خل نفحص الضغط-->يالله فوقه

اليوم المفروض انكم حفظتوها بعد

اليوم اليمعه يعني زوارة بيت يدتي

وانا صرت نشيط وقعدت 7 ونص رحت حق يدتي

طبعا عيال خالتي الظرفاء كانوا قاعدين

قعدنا نسولف وجذي لما العشر بعدين راحوا

فقعدت انا ويدتي وامي وخالتي

يدتي قالت والله احس تعبانه

قتلها يدتي ها يالله انييب العده

لووول جان تقولي يالله فوقه

جان اطالعا اقولها والله زين تعرفين فوقه

جان تقولي مو صج ها ؟

لووووووووول اهم شي يدتي دايرته مصطلحات فوقه ومو صج

الجده فاصله اليوم الظاهر السكر مأثر لوووووووووووووول

عاد جان اروح اييب جهاز الضغط والسكر

اول شي شفنا السكر طلع زين

بعدين احلى شي الضغط

طبعا من زود الحرص حاطتلها جهازين واحد العادي الي ينحط على الذراع
هذا مثل ما انتوا عارفين تضغطون على الكره لما تحسون ان خلاص صك على ايدكم

ولازم الوايرين مال الهوا والي يقيس النبض يكونون على الوريد

لوووول هذا تعلمته اليوم


والثاني على المعصم
أما هذا فتربطونه على الإيد وتطقون ستارت بعدين اهوه يبتدي يصك على الإيد لما يوصل إلى الوضع المناسب

لما خلاص تطلع النتيجه هم بشكل آلي يفتح عن الإيد بروحه

طبعا قزرتها عليه شويه لووول يدتي تقول بس عاد لا تخربه

طبعا انا كيفت على السالفة

اول شي شفت ضغط يدتي

خلصت منه جان اروح اشوف ضغط امي

خلصت بعدين قلت حق خالتي يالله وصل دورج

اخر شي قعدت اجرب على نفسي

والله شغل عدل

احلى شي لما يضغظ الحزام على الإيد تحسون بطقات القلب

وانا ما عندي شغل قاعد واجرب

لوووول يدتي تقول مو ناقص الا تشوف ضغط الخدامه بعد

اليوم كان ممتع بصراحه

:)

3bady

3bady

طبعا لا تقولون ما تعرفونه

بعد الكثير من الإنتظار

والفراره من مدونه إلى أخرى

والإكتفاء بالتعليقات على المواضيع

والمتابعه 24/7 للمدونات ما يطوفه موضوع(صك على وكالة رويترز)

وتلقاه اول واحد حاط تعليقه

اليوم يدشن(حشا سوق مركزي مو عبادي) عبادي مدونته

طبعا بإنتظار مواضيعه الي اتمنى تكون حلوه مثل تعليقاته على الصغيره والكبيره

هذا العنوان

puma :)

من فترة أمي قالتلي انها شرتلي جوتي وانتوا بكرامه

وان حطته بالكبت

المهم انا نسيت موضوعه وقلت خل اخلص صيفي بعدين اشوفه

عاد ذاك اليوم طرا على بالي جان اقول خل ابطله اشوفه اشلون صاير

بالبدايه كان شكله ظريف بس وايد فلات وانا ما احب جذي

حلاته يكون كبير شوي علشان ترتاح فيه

ولكن لفت نظري شي
قاعد اطالع هذا شنو بعد شنو هالفتحات احوس اطالع بالكرتون ولا حاطين مسامير
لا والدرنفيس معاهم بعد علشان لا يتعبونك

يعني ما ادري امي على اي اساس خذتلي هذا بس يالله شي يديد

حتى وانا صغير ما شريت جذي

لوووول شدعوه شدعوه شنو بروح اتهاوش انا بالجوتي ولا شنو

والله شكله مرعب

انا حتى ما جربت امشي فيه وانا مركب هذيل اخاف ازلق ولا شي

مشروع فاشل

بصراحه انا احب
nike

مريحين ودزايناتهم حلوه وعلى قولت جوكلت ما يزلق

songs tag

tagged by mo3ath

تحلطم: بالله انا وين وهالسوالف وين بس خوش شي ترا طريقه حلوه

اي وهذا ثاني تاق اسويه من اول مشواري البلوقري

وعموما آيبودي ضايع ولا جان سهل علينا المهمه وايد

فأنا فتحت فايل الأغاني العربيه وبسوي التاق عليه

لإن ملف الأغاني الإنجليزية في تقريبا 3500 اغنيه بصراحه وايد

فالعربي زين والله يستر :)

يالله بلشنا

: The Rules Are
1. Put Your iTunes/ music player on Shuffle



2. For each question, press the next button to get your answer



3. YOU MUST WRITE THAT SONG NAME DOWN NO MATTER WHAT!!! After you've answered all of the questions, tag 5 other people and then let them know they've been tagged to do them themselves :)

-----------------------------------------------

1.IF SOMEONE SAYS "IS THIS OKAY" YOU SAY?
أصالة - أكثر

2.WHAT WOULD BEST DESCRIBE YOUR PERSONALITY?
حاتم- يا طير

3.WHAT DO YOU LIKE IN A GUY/GIRL ?
حسام الرسام - أسير الروح

4. HOW DO YOU FEEL TODAY?
حمد العامري- تزعل

.5.WHAT IS YOUR LIFE'S PURPOSE?
رباب-مسافر


6.WHAT DO YOUR FRIENDS THINK OF YOU?

نبيل شعيل - ما اأروعك

7. WHAT DO YOU THINK OF YOUR PARENTS?
رهف(جيتاره)-ناديت

8.WHAT DO YOU THINK ABOUT VERY OFTEN?
سرين-لو بص في عيني

9.WHAT DO YOU THINK OF YOUR BEST FRIEND?
فرقة الشموع- الوطر

10.WHAT DO YOU THINK OF THE PERSON YOU LIKE?
فيروز - حبوا بعض

11.WHAT IS YOUR LIFE STORY?
صغيره جنت

12.WHAT DO YOU THINK WHEN YOU SEE THE PERSON YOU LIKE?
خالد سليم - عديل الروح

13.WHAT DO YOUR PARENTS THINK OF YOU?
مايا-روح

14. WHAT WILL YOU DANCE TO AT YOUR WEDDING?

علي بن محمد -ياطير يا شادي

15.WHAT WILL THEY PLAY AT YOUR FUNERAL?
خالة شكو

16.WHAT IS YOUR HOBBY/INTEREST؟
منى شداد-حكم البشر

17. WHAT IS YOUR BIGGEST SECRET?
ياسر حبيب- لماذا

18.WHAT DO YOU THINK OF YOUR FRIENDS?
مايا -احلم تمنى

19. WHAT SHOULD YOU POST THIS AS?
جيتاره-يا معذبن قلبي

20. WHAT DO YOU THINK OF YOURSELF?
أصالة-مابقاش أنا

i tag:

زوبعة شوماخر

mr.chocolate

ساخر كويتي

يعقووبوو

forzaq8

لووول بصراحه خوش خوش تاق لووول والله لما تقرا السؤال وتشوف اسم الغنيه تضحك على عمرك وساعات اقول ما ادري شكو اسم الإغنيه بالموضوع بس يالله كله يمشي

يسعد صباحكم

صباح الخير على الجميع

اليوم ديكاتي نشيط صاير خخخخخ

طبعا كالعاده البوست ماله موضوع بس قرقه عالسريع وعالصبح

اليوم قمت صليت الفير وييت برجع انام

نقلب يمين يسار فوق تحت اقلب الفراش بدل المخده ماكو نوم

بطل النت شويه ارجع طفه وحاول تنام لا ماكو فايده

رجعت بطلت النت احوس احوس ماكو شي جان اقعد اسمع اغاني ميتال عالصبح

قاعد بغرفتي والمكيف بارد وكل شي تمام

الظاهر على غفله اندمجت مع الأغاني والإزعاج وطولت عليه بدون ما احس

ما اشوف الا ابوي مدرعم علي

انت شعندك عالصبح قاعد تسمع هالميانين ازعجتنا

مع ان غرفتي وين واهوه وين يعني مسافه بعيده يخرب بيتك اشلون سمعت

انا بالدار يالله اسمع

لووول المهم قتله اوكي خلاص خلاص

المهم راح شوي وانا ضليت اسمع بس بعدين حسيت اني يعت

اطالع الساعه 5 ونص

قلت ها جنه مبجر للحين

فنطرت لما الساعه 6 عاد اهني طفح الكيل

بطلنا الثلاجه ماكو شي زين حق ريوق غير بيض وجبن

اهوه صج كان في اشياء مغريه مثل مجبوس لحم على شوية سلطه على سوالف زهره وبطاط

بس قلت هالأكل عالصبح راح يخليني افقد

فقررت اني اطلع اروح اييبلي ريوق

ركبت السياره وطبعا لازم الهندي بو لبس اصفر يصبح عليك

بعدها تحرك من البيت بعد ما تسمي بالرحمن

تمشي شويه وتبطل الراديو تشوف شنو في اخبار بالبلد

اول ما تحط محطه ولا حاطين اغنيه مالت ايام الخوالي لما كانت شرين تقول

أخبارك اييه حبيبي طمني عليك حبيبي

فقلت لا جذي ما ينفع الحين لازم ندزه نطقلنا قوطي آش

عاد الي يبي آش زين ترا مال قطعه 4 ماكو منه شغل عدل

انا وصلت ولا ماكو احد عنده الا انا وشايب

لووول شعور جميل لما تعيش دور الشياب تقوم من الصبح تروح تشتري ريوق

وبعدها رحنا حق الخباز واتييلك ذيج الخبزه المسمسه يا سلام

وطبعا الآش والخبز شريته من خردة السياره لإن البوك فاضي ومالي خلق اروح اسحب :)

عرفتوا الخرده متى فايدتها الحين لوووووول

ورجعت البيت وخذيت الجرايد وانا داخل

حطينا عدتنا وقعدنا جابلت الجريده واكل

صج اخبار تلوع الجبد عالصبح بس يالله ومالو كلو بالهوا سوى

وطبعا للحين ما فيني نوم

يمكن امر الجامعه ولو اني مالي خلق اروح

بس دام اني قاعد خل امر عليهم لإن شاك بشي وابي استفسر منهم وانشالله ما يسووون لي سوالف يمين يسار لإني مالي خلق

guess what!! it's samsung

شرايكم ها لووول


ترا هذا مو آي فون

لووووول هذا الله يسلمكم تلفون سامسونج

اليوم شفته عند ولد خالي وطبعا الجهازشاشه باللمس

بصراحه كشي اول مره اشوفه وايد حلو بس طبعا انا بعد الآي فون اقول ماكو احد ينافسه بصراحه

هذا الجهاز مبدئيا حلو ولكن اللمس يعني لما تبي تفتح شي نوعا ما بطيئ

يعني حركته تحس فيها تقطيع

والحلو ان اي لمسه تطقها تبي تفتح شي يعطيك هزه خفيفه

لا بأس بألوانه

الصوت ماله اسوأ جهاز سمعت صوته

ما عجبني كلش مع ان سامسونج معروفين بنقاء الصوت والصوره

ممم اخذت طله سريعه عليه احس ان معقدينه زياده عن اللزوم او يمكن لإني انا اول مره اجرب السامسونج

كامرته لا بأس فيها طبعا 5 ميغابكسل


وهذا لنك حق الي معلومات اكثر

الخانه الثامنه

اليوم المفروض يبلشون مشروع الخانه الثامنه

لأرقام الهواتف كلها

ولكن للحين ما شفت شي تغير

الي عنده خبر او تغير عنده شي يقولنا

وانزين هل الحين لازم اعدل كل الأرقام الي مخزنها بتلفوني

ترا وايد ويبيلهم قعده

والي وطنيه وزين تعال فجج يعني

وهم سؤال على السريع رقم الشرطه 777 راح يكون عليه تغيير ولا يظل نفسه .؟

الي يسمعني الحين كل يوم ادق عليهم لووول

والي يبي معلومات اكثر يقدر يشوف اهني

و اهني بعد

:)

ويك اند بالأميري

مساكم الله بالخير جميعا

اول شي لا تخافون مو انا بالمستشفى علشان اطمنكم

الله يسلمكم يدتي الله يطول يعمرها تعبت شوي ودخلناها المستشفى

فتقدرون تقولون الويك اند مطيح اهناك :)

الخميس كنت مواعد رفيجي نروح نتغدى ولكن دزلي مسج قالي ان بتأخر شوي

فقلت امر اشوف الأوضاع عند يدتي

اول ما دخلت عندها ولا حاطينها بغرفه عموميه

فقتلها متى تروحين غرفه خاصه قالت ما ادري روح كلمهم

رحت ولا على حظي الحلو ان في ناس توهم طالعين فقالتلي الممرضه بس ينظفون الغرفه وننقل الحجيه

رحت قلت حق يدتي جان تقولي يمه ديكاتي جان ييت من زمان جان حصلنا الغرفه مبجر

لووول فديتها حتى واهي مريضه تنكت

واليوم اليمعه هم نفس الشغله رحت سيرت عليها وقعدنا انا مع الخالات سوالف وضحك

ويدتي كل شوي مغيره الوضعيه مالت الفراش

اذا تبي تتكلم لها وضعيه واذا تبي تسمع لها وضعيه اذا تبي تاكل لها وضعيه

واحنا ما عندنا شغل غير ارفع ونزل

ترا صج وناسه عاد

المهم شوي ولا ولد خالي بيمشي جان يقولي تعال معاي بره

كلمني شوي ولا اشوف دكتورات ثنتين شحلاتهم بلبس الدكترة

عاد خلصت جان ادخل الغرفه مره ثانيه قلت حق امي لحقي لحقي شوفي الدكتوره شحلاتها الي بره

لووول انا قطيتها على غشمره ولا امي من صجها تطلع تشوف

رجعت جان تقولي مالت عليك ما عندك نظر مو حلوه

لووووووووول احس الي قاعدين معانا انصدموا شنو هذيل من صجهم

المهم شوي عاد خلاص مليت جان اييبون الغدا مال يدتي

الله ذكرنا بأيام قبل لما اييبون هالصندوق وتفتحه وكل شي فيه عيش وحلو ومرق وشوربه وسلطه

المهم كلت يدتي خلصت جان اخذ الورقه الي كاتبين فيها شنو حاطين لها

والعب فيها ما ادري شسوي :)

بعدين هم مليت شسوي شسوي جان اقعد اطل من الدريشه واشوف هالمنظر الخلاب

وشكله هالإسبوع بنطيح اهناك وايد والله وناسه بدال ما نقعد نحوس وندابج يمين يسار

والمليق بالأميري انك لما تصدع بالمصعد

لازم توقف عند كل دور

يعني احنا بالدور السابع فيعني المصعد وقف 7 مرات

ولما بتنزل نفس الشغله بعد

بس بصراحه ما جازفت وطقيتها بالدري لإن سبع ادوار وايد

واحنا يايين بنطلع لاحظت ان كل دور لونه غير

يعني وقفنا بالدور الرابع كان لونه اذا مو ناسي ازرق

والخامس وردي وهلم جرا

:)

مشوار وتناتيف

امس ابوي قالي احتمال ادق عليك الصبح اتيي تاخذني

المهم قلت يالله دام قال احتمال عيل اكيد ماراح يدق

الصبح وانا بعز نومتي جان يدق قلت وليييه عاد احد يدق من فير الله(مع ان الساعه 10 كانت)المهم

رديت جان يقولي تعال يالله

يعني بالمختصر الإتفاق كان اني اخذه من المكان الي اهوه فيه ونرجع البيت

المهم طلعت من البيت ورحت خذيته

جان يقولي اي دام احنا اهني خل نمر هالشركه وخنروح هالمحل

بعدين خنروح المنطقة الفلانيه وبعدين نصب بانزين

وبعدين ها تعال نروح الجمعيه

ودام الحين حزة غدا خل نشتري خبز

و اي دام نسينا نشتري لبن نمر الفرع

يعني اهوه كان مشوار واحد طلع تحت عشر مشاوير

اي خو ليش جذي

يا بابا يا حبيبي قولي بروح اهني واهني واهني واهناك وذاك الصوب

خو ماراح اقولك لأ بس مو تقولي بس ابيك تاخذني و تطلعلي عشر مشاوير وراها

بس اليوم بدع الوالد لوووووووووووووول

واحنا نمشي بالسيارة جان يقولي

ابوي:ديكاتي لو قررت تتزوج منو بتاخذ؟

ديكاتي: (يا لهوي الحئيييييني ياما ولك اهوه ما ضل ضغظ ما ضل شي ما ارتفع والويه يقط الوان )جان اقوله اشلون يعني لوول مسوي روحي ما ادري شسالفة

ابوي:يعني بتاخذ من الأهل ولا من برا الأهل ؟

ديكاتي : (طبعا وانا اقطع بالكلام ومتوتر ما ادري شقول)جان اقول لا يعني من الأهل زين على الأقل نعرفهم ويعرفونا

ابوي: اها يعني علشان جذي انت شايف احسن

ديكاتي:(وبكل ثقه ) اي نعم

ابوي: (اشتغل دور النصوح)زواج الاهل مو شي يمكن ما يصير نصيب وما تكملون واذا انفصلتوا تصير مشاكل ولا تنسى الجانب الوراثي ويمكن تطلع امراض او شي لا سمح الله فيعني فكر بالموضوع عدل



الحين بالله يا يبه يا عمري انت شايفني مال زواج انا

ولا عمري صك مليون علشان تبي تزوجني

ترا والله توني شباب خل استانس

لا شوفوا الكسره الي حسيت اني عطيته واحد صفر

يعني حتى لو كان مفكر يزوجني اعتقد بعد هالحركه راح يهون

لووول بعد هالموضوع بشوي جان اقوله يبه ابي هديه منك

قالي اشتبي بعد

قتله بلاي ستيشن 3 بس

لوووووووووووووول

احس ابوي قال بقلبه هذا صج مو كفو انا اكلمه عن زواج واهوه يبي بلاي ستيشن

ترا ديكاتي خوش ولد والله ما عليه سوالف بس كله فاهمينه غلط :)

حسن ومرقص

اليوم رحت مع صاحبي فلم حسن ومرقص

طبعا بالبدايه انا عبالي مرقص يايه من رقص(رقصني يا قدع)بس اكتشفت ان مرقص اسم شخص

بطولة عادل إمام وعمر الشريف

بصراحه الفلم وايد حلو احسه غير عن أفلام عادل إمام الثانيه

يعني الفكرة أو طريقة القصه غير وكانت ما تخلو من القالب الكوميدي

مضمون القصه كان عن علاقة المسلمين بالمسيح

واشلون قدروا ان يتوافقون مع بعض بطريقه حلوه وتضحك

صج بعد الإمتحانات كان يبيله فلم خفيف مثل هذا

والله ضحكت بما فيه الكفايه اليوم

وكنت رايح متعشي في مطعم بافالو قبلها

طبعا لازم اجنحة دياي بدون عظم مع الباربكيو وصلحوا

كان يوم متروس بالمشاوير صج من الصبح لما بليل بس استمتعنا

ولو اني اعتقد اليوم صادتني كامره سرعه

بس للحين مو مبين شي

انا اقول اذا صادتني خل تنزل واروح ادفعها قبل لا يطيح علينا عمي الوالد

ادري حدي ما تكلمت عن تفاصيل شنو سويت صارت سوالف بس تعبان

ويايلكم بخوش سالفه اليوم :)

why is 5roofa taking a break?

طبعا الكل ملاحظ الفترة الأخيره ابله خروفه صارت متعددة النشاطات

يعني اضافه إلى انها تكتب قصص

وتدرس

وتلعب

وتجمع خرفان

يعني هوايات متعددة ومتنوعه

الحين الكل مستغرب خرووفه ليش قالت تبي اجازه

طبعا الي متابعها عنده خبر انها قالت بتوقف فترة وبترجع

الخبر عندي وانا ديكاتي

خروفة الآن تقوم بتسجيل مشاهد فلمها الجديد

طبعا اهوه فلم اكشن رعب تقدرون تقولون

اسم الفلم:الخروف الأسود

طبعا مثل ما انتوا شايفين اسم الفلم اختارته ابله خروفه بعنايه علشان يكون ماشي مع القصه

طبعا ادري في منكم قاعد يقول اشلون ومتى وخروفه من متى قام تخطط تدخل هالمجال

الدليل موجود




هذا التريلر مال الفلم

لوووووول ادري واحد صفر بس الفلم عجبني

اول امره اشوف اكشن على خرفان

والله قويه يا جماعه

طبعا انا ناطر رد خروفه الي ماخذه اجازه

فإحتمال على ما ترجع راح اكون مزهب لها استجواب

لإن سوالفها اكثرت اسبوع الي طاف منزلة لعبه والحين فلم

الله يستر بعد جم يوم بشنو راح تطلع لنا

:)

2/8

يوم 2/8

ما اعتقد في احد عاش بالكويت سواء كويتي او غيره ما يذكر هاليوم

يوم2/8

الناس بدت يومها على شي ما كانوا متعودين عليه

يوم2/8

آبائنا واجدادنا قاموا من نومهم على صوت ظلم

يوم2/8

سما الكويت لبست السواد

يوم 2/8

صغير وكبير كل من قام بواجبه واكثر

يوم2/8

لما قالوا ان الرجال معادن هاليوم طلع معدن كل كويتي اصيل وطلع معدن كل من دافع عن أرضنا

يوم2/8

حريمنا ماكانوا الا سند وعون حق مقاومتنا ورفضنا للإحتلال

يوم2/8

خلونا نذكر باليوم هذا شنو سوينا
:)

بلشنا السوالف عاد يالله

تذكرون ايام الغزو لما كانت العايله قاعده كلها في بيت واحد

ولما كانت الدنيا بره صواريخ وطق واحنا قاعدين نشرب جاي وناكل مكسرات

تذكرون لما كان غدانا يا اموش (ربيان يابس) ولا معدس الله يا سلام

تذكرون لما كان الخبز الإيراني مالنا غنى عنه

تذكرون لما كنا نقعد فوق السطح نشوف بوعرقش شسوون ولا ساعات نحذف عليهم بطول بيبسي

اي والله عاد اذكر خالي كان عنده كورفيت كان بعز ايامه كنا نخمس انا معاه بس حرقووه بو عرقش ما خلونا نستانس فيه


تذكرون يوم بدا التحرير واشلون الكل قام يطلع من بيته وما همه لا عدو ولا سلاح

خنقتني العبره

ذكروتوني بأيام بطولاتي بمحافظة الرميثيه

ايييييه ايام الي ابوي كان عنده شوزن اطول مني مرتين قاعد ويرمي فيه الصعاليك الي بالمدرسه الي يمنا

ايام لما كنا بعز شبابنا كنا نروح ونوصل اكل وفلوس حق الجيران والي محتاجين

ايام كان جابر وسعد عز وفخر وسند (الله يرحمهم برحمته)اييه

هذي الذكرى ال18 حق هاليوم

وانا لما الذكرى ال50 وال 100 اذا الله عطاني عمر راح اظل اذكر هاليوم

مو معناته ان فتحنا الحدود وخلاص كل شي رجع

الي بالقلب يظل بالقلب

ياما فقدنا من اهلنا و الي يعزون علينا وراحوا اسرى محد درا عنهم

اليوم ديكاتي صاير حساس فديتني والله

ملاحظه:ايام الغزو يمكن كان عمري سنتين ونص لوووووووول للتوضيح فقط

وانتوا شنو صار معاكم شنو الاحداث الي شفتوها

أهاليكم شنو كانوا يسولفون لكم

والي عنده بطولات مثلي خل يقول

معاذ ادري عنك انت الي كانوا مسمينك بطل جبهة المنطقة العاشره

قولي شكنت تسوي عيش الدور على قولتك

والسلام مسك الختام