لإن تأخرنا وحزة طلعة دوامات فأبوي قال اخذ البحر كله لما البيت

وانا عند الإشاره باخذ الفرعي يت يمي سيارة المهم خزيتها علشان لا تنام علي

جان يطمر الوالد لا تطالع بنااااااااااااااااات


لووووووول تكفه شكو بنات انا وين وانت وين الحين

طلعنا عالشارع الحين واحنا نمشي ولا تصف يمنا راعية اودي

جان الوالد يعطيك المقوله مالته

شواااااااااااااااااربك يا ديكاتي

لوووول انا اقول بقلبي منو صايم


شوي هم وقفنا عند اشاره ولا يشوفني قاعد اطالع المنظره الي بالنص

جان يقول ها شنو شكلك شفتلك شوفه

وطبعا عمي ميت ضحك علينا

المهم مشينا هم وقفنا عند اشاره ثانيه

جان ابوي يقولي عدل المنظره الي يمك

عدلتها لدرجه اني ما اشوف فيها

جان اقوله ليش

لووول يقولي بس بشوف الي بالسياره الي يمك

:)

انا بروحي خربان بعد ايي الحجي الوالد ويخربني زياده

ويقولون ديكاتي عوي اي ما تشوفون ابوي شسوي

لوووول والله ضحكني اليوم اشك ان خلا بالسالفة صيام


الظاهر اهوه مطبق صير صديق ولدك واهوه حاكها معاي

مع ان كنا انا معاه اليوم مصلين بالمسيد وقارين قرآن

وسمعنا الخطبه يعني كنا بقمة الإيمان بس ما يقدر لازم يخرب شويه

:)

ترا والله انا خوش ولد بس الي حواليني يخربوني

صباح الأفنيوز

اليوم قعدت الصبح عالساعه 8

وكنت قبلها حلمان اني قاعد ادابج بالأفنيوز

فقررت اني اروح

الساعه 9 ونص طلعت من البيت

في حركه ما احبها لما يكون جدامك سياره مثل هذي


والي قاعدين ورا يخزونك

خو اشتبون والله طول نزلت الدائري واهمه يخزون وانا اخزهم والله

وصلت 9 و40 ولا ماكو احد يا حلات المجمع

والله المواقف فاضيه وصخه وهدوء

عاد قلت ادري ان المحلات ما فتحوا بعد بس خل ادش

دخلت ولا العمال توهم داشين

والي ينظفون والي يوزع الجرايد

انا شفت مال الجرايد حسيت ان صج رايح مبجر انا

في ناس تمشي تسوي رياضه

حسيت ان العموم يضحك ويبتسم اليوم

حسيت براحه نفسيه

المهم صارت الساعه 10 ورحت الغانم قعدت اشوف جم شغله
الا هذا شعار يديد لهم توي اشوفه انا (اكس سايت)

بعدين رحت محلي المفضل سبريت


واستقبلني الفلبوني حتى قالي اسمه بس نسيته

اهوه شي قريب من ماريوز

:)
لوووول

المهم اول شي خذيت تي شيرت قلت خل اجربه

وبحكم ان ماكو احد معاي وانا احب اسأل ها شرايك حلو علي ولا لأ

فلبست وبطلت الباب شافني ماريوز قتله ها شرايك حلوه

جان يقول اي وايد حلوه عليك

بعدين خذيت قميص عاد هذا الي صج بدعت فيه

لبسته ووريته ماريوز قتله ها شرايك

لووول جان يقول

u have a nice sexy body

احم احم اللهم اني صائم اقول

اثقل اثقل يا صبي

لووووووووول عاد يضحك اهوه خوش واحد

لا وحنا نتمشى بالمحل قاعد يسولفلي عن برنامج الوطن فوضه ولا موضه

لووول قتله هذيل مينن وقاعدين ما عندهم شغل

جان يفصل من الضحك ويقولي السوالف الي تصير وجذي

بعدها خلصت خذيت ملابسي

وطبعا لازم اناجرهم كل مره

انا اشتري قطعه او قطعتين كل مره وكله يحطون لي جيس كبير

واناجر هذا اقوله خو ما عندك جيس اصغر خو انا مو شاري المحل كله

والله يعني مو شي جيس كبير يتخضخض باللي فيه

حلاته صغير مدلقم وملموم



وانا اتمشى في ناس يسوون رياضه

خو هذول بسرعه يبينون من جوتي الرياضه والمشيه العجيبه مالتهم

في وحده من اول ما دخلت المجمع شفتها واهي تمشي المشيه الرياضيه

وحاطه التلفون على اذونها هذا الكلام من الساعه 9 و45 تقريبا

صادفتها كذا مره وانا امشي واهي للحين ماسكه التلفون

لما الساعه 11 ونص وانا ياي بطلع من المجمع واهي للحين نفس المشيه

وللحين ماسكه التلفون شنو هالسالفه الي ماخلصت للحين

بغيت اسألها يعني هل هذا نوع من الرياضه انج تمشين وتمسكين التلفون ولا شنو

ادري ديكاتي انت شكو بس شغله تشد الواحد شسوي يعني

خربشات يهال (ما ادري اي جزء وصلت)المهم

امس خذيت اخوي الحلو بعد الفطور كان عندي جم مشوار

واحنا نتمشى جان يسألني سؤال عجيب

اخوي:ديكاتي الزقايرة تنشرب ولا تنوكل ؟

انا سمعت السؤال جان اغير الموضوع

شوي جان يرجع

اخوي:انزين ديكاتي الحين الزقاير تعتبر من الحلويات ولا موالح ؟

ههه لا يا شيخ مقبلات وانت الصاج

يا بووووووووووووووووووووووووووي

تكفه شنو هالأسئله شطاري زقاير اليوم

جان يقول ما ادري من طلعنا وانا اشوف وايد ناس تدخن فقلت اسألك

قتله الواحد يبي يسأل يسأل سؤال عدل

انت فكر بسؤالك قبل لا تقوله بعدين اسأل

والله ساعات تطلع منه اسأله تخليني احتار ما ادري شنو ارد عليه

اخر شي لوعت جبده بالزقاير

اقوله هذي كلها مواد كيماويه وسم فيران وفليت وكل شي يلوع الجبد حطيته بالزقاره

لووول علشان ما يسألني عن هالشغله كلش


بس شرايكم اخوي مو فطين

:)

سوالف رمضان

اول امس تسحرنا انا وصاحبي ساد سمايل

خو الناس تتسحر خفايف وتحاول تاكل شي مو مالح وايد

وما تاكل شي يقعد على الجبد

بس انا وساد كسرنا هالقاعده كلها

لوووول

اول شي قلنا نبي ناكل شورما

رحنا شرينا شورما ما كثرنا خنت حيلي

خذينا 2 دياي و2 لحم

اوكي قلنا نرجع بيتهم ناكل احسن

واحنا بالطريج جان يدق ابو ساد يقوله ها تسحرت

جان يقوله اي انا وديكاتي اخذنا سحورنا ويايين البيت

قال انزين في بيتزا كامله تبونها

لوووول خو ساد ما يطوف قاله اي اي خلوها بالدوانيه احنا على وصول

أول ما وصلنا صار الهجوم الكاسح

مبطلين التلفزيون ومجابلين هالشيات الزينه

شورما دياي بروحها مالحه وفوقها بيتزا بعد شصير

لا عاد انا سويت خوش حركه

اول شي كليت الدياي بعدين كليت قطعة بيتزا بعدين اكلت اللحم وراها قطعتين بيتزا

لووووووووول يعني مسوي خلطه او حركه مع الويه

وبعدها لازم نخربط شويه :)


رجعت البيت وبس مجابل هالماي لإني ادري بعواقب هالأكل

بس ما نفع ثاني يوم قاعد واتحسب على ساد اقول بقلبي قص علينا هذا خلانا ناكل جذي والحين انا عطشان

بس يالله طافت على خير

انا اقول احسن شي انكم تخربطون على الفطور بس حاسبوا على السحور

:)

صج صايمين+ورق عنب

لما تشوفون منظر مثل هذا

وفي وضح النهار(حلوه وضح النهار صح ) اي

وبعز القايله

راح تعرفون ان هذول صج صايمين
لوول طريقة الدعمه ضحكتني لا وناطرين الدوريه بعد

يمعودين روحوا بيوتكم الشمس حاره

لوول يا حلو الشماته برمضان

------------------------------------

ادري راح العب بأعصابكم

بس شسوي قلت لازم احطلكم هالصور تمهيدا للفطور

لوول اليوم دشيت المطبخ ولا قاعد يسوون ورق عنب

وهذي الي اسمها ورووقه عنوبه لإنها وايد صغيره

ممم نسميها ميني ورق عنب

لووول ولا كوجيييك احسن



يا جماعة ورق عنب بالزيت والليمون

يا سلام كلها ساعات قليله

ونهجم على هالشي الزين

الي يبي اتنقصله قبل الفطور بنص ساعه ييبوا جدوركم وتعالوا


اهني صاير لونه فاتح لإني شغلت الفلاش لوول
الا سؤال فني ليش يحطون مغطة جدر فوقه لما يبون يطبخونه ؟

:)