موضوع بوتيت

يالله حيااا كيف الحال

ديكاتي صاير مو مضبوط ادري

ماكو بوستات مثل الناس والسوق نايم وماكو شي

حاليا انا بالقهوه ومعاذ مجابل ويهي

الله يستر على هالصبح شكله راح يكون مشئووم

ويييه و مستر جوكليت وصل بعد

ياااا الله

المهم

خخخخخخخخ

انا قاعد يمهم واحش فيهم

بس اشوه انهم ما راح يقرون الا لما يرجعون بيوتهم

عاد اقولكم

هاليومين طالعين طلعه بتلفونات النوكيا الصيني

واسعارهم طايحه بالأرض

يعني جهاز وشي زين يطلع عليك ب 45

ولكن

باالنهاية صيني يعني ماكو فايده

شوفوو هالجهاز العجيب صيني طبعا

المنيو نوكيا كامل

ولكن المسميات غبيه

لا وابشركم في تلفزيون بعد

لوووول ومن تحت تطلع الأريل

حشى مو تلفون

والله ما خلو شي عيال الصين

بس بالنهاية اذا الشي مو اصلي ما منه فايده

وما اانصح فيه كلش

:)

اي والله قال اريل قال

----------------------------------------

الا شرايكم بالجو امس

اخييييه كان بديع والله

غيوم وهوا وشمس وبرد

وانا لابس خفيف يعني طقطقت الا شوي

:)

وخذيت صور الي يازتلي

طبعا اهداء صغيررون حق ملاك

لوووول ملاك ما راح نخلص ترا انا اسوي اهداء وانتي تردين علي بإهداء ثاني

انزين لما متى عاد
:)

----------------------------------

امس وصلي ايميل من صوت الكويت

اهي حركه شبابيه معروفه

المهم كان عندهم عرض حق فلم اسمه"عندما تكلم الشعب"وايد حلو

امس حضرت الجزء الأول

والأثنين الياي الجزء الثاني

والأثنين الي بعده الجزء الثالث

بصراحه فلم وايد حلو اهوه سياسي نوعا ما

قاعد يتكلم عن مجلس الأمة والنواب والي قاعد يسوونه

بإسلوب مضحك ويشد المشاهد

طبعا الحضور كان لا بأس فيه

بس الكراسي مو مريحه لووول

ولكن كانت تجربه حلوه وايد

واعتقد اني راح اروح الجزئين اليايين اذا صار في مجال

:)

---------------------------

ترا عنوان الموضوع على ذوق معاذوو

قتله مليت من الأسامي ملوت المواضيع المنوعه

حطيت تناتيف و خربشات نبي شي يديد

كنت بكتب مقتطفات ولكن معاذ قال اكتب موضوع بوتيت

تنانيف- كاميرات السرعه!!

هذا الخبر امس قريته

واليوم واحد من الشباب اكد الموضوع

يعني خلاص ماكو كامرات مقلوبه صارت الكامره تصور من الجهتين

والله شكله اخر شي وزراة الداخليه بحطون صواريخ

علشان محد يفكر يدوس

بس للحين ما طبقوها على الكامرات بس شوي شوي راح يسوونها

يالله نطروا شويتين والشباب يطلعون لهم حل حق الموضوع

ما تخاااااااافي

:)

------------------------------------------

اليوم اول ما دخلت الكليه

كان في شي غريب

الي كان بالإداريه الصبح يمكن شاف الي انا شفته

اليوم شفت 5 إلى 7 بويات

طبعا كل ثنتين بروحهم

ما ادري شعندهم اول مره اشوفهم

تهقون عندهم هووشه

:)

لا في وحده لابسه نجديه لونها خطير

الله يكافينا الشر ويحفظ عيالنا

-------------------------------------------

امس بينما كنت اقرا خطاب الأمير بالنسبه لحل المجلس

والمشاكل الي قاعد تصير مؤخرا

حق الي يهتم بالموضوع

خل يقرا الخطاب وراح تلاحظون ان في رسالة الأمير الله يحفظه قاعد يوجهها

ما ادري انا لاحظت الكلمات المستخدمه والإسلوب حسيت بشي اعتقد اني فهمته

مممممم

وهم ال
BBC

خذوا الخطاب وحللوه

فيعني شي جيد شدني هالفتره

شرايكم نوقف موضوعات الأكل والضحك ونقلب سياسه

دام العموم يتكلم بالسياسه

:)

ترا انا قاعد اسولف لإن الغدا ما استوى للحين وابي اضيع التايم

المشكله بطلت الجدر طلع عيش ابيض فأكيد اليدام تحت العيش

طبعا العمه الشغاله واقف فوق راسي ما خلتني اتعبث واستكشف

هههههه

نشوفكم على خير

برجرز

مساااا الخير

اشلونكم شحالكم

:)

هي هي هي اليوم ديكاتي ناوي على شر

ويمكن البعض راح يطقني ما يندرا

بس لازم اعبر عن ما في جعبتي

اول شي

مطعم بلاك اند وايت سالم المبارك

هذا الفرع الجديد لهم

وطبعا انا ماعطي رأيي المطعم هذا من زمان

وبصراحه برجرهم صج صج عجيب

اول شي المطعم وايد وايد اكبر من مال المنطقه الحره

ودورين طبعا ولكن حاليا الدور الي فوق ما خلص

رحناله بالويك اند وكنت متوقع ان زحمه ولكن طلع صخه

بس شي مرتب وحلو وايد واهم شي ان قريب يمي

قبل كنا نشد الرحال لما المنطقه الحره علشان ناكل منه

وطبعا كالعاده صور من هنا وهناك

لوول اهني صوره ولكن على طريقة بلاك اند وايت


وهذي وجبتي الي استمتعت جدا فيها

والله لحمهم في نكهه حلوه ما تحصلها بأي مطعم

بصراحه مطعم من افضل المطاعم للبرجر

يتراوالي احسن من برجر هب

:)

------------------------------------------

لوووول الكل شاف صمونة برجر كنج اليديده

هالله هالله

اليوم رحت جربتها

بصراحه اهي كقطعة لحم ما فيها شي زود

ولكن نكهتها حلوه لإن حاطين معاها بيف او ما ادري شسمونه هذا

بس جيده لا بأس فيها

يعني اتوقع اني راح استغني عن الدبل ووبر بوجود هالوجبه

لووول وطبعا لما اكلت نص الصمونه قلت حق الشباب الي معاي

والله حجمها بالصج مو نفسها بالصوره

لوووووول هالإستنتاج طلع لإني حسيت اني ما شبعت

:)

سوالف ديكاتي ما تخلص

دام ان هالمطاعم تنزل اشياء يديده

الحمدلله من قررت اسوي رجيم وانا ماشي على خطى ثابتهه

اللهم لا حسد

لووووووووووووووووووووووووووول

نشوفكم على خير

خربشات ديكاتي

في احد ايام هذا الإسبوع المتروس من الشغل

والأعمال الشاقه مع النفاذ بحكم انك بجامعة الكويت الموقره

ذاك اليوم قعدت الصبح وخذيت شور وكل شي ماشي بامان الله خلصت اول محاضره ورحت شريتلي كتاب

فقلت ما ابي ارجع الجامعه

خل اروح المنطجه الحره اقعد بالقهوه واشرب شي واقرا كتابي

حلو الكلام

حزتها المووود كان اوكي وقاعد امشي واتحلطم على الي اشوفه لإن ماكو احد اقرق معاه

المهم وانا عند الجسر الأخير مال الغزالي صار زحمه

وجدامي راعية بورش كايين علييييها باااااااف

مو صج

يعني بين بفها وسقف السياره اقل من شبر

شدعوه عليج راسج تافخته هالكثر

عاد انا قاعد اتحطلم واعترف اني شقيتها بالتحلطم

ولكن الله ما يطق بعصا يا ديكاتي
هي هي هي

لووووووول المهم الحين صار يميني رصيف واهي على يساري

انا طفت بس بحركه لا اراديه كنت بشوف الباااف من الجنب لفيت ويهي بطالع

جان طق احوش الرصيف

قلت عادي يالله مو اول مره احوش رصيفف

ولكن جدام شويه صار شي مو زين
لوووووووووووووووووووول الله ما يطق بعصا ليش تحش بالبنيه شوف زين لك الحين

والساعه 11 وحر

ادق على الربع الي يمي ماكو االي محاضره والي ما يرد

وحش بروحي

واطلع العده واقعد اسويه

انا ما اقص عليكم صج طفرت

يعني من قعده هاديه واقرا كتاب واشرب شي

إلى تصليح تاير وحش بروووحي

لا وانا قاعد ارفع السياره وايي هندي وقف وراي قاعد يطالع

انا هم ما ايوز قاعد اتحلطم اقول بقلبي خو يا تساعدني يا تطس لا تطالعني جذي

لوول لما فكيت التاير وييت بركب السبير جان ايي

لاااااااا والله تو الناس

الحين قاعد اركب براغي التاير وهذا قاعد ينزل السياره ولا طربااااااااااااااااااااااخ

ما ادري شنو هالصوت المهم جان اخزه وانا واصل حدي واهوه يضحك

جان ازفه ومشيته

اي والله قهرني قاعد يضحك

بس هم رحت القهوه وبس قاعد ومجابل الماي حتى مالي نفس اقرا ولا اسوي شي

----------------------------------------------------
في اشاعه اطلقها بعض الشباب بالجامعه والي اشك بمصداقيتهم

ولكن اخر محاضره امس كان الموضوع المتداول بناءا على الإشاعه

ان الجامعه ما راح تسوي كورس صيفي لعجز بالميزانيه

عاد صج جذب العهده على الراوي

بس ترا مو شي احنا بروحنا متأخرين ترا

بس هم ما اعتقد شنو خو مو فوضه السالفه

------------------------------------------

لووول واستقاااااااااااااااااااااااالة الحكومه

يالله دخييييلك

ما مداهم

قبل شهرين مسوين حكومه يديده والحين استقالت

واحنا ما عندنا غير استقالوا وحلوا وانتخبوا ورشحوا

اقوووووول عمي اترس بطنك وجابل دراستك واطلع مع ربعك وخل هالسوالف عنك

اليوم احد النواب الموقرين حاط خبر بالجريده نرفزني بصراحه

انا بعلق مو قادر امسك نفسي والي فيها فيها

يا حبيييييييييييييييييييييييييييييييييييييييبي انت

الحين بناتنا مو قاعد يدرسون بجامعات ومعاهد ودكاتره يدرسونهم

انزين بالمدرسه الي يدرسون فيها ما في اداره ما في عمات عين

ثاني شغله حتى لو مسائي الصف مو اقل من 10 طالبات فيه يعني شنو بسوي

على طول مساءله حق الوزيره واستجواب يمكن بعد

وترا انت قاعد تتكلم عن مدرس مو صايع ولا هتلي يايبينه من الشارع

ناس تحر الواحد بصراحه

شنو الي يخليك ما تاخذ خط فيفا؟

مساااء الخير

اشلونكم شحالكم اخواني وخواتي

هيييه يابويا الزين خلانا

هههههههه والله انا الي شكلي بالخلي هالزين

اليوم قاعد مع خالي قاعد يقنعني اني اخذ خط فيفا

فقلت حق نفسي ليش ما اخذ

مع اني حجزت رقم واستلمته بس عطيته الوالد

المهم

انا بقول مميزات الفيفا الي يازتلي

اول شي الإنترنت مالهم سريع و24 ساعه شغال زي الفل

تعبي بعشرين تاخذ زياده 8 دنانير

يعني 28

اوكي

خدماتهم المتجدده دايما شي مو مسبوق لا من قبل زين ولا الوطنيه

خدمة التلفزيون اشتراك 3 دنانير بالشهر



ويشتغل بسرعه وما يعلق وما يحسب عليك اي قيمه اضافيه

طبعا ادري اني ما راح اجابل التلفزيون على تلفوني ولكن هذي شغلهه تنحسب لهم

مو ربعنا تشغل خدمة التلفزيون يحسب 60 فلس للدقيقه

الإرسال نوعا ما متعدل عن بدايتهم

اوكي الحين عندي كل هالأشياء الزينه

وطبعا في المزيد زالمزيد من الخدمات وغير الخصم مال المكالمات

شنو ابي اكثر من جذي فليش ما اخذ

مو احسن من زين الي طلعت فلوس من ديرتنا وتوسعوا وللحينهم ما سووا شي حق هالديره يذكر

الي عنده خط يقولي شنو عيوبه اذا كان في عيوب

والي ما عنده شنو الي يخليه ما ياخذله واحد

طبعا انا ما اختلف مع الي يقول الناس كلها تعرف رقمي هذا فليش اغيره

:)

PIZZA INN!!

من فترة طويلة

يعني فيها شهرين اذا مو اكثر

وصلني كذا ايميل من مطعم بيتزا انن

طبعا من فترة رحت لهم بسوق السالميه

ولكن ما كان مفتوح للحين

ما ادري شحقه شاقيني يإيميلاتهم عيل

المهم من يومين

في طلعه سريعه

قال مستر جوكليت يالله اقترح شنو نتعشى

فكنا قريبين من سوق السالميه

فطاح اختياري على بيتزا انن

المهم وصلنا المطعم كان فاضي ومساحته مو ذاك الكبر

قعدنا وطلبنا

يومها كان عرض واعتقد للحين مستمر

ان تاخذ بيتزا وتاخذ نفس حجمها مجانا

وهذا المنيو


وطبعا غير المقبلات الي خذيناها من خبز بالثوم و بيبروني ريبز او شي جذي

المهم واييكم التقرير

لوووووووول طبعا كل تقرير يطلع بعد ما اترس بطني كلش

اول شي خبز الثوم اطرافه يابسه نوعا ما حتى انا ما كملتها كلها بس اكل جزء واليابس اخليه

والبيبروني جبنتها ما كانت اوكي
مع ان جوكليت شكله يازتله :)

ادري طيحت حظ المطعم بس الحين اييكم الشي الزين

اخيييييييييييييييييييييييه

البيتزا كانت شي حلو جدا

اول شي العجينه خفيفه مع انا طلبناها سميكه ولكن خفتها حلوه

وثاني شي ما تغث كلش

يعني احنا اثنين اكلنا الثنتين وسط مع المقبلات

لووول علينا بالعافيه تفتفتفتف

يعني بيتزتهم وايد حلوه

والصوص مال البيبروني كان جدا حلو احسن من بيتزا هت الي لازم تقولهم يحطون اكسترا صوص علشان يبين الطعم

والبنهايه

يالنا المنيجر مالهم وقعد يسألنا عن جم شغله

وعطيناه ملاحظاتنا

ومثل ما تلاحظون الصحون والقفاش وغيرها بلاستيك

سألناه عن هالشغله قال لإن يمكن ناس تاخذ طلبهم بره يقعدون صوب تجمع المطاعم فجذي يمكن تضيع صحونهم

ولكن الحين خلاص سكروا التجمع الي يم المطعم فمن بعد اسبوع راح يكون كل شي زجاج وما إلى ذلك

وخذينا ورقة فيها اسئله حق تقييم

كانت الإجابات ايجابيه بصراحه لإن البيتزا حلوه

وبالأخير الحساب طلع 4.650

مممم على الي اكلناه لا بأس


والي يحب يجربه ترا بيتزتهم تستاهل

---------------------------------------

اخيييييه من زمان مو كاتب موضوع خاص بالأكل

والله الواحد يحس بمتعه واهوه يكتب

الأفكار تطلع من كل مكان اذا كان الشي يتعلق بالبطن

:)

نشوفكم على خير

الجو في ظرف ساعتين!!

صباح الخير

اليوم اول ما قعدت من النوم عطست 4 مرات

فقلت هذا شي مو طبيعي خصوصا مع تاريخي العريق مع الجيوب والحساسيه

المهم طليت على الجو بره ولا شحلاته

قلت الظاهر برد و السنسر مالي قام يخورها

طلعت وصلت الكلية واخذت لقظه لغيومي

:)

المهم وصلت ودشيت محاضرتي وكل شي امان

ما طولنا نص ساعه وطلعنا

اطالع الجو بره

اففففففففف هذا شنو شصار

توه الجو بديع شزينه




وعندي فراغ ساعتين

شتسوي يا ديكاتي شتسوي

اممممم

نروح القهوه ونشرب هالشاهي ونجابل النت

حتى اشعارا اخر

:)

سكرجيشن-وسيارة فاطمة جعفر

طبعا مآزرة لموضوع اخوي

الطائر الحنونو

لوول اهوه منزلل موضوع الكلاسات الخلط

واقروا باجي الموضوع

المهم انا عندي كلاسين خلط هالكورس

بصراحه انا مو متعود ادرس بمكان في بنات

وانا من طبعي احب اناقش واتكلم

ولكن بالكلاسين هذول الساني ينربط ما ادري ليش

اوكي انا بخلي كل شي تكلم عنه الطائر الحنونو

لإن اواجه نفس مشكلته

ولكن سؤال حق البنات

انتوا لما تدشون كلاس مختلط

خصوصا بجامعة الكويت

شنو شعوركم

هل تواجهون سالفة نستحي او نتردد

ولا الوضع عادي عندكم

خو امس ما ادري الي قبله

كنت بالكليه بروح سيارتي ولا وراي وحده معانا

ديكاتي وديكاتي مثبته امسي لما ينادينا الدكتور

احم هلا

اهي : انا معاك بكلاس الإداره

ديكاتي: اي يا هلا آمري ؟

اهي : بغيت الأوراق الي وزعها عليكم وبغيت من نوتك جم شغله

اهااااااااااااا جذي

يعني الحين البنات الي معاج ليش ما خذيتي منهم

انزين في شباب وايد شعندج لاحقتني هل شكلي يقول اني طيب يعني

طبعا كانت متوقعه اني راح اعطيها النوت و الاوراق ولكن كسرت فيها

قتلها اي خلاص اصورهم واييبهم المحاضره اليايه

بالله هذي شقول عنها

لا وتتبوسم ومبسوطه

وانا ضغطي وصل الف

-----------------------------------

اليوم ساد سمايل صاحبي داق علي

يقولي ديكاتي شفت سيارة تيوتا اليديده

قتله اي وحده

يقولي اسمها فاطمة جعفر

انا قاعد افكر شنو تيوتا يبون يسوون نفس سيارة حليمه يعني ولا شنو

جان اقوله اخاف برعاية فاطمة جعفر ولا فايزة بسياره

جان يقول لا ياخوي اسم السياره فاطمة جعفر


انا ولييييه شنو هذي بعد

ولا يقولي انت مو شايف
FJ

اي هذي اهي

يعني
FJ
اختصار فاطمة جعفر


لوووووووووووول ترا خوش شي والله

الله يقطع سوالفكم الدايخه هذي

بس صج ضحكني

منوعات ديكاتيه

مسااااا الخير

شو كيفكم شو اخباركم

لا تلوموني لإني وانا اكتب البوست حاطين مسلسل سوري بالتلفزيون

لك شوووووو ابن عميييييي

المهم

اول شي سوالف الدوام يايلكم فيها في بوست ثاني

لووول للحين قاعد اجمع الماده العلميه مالته

:)

اليوم يايبلكم مجموعة صور هزة كياني الضحوكي او الضحكوي

لوووول

اهني عندنا احد الاسواق او المراكز التجارية مراعي الإكونومك كرايسس

:) يهب ان اللغه مطفحه

احم يعني الكساد الإقتصادي وترا اهمه مراعين مشاعرنا واوضاعنا علشان جذي مسوين تنزيلات


والله يا عيالي انا كل الي شايفهم شقر ما قمنا نفررق بين الخليجيه او غيرها

بالله عاد كله شعر عاد خليجي ياباني امريكي كله شعر خو

لووول على قولة خالي انت اشلون تخلط الحابل بالنابل

اهني انا اسميه ما بين الحديث والقديم

اكل كرة مارس شغل عدل اند وراها جرعة من القهوه العربيه الشغل عدل هم

اهني نظرا لجمال الجو الفضيع امس

صورت جم صوره حق غرامي الغيوم والسما

وطبعا اهدااء حق وخيتي ملاك هالصور الزينه
يا جماعه ما صارت هالشوارفسكي

حطووه على السيايير قلنا يالله حطوه على حجابات قلنا موضه

اما ينحط على ثلاجات فهذا مو طبيعي

وكعادتنا كل جمعه نقعد بالدوانيه

نحن والربع

امس فصلوا الشباب يبون حلو

جان نروح كيك اند بيك

ونختار كيكه شي

لووول وطبعا لازم نتفلسف ونكتب عليها احرفنا

لوووول طبعا الأحرف اهي سلوم مستر جوكليت وبعدين
k
صاحبنا ساد

وبالنهايه ديكاتي


:)

وسلامة قلوبكم