MY FIRST TAG

لووول اخيرا عرفت شنو يعني

tag

لوول وانا اقول اشفيهم الأوادم طايحين له تاجات

اثر السالفة ظريفة والله

لووول لا وانا اقول حق خروفه شنو يعني

tag

ولكن طلع مستر جوكليت هم مسوي واحد فقالي ادخل موقعي علشان تفهم شنو هذا

والله زين حاط شرح جيد

والحين راح ابلش لإن خروفه قالتلي

لوووووووووول وانا اكتب احس فيني ضحكه ما ادري ليش احس الموضوع غريب بس يالله

التاغ الأول (تاج-تاق)كل يدل على المعني

المهم التاغ الأول مال علاقة المفاتيح

انا دايما اشيل مفتاح سيارتي ومفاتيح البيت

على اليمين مفتاح السياره ترا مو كايين هذا مفتاح هوندايتي واللي على اليسار مثل محفظة مفاتيح بس من جلد اصلي امي عطتني هذي

وايد مريحه ما تسمعون خرخشة مفاتيح وشغلك منظم لوول طبعا اهمه 4 مفاتيح

مال الباب الي بره ومال الي داخل ومال غرفتي والرابع ما ادري مال شنو

التاغ الثاني والي المفروض لازم اذكر 6 شغلات عن اطباعي

عاد انا خوش ولد يعني علي حركات غبيه شوي بس ترا عادي سمبل على قولتهم

(1)

لما اقعد اكل غالبا احب يكون معاي احد ما احب اكل بروحي و اذا احد يبي يحطلي شي مو مشكله بس ان ياخذ من صحني اكفخه بالصحن لإن عيب ما يصير هذي حقوق ملكيه لإني وانا اكل كل قطعه بالصحن اتأمل اشلون راح اكلها فلما واحد ياخذها يخرب الخطه

(2)

ممم اتييلي فترات احب اقعد بروحي تدرون شنو اموت واحب على شي اسمه هدوء اخييه والله الهدوء شي عجيب صج احس ارتاح وحتى ساعات اطلع بروحي بس هذي ما تصير وايد الواحد يحتاج يقعد مع نفسه ساعات

(3)

لما اقعد بمطعم او بمكان عام اخذ راحتي غالبا سواء مكان كشخه ولا عادي المثل يقولك خلك على طبيعتك احسن من ما اصير ستايل وكول وما ادري شنو يبه فري كويت

(4)

ممم لما اطلع بروحي بالسياره احط آيبودي واسمع ميتال بس لما يركب معاي احد غالبا اغير او اطفيه لإن الناس ما تحب تسمع ازعاج اما انا ما عندي مشاكل بالعكس استانس واحد يقعد يصارخ لووول ولا اطول عليه بعد حتى الي يمي بالخط السريع يسمع صوت المسجل :)بس اذا وقفت عند زحمه او اشاره اقصر عليه

(5)

لما اروح اشتري ملابس تكون عندي خطه مسبقه يعني اقول ودي هالمره اشتري شي اسود او شي فاتح واروح اختار الأشياء الي في بالي مو من النوع الي اروح اشوف شنو في حلو واشتري

(6)

لوووول لما اتسبح احب الف فوطه على راسي واقعد لووول اي مو عبالكم شعري طويل ومكتكت لا يبه فلفولي شغل عدل بس احب احط فوطه جني علاء الدين .

ادري نص الشغلات الي قلتها مثل وخيتي خروفه بس لإن هذي اول مره اسوي تاغ انشالله مره ثانيه تكون احسن

ممم حاليا ما عندي احد اطلب منه يسوي تاغ لإن الي كنت بطلبهم خروفه ومستر جوكليت حاطينهم

انشالله التاغ الياي يكون احسن :)

مدونة زوبعة شوماخر

تحديث تحت
لووول امس وانا ادور وادعبس يمين ويسار

ولا اصيد مدونة توه مسوينها ما صارلها يومين

قلت يالله خل ندخل نشوف شنو اكو

لووول بيوم واحد 6 مواضيع

ياساتر شدعوه توه فاتح المدونه مداك تحط 6 مواضيع

بدايه قويه وسريعه وكلها تفاؤل انشالله ما يقطع عاد

دورت عن هالمواضيع ولا طلع صاحبنا يكتب بمنتديات وناقل جم موضوع

بس اهم شي انهم ملوته يعني مو بايقهم

والإسم والله ملفت للنظر ولا شرايكم

زوبعة شوماخر

الإسم حلو عجبني

بس انا قاعد اقول هذا اول يوم 6 مواضيع الله يستر باجر


وفي موضوعين لوول ضحكوني

يالله الله يزيد هالمدونات ملينا من هالسياسه والكلام الفاضي

بدايه قويه وسريعه وكلها تفاؤل انشالله ما يقطع عاد

نبي نضحك ونغير جو ولا شرايكم

عموما المدونه تستحق الزيارة

zawba3at-shoma5er

يا جماعه ترا بلوق زوبعة شوماخر مال بنيه مو ولد لووول خوش مفاجئه

الظاهر انها كانت مشتركه بالرابطه :)

عموما حياها الله بالبلوقز

مايكروويفيات:)

Amazing Microwave fun! - The best free videos are right here

انا من الناس الي ما احب الميكروويف يعني نادرا جدا استخدمه وحتى لو في شي ما يستوي الا بالمايكروويف ما اكله

احسه موشي والله وفي ناس ثلاث ارباع اكلهم كله يسوونه بالمايكروويف

اهوه بمجرد ما توقف يمه هذا يضر بالصحه فما بالكم تاكلون شي منه

أنا أعتقد ان اهوه مضر على المدى البعيد فنصيحه لا تكثرون في استخدامه

إضافة الخانة الثامنة لأرقام الهواتف

وزارة المواصلات ستبدأ بإضافة الخانة الثامنة إلى الأرقام في 8 / 8 / 2008م ، وذلك على النحو التالي

إضافة رقم ( 9 ) في بداية جميع أرقام شركة ( زين ) للإتصالات

.* إضافة رقم ( 6 ) في بداية جميع أرقام شركة ( الوطنية ) للإتصالات

.* إضافة رقم ( 2 ) في بداية جميع أرقام الهواتف الأرضية

.* إضافة رقم ( 1 ) في بداية جميع أرقام الهواتف التجارية

المصدر

فلسفات أب

اليوم وانا قاعد اطالع فلم بالغرفه دخل الوالد جان يقولي عندي جم مشوار تبي اتيي

انا فكرت اخاف اقوله لأ يقولي تقعد شتسوي فإمش معاي واذا قتله اي بيي يفر مخي بمشاويره

المهم في الحالتين سواء قلت بروح ولا لأ انا لازم اروح لإن راح يغصبني

اهوه بالبدايه يأمرني بلطف واذا قتله لأ يقولي قوم البس و لا تكثر كلام فانا اختصرت الموضوع

طلعنا وكالعاده ديكاتي يصير دراولهم عاش عاش

(ملاحظة :الوالد لما يقولي تعال وده يزف احد علشان جذي يقولي تعال معاي علشان يشخط فيني طول الطريج :)لوول )

طلعنا اول شي سقت بإيدين لإن اهوه ما يحب احد يسوق بإيد وحده وهذي طافت الحمدلله

اشوفه شغل المكيف حده ومخليه بارد اول مره يسوي جذي ولا العاده لما نطلع بعز الظهر والحر يقصر عليه يقول الي يطول عليه يصير مريض علشان جذي مو زين

واحنا نخيس حر بالسياره

الحين خلاص انا طقني البرد قتله مو جنه برد جان يقصر عليه ويقولي اي زين والله حسيت بالبرد خو انت ما تحس كله مشغل المكيف

معناته اهوه عناد مطول عليه وناطرني اقول برد علشان يفتح موضوع

خلصنا جم شغله بشرق واحنا طالعين من المواقف جان يذكر سالفة صارلها اسبوعين ويقعد يتحلطم عليها وانا ماشي مو مشكله

رحنا جمعية الفيحاء شرينا جم شغله والحين بنرجع البيت جان يطلعلي بسالفة

يقولي انت ليش ما رحت درست بمصر وليش ما ادري شنو واشحقه داخل هالجامعه

خلصنا منها وانا كله انشالله وانشالله وحاضر

عاد وصلنا حق السالفة الي ضحكتني صج صج

يقولي ليش يايب مفتاح سيارتك ومفتاح البيت خو انت طالع معاي

قتله بس جذي يعني هذي اغراضي اذا بطلع مع اي احد اخذهم معاي

ويقعد يتحلطم ويحن ويحن جان اقوله خو شنو مضايقينك يعني ترا انا حاطهم بالدرج مو ماخذين مكان

ويقولي اي ليش اتييبهم يعني شحقه

بالله هالوالد شنو ارد عليه

ولا يقولي اخاف انت ما تبي تسوي زحمه على علاقة المفاتيح بالبيت علشان جذي ماخذهم

قتله خو ترا بحطهم بمخباتي خلاص خو مفاتيح ويبتهم شنو صار

لوووول جان يقعد ويزف وانت كله طالع وليش ماخذ مفاتيحك بالله صار شي بالبيت ويبون يطلعون سيارتك او يحركونها واشلون

يقولي يالله يالله رد علي مو انت اعلامي وتدرس اعلام يالله شفيك ساكت

وانا ميت ضحك والله مو قادر امسك نفسي واهوه معصب

قاعد اقوله شكو شكو هذا بهذا يعني شكو المفتاح بالإعلام

يقولي جب جب اقلب ويهك

لووووووووووووووووووووووووووووووووول والله ضحكني

عليه سوالف ما ادري من وين يطلعها احس رجل فلسفي يربط كل المواضيع في بعضها وبالنهايه ما تطلع معاه بنتيجه

ازالات حتى بالمسجد

ذاك اليوم طلعت مع مستر جوكليت

رحنا المكان العجيب ستار بكس قعدنا وشربنا

وصارلهم اسبوعين ما عندهم وايت موكا والله مو شي ترا

المهم قلنا خل نروح نصلي بالمسجد (اويلاه علينا بس )المهم

رحنا درعمنا نبي نتوضأ ولكن لكشت المفاجئة العظيمة

خو بالله عليكم مسجد حاطله مكان علشان المصلين يتوضون

ازالة ليش علما بأن مكان المغاسل صاير صوب مثل براحه محد يستخدمها لإن دار مدارها بيوت

وحتى لو يبون يستخدمونها ترا المساحه الي ماخذينها صغيره تكاد لا تذكر

يعني القانون صح يمشي على الجميع بس هذا مسجد يعني مو مخالف ذيج المخالفة الي تستحق هالإزالة

shawarmaT

لووول ما ادري اشفيني على الأكل

بس يالله بالكويت شنو عندنا غير اكل وتمشي وتلفزيون وانترنت

هذا مطعم اسمه شاورماتي بالجابرية

ذاك اليوم كنا انا وساد سمايل رايحين فرح ولا نمر على هذا بالغلط فغيرنا المشروع وقلنا ناكل منه

نادينا الحبيب قلناله بغينا المنيو قال ماكو لسه بالمطبعه

قلناله من متى انتوا فاتحين هالمطعم يقول من زمان بس اشلون للحين المنيو بالمطبعه

المهم قالنا شنو عنده

والله خلطاته يديده اول مره اسمع عنها

فجربنا شورما دياي (دجاج لوول )مع مشروم بالجبنة

وخذينا شورما لحم مع روب ونعناع ويقول انها حارة

ورحنا القهوه قعدنا نشوف مباراة وناكل

والله بشكل عام الشاورما عاديه بس الشي اليديد ومخليها سبشل الخلطات الي عليها

والله ادري تقولون ديكاتي صاير بطيني هاليومين بس ما عليه محافظ على رشاقتي للحين

لووول والي خاطره يجرب خلطات يديده يروح حق هالمطعم ترا لا بأس فيه

كلية العلوم عالم مختلف

اليوم مثل ما انتوا عارفين

بداية الكورس الصيفي بالجامعه

وانا ويا بختي ويا ويل حالي يعني بصير فلته

جان اقوم واخذ مواد في كلية العلوم بالخالديه

طبعا الكليه لا توصف بالمره خو انا على ما دليتها ولقيت المواقف دار مخي

فقلت اخذلكم بعض الصور ونعلق عليها

لإني اليوم قمت امشي واكلم نفسي من هول المناظر الي شفتها

لووول هذي وحده من الأشياء الي لفتت انتباهي وانا قاعد ادور القاعه مالتي

انا لما قريتها شدني الفضول ولوعت الجبد ودي اشوف شنو داخل هالغرفه ودي استكشف

عبالكم ما حاولت لا طال عمركم انا ديكاتي وما يهزك ريح فتحت الباب ولكن طلع مقفول حسافه

ولا جان خذيت لكم صور عن قرب داخل هالغرفه الغامضه

طبعا ممرات الكلية كلها متروسه بأجهزه بأشكال والوان مختلفه

والله وين ما تمشون تشوفون اجهزه مقططه وثلاجات وما ادري شنو بلاوي

والمشكله كل الأجهزه مغبره وشكلها ما يوحي انها تشتغل

خو مو محتاجينها بيعوها أو عطوها حق الناس الي تستفيد منها مو مكودينهم بالممرات

الي يشوف هالمنظر يقول قاعد ايام الغزو مو بكليه العلوم

هذا الي ما يتسمى كان جدام القاعه او بالأحرا المختبر الي ناخذ محاضرتنا فيه

انا واقف ناطر الدكتور وقاعد اطالع هذا قاعد اقول

لو ينفجر الحين شنو راح يصير يعني خل اتخيل الموقف

هل يمديني ادش القاعه انخش عنه ولا ينفجر ويصير ديكاتي شهيد كلية العلوم

تبادرت الى ذهني الكثير من الأفكار الشيطانيه

إلى أن وصل الدكتور

دخلنا المختبر وطبعا انا اول شي كنت مسجل عند دكتورة ولكن صار ان الدكتورة قالت حق دكتورنا ان ياخذ جزء من الشعبه

والشغله الحلوه ان دكتورنا اهوه ابو الدكتورة الي كنت ماخذ عندها يحليلهم الأب وبنته في نفس القسم

الله يخليهم

المهم انا دشيت المختبر وشفت عجب العجاب(اليوم ديكاتي داوم بكلية العلوم بس مصطلحاته الأدبيه ابداع)اي والله

يعني شفت شغلات اول مره اشوفها

لوول هذا اجزاء تمثيليه للعظام لا انا اول ما شفتهم قاعد اجيسهم اطالع الملمس اشلونه

المشكله يمهم شي محطوط بغرشه ما ادري شنو هذا بس اكيد شي محنط

الدكتور قاعد وانا افتر على المختبر لإن ما كان في كراسي وناطرينهم اييبون الكراسي

لوول يا ولد هذا الجرجور الصغير

هذا يريور صغير هم حاطينه بسائل ما ادري شنو علشان لا يخيس

بس عيونه مو موجوده هقوتكم استئصلوها للتشريح ولاا اختفت بروحها

هذا زبيدي على ما اظن فيعني لا تحاتون يوم الي يغلون الأسعار

والمثلج ما اييبون منه راح نلجأ الي الزبيدي المحنط

يعني ماكو اي مشاكل انشالله بس اذا كليتوا وحاشكم انفلونزا السمك انا مالي شغل

مو خبركم هاليومين كل كائن حي صار عنده انفلونزا

زين ما يقولون باجر انفلونزا السيارات عادي يعني لا تستغربون

اهني مكاني يوم ييت اقعد ولا اشوف هالجهاز بعد

والله شنو هذا مختبر علم احياء ولا وكالة الفضاء ناسا

كل شي فيها وكل شي متوفر

والله هالكليه فيها بلاوي محد يدري عنها

انا بسأل عن شغله هل اهو لزوم ان كل مختبر علوم لازم يكون في مثل هالكرسي

يعني الكرسي هذا يساعدك على انك تفكر تفكير علمي ولا شنو

كل مختبرات العلوم الي مريت فيها من صغري لما تخرجت كلهم عندهم نفس هالكراسي شنو الموضوع يا جماعه

اهني لمحة صغيره على مختبر المعيدين

لوول شكله غرفة الممرضين بالمستشفى

على طاري الممرضين ترا اغلب الي يشتغلون بكلية العلوم يلبسون بالطو ابيض سواء دكتور معيد ولا عامل كلهم

هذا الجهاز الي عقدني صاير مثل لمبه ما ادري اشلون

هالجهاز وين ما تمشون بكلية العلوم تلقونه

كل ممر تلقون فيه اكثر من 2 ما ادري شنو استخدامه بس لاعت جبدي من كثر ما شفته

بعد ما خلصت محاضرتي قلت امر على الكافتيريا نشوف شنو فيها

والله شغلها عادي مو احسن من الآداب ولا التربية

اهني ماكو شي ملفت بس مالت البنات فيها كاريبو كافيه

وانا بسأل هل فيها وايرلس او لأ حق الي عنده خبر ؟

بس شغلهم منظم والجو حلو بس الي صدمني هالصورة الي تحت

لوول شورما من الصبح شنو اسود

انا اقول اشفيهم طلبة العلوم كله مفيخين ومالهم خلق شكله من هالشورما الي تقعد على الجبد

انا عندي اقتراح ليش ما يفتحون قهاوي بالكليات على الأقل الواحد يقعد يشرب جاي قهوه وشيشه حق الي يدخنون

مو احسن من ما يتعنى الطالب ويطلع من الكليه ويروح قهوه

مو خبركم اليوم كنت بروح قهوه دام الفراغ طويل بس زحمة الخالديه خلتني اتراجع عن قراري

الحين قلنا نبي نطلع من المواقف

بس حاشتنا مشكله صغيره

الحين الموقف صايره على شكل صفوف تدخل وتطلع من الجهة الثانيه

ولكن الطلبه العلميين الله يعيطهم العافيه يروحون صوب الطرف الثاني مال اطلعه ويوقفون سياييرهم ويخلونك غصب تجيور(يعني تلف فوق تحت)داخل مسافة ضيقه تجدم السياره وترجعها مليوم مره علشان تطلع

خو حاطين لكم مواقف ارضيه وكشخه وماكو شمس ليش ما توقفون سياييركم هناك

ادري اليوم او مو بس اليوم هاليومين صاير اقرق وايد بس اتمنى انكم مستمتعين

وتيتي مثل ما رحتي جيتي

والي يبي يملق اقوله لا اتعب نفسك جيتي ولا هوندا هههه

بس خلاص خلاص ما ادري اشفيني فصلت

real grand theft auto

لووول يعني مقلدين اللعبه

اهم شي العدادات الي فوق تتحرك مع الشخصيه لما يختار السلاح

في كذا فيديو بعد بموقع يوتيوب

بس هذا الي عجبني :)

طرارة غير شكل

اليوم خلصت من بيت الجده الله يحفظها ورحنا ستاربكس انا وساد سمايل ومستر جوكليت

عاد انا وساد وصلنا قبل جوكليت فشبكت شوي شفنا شنو اكو اخبار يمين يسار

وجوكليت للحين ما وصل فقلت حق ساد عاد انا يوعان مو متغدي عدل

جان يقول في subway

قتله يالله خل نروح ناخذلنا شي ناكله ونرجع

والله رحنا طلبنا صمونه فيها خلطهبيطه ما ضل شي ما حطينا فيها

ورجعنا ستاربكس

ومن قواة العين قاعدين بستاربكس مو طالبين منهم شي وقاعد ناكل من مطعم برا

المهم أكلنا خلصنا وصل جوكليت وطلبنا قهوه وقعدنا ندردش

ولا ايي واحد يسلم واشلونكم عساكم بخير

وانا اخوكم ويطلع بطاقته المهم

ويقول انا من الأردن وامي متوفيه وما ادري منو مات والثاني مريض وهذاك في شلل

يعني الظاهر صاحبنا ذبح العايله كلها

والغبي ساد سمايل هذاك عطاه بطاقته ما قرا شي غير اسم العايله

ولما عطاه الورقه الي كاتب فيها قصة حياته يقول ما قريت شي غر اسم امه

والله خربان ولدنا

المهم عاد قلت حق الشباب يا جماعه كل واحد يعطيه المقسوم وبس

دفعة بلا عن عمرنا شنسوي بعد

وهذا اهني راح حق الطاولة الي يمنا ودار على جم واحد

انزين بس بقول شغله على الطاير

يعني احنا بالكويت ديرة خير والكل يدري بالشغله هذي

يعني بدال لا تروح تمد ايدك حق الناس في بيت زكاة في لجان خيرية في وايد اماكن

هذي الأماكن ممكن انها توفرلك كل الي تحتاجه بقدر معقول وبدون ما تنزل نفسك حق الناس

وهذا المال الي قاعد تاخذه من بيت الزكاة أصلا من الناس الي حواليك يعني ماله داعي تسوي جذي

والمشكله احنا الكويتيين طيبين وعلى طول نعطي الفقير علشان جذي هالأشكال ممكن انها تستغل هالطيبه

يعني انا شفت شغلات جذي لما سافرت اييك واحد سيارة وهالله هالله

ويقولك محتاج فلوس واخر شي تلقاه بديسكو ولا يشرب سكربيل :)

بس بالكويت اول مره يصير معاي جذي

الله كريم

اضرب بالخمس

الخميس اهي يمعة الدوانيه يعني حق الرياييل الكبار وجذي

عاد انا وساد سمايل رحنا لإن ولد عمتي مسوي عشى ومستر جوكليت قالنا تعالوا

المهم رحنا اهناك قعدنا معاهم سوالف وجذي شوي ولا يرن تلفون ساد

ولا نتايجه طلعت فقالي خنروح نشوفهم ونرجع قتله اوكي

واحنا قايمين

جان ولد عمتي يقولي ديكاتي اتييب العشى معاك

قتله اوكي مو مشكله جان يعطيني 80 دينار

لوول انا قلت شدعوه شنو طالبين من الشيراتون ولا وين

انا قلت الحين طالبين بلاوي الي قاط علي 80

المهم رحنا شفنا نتايج ساد وبعدين قلنا نروح المطعم هاشم هاشم الي بحولي

مع ان طلبنا يخلص 9 ونص بس قلنا ليش نرجع البيت ناخذ الطلب مره وحده ونرجع

وصلنا دشيت المطعم جان اقوله في طلب بإسم فلان الفلاني

جان يطالعني هذا الي يشتغل ويضحك يقول انتوا شنو طالبين شنو مخلين

لووول جان اضحك واقول بقلبي اي من عذر ماعطيني 80

المهم قالي طلبكم ما خلص بعده ممكن تنطر شويه لإن طلبكم وايد

عاد قعدنا ندور انا وساد على الشارع نشوف الي رايحين ورادين

ملينا جان ندخل داخل المطعم ونأذيهم وساد ماسك هذا مال الطلبات وانا قاعد اشوفهم واهمه يسوون الأكل

عاد وانا احوس صوبهم

قاعد اشوف فلفل وطماط بأحجام مو طبيعيه لا يعني شدعوه هالكبر

شنو تبون توكلون عمالقة انتوا

لووول والله حتى انا سألت هذا الي يشتغل

هالفلفل والطماط ينوكل

جان يقولي اهوه في شي بالكويت ما ينوكل :)

بس يعني مو لهدرجه والله انا منصدم منه اول مره اشوف هالكبر

الحين خلص الطلب قلت بروح اشوف جم حسابه الي ماعطيني 80

اخر شي طلع الحساب 45 وانا اطالع اقول انزين شدعوه ماعطيني 80

خو حتى لو تبي تعطيني احتياط عطني 50 او 60

المهم خذينا الطلب وحطينا بالسيارة طبعا بالدبه

وهذا حطينا بالدبه وريحة السيارة الحين كلها مشاوي لوووول تقعد الصبح تدخل السيارة تشم ريحة اكل افففففف مو شي

عاد لما وصلنا البيت نادينا الصبيا يشلون الأكل من الدبه

انا ياي بقول حق واحد منهم لا تشيل العرايس

جان اقوله لا تشيل الفرايس والشمات ساد يقعد يضحك علي يقولي احمد ربك اني بس انا معاك

لو في احد ثاي جان مات عليك من الضحك على هالبدليه

لووول

:)

120!!

آه يا ال 120

اي مرحبا الساع عليكم جميعا

ادري بالفترة الأخيرة مواضيعي ما تنبلع كلش

وبصراحه انا لما نزلت الأشياء البايخه انا مو مقتنع فيهم اصلا

ولكن السبب كان تقني لدرجه كبيرة

شاشة الابتوب قامت تخرف تقط الوان وما ادري شنو

فما كنت مرتاح وانا قاعد اكتب مواضيعي

سامحونا يا جماعه ادري قمتوا تقولون اشفيه ديكاتي قام يكتب اي شي

بس لكم وعد مني ان المواضيع اليايه راح تكون ذات مستوى وتعجبكم

الحين خل اقولكم الفلم مع الشاشه

يوم من الأيام حاشني فايروس مع البوم اغاني كنت قاعد اسحبه

بس الحمايه صادته وتعاملت معاه بس بنفس اللحظه الشاشه قامت تقط الوان

طفيت الجهاز شغلته ماكو فايده

عاد قلت خل نخلص امتحانات ونروح نسوي هالعله

ذاك اليوم خططنا انا وساد سمايل نقوم الصبح على الساعه7 نروح نتريق ونقعد بالقهوه ونحرك على ال9 حق ورشة دل بالشويخ

المهم طبعا يومها انا معاه خامدين لما الساعه 7 ونص يعني انا ناطره يدق علي

ولا يطلع اهوه الي ناطرني ادق عليه

عاد وصل عندي ورحنا الطيباوي اول شي خذينا ريوقنا

لا تخافون ما تريقنا كنافة وزنود الست لا عنده فلافل خوش شي والله و الطحينه شغل عدل

ورحنا القهوه اكلنا وشربنا

وطبعا لازم نطلع بشي عجيب واهوه جاي بالمايه البيضة على قولت المصريين

شربنا هالجاي الي يقعد الراس على قولتهم ونطلقنا إلى شويخ

وصلنا شويخ الحين نبي مجمع صن سيتي

وطبعا بالبدايه ضيعنا شوي بس لقينا المكان ولا كشخه وشحلاته

تحس انك مو قاعد بشويخ

وفي وايد شركات داخل وشغلهم منظم وايد حلو

المهم دخلنا شركة دلdell

عاد ولا شايب يايب جهاز ويبي يفرمته قاعد اقول والله ما عنده سالفة اهني يفرمتون ب15 وبره ب5

المهم قتله ان المشكله بالشاشه وقاعد يشوف ويجيك ولا يقولي الكفالة خالصة

قتله اشلون انا كفالتي خابرها 3 سنين ولا تطلع سنه وحده

انزين بجم تسوونها وطبعا الحبيب شافها وما ادري شنو جان يقول لازم تبدلها ب 120

انا سمعت 120 جان احط الابتوب بالجنطه واقوله فمان الله

وطبعا ساد سمايل هم شاشته مختربه ما ادري شالقصه انا معاه مع هالشاشات

المهم ساد انصدم قال اذا انت 120عيل انا جم ونقعد نخطط نشتري لابتوبات يديده وجذي ونروح محلات ونسأل

فقلت خل اودي الاتبوب حق محل خالي المهم رحت عطيته الابتوب قالي خله اشوف واعطيك خبر

ثاني يوم دق علي قالي تعال اخذ جهازك خالص

انا عاد ما صدقت خبر جان اطير حولي واروح المحل قتله ها اشلون سويته

جان يقول بس عندك فيوز او شغله خربانه فلما تصير حارة الألوان تخترب وبدلها ب20

انا اهني قعدت اتحلطم هذا على طول قالي 120 واهني صلحتها ب 20 يعني فرق 100

عاد من زود الوناسه جان اقوله حطلي رامات 2 جيجا خربناها

والله الشاشه شحلاتها الحين جنها البخت ولا اقط 120 ولا شي

بيني وبينكم انا شركة دل ما احبها لإني جم مره اتناجر معاهم وكل الي يشتغلون مصاروه ونفسيتهم بخشمهم

يعني بصراحه ما ارتحت لهم واذا باخذ جهاز يديد ماراح يكون من دل

خو انا الي ضيق خلقي ان هذاك قالي 120 وانا ضايق خلقي 120 يعني هدية النجاح راحت علينا

لووول بس اشوه تداركنا الموضوع يعني حتى لو ما تصلحت 120حط عليها واشتري واحد يديد احسن

وخل شركة دل تنقع شاشتها وتعرف اشلون تتعامل مع زباينها مو بالبوق والأفلام

انا حتى اخاف احط لابتوبي عندهم يبوقون منه شي ما استبعد