خربشات يهال (ما ادري اي جزء وصلت)المهم

امس خذيت اخوي الحلو بعد الفطور كان عندي جم مشوار

واحنا نتمشى جان يسألني سؤال عجيب

اخوي:ديكاتي الزقايرة تنشرب ولا تنوكل ؟

انا سمعت السؤال جان اغير الموضوع

شوي جان يرجع

اخوي:انزين ديكاتي الحين الزقاير تعتبر من الحلويات ولا موالح ؟

ههه لا يا شيخ مقبلات وانت الصاج

يا بووووووووووووووووووووووووووي

تكفه شنو هالأسئله شطاري زقاير اليوم

جان يقول ما ادري من طلعنا وانا اشوف وايد ناس تدخن فقلت اسألك

قتله الواحد يبي يسأل يسأل سؤال عدل

انت فكر بسؤالك قبل لا تقوله بعدين اسأل

والله ساعات تطلع منه اسأله تخليني احتار ما ادري شنو ارد عليه

اخر شي لوعت جبده بالزقاير

اقوله هذي كلها مواد كيماويه وسم فيران وفليت وكل شي يلوع الجبد حطيته بالزقاره

لووول علشان ما يسألني عن هالشغله كلش


بس شرايكم اخوي مو فطين

:)

سوالف رمضان

اول امس تسحرنا انا وصاحبي ساد سمايل

خو الناس تتسحر خفايف وتحاول تاكل شي مو مالح وايد

وما تاكل شي يقعد على الجبد

بس انا وساد كسرنا هالقاعده كلها

لوووول

اول شي قلنا نبي ناكل شورما

رحنا شرينا شورما ما كثرنا خنت حيلي

خذينا 2 دياي و2 لحم

اوكي قلنا نرجع بيتهم ناكل احسن

واحنا بالطريج جان يدق ابو ساد يقوله ها تسحرت

جان يقوله اي انا وديكاتي اخذنا سحورنا ويايين البيت

قال انزين في بيتزا كامله تبونها

لوووول خو ساد ما يطوف قاله اي اي خلوها بالدوانيه احنا على وصول

أول ما وصلنا صار الهجوم الكاسح

مبطلين التلفزيون ومجابلين هالشيات الزينه

شورما دياي بروحها مالحه وفوقها بيتزا بعد شصير

لا عاد انا سويت خوش حركه

اول شي كليت الدياي بعدين كليت قطعة بيتزا بعدين اكلت اللحم وراها قطعتين بيتزا

لووووووووول يعني مسوي خلطه او حركه مع الويه

وبعدها لازم نخربط شويه :)


رجعت البيت وبس مجابل هالماي لإني ادري بعواقب هالأكل

بس ما نفع ثاني يوم قاعد واتحسب على ساد اقول بقلبي قص علينا هذا خلانا ناكل جذي والحين انا عطشان

بس يالله طافت على خير

انا اقول احسن شي انكم تخربطون على الفطور بس حاسبوا على السحور

:)

صج صايمين+ورق عنب

لما تشوفون منظر مثل هذا

وفي وضح النهار(حلوه وضح النهار صح ) اي

وبعز القايله

راح تعرفون ان هذول صج صايمين
لوول طريقة الدعمه ضحكتني لا وناطرين الدوريه بعد

يمعودين روحوا بيوتكم الشمس حاره

لوول يا حلو الشماته برمضان

------------------------------------

ادري راح العب بأعصابكم

بس شسوي قلت لازم احطلكم هالصور تمهيدا للفطور

لوول اليوم دشيت المطبخ ولا قاعد يسوون ورق عنب

وهذي الي اسمها ورووقه عنوبه لإنها وايد صغيره

ممم نسميها ميني ورق عنب

لووول ولا كوجيييك احسن



يا جماعة ورق عنب بالزيت والليمون

يا سلام كلها ساعات قليله

ونهجم على هالشي الزين

الي يبي اتنقصله قبل الفطور بنص ساعه ييبوا جدوركم وتعالوا


اهني صاير لونه فاتح لإني شغلت الفلاش لوول
الا سؤال فني ليش يحطون مغطة جدر فوقه لما يبون يطبخونه ؟

:)

اول صباح في رمضان

اليوم قعدت الفير صليت

ورجعت ابي انام ماكو نومه طبعا

وما نقدر نشرب ولا ناكل خلاص صارت الصجيه

لوول

فقلت خل اطلع اتمشى شوي

ويلبس ديكاتي الشورت وفنيلة المانيا (اهم شي)ويطلع من البيت

طبعا الدنيا ظلمه للحين الشوارع شبه فاضيه

وانا قاعد اتمشى على راحتي

و مبطل الدرايش لإن الجو كان حلو إلى رطب نسبيا

توجهت على البحر واذا بي انا وحيدا عند اشارة شوبيز

وافتحت الإشاره وكملنا إلى المرينا واناا داخل ولا راعي دوريه يجزاه خير

وقف وقف

اطالع ولا اشوه مو انا هذا راعي اللومينا الي يمي

المهم دخلت صوب فندق المرينا ونزلت من السياره اتمشى واشوف بعض الشباب الي يسبحون

والي يلعبون كره سلة

وطبعا لازم نشوف من المخابيل الي مطول على الأغاني منزل درايشه حسباله روميو واهوه قاعد يفكر بجولييت

لا والثاني قاعد يشرب زقاير بالعلن مو جنه اليوم رمضان

استغفر الله يعني هذا الي يفطر عمدا برمضان شنو هالضمير الميت الي عنده

وتمشيت وناخذ صور يمين ويسار ماكو شغل

طبعا شوي شوي قامت تفتح الدنيا والشمس تبي تشرق

وانا قاعد امشي على الحواجر الإسمنتيه هذول


بعدين رحت صوب الطراريد والقينا نظره

بصراحه الجو كان يشجع اني امشي من مكان لمكان


بعدين عاد حسيت ان قام الجو يصير رطب وحار اكثر

جان اركب السيارة واطق المكيف وامشي برجع

فدخلت صوب سينما السالمية القديمه

ولا البنك الوطني حاطين لهم خيمه رمضانيه حق افطار الصائم
عاد بعدها قلت دام شارع المطاعم قريب يمي خل اروح اطل طله

مو خبركم شارع المطاعم هذا الشارع الوحيد الي ما يصير فاضي على مدار اليوم

حتى بأول يوم رمضان دشيت ولا في جم واحد قاعد يدورون

لوول الظاهر قاعد يدورون مطعم مفتوح او شي

وكالعاده عمال النظافه قاعدين ينظفون ما خلفته ليلة الأمس

الظاهر الشباب سمعوا ان اليوم رمضان فقالوا خل ناكل حق اسبوع جدام

لوووووول


وانا راجع البيت(قبل لا اكتب البيت كنت كاتب الكويت الظاهر مضيع ديكاتي) و اذا بها شمس الصباح تبي تشرق

كان المنظر حلو

وصباحكم خير يا حلوين

وعلى طاري سالفة أمس لما فكرت اخذ اجازه تدوينيه خلاص سحبت الفكره

لإن انا بروحي ابي اتكلم واقول فالبلوق اهوه المكان الحلو حق هالسوالف

فإذا راح تلقوني اكتب سواء عندي شي او ما عندي ورمضان فرصه حلوه حق المواضيع الي مثل هذي

take care all

رمضان 2008

مبارك عليكم الشهر جميعا

وربي يعوده علينا وعليكم بالصحه والعافيه

رمضان جانا وافرحنا هووو

:)

مظاهر رمضانيه :

1- مسلسلات على مختلف الأذواق من كوميدي درامي ...الخ

2- القنوات تبلش تحط فواصل اعلانيه يديده و تغير الموسيقى مالت الدعايه

3- تبلش زحمة الشوارع من بعد الساعه 8 ونص

4- العشر الأوخر السينما تغلق ابوبها

5- انتشار الخيام الرمضانيه والسهر فيها لوقت متأخر

6- الناس تبلش الأكل الي يسمونه سحور وبعدها شيشه على أنغام الطرب الشرقي (هذا يعني رمضان)المهم

7- اشوه ان ماكو جامعه لإن بصراحه احس بعض البنات يستخفون برمضان العطر والمكياج يزيدون

8-الي يبي يبلش يشتري حق العيد خل يخلص شغله من الحين صدقوني

9- الي يقولي هذي فرصه برمضان حق الرجيم أقوله استريييييييييييييييييييييييييييييييييييح

:)

10- لا تكثرون موالح بالسحور ترا تتعبون ،السنه الي طافت املق يوم لما تسحرت مشويات لوول قعدت الصبح لساني طايح يمي من العطش

11- هالله هالله باللقيمات وصب القفشه وهالشيات الزينه

12- ما ادري ليش ديكاتي يفكر ياخذ اجازه تدوينيه(ابي رايكم بالنقطه هذي)لإن قمت احس ما عندي سالفه

13- شكرا لحسن متابعتكم

14- العفو

15- نشوفكم على خير

16- مع السلامة

17-باي

18- حطوا بالكم على عمركم

19-اففف تعبت

20 اخير وصلت العشرين

:)

fish market

في طلعه تفليصيه انا مع الشباب

الي اهمه مستر جولكيت وساد سمايل وبوحسين اند ولده المصون حسين

:)

في تخطيط سابق من جوكليت ان نبي نروح مطعم فيش ماركت

الي صوب الأبراج

طبعا المطعم بمعنى الكلمه حلو وخدمة ممتازه جدا

اول ما دخلنا نطلب المقبلات والشوربات واحنا عالطاوله

بعدين اييك الجرسون ياخذك حق مكان الي تختار في السمج وتوابعه

طبعا اول شي الربيان

بصراحه كان شي عجيب

وتختار ما بين مقلي او مشوي

احنا اخذنا ربيان بالبقصمات والعادي

المهم

رحنا صوب السمج ونزلنا 3 سمجات

نقرور وهامور واعتقد سبيطي

والسمج كان مشوي

اخترنا الي نبيه بعدين رجعنا طاولتنا شوي ولا توصل المقبلات


لووول شفنا سوالف عجيبه غريبه الي اكل خثاق والي اكل قبقب

يعني خربوها على الآخر

شوي جان يوصل الأكل

أول شي صار الهجوم على الربيان كان حده عجيب

والسمج طريقة الشوي مالته كانت حلوه بحيث ان ما يلزق ويكون مقطع عدل

بعدين وصلت العصاير الي اشكال والوان

لما خلصنا جان اصور صحن ساد سمايل الي كان مستنفر واهوه ياكل

:)

صج صج المطعم كان حلو

والستاف الي يشتغلون وايد ظريفين ويسولفون وكانوا حبوبين

بعدها طلعنا لازم نحلي هذا شي مهم

رحنا جيلاتو اتاليانو




لووول انا دشيت داخل عند الحلو الي قاعد يحط قاعد اصور وماخذ راحتي :)




هالبرد الزين



خلصنا الحين بنرجع بيوتنا

واحنا عند الإشاره ولا جوكليت يقولي

ديكاتي الي ورانا مو جنها الي الممثلة يلدا

قتله انا خابر عندها لكزس (مو خبركم شكثر اشوفها برميثيه)لوول

والشباب يتناقشون اذا اهي ولا لأ

اخر شي جان يطلع جنس لووووووووووول

الله ياخذه عريض زنده اكبر من راسي

وعباله حاط مكياج حلو يعني

الله يلوع جبده

الله يكافينا شر هالناس

وبهذا انتهت الرحله السعيده

وتقييم المطعم

85 %

صج يستاهل

mango koocheek

دام ان احنا بالصيف

وهذي فترة الفواكه بأشاكالها والوانها

طبعا المانجا شي اساسي

لما اتييك وحده مدلقمه

خصوصا اذا كانت حلوه وحامضه

الواحد يتلذذ فيها

انا طول عمري اشوف المنجا بالحجم هذا او اصغر شوي ولا اكبر

بس ذاك اليوم خالي يايب لنا مانجا شوفوا شكبرها


لووول هذي تاكل سحاره كامله يالله تحس بالطعم

عاد اهي صج صغيره بس تدرون شنو حاليه

انا اول ما اكلتها كحيت بغيت اشرق من كثر ما اهي حلوه

الا شرايكم بالزوليه الصوفيه لوووول

لوول يدتي تراهن على كل شي الا هالزوليه ما ادري اشتبي فيها

تحسسني اني قاعد بالبر :)

تقليد مره حلو

اليوم وانا قاعد مع صاحبنا ساد سمايل

نتشاور بأمور الحياة وما ذهب إليه حال الديره

جان يوريني فيديو واحد يقلد اصوات

يهب صج انه خطير مره

تناتيف

اليوم رحت حلقت وكنت مع العم بوحسين اند ولده المصون حسين

عاد واحنا نحلق ونسولف عن سوالف الشباب هاليومين

والي موقف شعره وما ادري شنو حاط والي صابغ

عاد خلصنا وتغير الموضوع وسالف تجر سالفة

خلصنا جان اشوف ولده حسينو ولا طالعوا شمسوي براسه
ويعه بلا ويعه شمسوي انت

لوووووول تكفه احنا قبل شوي شقاعد نقول شنو ما سمعتنا ولا مو معانا

الا شرايكم بالسوالف هذي ؟
:)
-----------------------------

رجعت البيت خذيت شور من بعد التحلوقه الجميله

وقعدنا ندابج بالإنترنت يمين ويسار

وسوالف

بعدها صار موعد اللعب

اي نعم ديكاتي قرر يلعب كره

كان اللعب الساعه 11 بملعب قهوه مشرف يونايتد

ملعب مو كبير وايد بس مجهز وشغل عدل

وصاير داخل قهوه

يعني ريحة الشيشه والشوي كلها صوبنا

عاد ديكاتي لياقته كانت ابداع

المشكله انا بدون شي اتعب بسرعه هالمره دخان شيشه شصير فيني

المهم وانا العب ودخنة الشيشه كل شوي تدش بخشمي

حضرتني الغنيه الي تقول

نسم علينا الهوا من مفرق الوادي

لوووووول

طبعا ادري اي هوا الي قاعد تتكلم عنه يا ديكاتي بس هذا الي طلع معاي

خلصنا لعب طبعا كان لي نصيب بتسجيل الاهداف

ورجعت البيت وكنت لا متغدي ولا متعشي

وصلت خذيت شور ويطلع ديكاتي مع فوطته وروب الساحر

وطيران عالثلاجه واشوف ذاك الجدر الي يلمع

وداخله مكرونه ما ادري مالت جم يوم

بس اليوع كافر

واحطه على نار هاديه واروح ابدل

وابطل النت شويتين وارجع حق الجدر ولا كل شي تمام والأوضاع مستتبه

طبعا ما صرت ذرب اليوم فخذيت الجدر كله معاي وصحن وحطيته يمي وشغلت التلفزيون

واحطلي واكل واطالع تلفزيون

لا شعوريا وبدون سابق انذار اكتشفت اني خلصت الجدر كله

مع انه كا ن في وايد

شنو معقوله هالكثر انا يوعان

الي كان بالجدر يكفي شخصين او حتى ثلاثه

المهم بالعافيه علي ومطرح ما يسري يمري

mini ketchup

هاااااااااااااي جميعا

اشلونكم شخباركم ادري اني قاطع نوعا ما

بس الروتين خربان وشوي مشغول مع مخدتي الي ماخذه اغلب التايم

بس انشالله نحاول نعدل من هالوضع

اليوم كنت زاير بيت أحد من الأهل

وانا اكل على الطاوله واسولف مع ولد خالتي لفت نظري هالكتشب

لوووول اول مره اشوف جذي صغير

يعني وايد صغير شدعوه خو

هذا ما ينفع حق كويتيين

احنا اذا ما تترس الشي الي بتاكله بالكتشب ولا ما تتلذذ فيه

عاد قعدت افكر لو طلبت بيتزا لارج هل هذا راح يوفي معاي ؟

سؤال محير ها

:)

بس فكره حلوه بصراحه وخصوصا حق المطاعم

علشان يطلع مع الطلب واحد من هالصغار احسن من ما يحط واحد كبير والف واحد يمسكه ويحط

ولا ساعات تلقونها عليها دهن ولا شي

هذي اصغر واوفر

واذا الزبون بغا بعد واحد يعطيه ويحسبه عليه

لووول هذا الي يبي يفتح عيون المطاعم على هالسالفه

خربشات يهال

لووول ادري من زمان ما نزلت خربشات

بس اليوم في خربشة صغيره كنت عيزان اكتبها

بس بعدين قررت اني اكتبها لإن الحلو اخوي قام يقط قطات مو صج على قولتهم

1

ذاك اليوم قاعدين نتغدى وكل من لاهي

خو انا اذا قاعد اكل ما اعرف احد والتلفون سايلنت

ولا الفتره الأخيره قمت اخليه بالغرفه علشان محد يزعجني

كليت بس حسيت ان يبيله دور ثاني

قمت بروح المطبخ احطلي بعد جان ابوي يقولي ييبلي معاك

بس لا تحطلي وايد بس ملاس او ملاسيين

وانا رايح جان يقول تدري حط ملاسين ونص

جان يطمر الملقوف اخوي الصغير

جان يقول : ديكاتي انا اقولك فرغ الجدر كله احسن

لوووووووووووووول الله وكيلكم ربع ساعه وانا اضحك

لوول قطها بطريقه مو طبيبعيه وابوي خو ما ابي اقول اشلون قلب ويهه


2

مره قاعد ما ادري شكنت اسوي

المهم ان ابوي انعجب بالشغله وياي يبي يمدحني

جان يقول انت اثبت اليوم انك ولدي

جان ايي الاخ الصغير ويقول حق ابوي

يبه يعني ديكاتي اسبوع الي طاف كان ولد الجيران والحين صار ولدك

وانا وابوي نطالعه اشتبي يعني
:)

3

أمس وانا قاعد ادور بالتلفزيون

فسألت الملقوف الصغير عن مسلسلات رمضان وجذي بحكم ان اهوه متابع

عاد دارت السوالف عن رمضان والصيام

وطبعا محتر مني لإني ما راح اداوم واهوه راح يقوم من الصبح

وطبعا ترقيعته جاهزه يقول اي انا احسن اقوم الصبح اصير نشيط واروح اتعلم

وانت ما تسوي شي غير تنام وتطالع تلفزيون

الي يسمع الحين اهوه بالعطله ما يسوي جذي

المهم جان اييني بالسؤال الي صج صج مو طبيعي

قال ديكاتي هالسنه العيد راح يكون بنص رمضان صح؟

يبوووووووووووووووووووووووووووووووووووووووووووووووووووووووووي

ولك تكفه وين مخك هذا وعمره 11

يا مخ

انا سمعت السؤال جان احقره واقوم

يقولي اشفيك قتله لا ماكو

جان يقولي خو رد علي

جان اصارخ عليه يا الغبييييييييييييييييييييي

وين مخك انت شنو هالسؤال اكو عيد بنص رمضان بالله

لووول جان يقول اي صح نسيت ان العيد لازم بعد ما يخلص رمضان

لا والله تو الناس تعبت عمرك

4

قبل شوي خلصنا عشى

ورحت غرفتي بطلت النت قاعد اشوف شكو ماكو

جان يدخل الحبيب قتله باجر الصبح يمكن اطلع تبي اتيي معاي

قالي اي خلاص وين بتروح

قتله عندي جم مشوار بالسالميه

جان اقوله روح نام مبجر مو تقعد الصبح تمد البرطم وتقعد وفيك نومه

جان يرد رد ابدع فيه

قال: انا اقوم الصبح عشر دقايق بعدين اصحصح واضحك عادي بس انت لما تقوم ويهك معفس وتمد براطمك جنك شيماء علي


اهوه قالها انا قمت اضحك على نفسي

والله ما ادري منو الكبير فينا انا ولا اهوه

الله كريم وانشالله ما يطلعلكم اخو السانه اطول منه

بس هم خوش ولد وظريف وينكت على الأقل في احد اتناجر معاه بالبيت


:)

خسوف القمر

اليوم كان في خسوف جزئي للقمر بنسبة 81% تقريبا

طبعا كان واضح جدا ومن السهل ان تشوفونه

بدأ الخسوف من الساعه 10 و35 لما الساعه 1 و 44

طبعا هذا اخر خسوف جزئي راح نشوفه هالسنه

و بالنسبه حق هذي الظواهر في صلاة اسمها الآيات نصليها لما نشوف مثل هذي الأشياء

وهذي بعض الصور فيها بعض المراحل من الخسوف


بصراحة المنظر وايد وايد حلو

سبحان الله لما الإنسان يشوف شي جذي ما يقدر يقول شي غير انه يطالع

نلقاكم على خير

:)